Kanan Tamneira...
- Details
- Written by Taranieta
Antai ae Kakannato riki?
A titiraki imarenaia ana Reirei Iesu iaon kawaia nako Kaberenaum ba antai ae e kakannato riki?(Mark 9:33-37) Ma e kaeka Iesu nakoia ao man ana te teei ae e uarereke ao e kateia imataia n atonga ae aekan aei- ane e butimaea te ataei n aron aio n arau ao e butimaeai naba ao e butimaea naba teuare e kanakomaiai.
Ai tikiraoira ana manewe Iesu aikai ba E tuangira aron kakawakia ataei aika a uarereke. Iai naba ana taeka n te taina ae e kangai; tataro n ai aroia ataei aika a uarereke.
Tariu ao maneu, tataro n ai aroia ataei aika a uarereke riki n te bong aei ba aio bukina: te bong aio bon te kabanea ni bong imwain te Toa ae te Mannang. Te Toa aio e makena moanakin te Karemo are bon te katauraoi imwain butimaean kauringan maten ao manga utin Iesu n te Toa ae Bakate. N tain te Karemo naba ao ti riai n uringnga ba aio ana tai te Atua ni kabaroa ana KARATIA iaora ngaia are e bon riai ba ti na waaki inanon te maeu n tataro ae e onoti. E onoti ibukina ba ti na riai n karekea inanora te ingainga nakon te bai ae e boou, te bai ae e kamimi- bon ana bai n tangira te Atua nakoira ana Karatia.
N te bong aio ao ti a bane ni miakina te bai ae E na anganira te Atua inanon te Karatia aio. Tera ae ko kan karekea mai iroun te Atua? Tataro akinna n te bong aio ba uotam nakon te Toa ae Te Mannang.
Ti a okira ana taeka Iesu n te Evangkerio n te bong aei are E tuangira ba ti na butimaea te ataei ae e uarereke ma arona nako. Ti bia tataro ni katoa bongin te Karemo aio n ai aron te ataei ba ti aonga ni kona n kamangoriira raoi n ara taetae ni kawai ma te Atua ike ti na bubutia iai ana Karatia ae e tau ibukira inanon te ririki ae 2012.
Kam na kabaia tariu ao maneu ao E bia karaoiroira te Atua inanon ara mananga n tain te Karemo aio.
- Details
- Written by Uriam Timiti
Aikai bon ana taeka te karo are uota natina nakon Iesu ba e na kamaiuaki man aorakina ae bainaki iroun te riaboro. N nanoangan natina n arona ni bainikirinaki iroun te riaboro ma n uarerekena ao E butia Iesu ni kangai, "Ngkana iai te bae kona ni karaoaki ao an nanoangaira, buokira".
Ao e kaeka Iesu ni kangai, "E konai bai ni kabane ane onimaki". N ana reirei te Ekaretia ao ti tuangaki ba te onimaki bon bai ae ti inaomata ni butimaia ao boton te onimaki bon te kakoaua iroun Iesu Kristo ao iroun te Atua te Tama ae kanakoa Iesu nako aonteaba ba E na kamaiura. Karekean te teimatoa ao te rikirake inanon te onimaki e bon kainnanoa katongan ana Taeka te Uea ao te bubuti nakon te Atua ba E na karikirakea riki ara onimaki. Irarikin ana taeka te Atua, ti riai ni karaoi ara makuri ma te nanoanga ae aanaki n te kantaninga ao kakoauan te Ekaretia.
Tariu ao maneu teuana te reirei ae kakawaki ibukin karekean ana Kamaiu te Uea bon te onimaki. Ma tera ngkanne tibagnara ngaira taan karokoa ana kamaiu te Uea nakoia aoraki riki aika a bainaki iroun te riaboro? Bon titebo te bai ae kakawaki ba te onimaki iroun Iesu ao Teuare E kanakoa nakoira. Ti riai ni kona n onimakina makan Iesu iroura are ti kona iai ni kamaeua te aoraki. N aron ae kauringira Iakobo ao ti riai ni karaoi baai ni bane ibukin te Uea ao tiaki ibukin kamoamoakira. E na bon aki kona ni makuri makan te Atua ni katoki aoraki ngkana iai te kairiribai ke te bakantang irouia taan tataro ma te aoraki.
- Details
- Written by Uriam Timiti
E kauringira Iaokobo n ana reta n bong aio aron ana urubai te newe are kabotaua ma aekan te makaro n ai are kona ni kaurarakea te buakonikai ae bubura. Tariu ao maneu I taku ba ngkana ti karaua n tuoa raoi aron ara kekeiaki ni maiura ni kiritian ao ti na kakoaua aron te bai ae taekinna Iakobo ba e bon e kaeineti naba nakoira n tatabemanira. Ti na kakoaua ba bon aio raoi ba oin mamara teuana bon kabonan newera ibukin te riaboro ke te winnanti. A bon bati taai aika ti a tia ni kabonganai iai newera ibukin kabuakakakia raora ke ibukin kamoamoakira. Aio e bon kaeineti naba ma ana taeka Iesu are kangai; "E aki buakaka te bai ae rin inanon te aomata ma bon te bai are otinako mairouna.
