Kanan Tamneira...
- Details
- Written by Uriam Timiti
Ti nora aron Anterea ma raona are temanna ni kakaea Iesu are te Messia are kabarabara ngkoa Ioane te Tia Babetito ba ana Tibu te Tei te Atua ae na kamaunai buren aonaba. Anterea ma raona a bon kaota raoi te bai are a tabe ni kariaria natin Iteraera ibukin taekan te kamaeuaki. Ukeran ao te taka ibukin te maiu ni koaua are mairoun te Atua bon te bai ae na riai ni moanibai n ara kantaninga ao ara iango. N te wareboki n te bong aio ao ti ongo aron Iesu ni kaeka aia titiraki n ukeuke Anterea ma raona. E kaeka Iesu ni kangai, "nakomai noria".
Tariu ma maneu, te bai ae kakawaki ikai bon aron nanon Iesu n tangiria ba ti na kitan baai ni kabane ao n tauraoi n irira Iesu nakon te tabo are maeka iai. Inanon Kiritimati ao E kaotia Iesu ba teburara arona Ngaia ae te Atua ae E a roko ni maeka ibuakora n te aro ae moan te mangori. Ti na kakaea te Atua tiaki ibukin te koora ke te tirewa ma ti na kakaea Iesu ibukina ba boni Ngaia te Atua ae kona n anganira te oinibai ni koaua are bon te Maiu ae Onraken te Maiu.
Boni iai naba tibangara iroun Anterea ba imuin are a tia n ira Iesu nakon te tabo are mena ao e oki ni kakaea tarina ae Simon ao e tuanga ba e a tia n nora te Messia ao e a manga kaoiroroa naba ba e na iri n nora Iesu. E na kororaoi ana kamaiu te Uea iroura ngkana ti kona ni manga kaongoia ao ni kairiia tarira ma manera nakon te Uea. Ma n aiaron Ioane ao ti riai n riki ba tan kairiia aomata nakon Iesu ao tiaki bon nakoira ngaira ibukin kabaiara ao reken arora.
- Details
- Written by Uriam Timiti
Aikai bon ana taeka Ioane te Tia Babetito ngke e moan nora Iesu—Te tibu Tetei. N rongorongoia natin Iteraera ngke a otinako man te toronaki i Aikubita ao e taekinaki ba e moanaki kamaiuakiia man tiringan te tibu tetei ao n rarana are a kabira iai mataroan aia auti ao man riaoaki irouin ana anera te Atua are na tiringia kain Aikubita.
E oti ikai ba rongorongon kamaiuaia Iteraera mai Aikubita bon rinanon te tibu te tei. Bon aio naba ngkanne kanikinaean rokon te Messia are a kakataningaia natin Iteraera, bon te tibu te tei. Kabarabaran Iesu aio iroun Ioane te Tia Babetito ba Te Tibu Tetei bon kakoauan ana berita n akoi te Atua nakon aonaba ni karokoa te kamaiuaki iroun Iesu are E tiringaki mani kaboira n rarana ba ti aonga n riki ba nati ngaira ni koaua ao taan baibai irarikina i Karawa.
Ti na bane ni waaki inanon te ririki aio ma te onimaki n ana nanoanga te Atua ae moan te bati i bukira are na kairira nakon tokin kawaira irarikin Tamara i Karawa. Ti na keiakina te maiu ae raoiroi ao ti na kaota mamakurin Tamnein te Atua inanora ba ti aonga ni kinaki irouia aomata ba boni taan irira Iesu ae Ana Tibu te Tei te Atua ae kamaunai buren aonaba ni bane. A bia riki ara makuri, ara taetae ao kateira inanon te ririki aio ba kaekan ana wewete te Atua nakoira nakon te maiu ma Ngaia n te kimareirei ao te mimitong ae akea tokina i Karawa.
- Details
- Written by Uriam Timiti
Inanon Iesu Kristo ae Natin te Atua are E bungiaki nakoira, ae bon te Atua Ngaia mairoun te Atua, ao ti kakoaua miterion ana kamaiu te Atua ni kataua ba E na riki n aomata. Inanon Iesu ao e a kaotaki man noraki aron ao Rabatan te Atua i buakora are E a uota nakoira te kona ni maiu inanon te tai ae NGKAI n aki totoki n onea muin ana NGKAI te aonaba ae totoki.
Inanon te Kiritimati ao ti a nora kamimin te Atua. Ngaia ae E moan te korakora E rineia ba E na riki ni mangori; Ngaia ae E moan te maaka E tauraoi n riki ba te tei ae uarereke ae akea te bai ae kona n reke irouna ao ae kainnanoa buokana ma ara tangira. Ti a nora ikai aron kororaoin tamaroan te Atua ngkai E kona ni kitana arona ni kakannato ao n ruo ni kawarira ni nneia man amarake ba ti na kunea iai ao man kabouaki n tamaroan ao kororaoin te Atua iroun Iesu.
Tariu ao maneu tera tibangam ae reke n te Kiritimati aio? Ti bia bane n ongo banan te Atua ae kangai, "Bon Natiu ngkoe ae I angan aonaba". E a riki te Atua ba temanna ibuakora n te aro are ti kona n kina te Atua ao n riki n aiarona. Ti na kunea n ana tabo Iesu te Tei are rineia ba ti na kunea iai are bon aia kumete maan n amarake. Ti bia nora mimitongin te Atua irouia merimeri ao ataei ake a tuai ni bungiaki ni kabane inanon te Kiritimati aio. Ti na bane ni kimareirei ao ni karaoiroaki inanon te Kiritimati aio.
