Kanan Tamneira...
- Details
- Written by Uriam Timiti
Aio bon ana titiraki Iesu nakoia ana abotoro ngke a tabe n nakonako ni kawara te kawa ae Kaitarea Biribi. Ma ti kakoaua naba ba bon aio naba ana titiraki Iesu nakoira ngaira aika ti a maan n iriria ao n taku ba ti kina raoi Iesu. E kamimi ana kaeka Betero ba e kangai; "Bon te Messia". Aio aron naba kinakin Iesu iroun Ioane te Tia Babetito ngke e kangai; "Ao aio te Tibu Tetei".
I taku ba e bon rangi ni kakawaki naba iroura ngkai ba ti na titirakinira ba antai Iesu. Ngkana ti kina raoi Iesu n aron ae kabarabara Betero ao Ioane te Tia Babetito ao ti na bon ota raoi n aron ana Tangira te Atua ibukira ni kabane ao te banna ae E tangiria Iesu ba ti na katotonga ba ti aonga ni bane ni kamaiuaki. Iesu e bon rabatana ae ana Berita n tangira te Atua ba ti na kamaiuaki man te toronaki man te bure. Iesu bon rabatan ana tangira te Atua nakoira are ti a kona n noria ni matara ao ni namakinna. Iesu boni Ngaia are E riki ba te kabanea ni mangori ao are E anai rawawatan ara bure ni kabane iaon ana kaibangaki ba ti aonga ni kamaiuaki. Tariu ma maneu bon aio aron kinakin Iesu ae tangiria ba e na reke iroura inanon maiura i aonteaba- E akoi man nanoanga ao E tangiria ba ti na bane ni maeka irarikin Tamana i Karawa n aki totoki.
Ma ti na kanga n ota raoi n ana tangira te Atua aio ibukira? Te bai ae kakawaki bon te nanorinano n ataia ba ti ti kona ni kamaiuaki man ara makuri n tangira ao ana karatia te Atua. Ba te aomata ae nanorinano, ae aki nanona te kaubai n te maiu aio e na reke kaniwangana ae te Abanuea ae Karawa. N arora n reitaki ma tarira ao manera ao ti bon riai n aki kakaokoroa arora nakon ae mangori ke ae kaubai ba muina ti na kabuakakaki. Ti riai kina raoi ao ni kaota bannan Iesu ni maiura nakoia aomata n ana tangira ao ana nanoanga ae kororaoi.
- Details
- Written by Uriam Timiti
Teuana te kawai ae na kona n rikirake iai ara onimaki bon te tauraoi n ongora ao ni karaoa te makuri. Ba ngkana ti ti ongongora ao ti aki makuri ao ti riki ba kanga aekan te aomata ae ti tatara tamneina n tiromtaam ao n tabetai ao ti bon keweira ba ti taku ba a nakoraoi baai ni kabane ba ti ongora n ana taeka te Uea. I taku ba ngkana e reke iroura te aekaki aio ao ti na riai ni kina ba oin raoi ara kanganga bon te taningaroti. Ti a kauringaki ikai ba n te motikitaeka ao a na baireaki taekara mani makuri ae ti karaoi aika raraoi ao makuri naba aika a raraoi aika ti aki muitiakini ni karaoi. Ngkana ti teimatoa n riki ba taan ongora ao tan karaoa te makuri ao ngkanne ti na bon karaoiroaki ao man anganaki te kaniwanga ae moan te kakukurei iroun te Uea.
N te ewangkerio n te bong aio ao ti ongora aron te mataki are e uotaki nakon Iesu are manga kaoka ana noraba. Ao tera te bitaki ae reke nakon te aomata aio? Bon te kona n noria aomata ae kanga aron tarakia aroka. Tariu ma maneu ngkana ti kamaiuaki n ara noraba, tiaki ti ni matara ma n nanora naba ao ngkanne ti kona katonga aron mimitongin te Atua n ana karikibai ao ae kakawaki riki bon te kona n nora ubun Iesu inanon te mimitong i Karawa. Bon aio te bai ae baebaetia Itaia ni kakantaninga te tai are e na kona n nora kororaoin mimitongin matan te Atua ngkana e anganaki te kona n noraba.
Ti na bubutia te Atua ba ti na kona ni kabonganai matara ae E anganira ibukin noran mimitongin te Atua n ana karikibai ao ba e na kawakinira ba ti na aki kabonganai matara ibukin mataiakinan kaubain te aonaba ao riki baika a na kairira nakon te bure.
- Details
- Written by Uriam Timiti
N tabetai ao ti kata te Atua ba E na anganira taian kanikina ba ti aonga ni kakoaua. Are nanona ba ti kabongana rabakaura ma wanawanara ni karaua raoi ni rinanoi baai aika ti nori ao imuina ti a tiba kakoaua.
Ma ti kauringaki iroun Bauro n ana reta nakon Iakobo ba ti riai ni tauraoi ni butimaai taian kataki ma rawawata ba ngkana a kataki ara onimaki ao ti na kona n teimatoa ao ti na kororaoi n akea te bai ae ti kabaka iai. E tuangira naba Bauro ba e uarereke te wanawana iroura ao ti na tauraoi ni butia te Atua are E tauraoi n anganira n taai nako. Ba ngkana ti bubuti ma te onimaki n akea te nanououa ao ti na bon anganaki.
