Kanan Tamneira...
- Details
- Written by Uriam Timiti
E reke nanou n te bong aio ba ti na tarai aroia burabeti ake a taekinaki ba a kakannanto ake Eria ao Ioane te Tia Babetito.
Teuana te bai ae ti noria irouia burabeti ba a maeka i buakonikai ao n taian nanganaga. E kamarakeaki Eria iroun te mannikiba ao Ioane e kana te rokati. A uaia ni kunikainia n kunin te man ao a kaai naba ni bainikirinaki ao aki maku ni kaeti aroia aomata aika a kakannato. E bwenaua te karanga are Ioretan Eria ao Ioane e kauka kawain te babetito . E noraki Eria ba e uki karawa nakoina ao e waerake ao Ioane e nora naba karawa ba e uki ao E ruo Tamnein te Atua n toka iaon Iesu.
Inanon maiuia burebeti aikai ao ti kona ni karekei tibangara aika kakawaki. Teuana bon te maiu ae inaomata man kaubain te maiu aio n aron are ti noria ba burabeti aikai a maeka n te buakonikai ao n te rereua ao a aki tabe ma katikiraoan rabataia n te kunikai. Te kauoua bon onimakinan te Atua ba E tararuaira ni katoa bong. Te kateniua bon te tauraoi n rinanon taian rawawata ma bainikirinaki ibuikin te Uea. Irarikin anne ao ti na riai n ninikoria n taekina te koaua n aki maku. Ngkana ti kaburei maiura ibukin te Uea ao ni beku ibukina ao ti onimakinna ba E na anganira te Atua ana karea te Tamnei ae Raoiroi ni kona ni karaoi kakai ba ti aonga iai ni kaotan makan te Atua. Te kabanea ngkanne ae ti noiria naba irouia burabeti aikai bon noran Karawa ae e uki nakoia are bon kaotan te kaniwnaga ibukira ngkana ti kabanei maiura ni beku ibukin te Uea. Bon aio ana kantaninga te Atua ibukira ni kabane ao bon aio te bai ae na reke nakoira ngkana ti beku ibukina ma te kakaonimaki. E ngae ngkana ti tara ni mangori i aonteba ibukin ara makuri ibukin te Atua, ao te Atua E na bon tabekira nakon te mimitong ma kakannato ba kaniwangan ara kekeiaki ngkana a toki maiura.
Ti na butia te Atua ba ti na tauraoi ni riki ba taan kakoaua ana tangira te Atua nakoia aomata , n taetaekina te koaua ao n aki maku ao ni karaoi makuri aika raraoi nakoi aomata.
- Details
- Written by Uriam Timiti
Ti na bane n riki n tain te avenete aio ao inanon maiura ni kekeiaki ba otan aonaba. Ti na kaota te n aonaba ae taonaki n te roo tongitong ae bati. Te roo man kariri aika bati, te roo man kaubain te maiu aio, te roo mani katei aika aki boraoi ma nanon te atua, ao te roo man ana tautaeka te riaboro iroura.
Ngkana e moanaki te bong ae boou iroura mani butimaea ana kamaiu te Atua ao ti bon riai n uota te ota aio nakoia aomata ni kabane. Ao ti na kanga n riki ba ota ngaira nakoia raora? Ti na riki ba ota ngaira ngkana ti taetaekina te rongorongo ae raoiroi nakoia raora, ao riki ngkana ti karaoi makuri aika raraoi nakoia tarira ma manera. N te tabo are ti maeka ao ti mena iai ke ti makuri iai ao ti bia kaota ana nanoanga te Atua ma makana iaon te roo.
Nte tai naba aio ao ti bia katotonga banan Ioane te Tia Babetito n tatakaruaea te rairannanon nakoia aomata ao n riki ba taan katauraoa main rokon Iesu. Ti na riai ni moana uotan te ota aio inanon ara utu ao nakoia kain rarikira ao kain ara makoro. Ngkana ti tauraoi n riki ba otan aonaba ngaira ao ti na buoka katokan takan te Atua n tangiria ba akea ae na bua. Ana tangira te Atua aio are ti noria n te taetae ni kaikonaki are taekan te Tia kawakin Tibu are e kitania tibu ake ruangaun ma ruaman ao n tabe ni kakaea temanna te tibu are bua ni karokoa ae e kunea.