E bia reke te reirei aio ba teuana kanoan ara motinnano n tain te karemo. Ti na butia te Uea ana buoka ba ti na kabonganai raoi newera ibukin neboana. Ba ngkana ti ongotaeka Irouna ao ti kakaraoa nanon te Atua ao ti riki ngkanne ba mimitongin te Atua i aonteba. N aron are kataua Iesu ba a nora mimitongina Betero, Ioane ao Iakobo n te maunga are Tabora ao bon nanon naba Iesu ibukira ba ti na uouota n taai nako otana ao raneaneana nakoia ake ti kaitibo ma ngaia. Ti na kawakinira n taai nako ba a na aki reke newera ba ana bai te riaboro ma a na riki ba bon ana bai Iesu n ti ngaia.
- Details
- Written by Uriam Timiti
Tera ana karea te Atua nakon te aomata ae te kabanea ni kakannato? N te bong aio inanon te tutia ao I a tabe n iangoa te titiraki aio n reitaki ma aron Iesu ae ti ongora n te ewangkerio ni kamaiua te tenakibaina. Ana moan kamaiu Iesu ae angan te aoraki aio bon kabaran ana bure. I taku tariu ao maneu ba aio aron kinakin ao anuan te Atua ae kan anganira ba ti na ataia.
Bon aio nanon ana taeka Ioane te Tia Babetito ngke e kangai; "Noria te Tibu te Tei". Ba ti bane ni bungiaki inanon te bure n riki ao bon aio te bai ae kamaenakoira ma te Atua n te moan tai. Ma te Atua are kororaoi ana Tangira E baireia ba E na kabaraira man ana tautaeka te bure inanon Natina ae Iesu are e riki n aomata ao E kaboira n Rarana ae moan te Tabu mai iaon ana kaibangaki. E oti ikai ngkanne ba akea riki ae kona ni kabarai ara bure ma bon ti te Atua. Inanon Iesu ngkanne ao ti a nora raoi te karea ae kororaoi ibukin kaiokara ma te Atua. E kaota arona n Atua nakoira Iesu inanon makana ni kabarai bure. Ti na karaba te Atua ibukin ana bai n tangira nakoira ae moan baan te kakannato are bon kabaran ara bure inanon Natina ae e riki ba te Tibu te Tei ae kamunai buren aonaba ni bane.
Tariu ao maneu ti a manga weteaki iroun Iesu ba ti na maiuna te i-kakabarabure ba aonga ni kabaraki ara bure. Bon aio ara karea ae moan te kakawaki ae ti kona n angan te Atua ba boon muin ana tangira ae kororaoi nakoira n tatabemanira. N tain te karemo ae nang roko ao ti a kauki nanora ni katotonga Iesu ni kabarai aia bure ara kairiribai riki ake a tia n urui nanora n te aro ae rangi n rawawata. Ti na butia te Atua ba e na unika koran "Eng" inanora ba ti aonga ni kakaraoa nanon te Uea inanon tain te karemo aio ao n ara tai ni kabane.
- Details
- Written by Uriam Timiti
Ai kamimira aron karekean te maiu ae akea tokina! Ba ti riai moa ni kabua maiura ibukin Iesu ao te ewangkerio. Ao ti na kanga ni kabua maiura ibukin Iesu. E taku Iesu ba ngkana ti kan rimuina ao ao ti na tabeka ara kaibangaki ao n iria.
E roko Iesu mai Karawa ba E na kaota nakoira te Tangira n Atua are ti anganaki n akea boona ba kaotan kororaoin Nanon te Atua ibukira. N te aro ba e na reke ni koaua iroura te Maiu ae Onraken te Maiu ao E kaota kawaira Iesu ae ti na toua ao ti na katotonga. Te kawai aio bon kawain te kaibangaki ae tangiria ba ti na kakeaira ao ni mate ni katinanikua are bon nanora ao ti na ira kawain te Tamnei ae Raoiroi. Bon aio nanon te kaibangaki ibukira ba aki karaoan ana kairiri te rabata ma bon karaoan nanon te Uea.
Tariu ao maneu ai kawara ngaira ngkana ti na kabua te maiu n Atua aio ibukin tangiran bain te maiu aio. Ai kawara ngaira ngkana ti kataua ba a na kabuaira bain aonteaba aio aika mamauna ibukin te maiu ae aki mamauna. N tokin te ewangkerio n te bong aio ao E taku Iesu nakoia te koraki;"Te koaua ae I tuang ngkamai ba iai tabeman mai ibuakomi aika a na aki katonga te mate i main noran te Uean te Atua n nakomai ma te maka". Ao tera ae nanonna Iesu ikai. Bon taekaia te koraki ake a rawa ni kan kitana kakukurein te maiu aei ao e a roko naba aia tai ni mate are a nang nora iai Iesu n roko inanon te maka ma te kakannanto.
Ti na kauki nanora nakon ana Taeka Iesu nakoira n te bong aio ao ti na tauraoi ni maiuna te kaibangaki ba bon ti ngaia ae ti na kamaiuaki iai. Are nanona ngkanne ba tiaki ti te onimaki ae ti kamaiuaki iai ma e na riai n raonaki n taai nako ma te makuri.