Tariu ao maneu I taku ba a riaon te maiti kakai aika ti a tia nori inanon maiura are ti a tia ni kakoaua iai kamimin ao makan te Atua. Ti riai n te tai aio n aki manga katotongia baritaio ake a butia Iesu ba E na angania taian kainikina ba aonga ni kakoaua. Ti na riai kina raoi te Atua n arona ba E maka ao E aki kona n rawa n anganira baika ti butia, ti ngkana a raoiroi ibukira. Bon ti te Atua ae ataia ba tera te kabanea n tamaroa ibukira. Ti na onimakinna ba E kororaoi ana tangira nakoira n taai nako. Ti riai naba ni baina te nanorinano ni kakoaua ba ti kainnanoa te Atua n taai nako ao a na bon akea ngaira ngkana akea te Atua. Ti na rikirake inanon onimakinan te Atua ngkana ti teimatoa ni kakaraoa ae Nanona ni maiura. Uan naba te onimaki ae kororaoi bon ataakina ba E maeka te Atua inanora ao kakoauana ba ti kona ni karaoi bai ni kabane n aran te Atua.
- Details
- Written by Uriam Timiti
Ti ongora n te ewangkerio n te bong aio aroia abotoro ngke a kaonakoaki iroun Iesu ibukin waeremwen aia iango n ota n te bai ae nanonna ngke E kangai; "Tarai ngkami ao kawakini ngkami bam kam na aki mane n aia iti ni kariki buraua (aia kewe) baritaio ao Erote". Ba iai te tabeaianga irouia Abotoro ngke a toka n te boti irarikin Iesu ma uotaia ae ti teaina te kariki ni buraua.
Aio bon reitan te wareboki n te bong are ngkoananoa are taekaia baritaio ni kauntaeka nakon Iesu ba E na angania te kanikina ba aonga ni kakoaua. Man n te bong aio ao ai bon taekaia Abotoro ake a maan n irira Iesu ao a waeremwen naba aia iango n onimaki ao n ota n te bai ae taekinna Iesu. Ba imuin noran kamaitan te ika ma te bwerena iroun Iesu ao a tuai naba Abotoro mani kakoaua ba ngkana a irira Iesu ao bon akea te bai ae a na riai n tabeaianga iai.
Te bai ae e a manga kauringira ikai Iesu bon taekan ara onimaki ba e na riai n rikirake ao ni matoa. Ao iteran maiura ae ti na riai ni karikirakea bon te teimatoa ao te nanomatoa ni kaitarai taian kaririaki. Inanon taian kaririaki ao ti na onimakina ana buoka te Atua nakoira ae tauraoi n taai nako n anganira, ti ngkana ti bubuti.
N ana koroboki Bauro nakoia I Roma ao e kabarabaraki ba e reke te onimaki man te kakauongo ke te bai ae ti tuangaki. Are nanona ngkanne ba te onimaki bon tiaki te rabakau ke wanawana ae ti karekea ma bon tauraoin nanora ni butimaea te bai ae ti tuangaki. Tariu ma maneu I taku ba ti a bon riai ni bubuti nakon te Atua ba e na anganira ana karea ae te onimaki ba boni ngaia ae na anganira te kona n ota n taai nako n Nanon te Atua ae tangiria ba ti na karaoia ni maiura.
- Details
- Written by Uriam Timiti
Aikai bon ana taeka te rebera nakon Iesu ba e kan kaitiakaki man aorakina. Ti nora aron te rebera n onimakina Iesu ba E kona ni karaoi baai ni kabane ngkai boni Ngaia te Atua. Ba tera nanon te Uea ibukira, riki ngkana ti taonaki n te rawawata ao te aoraki n aekan te rebera aio?
N ana taeka te rebera are kangai; "ngkana nanom te Uea..." ao ti nora te nano n titiraki iroun te rebera ba E na kanga raoi nanon te Uea ibukina. E kauringira St Teresa n Avilla ba E bon aki kona ni maninga taekara te Atua. Ba bai ni kabane i aonteaba a kona n aki koro bukiia ma te Atua ae te Uea i aon baai ni kabane e na aki kona n aki kakoroa bukin ana Taeka. E taku riki St Teresa n Avila ba inanon kamaiuana man te maraki ae korakora ao te aoraki ao e ongo banan Iesu nakoina ae kangai; "tai maku natiu ba Nna bon aki kona ni kitaniko..." Bon ana taeka Iesu aikai ae angan St Teresa te rau, te korakora, te ninikoria, ao te ota n te aro e a kona n nora bitan nanona ma tamneina iroun Iesu.
Tariu ma maneu n aiaron te rebera are e butia Iesu kaitiakana ao ti riai naba ni butia te Atua kaitiakara man ara bure aika rawawata ake a na kararoaira ma ana tangira te Uea. Ba te bai ae kakawaki n te tai aio bon onimakinan ana nanoanga te Atua n taai nako ibukira ao te bai ae ti kainnanoia bon ti te uki n nano n nakon te Uea ma te nanorinano ni butia ba e na kabarai ara bure ao ni kaitiakiira. Ba ngkana ti maiu inanon te itiaki n ana karatia te Atua ao ti na bon ira nanon St Bauro ngke e kauringia kain Korinto ba a na riai ni karaoi baai ni kabane ibukin neboan te Atua ao a na kataia ni kukureia aomata ni kabane inanon baai ni kabane aika karaoi ba aonga n riki ba katotongan Iesu Kristo ni koaua.