Kanan Tamneira...

Details

Te wewete ae kakannato inanon maiura aio bon te irira Iesu ao te riki ba te tia kakoaua ibukina nakoia aomata nako. Te irira Iesu bon te karaoa Nanona ae tangiria ao te maiu inanon te karatia n aia iango, n ara taetae ao ara makuri. Ma te irira Iesu e na karira nakon te ninikoria ao te teimatoa n riki ba taan kakoaua ibukina nakoia aoamata nako.

Te bai naba ae kakawaki ba ngkana ti na riki ba taan kakoaua ibukin Iesu ao ti na riai n tauraoi ni bainikirinaki ao ni kammarakaki ni katotonga Iesu are e tauraoi n anga maiuna iaon te kaibangaki ibukin kamaiuaia aomata ni kabane. Inanon uouotan ara kaibangaki n riki ba taan kakoaua ibukin Iesu ao ti onimakinna n taai nako ba E na raonira te Uea inanon taian kataki ma taian kammarakaki ao E na bon anganira arora ni kabane aika ti na taekin ke ti na karaoi ao boni Ngaia ae E na makuri inanora. Ti na aki raraoma ba tera ae ti na taekinna ma te bai ae kakawaki bon ti te onimakina te Atua ba E na anganira ana karea aika ti na kainnanoi ibukin karaoan Nanona. Ti na riki ni koaua ba taan kakoaua ibukin Iesu ngkana ti maiu inanon te itiaki, n te aro are ti kona n riki taian tirotaam aake a na kaota Bannan ni koaua Iesu. Ngkana ti maiu inanon te bure ao ngkanne a riki rabatara aikai ba bannan te riaboro. N ara kekeiaki ni kaota Bannan ni koaua Iesu, bon Nei Maria te tia buokira ao n reireinira. Ti kainnanoa ngkanne ba ti na kaboui arora n reitaki ma tinara Nei Maria n ara tangira ao ni kateira ni kaburei maiura nakoina ao ni bubutia ana buoka ao ana kakawakin n tai nako.

Details

Aio bon te kibu n taeka mairoun Itaia (55:6) are I  kan tibaia ma ngkami ba kanoan ara katauraoi inanon kaukan ana ririki te Ekaretia are te Avenete. Bon aio ara tai ni kariaria ma te onimaki ni butimaea rokon te Metia ke te Tia Kamaiua aonaba.

Tariu ma maneu ko a ti ni iangoia ba tera raoi nanon ae ti na manga kunea te Uea ngkai e kai reke ba e kaan? I taku ba ngkana ti ata raoi nanon te kibu aio ao ti na kona n nora kakawakina ibukira. N aiaron te kaubai teuana ae moan te kakawaki are e taunaki n te tawana ao ti riai ni kabanea korakorara ni ukeria ni karoakoa ae e reke. Iesu bon Ngaia te kaubai teuana ae moan te kakawkai are ti na kabanea ara tai ni ukeria. Ao ti na kanga ni karekea? Ti na kauki nanora ni butimaea ana tangira ae moan te bati i ibukira ao riki ni kainaomata Taimneia ae Raoiroi are ti a tia ni bane n anganaki n te Babetito. Ba ngkana e inaomata ni koaua te Tamnei ae Raoiroi i nanora ao ngkanne ti na namkina ni koaua URAN ana tangira te Uea inanora ao iroura. Ti na tauraoi ngkanne ni kaeti maiura nakon ae tangiria te Atua ao ti na tauraoi naba n tanrikaki nakon te Uea n te rairannano ae kororaoi. Ba E bati n nanoanga te Atua ao E kan anganira n tai nako kororaoin te maiu iroun Tamneina ae Raoiroi.

Tera ngkanne nanon ae e 'kai reke te Uea ba E kaan'? Tariu ao maneu I taku ba bon aio te makoro n taeka ae moan te kakawaki ibukira. Ba bon irou, nanon ae 'e kai reke te Uea ba E kaan' bon te TE TAI AE NGKAI. Ti aki nakon te ingabong ke n te wiki ae na roko ke ningai; ma boni NGKAI. N tabetai ao ti taku n ara iango ba e kiriaria ao ti a rairi nanora nakon te tai ae na roko. Ti anganaki inanon maiura i aonteaba ara tai ni motikia ba ti kan mena ke ni maeka ia nakon te tai ae na roko- te maeka n tai nako inanon mimitongin te Atua, ke te maeka n taai nako inanon te kabuakakaki i moone. Te Atua boni Ngaia Uean te Tai ao e uki nakoira ana karatia ni kamaiu te Atua ngkai ti maiu i aonteba ao e na toki n te tai are ti weteaki iai. Ba n ara tai ni mate ao ti na nora Iesu ba Tia Moti are E na anganira muin ara kekeiaki i aon te aba. E bon rangi ni kakawaki ngkanne iroura ba ti na riai n ukera te Atua ngkai E kai reke ba E kaan.

