Kanan Tamneira...
- Details
- Written by Uriam Timiti
Wiki 11 Moanibong
Warekan te moani Boki ae taekaia Uea. 21: 1-16
Iai aban Nabota, are kain Ietireera, ba ana nne ni kurebe are kaan ma ana auti Akaba ae uean Tamaria. E tatae Akaba nakon Nabota ni kangai: “Anganai nnen am kurebe ba nnen au kai n amarake, ba e a boni kaan ma au auti, ao N na anganiko te nne ni kurebe ae raoiroi riki, ke ngkana nanom, ao N na anganiko te mane ba boona.” Ma e taku Nabota nakon Abakaba: “E na tukai te Atua ba N na aki anganiko abaia au bakatibu!” Ao e okira ana auti Akaba ma e rawawata ao te un i bukin te taeka arei. Ao e wene iaon ana kainiwene ao e tannako, ao e rawa n amarake. E roko buna ae Ietebera, ao e taku naoina: “E aera ngkai ko rawawata? Ao e aera ngkai ko rawa n amarake?” E kaeka ni kangai: “I a tia n taetae nakon Nabota ba N na kaboa nnen ana kainikurebe n te mane ke n te nne ni kurebe ae raoiroi riki, ao e rawa.” E taku buna ae Ietebera nakoina: “Teirake ao amarake, ao ke e kukurei nanom, N na anganiko nnen ana kurebe Nabota.”
Ao e koroi reta neierei, n aran Akaba ao e kanima iai ana kanikina te uea, ao e kanakoi nakoia unimane ma toka ake a maeka i rarikin Nabota. E kangai kanoan reta akekei: ‘Kam na tua te aki mamatam, ao katea Nabota i mataia aomata; karekeia uoman aomata aika buakaka ba a na kaitara ma ni bukinna ni kangai: ‘Ko taetaebuakaea te Atua ma te uea.’ Ao kam na katikia nako ni karebanaia ba e aonga ni mate.” Ao a ira nanoni Ietebera kain ana kawa Nabota, ma unimane ao toka, n ai aroni kanoan te reta ake e kanakoi. A tua te aki mamatam, ao a katea Nabota i mataia te koraki, ao a roko uoman aomata ake a buakaka ni kaitara, ao a bukinna ni kangai: “E taetaebuakaea te Atua ma te uea Nabota.” E kaitikaki Nabota nako tinanikun te kawa, ao e karebanaki, ao e mate. E kanakoaki te rongorongo nakon Ietebera ni kangai: “E karebanaki Naboa, ao e mate.” Ngke e ongo Ietebera ba e karebanaki ma ni mate Nabota, ao e taku nakon Akaba: “Teirake, abana te nne ni kurebe are e rawa n anganiko Nabota: e aki maiu Nabota ba e a tia ni mate.” Ngke e ongo Akaba, ba e mate Nabota, ao e teirake ao e ruo nakon nnen ana kainikurebe nabota ae kaini Ietireera ba e na abanna.
Te Taramo 5:2-3, 5-7
Kaekana: Te Uea, ongo tangiu.
Te Uea, ongora n au taeka, Ko na ongo tangiu.
Kakauongo banau ni wewete, au Uea ae Atuau. K.
Ba te Atua Ngkoe ae Ko aki tangira te buakaka, Ko aki butimaea te aomata ae buakaka,
A aki tei i matam akana kamoamoa. K.
Ko ribaia ni kabaneia tani buakaka, Ko kamaunaia tani kewe.
Te tia tiritiri ma te tia kamani, E ribaia te Uea. K.
Alleluia, alleluia.
Anganai te maiu, te Uea, ao N na ira nanon am tua. Alleluia.
Euangkerio
Warekan ana Euangkerio Mataio. 5:38-42
E kangai Iesu nakoia ana reirei: “Kam ongo ba e kangai te taeka ngkoa: ‘Boon te mata te mata, ao boon te wi te wi.’ Ao Ngai I taku nakoimi: tai kauntaba te aomata ae ioawa, ma ngkana iai ae orea tabam teuana, ao anga tabam are teuana; Ngkana e kan ana am kabaraki i matan te kabowi, ao anganna naba rabunam. Ngkana e kani kairiko teuana te maire, ao raonna uoua te maire. Ane butiko, ao anganna; ane kan tangoa am bai, ao tai tannako mairouna.”
