Kanan Tamneira...
- Details
- Written by Uriam Timiti
N te O-Te-Tamenti ao ti nora aron te Atua ni kaitibo ma ana botan aomata ae Iteraera rinanon te Ake are bon te uma n rianna ae uarereke ma kanoana are bon Atibu ake a koreakio iai ana Tua te Atua ake E angan ngkoa Mote.
N te Berita ae Bou ao ti a manga nora aron te Atua n ruo ba E na riki n aomata iroun Nei Maria. Ni kakoroa nanon ana Berita n Akoi te Atua ma ana botan aomata ao E a rineia ba E na maeka i buakora inanon te takaramentu ae te Eukari ian katotongan te Bane.
N te ewangkerio n te bong ao ti ongora aroia aomata n ririmuin Iesu ao n uotiia aoraki ba a na kamaiuaki. Angiia a bon mananga nakon Iesu n onimakinna ba a na kamiauaki ti ngkana a ringa buruburun ana kunikai.
Tariu ma maneu E weteira ikai Iesu ba ti na onimakina ana kamaiu nakoira n taai nako ngkana ti kaoa ba E na maeka i nanora ni koaua. Ti na butia te Atua ana karatia ba ti na kona ni kamaeka ni koaua Natina ae Iesu inanora. Ba ngkana E maeka inanora te Uea ao ti na kaonrakeaki n taai nako n ana tangira, ana kamaiu ma ana nanoanga ao ti na katanaki man taian kabuanibai ao riki mairoun teuare buakaka. Ti riai ngkanne ni kariki nanora ba ana Ake ni Kamaiu te Atua are E na maeka ni koaua iai n aki toki. E na bon reke te kona ni maiu n ti teuana ma te Atua ngkana ti maiu inanon ana tua mani kakaraoa ae Nanona. Ti na bane ni katotonga aron maiun tinara Nei Maria are bon ngaia te moan aomata are e tia n reke irouna kororaoin ana kamaiu te Atua.
- Details
- Written by Taranieta
N te bong aio ao ti ongora taekan Nei Ana ma arona n onnon nakon te Atua inanon ana tataro ibukin nanona n tangira natina.
E nakon te Atua Neiei ma ana maroro are e a kaman tauraoi ao ma te onimaki ni koaua ba akea ae e kona ni buokia ba ti te Atua.
E aki tabe ma aomata ngke e a uota nanona nakon te Atua ao e a aranaki ba ai te koronimanging.
E nanoangaa nanona te Atua ao E ongo ana bubuti ao man anganna natina are e bubuti ae Tamuera, ao e bitaki moamoana man te rawawata nakon te kimareirei.
N tabetai ao e mamara aron ara taromauri ke ara nebonebo ba ti bae n iangoia kain rarikira.
Ti na butia Iesu n te tai aio ba e na anganira te aro n tataro, n neboneboia ao ni maroro ma ngaia n aiaron Nei Ana, ba tina kakea mamarara ke iangoan bai aika a na katabetabei ara iango.
Ti na neboia n tainako n ara tataro ao ara makuri n aron are E tangiria ao man kantaningaia mai iroura, ao ti na katikui iangoakin tarakira iroun aonteaba, n Ana ibuobuoki. Ti na bon kantaningai uaan ma boon ara tataro aika a na rangi n tamaroa. Tiaki ti anne ma ti na katabui naba baika ti anganaki ba kaekan ara tataro, ni kaoki rikaki nakon te Atua ba Ana b'ai, ao ni kabonganaki ibukin neboana...n aiaron Tamuera.
- Details
- Written by Taranieta
Antai ae e na tokanikai iaon te aonnaba, ma bon te aomata ae e kakoaua Iesu ba natin te Atua.
Aio kanoan Ana Taeka ae e Tabu te Atua are tibangara n te Tutia n te bong aio are e anganira ba tin a kananoa iangoa.
Ti tuangaki ba Iesu bon ana Taeka te Atua ao ngkana ti kakoaua Iesu ao ti bon kakoaua ana Taeka te Atua ao e maeka inanora. Ngkana tiaki kakoaua ao e aki maeka inanora te Atua.
E kakauringira Iesu ba a maiti riki inanon Arana nakon ae ti ataia.
N te tai aio, ae moan ara ririki ae e boou, ao ti na kananoa iangoan aran Iesu ae moan te Tabu iaon aara ni kabane.
Ti a butia te Atua te karea ae te wanawana, ba E na katoka ba ara bau n tainako, ao E na kairira man katanira iaana n te ngaina, ao e na kaotai kawaira iai n te bong.