Details
A bon kan kamanea Iesu nake Tatukaio n titiraki ba antai buun te aine are e bunia taari ake a maiti iaon te aba,  ngkana e roko i Karawa.
E kaekaia Tatukaio Iesu ao e kangai  "Ngkai kam taekina mangautia mate  ao tao kam tuai  ni wareka ana taeka te Atua nakoimi, ba E kangai, bon Atuan Aberaam Ngai, ao Atuani Itaaka, ao Atuani Iakoba. Ao te Atua bon tiaki Atuaia  akana a mate ma bon Atuaia akana a maiu."
Aio bon te titiraki ae ti noria ba bon te bai ae akea nanona ba e aki kariki uaa ao te titiraki ae e mate ba bon ti te titiraki ni kan kauntaeka ao ni kam'am'ane.
E katabetabeaki aia iango Tatukaio aikai ma te kan kam'ane, te kan rabakau, te kan kaotia ba a wanawana nakon Iesu ao tao a maiti riki. Ibukin nanoia aikai ao ti kona n iangoia ba tao e bane iraua aia aoa n iangoi ao ni maroroakini aia iango aikai ma raoia, n akea te bai ae e kariki uaa ae a karaoia.
E karewerewe n tainako te kauntaeka ao te kan kamane ke te kan ngare ni maiura aio are iriana te aoriori n aki karaoa te makuri ae manena.
N tabetai ao ti ataia ba akea nanon te iango ma te kauntaeka are e ti rin ibuakona ke ti bon tabekia ao e kanganga te kerikaki mai iai.
E tataningaira n tainako te Atua ae Atuaia akana a maiu n aiarora, ba iai muiokoara Irouna. 
Ti bon aki kan tabe Irouna ao tiaki karinea  ba Atuara ngkana ti iangoi iango aika a mate ke ni karaoi makuri aika a mate n aki karikiua.
E tuangira Iesu n te bong aio ba ti riai ni kabanea ara tai aika a mawa, ni wareki Ana taeka te Atua nakoira, ba a na bon reke iai kaekan ara titiraki iroun Atuara ae Atuaia akana a maiu.
Maiura aio bon te maiu ni buaka ao ngaira ana taan buaka te Ekaretia.
Maitira riki te ibuobuoki are e na reke n te buaka aio ngkana ti reita te buaka n tainako n ara korona, te Bau n Nanoanga ke tataro aika a uarereke, imarenan taai ake tiaki tabe iai ke e raroa ma ngaira Ana Taeka te Uea.
Ti a butia Iesu ba e na kaotaira ao man kauringira n tainako ba ti na butaki rikaki man iango ao makuri  aika a katabetabe n akea bonganaia ao ti na butia te korakora ni karaoa anne n tainakioi. Ti a butia Iesu  ba  E na karekea katabean ara iango ma ara makuri aika ana buoka ana iaon te aba inanon maiura ngkana a mawa tabera..

Details
Te bong aio bon te Toa ae Iesu Kristo te King ao aio naba tokin te ririki n te Ekaretia ba e a moanaki te ririki ae e boou nakon te ingabong.
Ningabong ao e a bon moanaki te Avenete ao ai bon ara tai ni manga kaboui nanora ao maiura ba ara baintangira nakon Iesu te Tei Ara Uea.
Aio naba ara tai ni kaboui ara motinnano.
E kauringira Iesu n te wareboki n te bong aio ba ti na tarai riki aron iteran maiura ni kabane ba ti aonga ni moana te maiu ae boou.
E kauringira ba iai bai ni maiura aika ti na kekeiaki n taratarai raoi ba muina ao ti reke ibuakoia nake a na kabuakakaki ngkana E a kaokoroia ana tibu Iesu nakoia ake E kinaia ao E aki kinaia.
Tangiraia ao nanoangakiia aika a mangori, bon kimareirein nanon ara Uea ae Iesu ao e kaota anne n aron rokona ni mangori ibuakora.
Ti na kanga n butimaea ao n tob'a Iesu te Tei ae E mangori ibuakora n te Kiritimati aio ngkana tiaki kan kinaia man tabeakinia aomata aika ti kaitibo ma ngaia aika a kainnano, akea kanaia ke a aoraki man kananoanga? Ke ngkana a teimatoa ni buakaka nanora nakoia ara kairiribai?
Ti a butia Iesu ba e na buokira ni kamangorii nanora n tainako, ba ti na aki baina te kamoamoa n aki kan reitaki ma aika a kananoanga man mangori, ke n aki kan kabanebuakai ara tai ni buokia aoraki ma mauku ke buure ake ti kaitibo ma ngaia, ke n nanoangaia ma aomata aika a tiku n ti ngaia, ke ni bon aki kan reitaki ma raora ba iai aki raun nanora n aroia.
 Ti a butia Iesu n te tai aio ba e na kauki nanora ao matara nakon iteran maiura aika e nanokawaki iai ke e aki kukurei iai ba tiaki karaoa ae e raoiroi.
Ti a butia Iesu ba e na buokira n ara motinnano aika ti na iangoi ni bita maiura inanon te ririki ae boou ba ti aonga ni butimaeia n tobaia ni bungiakina ba E na ebiebi inanon ara Tangira ibukina ao E na kaonrakeira ni m'aitin riki Ana Tangira n tainako
E taku ana taeka St Baraniko ba  ngaira ni kabane ti kona ni bane n roko n te maiu ni Kiritian  ae e tabu, n aki kangai ba tera aron maiura ae ti mena iai  ke tera ara makuri  aika ti muiokoaki iai.