- Details
- Written by Uriam Timiti
Akea ba ti a roko inanon moan te ririki ae bou ao I taku ba e kakawaki iroura ba ti na katituaraoa te Atua ibukin ana buoka ma ana kakawakin nakoira inanon ara waaki nako inanon te ririki 2011 ae a tia n nako. Ngkana ti bon karaurau n tarai ao n iangoi bai aika tia n riki nakoira n ara utu, n ara makuri ao n ara waaki ao ti kona ni kakoaua maitin ana tangia te Uea ae moan te kororaoi ao moan te bati. Ko raba te Atua ae Tamara ni koaua n raonakira ao tararuakira inanon ara kekeiaki ma mamarara ni kabane.
Tariu ma maneu tera kanoan am iango n te ririki ae bou aio? I taku te bai ae kakawaki ba ti na riai n nori itera ake ti a tia ni mamara iai n te ririki ae nako ao ti riai ni karaoi ara motinannano aika a na katamaroa riki kanoan ara waki inanon te ririki ae bou. Ti riai naba ni kairaki n te koaua are E a tia ni karikira te Atua ni katotongana ao bon ana babaire ibukira ba ti na maiu irarikina i Karawa. Bon aio ngkanne bukin rokon Iesu i aonteaba ba E na kaoka nakoiara te aro n natinaki ao n riki ba tan baibai iroun Tamana.
Ni moan bongin te ririki nako ao e anganira te Ekaretia tibangara ae moan te kakawaki ba Nei Maria ae Tinan te Atua are ngaia are e tia n toba Iesu ba e na tobai naba ara waki inanon ara borau n te ririki 2012. Ti bia kairaki iroun tinara Nei Maria ba ti aonga ni kona naba n tobai ara waaki inanon te ririki aio nakon karikirakean maiun te Atua are are bon tamneina ae mamaeka inanora. Ngkai bon Nei Maria are kariaia ba e na ruo ni maeka te Atua ibuakora ao bon ngaia naba ae na buokira ni kona n roko irarikin Natina ae Iesu i Karawa. Ti na bane ni kabaia ao kairaki iroun tinara Nei Maria inanon ara borau ma kekeiaki ni kabane ao ke E karaoiroira te Atua inanon te ririki 2012.
- Details
- Written by Uriam Timiti
Akea ba ti a roko inanon te Kiritimati ao ti uaia ni boti banara ni katituaraoa ao n neboneboa te Uea n ana baintangira nakoira ae bon Natina ae Iesu are bungiaki nakoira n te Kiritimati aio.Ti a reiti banara ma anera ake a ruo mai Karawa ni kaota bungiakin Iesu nakoia taan kawakin tibu ao ti a bane n neboa te Atua iroun Iesu te Tei ae E bungiaki nakoira ni kangai,"Gloria in excelsis deo..Te nebonebo nakon te Atua i eta i Karawa ao te Raoi nakoia aomata aika a nanoraoi".
Te rongorongo ae moan te kakukurei inanon Kiritimati bon rokon Iesu ae Natin te te Atua ba E na maeka i buakora ao are ti kona ni kabarabra ba te Atua ae Emmanuera. E kaoti ao E reitaki ngkoa te Atua rinanoia Burabeti ao ngkai E a bon roko te Atua ni maeka i buakora. E a roko te maiu i aonaba ao akea ba ti nora aokaburaken ana kamaiu te Atua ibuakora iroun Iesu. I nanon Kiritimati ao ti a kona ni kakoaua iai mimitongin Karawa ba e a ruo nako aonteaba ao ti nora naba iai moan ukin ao kaitibon Karawa ma aonteaba n aron ana babaire ma ana kantaninga te Atua mai moana. Ti bon riai ngkanne ni kaonrakeaki n te kimareirei ngkai e kakoauaki kakoroan nanon ana berita ni kamaiu te Atua nakon ana botanaomata are e a tia ngkoa ni baka n te bure inanon Iesu te merimeri ae te Messia are E a bungiaki nakoira. Te bai ae riki teuana ae ti riai ni karabaraba naba iai bon aron nanon Nei Maria are bon temanna n aiarora are a tia n reineaki iroun te Atua ba e na riki ba tinan Natina ao e tia ni kariaia ngke e kangai, "Ana toro te Uea Ngai e na karaoaki nakoiu n aron am Taeka."
E na banin raoi kakukurein Kiritmati ngkana e reke te Raoi iroura ao are ti bon riai n uotia ao ni karabata nakoia tarira ma manera, riki ake ti tuai ni kabarai aia bure; ara kairiribai ao kain ara utu.Ti na kauki naba nanora ni kona karokoa te kukurei nakoia raora n tauraoi n anganiia ara baintangira ao ara tangira.
Ke E kabaroa iaomi te Atua ana karaoiroi ma ana kimareirei ao ana Raoi ni Kiritmati te Atua te Tama, te Atua te Nati ao te Atua Te Tamnei ae Raoiroi. E karaoiroaki ami Kiritimati ao te ririki ae bou.