Tibatiba: Tangira am kairiribai ao tataro ibukina
- Details
- Written by Uriam Timiti
Wiki 10 Kanimabong
Warekan te moa ni Boki ae taekaia Uea. 19: 9, 11-16
Ngke e roko Eria n ana maunga te Atua, ae Oreba ao e rin n te nangananga, ao e tiku iai n ua te ngaina. E roko irouna ana taeka te Atua ae kangai: “Otinako, ao tei i aon te maunga i matan te Atua.” Ao E rikekei te Atua. E rook te ukeukenanti ae korakora ae bwenai maunga ma ni ibei ba, n rimoan te Atua; ma akea te Atua i nanon te ukeukenanti. I muin rurun te aba, ao e kaoti te ai, ma akea te Atua i nanon te ai. I mwin te ai, ao e roko tangin te angakaau ae kanamwemwe. Ngke e ongo Eria ao e karaba matana n rabunana, ao e otinako n tei i matan te nangananga. Ngkanne e ongo te bana ae kangai nakoina: “Eria, ko aera ikanne?” Ao e taku: ‘E korakora nanou ni ira tangan te Atua ae maka, ngkai a kitaniko natini Iteraera, ao a kabakai baonikaream ma ni kamateia am burabeti n te kabang. Ti ngai nikiraia, ao a kani kamateai.” E kangai te Atua nakoina: “Nako, okira Tamateko ri nanoni kawain te rereua. Ko na kabira Ataera ba uean Aram. Ko na kabira Ieu ae natini Nimti ba aia uea Iteraera, ao ko na kabira Eritai ae natin Tiabata, mai Abera-Meora ba te burabeti n ruamuim.”
Te Taramo 27: 7-9, 13-14
Kaekana: E ingainga nanou, te Uea, ni kan nora matam.
Te Uea, ongo banau ni wewete, Nanoangaai, kaekaai.
E taku nanou n taekam: “Ukera matana.” K
Te Uea, I ukera matam, Tai karaba matam nakoiu.
Tai kanakoa am toro n unim. Ba boni Ngkoe buokau. K
I bon ataia: N na nora ana akoi te Uea, I abaia akana maiu.
Onimakina te Uea, keiaki, kamarurungko, Onimakina te Uea. K
Alleluia, alleluia
Te Uea, kauki nanora n ongora ana taeka Natim. Alleluia
Warekan ana Euangkerio Mataio 5: 27-32
E kangai Iesu nakoia ana reirei: Kam ongo ba e kangai ngkoa te taeka: ‘Tai wenenibure.’ Ao Ngai I taku nakoimi: ba ane tara te aine temanna ma te nano ni kaitatan ao e a tia ni wenenibure ma ngaia i nanona. Ngkana e kairiko nakon te bure matam ae mai ataim, ao autia tewenakoa mairoum. E raoiroi riki i bukim ba e na bua bain rabatam ae ti teuana, nakon ae e na kabaneaki rabatam n te wenakoaki i Keenna. Ngkana e kabakako n te bure baim ae ataim, ao koroia, tewenakoa mairoum. E raoiroi riki i bukim ba e na bua bain rabatam ae ti teuana, nakon ae e na kabaneaki rabatam n tewenakoaki i Keenna.E atongaki naba ae kangai: ‘Te mane ae kanakoa buna, ao e na anganna te beba n raure.’ Ao Ngai I taku nakoimi: ane kanakoa buna, ae tiaki buna ni kewe, ao e kairia nakon te wenenibure; ao ane buna neiere kanakoaki, ao e wenenibure.