Ti na reitaki ma tinara Nei Maria ni butia ba e na reireinira arora aika ti na kona ni katauraoa iai main rokon Natina ae Iesu. Ti na katauraoira ni bubuti nakon tinara ba ti na kaonrakeaki n taian karatia are onraki iai ngaia ba buokara inanon ara katauraoi ni butimaea te Merimeri ngkana e a bungiaki n te Kiritimati ae nang roko.
- Details
- Written by Taranieta
Te moan bai ae e tuka noraabara bon te kamoamoa. Kaitaran te kamoamoa bon te nanorinano ke te kamangoriira.
Ara kamoamoa e bon anganira iangoakira, are bon ngaira, ba te moan bai n ara iango ao ara makuri n tainako, n te aro are e karika matakira ni bai aika maiti, nakoia moa kain ara utu ao nakoia tarira ao manera nako, ao ai bon nakon te Atua.
E maiti, inanon aran Iesu, nakon ae ti ataia. Ngke a ongo aran Iesu ba e takaruaeaki ba E rirarikiia ao mataki ake uoman, n te Euangkerio n te bong aio, a kamangoria ni kaakeaia ao a tatakarua ni wetea Iesu, ba a onimakinna ni koaua ba E na kamaiuia. A tia n tiku n tatabeakini bon oin aia kanganga, ma n taratarai ao n namakini baika a riki inanon aia iango ma rabataia, inanon aia aonaba ni mataki, ao a tia ni kataua aroia arei.
Ma n ongoia aran Iesu ao ongoia banaan Iesu , ao e uki aia iango ao e kiriwe nanoia n ukera te maiu.
....ma aki aki ataia ba ana biri nakea
A ataia ba akea te bai ae e kona ni kamaiuia ba ti te kamangoriia ibuakon te botanaomata, n tatakarua ni wetea Iesu. A bon aki kangai, ‘kamaiuira’, ma a kangai, ‘nanoangaira’.
.....ao ngaia are a uaia n tatakarua ma te ninikoria n aki ongea mamaia.
E aki ti nanoangaia Iesu, ma e kamaiuia man aorakia ae te mataki. E aki ti kaurea mataia ba ana noraba, ba E itaramata ma ngaia ao a kaonrakeaki ni boiararan mimitongin Iesu ao a on nanoia n tangiran te Atua, ao e reke irouia te maiu ae e boou ma te korakora ae bati , n te aro are aki kan ongo ana taeka Iesu are a na aki taekina te bai teuana, ao a mananga ni kaongoia aomata nako.
Iai kawaira ni bubuti Ana nanoanga Iesu aio ni karekea te kamaiuaki ao te kabouaki, are E anganira Iesu ba te Bau n Nanoanga.
Tia kamangorira ao n aki mama ao man ninikoria ni kakaraoa ara Bau n Nanoanga n te aoa 3 koraki, ao n tai ake ti riai ni bubuti iai Ana Nanoanga.
N ara tai ni karaoa ara bau n nanoanga ao tia katurua taran matan Iesu iaon te kaibangaki ma te nanorinano n tainako ao man butia Ana nanoanga ao te noraaba.
- Details
- Written by Uriam Timiti
Inanon kauouan wikin te Avenete ae ti a tokaria ngkai ao iai teuana te titiraki ae I kan reitaki iai ma ngkami ba; "Ningai te tai ae moanaki iai te bong ae e bou iroura?" Tao tabeman a na kaeka n taku ba ngkana e tang te moa ni moa ke ngkana ngkana e tebe mainiku ke ngkana e nang oti taai." Tao a na tara n eti kaeka aikai ngkana ti tabe n iangoa aron te bong n te aonaba. Ma iroura n tatabenaanira, ningnai raoi te tai ae moanaki iai te bong ae boou ibukira? Tariu ma maneu I taku ba e na moanaki te bong ae bou ibukira ngkana e boou aron ara reitaki ma te Uea ao ngkana e boou naba aron ara reitaki ma tarira ma manera.