. .

Details
Iai te kamimi ae ti aki kona ni kabarabara n tainako ba bon aron te namakin are e reke irarikin te aomata ae tangira te Atua.
E moamoa riki aron namakinan aio irouia ataei ake a kaman namakina aron te tangira ba a kukurei ao a kimareirei inanon bain are a taraa matana ao e butimaia ma te tangra.
A bon namakina naba aron te mengabuaka irarikin te aomata are akea te tangira irouna ke akea kubarakiia irouna ao a bon rawa ma n aki kan nakonia ke a bon tang.
Ai bon arora naba ngaira ikawai, ba iai te namakin ae raka man kakimareirei irarikin te aomata ae tangira te Atua are ti namakinna ao iai te mengabuaka ao te aki rau irarikin te aomata are e aki tangira te Atua.
Inanon ara tai n rawawata, ao ti kunea te rau iroun te aomata ae tangira te Atua ma e aki reke tokin nanokawakira ao e aki kona n reke te rau irarikin te aomata ae e aki tangira te Atua.
Inanon te reitaki n tataro man nebonebo ao aio te kamimi are ti namakinna ba ti mena inanona ao ti baruia n tainako.
Ti ataia ba te namakin aio e reke mai irouia aomata aikai ake raoia Iesu, inanoia n tainako, ao ti namakina te tangira are bon Iesu irouia.
Ma e a bon rangi ni kamimi riki aron rokon Iesu inanora n te Komunio ba e riai n karekea te namakin aio n tainako ba are e a roko Iesu inanora ao ngaira i Nanona.
N tabetai ao tia bon maninga naba taekan ara Uea are e roko inanora, tabeua te miniti ke bon te tekan are imuina ao e a manga roko iroura te un ao te kairiribai ke bon te maninga taekana,  n te aro are e aki kona n namakinaki te tangira, irouia aomata.
Ai kabaiara ngaira ba ti kona n botaki ni koaua ma Iesu ni kororaoin te kimareirei ni katoa bong ngkai e kataua ba e na maeka irarikira ao ni kawarira ian umara.
Ana bon bakantang Ana Reirei Iesu ma aomata ake rimoa ake a ti kona n ongo taekana ke n tarai matana, ma a aki kona n namakina katokin te kimareirei n aron ae E kataua nakoira Iesu ngkai ba E na roko inanora n ti teuana ngaira ma Ngaia.
Ti na bubutia te Atua ana karatia ba ti na kona n tangira Natina ae Ana Rikitemanna ae Mamaten Nanona,  ae Ana Tangira, are E kataua ba E na anganira ni katoa bong.
Ti na butia te Atua ba E na anganira te katauraoi raoi n tainako ni butimaia ni katoa bong ba ti na rikirake n Ana Tangira anne n onikaki n riki ba Oin Ana Tangira.
Ti na butia te Atua ba E na anganira Ana karatia ba ti na aki kabuaa man bakataea Ana Tangira ae E anganira ni katoa bong, ba ti na maeka ma Ngaia n tainako.
 
  1. E karaba ni karemo te oi n natinuea
  2. E karaba ni karemo te oi n natinuea
  3. Motikan taekau Iroum, Au Uea ao Atuau
  4. N te Miniti aio
  5. Te kakaonimaki inanon baai aika uarereke