Tibatiba: E ingainga nanou te Uea ni kan nora matam
Tariu ao maneu n te bong aio ae katea te Uea nakoira te rongorongo ae kakawaki ba kaotakira n te bai ae ti riai n uakiinna inanon maiura aio. Inanon warekan te ewnagekerio ao ti ongora ana reirei Iesu nakoira ba ti riai ni kabanei korakorara ni karekea te kaniwanga ae katauraoia te Atua ibukira. Eng, E taekinna Iesu ba iai uoua te bai ae kona n riki nakoira ngkana ti kitana te maiu aio. Teuana bon te nora matan te Atua ke te kauoua bon te teweakinako i Kenna. Ao n aron karakinan te tabo ae Kenna ao ti tuangaki ba Kennna bon te tabo i tinanikun Ierutarem are ura iai te ai n tai nak ao naki totoki ibukin kabuekan taian mange ma ma baika a maung man ino ao bon akea ae kona ni maeka iai ibukin te maung, te boira ma te kabuebue ao taian ino ma taian mwwata aik a miau iaon a boira mani maung. Ibukin teimatoan te kabuebue ma te boira ao te maung n te tabo aio ao e kabonganaki Kenna ba e tei ibukin te rekenikai ae na reke iroura ngkana ti kakaraoa te bure ao te buakaka. Eng ngkana ko karenakoaki i Kenna ao nanona kanga ai bon aron te mange ma te bai ae maug mani boira ngkoe are na riai ni karenakoaki n tabo ae na kabuokaki iai n aki totoki.
Ma n aron ae ti warekia n te taramo ao ti nora iai te kaniwanga ae ti riai ningainga ni kan karekea are bon te kona n nora matan te Atua. Ba ngkana ko maeka n te tabo ae ko nora matan te Atua iai ni katoa bong ao n aki totoki ao nanona ngkanne ba ko maeka n te Abanuea ae Karawa. Ti tuangaki ikai ngkanne ba te kaniwanga ae ti riai n uaiakinna bon tiaki taekan te tabo teuana ma bon taekan te mwenga are ti na kona n matan te Atua iai n aki totoki. N aron ae taekinaki n te moan warekboki ao ti ongora aron Eria n ukeukera te Atua are aki reke inanon te rebwetau ma te maeiei ke te iti ma e reke inanon te angkaau ae kamwemwe. Moan kaotin te Uea iroura bon reken te raoi n te aro are ti na kona n nora matan te Atua ao ngkana ti maeka ma te Uea ao ti na rinnako inanon kororaoi bai nako ao ti na onrake te kabwaia ao te mimitong ae aki totoki.
- Details
- Written by Uriam Timiti
Wiiki 10 Kauabong
Warekan te moani Boki ae taekaia Uea. 17: 7-16
I muin tabeua te bong, ao e ora nanon te karanga, ba e aki babaka te karau i aon te aba, Ao e roko ana taeka te Atua iroun Eria ni kangai: “Teirake, nako Tarebata n te aba ae Titon, ao ko na tiku iai. I a tia n tuanga temanna te aine ae e mate buna, are mena n te tabo arei, ba e na kaamarakeko.” Ao e teirake Eria n nako Tarebata. Ngke e nangi roko ni mataroan te kawa, ao e tabe n riko aia temanna te aine ae e mate buna, ao e weteia Eria ni kangai: “Uota mai teutana te ran n te kaatibu, ba N na moi.” Ao e nang kawaria neierei, ma e a manga takaruaia Eria ni kangai: “An rekenibaia naba te makarona te bwerena.” Ao e taku neierei: “I kaotia n aran te Uea ae maiu: bon akea au bwerena ae mai; bon ti te abutana te burawa i nanon te baketi ao teutana te ba i nanon te batoro. Ao ae I a tabe n anai uai te aia ba N na karaoi ba kanau ma natiu. Ti na amarake ao na karaoi ba kanau ma natiu. Ti na amarake ao ti na mate.” Ma e taku Eria nakoina: “Tai maku, nako, karaoa ane ko taku, ma karaoa moa te bwerena ae uarereke ba kanau, ao uotia nakoiu, ao rimui ko na karaoa kanam ma natim. “E na tai bane te burawa n te baketi, e na tai tare te ba n te batoro ni karokoa ana bong te Atua ni kabaka te karau i aon te aba.”
Ao e nako neierei n rinanoa ana taeka Eria, ao e amarake, ngaia ma natina. E aki babane te baketi ni burawa, ao e aki tatare te batoro ni ba, n ai aron ana taeka te Atua are e taekinna Eria.
Te Taramo 4: 2-5, 7-8
Kaekana: Te Uea, kaota matam nakoira.
Ngkana I weteiko, ao kaekaai, Te Atua ae te tia kamaiua taekau.