Inanon te wanawana anne mairoun te Atua ao ti a butia ba ni katoa tairiki ao tina karauiira ni kainnababu man iangoa ara reitaki ma Iesu n te ngaina ae e a tia n nako.
Ti na bon kaotaaki iai n nanon aran Iesu aika a maiti riki nakon ae ti ataia, ao E na kaotai ara iango ma nanora Iesu ao man kakimareireia tamneira. Ti a karab’a Iesu n Arana ae moan te Tabu ae e kairirira man anganira te totokanikai iaon te aonnaba aio.
- Details
- Written by Taranieta
Imain karaoan ara nebonebo n ara kawa ae Hamilton n te Tabati ae nako ao ti kananoa iangoan ara nebonebo ma te maiu n tataro ba kanga ara tai n tareboon nakon te Atua. Ba aio ai bon ara tai n tatae nakon te Atua ao imain ae ti nebonebo ao ti na bon iangoia moa ba tera arora nakoina ao tera are ti nang taekin ngkai. Ngke e a roko tain ongoraeakinan ana taeka te Uea ao e a warekaki te wareboki are bon mai iroun Ieremia, are bon taekan te buaka ma te karemo ao te tataro are bon angan te tokanikai iaon taian kanganga ake a taekinaki. Ma e kamimi tokin ana wareboki ba e kangai, “ Ao e kangai au tataro nakon Iawe, ...ao akanne Ana taeka te Uea.” E bon kaokia uoua te tai n aron anne. Kanga a bon bane n tare ara iango ba ti tangiria ni kan ongo ba tera te tataro are n te wareboki, ma te tia wareboki e a bon ti kakatokia naba ikekei.
Ti a karaua n iangoia ao ti a ataia ae e makuri te Tamnei ae e Raoiroi n tainako inanon te nebonebo ngkana ti weteia. Iai bukin tokin te wareboki ikekei are e bon reitaki ma ara tibatiba imain te nebonebo. E reke tibangara ba e kaokoro ara tataro n tatabemanira nako ma aron kanoan ara taetae ma Iesu n ara tai n tareboon. E anganira te kona ni manga rinanoa aron kanoan ara tareboon ma Iesu ba ti maroro ma te kukurei, te tauraoi n ara iango ma nanora, ti nanona ara taeka, ti karinea, ti kakoaua, ti kakatituaraoia, ti neboneboia ke e kanga. Aikai titiraki ake a rio man te wareboki ae e kamimi aio.
Ti a butia Iesu ba ti na kona n tarebon nakoina ma te koaua n nano ao ni kona n reitaki ma ngaia inanon kimareirein mimitongina n tainako.
- Details
- Written by Uriam Timiti
E na titiku iroura ana Tangira te Uea ngkana ti kakaraoa ae raoiroi ao ti tangiria raora n ai aron are a tia n tangirira iai te Atua. E kaotaki nakoira te tangira n Atua aio iroun Iesu ngke E anga maeuna iaon te kaibangaki ibukin kabaran ara bure. Ti riai ngkanne ni kaota te tangira aio tiaki ti n ara taeka ma ae kaakwaki riki bon n ara makuri.
Ara makuri n tangira a bon riai ni kaota bannan te Atua nakoia tarira ma manera. Ngkana e aki oti te Uea n ara makuri n tangira ao nanona ngkanne ba bon tiaki ana tangira te Uea are ti anga, ao ngkana te makuri n tangira bon tiaki mairoun te Uea ao nanona ngkanne ba bon ana makuri te riaboro ae kaitara te raoiroi. Ti na riai ngkanne ni kaota ana tangira te Uea inanon te koaua ao te eti ba ti aonga ni kakukureia nanon te Atua.
Inanon tain te Kiritimati ae ti mena inanona ao ti weteaki ba ti na maiuakina ao ni kaota ana tangira te Atua ae e maeka ibuakora inanon Iesu. Ti na buoka kaotan te Uea ae maeka i buakora ngkana ti kairia tarira ma manera nakon kinaakin Iesu. Ti riai ni katotongia Biribo ma raona ngke a kaota te Uea nakon Natanaera. Ngkana ti kakaota Iesu inanon te koaua nakoia aomata ao ngkanne ti na namakina te kukurei ao te kimareirei ao ti na kateimatoa maekan Iesu ae te Atua ibuakora ao ti na katabanina iai kamaiuara iroum te Atua.