Ao tera ngkanne te aeka n reitaki ma te Uea ao ma raora ae na riai ni kabouaki ikai? Tariu ao maneu I taku ba e kamamataki aio nakoira iroun St Ioane te Tia Bebetito ngke e takarua n te rereua ba ti na katauraoa kawain te Uea, n tauni taiani marua ao ni kaboraoi tain tabuki. Aio are bon te wewete nakon te rairannano n te aro ba ti aonga ni butimaea Iesu te Tei nako nanora. A na roko Maria ao Ioteba ni karebwerebwe ni mataroan nanora ni kakaea te tabo ae na bungiaki iai Iesu te Merimeri ao n aron karakinan Kiritimati, ao te tabo ae tauraoi ao ae botau ma are E kakaea te Atua ibukin Natina bon te tabo ae mangori ae akea iai taian kaubai n te maiu aio. Aio bon aron kabarabaran te nano ae kainnaoia te Atua ibukin tauraoira ni butimaea Natina. Ma iai riki te bai teuana ae kakawaki ao aei are ti kona n noria iroua te koraki ake ngaia taan moan nora te Merimeri irarikia Nei Maria ma Ioteba. Nakai bon taan kawakin tibu ake tatauraoi n tantani ni kawakiniia aia tibu.
E na moanaki ngkanne nakoira te bong ae boou ngkana ti tauraoi ni butimaea Iesu te Tei nako nanora ao n anganna ara tangira ma ara akoi ao ni kakoaua raoi ba E na bon mwengaraoi raoi ngkana ti tobaia. Ti na riai ni karekea te rau ao te raoi inanora inanon ara reitaki ma tarira ao manera ba ti aonga ni kona ni kakoaua rokon te bong ae bou iroura are bon bongin ana kamaiu te Atua nakoira.
- Details
- Written by Taranieta
E taku nakoira Iesu n te bong aio ba iai ake ana tatakuraea arana ma a na bon aki rin n te abanuea are iroun Tamara are i karawa, ibukina ba aki m’akuria nanon te Atua.
E kanga arora ni makuria nanon te Atua?
Ngkana ti ongo Ana taeka Iesu ao iai te bai are e na riki moa iroura ba ti aonga ni makuria nanon Ana Taeka Iesu.
Te bai aio ti ataia ba bon te tangira ni koaua inanora are bon karinan ao kamaekaan Iesu inanora ao ngaira ti anga ngaira n onimakainna, ao ni maiu inanon Iesu.
Te tangira aio e kakiriweira man aki karauira ba ti na konamaki ni makuri ba e na reke ae e tamaroa nakoia raora n te maiu iaon te aba ao n te maiu n tamnei n akea boona.
Aon te aba e na bainingareira ba akea boora mai iai, ma ti ataia ba Atuara ae Iesu inanora, bon ngaia kanuangara are E na kairira nakon te Abanuea are i karawa n aron ana taeka nakoira n te bong aio.
Ngkana ti ongo Ana taeka ao ti tataekinna ma n aki makuria, ao nanona ba akea inanora te tangira ao akea Iesu inanora ao ti na bon aki kona n rin i karawa ba akea ae e na kairira nako iai.
N tai tabetai ao e na uarereke inanora te tangira aio.
Ti karab’a Iesu ba e a kaman nora te itera aio ao E kataua ba E na rin inanora n te Eukari ae moan te Tabu ba E na kaura ain Ana tangira ao ni kateimatoa inanora. Ngkana ti katoa bong n Nakoina ao ti namakina rikiraken ara tangira.
Ngaira ake ti tuai kona n reitaki ma Iesu n te Eukari, ai kamira aron ana baintangira nakoira ba E kab’aroa iaora ao inanora boiararan mimitongina...Ana Tangira ..n te tai are ti tekateka ni kainababu irarikina, ao ti kakorakoraki ni karaoa Nanona.
Ngaira ake a ura ain Ana Tangira inanora, ti riki ba taan babakoa Iesu man kakukureia inanon boiararan ara tangira Nakoina, ae te bai ae mamaten Nanona mai iroura. Ti kamotirawa man korakaina ao marakina ao E kimareirei Nanona iroura iai.
E na bon aki kataua Iesu ba E na aki karokoira n te abanuea i karawa ngkana ti karaoi makuri n tangira nakoia raora, n te korakora mai Irouna, ao ngkana ti kakawaria n te Eukari ae moan te Tabu, n anga nanora ba ti na kabebetea n akoia man babakoia ao ni kabaroa ni koaua ara tangira Nakoina.
Tia reitaki n ara bubuti nakon Iesu ba E na buokira n kakauram’aka ain Ana Tangira inanora ngkana ti kawaria n te Eukara ae moan te Tabu n tainako.