Ko kabebeteai n rawawatau, Nanoangaai, ongo au tataro. K
Ngkami aomata, ningai tokin rawami? Ningai tokimi n tangira te akea
Ma ni barua te kewe? Uringnga: a kamimi aron te Uea
Nakon ane Makua: E ongo te Uea ngkana I weteiko. K
A kangai aomata: “Antai ae na karekea kabaira?”
Te Uea, kaota i aora raneaneani matam. K
Te Uea, ko kabatia riki kabaian nanou, Nakoni kabaiaia nako aomata
Ngkana e ruo marin te uita ma te uain. K
Alleluia, alleluia.
Ke e ota matam i aon am toro, Ao reireiai am tua. Alleluia
Warekan ana Euangkerio Mataio 5: 13-16
E kangai Iesu nakoia ana reirei: “Taarin te aba ngkami. Ngkana e mauna taarin te taari, ao e na manga taarinaki n tera? Akea riki manena, ma e na tewenakoaki ma n toubekaki irouia aomata.
Otan te aba ngkami. E aki kona ni karabaki te kawa ae tei i aon te maunga. E aki kauraki te taura ba e na karabaki i an te baketi; ma e katokaaki i aoni nnena, ao a bane n ota iai kain te auti. Ai aromi naba: ke e ota ami ota i mataia aomata, ke a nori ami makuri aika raraoi, ba a na neboa iai Tamami are i Karawa.
Tibatiba: Uringnga: a kamimi aron te Uea nakon ane makua
Bukin tibangara n te bong ao I anaa kibun te taramo aio ba ti na kananoa ibukn kanara mairoun te Uea n ana taeka. Eng tariu ao maneu bon aio te kibu n taeka ae moan te tamaroa ibukira. Te moani bai ae kakawaki man te toa ae Bentekota bon kawakinan karekean taian karea aika bati n te tai aio man bainakin te maku ao te onimaki inanon maiura. Ba ngkana ti maaka te Uea ao nanona ngkanane ba ti riai ni karinea te Uea ni kakaraoa Nanona ao n onimakinna. N te moani wareboki ao ti ogora taekan Eria ngke e tuangaki ba e na nako Tarebata ike e na reireinaki iai te kona n onimakina ana kakaonimaki te Atua n tararuaira ao n onimakina te Uea ba bon ti te Atua ae tauraoi n n tarauraira ao ni katauraoi bai nako ba ti aonga n teimatoa n onimakina kamaiu te Atua. Eng n akea te bai ae ti kona ni karaoia ao inanon taian kanganga ae ti taonaki iai ao ti na teimatoa n onamkina te Atua ba e tarauaira ao ni kakawakinira n tai nako.
Inanon te rongo ma te kabuebuae ae taona Taraebata ao Eria e onimaki ba e na kamaiua te Uea man makaan aia onimaki ao onikinan ana nanoanga ma ana tangira te Atua.E teimatoa n onimaki Eria ba e na kamarakeaki irouia maan reben ao iroun te unaine are e a tia ni mate buna ao e na teimatoa n aki tare te baketi ni burawa ao te baa n oera n te batoro ibukina ba bon te Uea na tararuaia
Ti na butia te Atua ba E na karaoi taian kakai inanon maiura ao ti na katuka ara onimaki iroun te Atua ba e na kangaraoi bai nako ao ti na tauraoi ni butimai bain eta ba ti aonga ni karekea te kaniwanga ae te maiu ae akea tokina ao ti na kaki bain aonteaba.
- Details
- Written by Uriam Timiti
Wiki 10 Katenibong
Warekan te moa ni Boki ae taekaia Uea. 18: 20-39
E weteia Iteraera ni kabaneia te uea ae Akaba, ao e botia burabeti i aon te maunga ae karemero. E roko Eria i mataia te koraki, ao e taku: “Kam na tiotio ni karokoa ningai i marenani kawai aika uai? Ngkana bon te Uea te Atua, ao Kam na iria; ma ngkana Baara, ao kam na iria.” MA e aki reke aia taeka te koraki. E taku Eria nakoia: “Ai ti ngai te nikira i buakoia ana burabeti te Atua, ao ana burabeti Baara, bon abubua nimabui maitia. Anganira uoman te kao mane: a na rinea temanna ibukia, ao a na korokoroia ni katoka i aon te aia, ma a na aki kaura aina. Ao ngai N na katauraoa te kao are temanna, ao N na aki kaura aina. Kam na wetea aran atuami, ao ngai N na wetea aran te Uea ae Atuau. Te Atua ae na kaeka, ni kaura te ai, ao boni Ngaia te Atua ni koaua.” A bane ni kangai te koraki: “E raoiroi anne!” E taku Eria nakoia ana burabeti Baara: “Rinea moa ami kao, ngkami, ba kam maiti riki; wetea aran atuami, ma tai kaura te ai.” A ana te kao, ao a katauraoia, ao a wetea arani Baara man te ingabong ni karokoa te tawanou, ni kangai: “Baara, kaekaira|” Ma akea te bana, ao akea te kaeka. Ao a ewewe man tutura i matan te baonikarea are a karaoia. Ngke ea tawanou, ao e kakanikoia Eria ni kangai: “Kakorakorai banami, ba bon te atua ngaia, ma iai tabena ke ana makuri, ke e nakonako ke tao e matu, ma e aonga n uti.” A kanenei riki banaia, ao a korokoroia i boni irouia n aia taaba ma aia kabang, n ai aron aia katei, ni karokoa tinakon te rara. Ngke e a bakanako tawanou, ao a taetae ni burabeti ni karokoa taini karean te tairiki, ma akea te bana, akea te kaeka ao akea te kanikina. Ngkanne e kangai Eria nakon te koraki: “Nakomai, kaningkami.” Ao a bane ni kania. Ao e manga karaoa baonikarean te Atua are uruaki. E anai atibu ake tebui ma uoua, n ai aroni maitin aia baronga natini Iakoba, are E kangai nakoina ngkoa te Atua: “Iteraera aram.” Ao e katea iai te baonikarea, ae kanoana aua te karan. E bairea te aia, ao e korokorea te kao ni katoka i aon te aia.” Ao a ira nanona. E manga taku: “Kauoua karaoana.” Ao a kauoua karaoana. E manga taku; “Katenua karaoana.” Ao a katenua karaoana. E baro te ran i rarikin te baonikarea, ao e tao naba te niba n te ran. Ngke e roko tain te angakarea, ao e kania te baonikarea Eria, ao e kangai: “Te Uea ae Atuan Aberaam ma Itaaka ma Iteraera, e na ataki n te bong aei ba te Atua Ngkoe i buakoia Iteraera, ao am toro ngai; ao e na ataki ba I karaoi baikai ni kabane n am taeka. Kaekaai, te Uea, ba e aonga n ataiko te botanaomata aei ba boni Ngkoe te Atua ae ko rairi nanoia.” Ao e baka ana ai te Atua, ao e kabuoka te karea ma te aia, ao e temeka te ran ni kabanea mai nanon te niba. A bane n rotaki te koraki n te maku, ao a kangai: “Bon te Uea te Atua, bon te Atua.
Te Taramo 16:1-2, 4-5, 8, 11
Kaekana: Kawakinai, Atuau, ba I onimakiniko.
Kawakinai te Atua, Ba katanau Ngkoe.
I kangai nakon te Uea: “Atuau Ngkoe, Boni Ngkoe tibangau ma au mangko.” K
A maitikurikuri anti: a baneakinaki. N na aki anga kareaia te rara,
N na bon aki atonga araia ni wiu. K
Te Uea, Ngkoe tibangau ma au mangko, Boni Ngkoe ae Ko kawakina tibau.
E mena te Uea i matau n tai nako, I teimatoa ngkai E mena i rarikiu. K
Ko na reireiai kawain te maiu: Ane iroum te kabaia ae kororaoi,
Ane iroum te kimareirei ae akea tokina. K
Alleluia, alleluia
Kaurei matau, te Uea, ao N na nori kamimi aika muin am tua. Alleluia
Warekan ana Euangkerio Mataio 5: 17-19
E kangai Iesu nakoia ana reirei: “Tai taku ba I roko ni kamauna te Tua ma burabeti. I aki roko ni kamaunai, ma I roko ni kakoroi bukia. Ba I tuangingkami te koaua: i maini maunani karawa ma aonaba, ao akea te iota ke te tantan teuana ae na bua man te Tua n ua a koro bukini bai ni kabane. Ma ngaia ae te aomata ae riaon te tua teuana i buakon akana uarereke akanne, ma n reireia aomata arona naba anne, ao e na atongaki ba moan te mangori n te Abanuea ae karawa. Ma ane kawakin, ma n reireia aomata iai, ao e na atongaki ba e kakanato n te Abanuea ae karawa.
Tibatiba: Kawakinai, Atuau, ba I onimakiniko
Tariu ao maneu ngkoananoa ao ti taekina kakawaakin te maku iroun te Atua ba ti aonga ni karekea te maiu ae akea tokina. N te bong aio ao ti reita ongorara n taekan Eria are e kamatoa nakoia te koraki ba a n a riai ni katoka te waki n nanououa ba antai ae a na iriria ke antai te Atua ae a na kakoaua man onimakinna. E tuangira ikai Eria ba ti riai ni katoka te aro n nanououa. N te bong ao e tuangia te koraki Eria ba E na karaoa te kamataku teuana are e na kaotaki iai ba bon antai te Atua raoi ke ni koaua. Ao e tua Eria ba a na karekeaki uoman kao ao a na rinea aia kao tan onimakina te anti are Baara. A na rinea naba aia kao Iteraera ao man katauraoia ni korokoreia ao imuina ao a na wetei Atuaia Iterera ao tan omikanika Baara. Ngkanae a katokai aia kao iaon aia baoni karea ao Atuia ba E na karuoa te ai ba e na kaura te kao iaon aia baonikarea. E moani weteaki Baara ba e na karuoa te ai iaon aia baonikarea ana aomata. A wetea Baara man te ingabong ni karokoa te tairiki ao bon akea te bai ae riki. Imuina ao e tataro Eria nakon te Atua ni butia ba e na kaota maakana ba aongan rairaki nanoia tan aki kakoaua. Imuina ana tataro Eria ao rina n ruo te ai are kabuoka te kao ao man toama te ran are taraki aon te baonikarea iai.
Tariu ao maneu n tokina ao a bane ni mimi te koraki ao a takarua n tataro ni kangai;”Bon te Uea te Atua…Bon te Atua.
Eng ti riai ni waekoa n te bong aei ni kaotia ba antai te Atua ae ti na iriria ao tin a onimakinna. Boni Ngaia ae E na kawakinira ao E na karokoira n tokin kawaira i Abaia Akana a Maiu n te Abanuea ae Karawa.
- Details
- Written by Uriam Timiti
Wiiki 10 Moanibong
Warekan te moa ni Boki ae taekaia Uea. 17: 1-6
E taetae Eria, ae te burabeti mai Titibe i Kireata, ao e kangai nakon te uea ae Akaba:
“I kaotia n aran te Uea ae Atuaia Ieteraera, ae I tei i matana: e na aki aoi ma ni karau n ririki aikai, ni karokoa N na taetae.”
E roko iroun Eria ana taeka te Atua ae kangai: “Kitana ikai, nako, waerake ao karabako i rarikin te karanga ae Kerita i mainikuni Ioretan. Ko na momoi man te karanga, ao I a tia tuangia reeben ba a na karekea kanam.” E ira nanon ana taeka te Atua Eria, ao e nako ni maeka i rarikin te karanga ae Kerita i mainikuni Ioretan. Ko na momoi man te karanga, ao I a tia tuangia reeben ba a na karekea kanam.” E ira nanon ana taeka te Atua Eria, ao e nako ni maeka irarikin te karanga ae Kerita i mainikuni Ioretan. A uouoti kanana reeben, ba te bwerena n te ingabong, ao te iriko n te tairiki; ao e momoi man te karanga.
Te Taramo 120: 1-8
Kaekana: E buokira te Uea are karika karawa ma aonaba.
I tabeki matau nakoni maunga: e na reke buokau mai ia?
E reke buokau mairoun te Uea, are karika karawa ma aonaba. K
Ke E tai kataua tibanakoni waem, Ke E tai matu te tia kawakiniko.
E bon aki matu ma ni wene, Te tia kawakinia Iteraera. K
Bon te Uea buokam ma katanam, E tei i angataim.
E aki taoniko taai n te ngaina, Ke namakaina ni bong. K
E na kawakiniko te Uea man te buakaka, E na kawakina tamneim.
E na kawakina nakom ma okim, Ma ngkai n aki toki.
Alleluia, alleluia.
Am taeka, te Uea, bon te koaua: Katabuira i nanon te koaua. Alleluia
Warekan ana Euangkerio Mataio 5: 1-12
E noria botanaomata Iesu, ao E ararakea te maunga. E tekateka, ao a roko ana reirei irouna. Ao E tabeka ana taeka n reirei nakoia, ni kangai:
A kabaia akana aki nanona te kaubai, ba aia bai te Abanuea ae karawa.
A kabaia akana nimamannei, ba a na abana te aba.
A kabaia akana a rawawata nanoia, ba a na kabebeteaki.
A kabaia akana barua te raoiroi, ba a na rauaki.
A kabaia akana a nanoanga, ba a na nanoangaaki.
A kabaia akana a itiaki nanoia, ba a na nora te Atua.
A kabaia tan raoi, ba a na atongaki ba natin te Atua.
A kabaia akana bainikirinaki i bukin te raoiroi, ba aia bai te Abanuea ae karawa.
Kam a kabaia ngkana kam taetaebuakaki, ma ni bainikirinaki, ma ni uabuakakaki i bukiu: kam na kakatonga ma ni kimareirei, ba e ababaki kaniwangami i karawa.
Tibatiba: E buokira te Uea are karika karawa ma aonaba
Mauri tariu ao maneu inanon ara toa ae kakawaki are bon Ruon te Tamnei ae Raoiroi inanon te Bentekota. Ao e aera ngkai e kakawaki te toa aio ibukira ngaira tan onimaki? Tera te karea ae kakawaki ae ti anganaki ke ti karekea inanon te toa aio ao tera nanona ibukira inanon maiura ma ara kekeiaki ni Kiritian ao te kaniwanga ae E katauraoia te Uea n tokin maiura aio?
Tariu ao maneu inanon te toa ae Bentekota ao ti anganaki iai te berita n akoi ae moan te kakawaki ;” Ba E kangai Iesu nakoira;” Ao noria , I angani ngkami au berita n akoi ba N na mena irarikimi ni karokoa tokin aonnaba. Inanon waeraken Iesu nako Karawa ao ti bane n anganaki te kantaninga ae moan te te tamaroa ba ngaira ni bane ba n te aro ti nora iai Iesu ni waerake nako karawa ao ti na bon noria naba ba E na roko ni butimaira nakon mwengara ni koaua are a tia ni katauraoia i bukira i Karawa. Inanon te tai ni bakate are moa man mangautin Iesu ao e toki n te toa ae Bentekota ao E a manga kamatoa Iesu nakoira ba ti bon n roko n tokin kawaira ngkana ti teimatoa ni karaoa Nanon Iesu n nako tokin aonnaba ao ni babetitoia aomata nako n aran te Tama, te Nati ao te Tamnei ae Roiroi. Ma inanon ara borau n te maiu aio ao ti na bane n tauraoi ni butimaea Iesu are E kaoti ngkoa nakoira ao ni kanagai; “Te Raoi nakoimi.” Ao muina e ukira Iesu ao E a manga kangai;” Butimaea te Tamnei ae Raoiroi are boni Ngaia te Tia Ibuobuoki are na anganira te korakora n reitanako kabouan bitakin taran aonnaba. Aei bon te Tamnei ibukin te aonnaba aio ba E na onrake n raneanean mimitongin te Atua ao ti na nora Ierutarem ae bou are karuoaki mai Karawa are bon tin a nora iai tamnein te kaniwanga ae ti na karekea ba muin ara kekeiaki inanon maiura aei ni kabuta nakoia tarira ma manera te Maiu ae Onraken te Maiu ae ti anganaki n tain te Bentekota.
E na bon reke te Maiu aio ngkana E inaomata raoi iroura ao inanora Tamnei te Atua ae te Teiniman Temanna ae moan te Tabu man Mimitong. Ti na kauki nanora nakon ana reirei Iesu ana Taeka ni Kakabaia Iesu are ti anganaki n te bong aio aika a na riai n riki ba kairan maiura ba ti aonga ni karekea te Maiu ae akea tokina i Karawa.