Kanan Tamneira...
- Details
- Written by Uriam Timiti
E kabaia te aomata ae ata kainnanona ma mamarana ba ataakin aio e na reke ba kanga aan, wakaan ao kawain karekean baai ni kabane aika a tamaroa. Ba ngkana ti ataia ae iai te bai ae ti kainnanoia ae ti aki kona ni karekea i bon iroura ao aio ae na kairira ba ti na riai n teimatoa n tataro and ngkana ti teimatoa n tataro ao ti na namakina te bitaki nakon te nano ae mangori ao e na reke te tataro ba kaubain tamneira. E na rikirake te maiu ni kukurei iroura ao a na oneaki ara tataro nakon te katituaraoi n taai nako n noran ana kamimi ma ana tangira te Atua nakoira.
Arora n tataro aio inanon te koaua ao te onimaki ba e ongora te Atua are E a Kaman atai kainnanora nako, e na bon kakorakoraira ao a na bon akea te bai ae kona n ekinakoira. Ti na moanna n aki manga tangiri baika akea manenaia ao ti na rikirake n aki kona ni barannano n ara tataro ba ti ataia ba ti kainnanoa ana buoka te Atua n taai nako.
A na reke bai ni kabane aika tamaroa ngkana ti ataia ao ti kaotia ba ti kainnanoa ana buoka te Atua n taai nako. Ni banen nanora ni kan kaniira ma te Atua ibukin kainnanora ao E na katikiira ni kaniira te Atua nakoina nakon ana karea ma ana karatia ba uan te nanorinano.
Tariu ma maneu e koaua ae ti kainnanoa te tataro n airon te amarake nakon rabatara. Irarikin karekean kainnanora ngkana ti tataro ni bubuti, te bai ae kakawkai riki ba bon arora n tataro n aki barannano inanon ataakina ba ti kainnanoa ana buoka te Atua n taai nako. N aiaron te tia moti ae buakaka are waekoa ni karekea te eti nakon te aine ae akea buna ibukina ba e rawa ni kakirueaki, ao tera ngkanne aron te Atua are onrake n te tangira ma te nanoanga ni kaekai ara bubuti? Ti na teimatoa n tataro ma te aki barannano ba ti aonga ni nnim n tai nako ma te Atua are Ngaia ae a mananga mairouna taian raoiroi ma karatia aika a na kairira nakon te maiu ae kororaoi.
- Details
- Written by Uriam Timiti
E anganira te Uea n te bong aio te reirei ae kakawaki ae ti na kona iai ni karekea te maiu ae aki totoki. Ao aio e na bon reke ngkana ti kakeaira i bon iroura ao ti tabeakiniia tarira ma manera. E kamatata ikai te Uea ba ti na karekea te maiu ngkana ti maiuna te Tangira n aron are E a tia n tangirira iai Iesu. Ba ngkana ti maiuakina te Tangira ao ngkanne bon iai te bai ae ti anga nakoia tarira ma manera. Te Tangira bon te kona n anga nakon temanna, ao e na bon tabanin ao ni kororaoi te Tangira anne ngkana ti namakina te uruaki imuin te bai ae ti anga ke te makuri ae ti karaoia nakoia tarira ma manera. Are nanona ngkanne ba ti ngkana ti maiuakina te Tangira ao ti bon kaeaira i bon iroura.
Te bai ae aki toki n ringa nanou ni maiuakinan te Tangira bon te uruaki. Ngkana iai te bai ae ti na tibaia ma tarira ke manera ao e na bon riai n uruakaki te bai anne. E kaota te kantaninga ae kakanato aio Iesu nakoira inanon te Eukari are bon Rabatana ae urukakai ba e aonga ni kona n tibatiobaki nakoia aomata aika bati. E uruakaki Rabatan Iesu iaon te Kaibangaki ba E aonga ni kabarai ara bure mani karokoa iroura ana Tnagira te Tama.
Inanon maiura ni kekeiaki n irira Iesu, ao bon aei te moani bai ae moan te kakawaki. Ba ti na tauraoi n taai nako n uruakaki ibukia tarira ma manera. Inanon uoutan ara kaibangaki ao ti kauringaki n taai nako ba ti na riai n rinanon te uruakaki ba ti aonga n rooti maiua tarira ma manera ao ni karekea te maiu ae aki totoki. Ngkana ti kona n tabeakini moa kainnanoia tarira ma manera ao tiaki ngaira moa ao ngkanne ti na mimi ba a na bon bane n reke bai ni kabane aika ti kainnanoi. Ti bia aki katotonga bun Roota are e tanrikaki n tabeakini ana bai ake a na tiku ao tokina e riki n atibu. Ba ngkana e moani bai tabeakinan rabatara aika mkamka ao nanona ba ti bon kabanebuakai ara tai n te bai ae na mauna ao ti na kabua te bai ae aki mamauna.
- Details
- Written by Uriam Timiti
E taekinna Etekiera n te bong aio aron te maiu are roko n taian aroka ma kai n amarake ake a tebokakai n te raanga n ran are baro man ana temboro Uea ao n toki i taari.
Iai bai aika uoua aika e teke iai nanou man te rongorongo aio ba teuana- ana Temboro te Atua boni ngaia te tabo ae ranga mai iai taian kamaiu nakoia aomata nako. Ti riai ngkanne ni kawakina tabun ana Temboro te Atua ba e aonga n teimatoa n reke ibuakora te tabo ae na koburake ma iai te ran ni kamaiu. Ti riai naba ni karinea ana Temboro te Atua ao n aki karaoi makuri aika a na urua mani kaakea kakannaton te umantabu.
Te kauoua ngkanne bon arora ae ti na kona iai n rotaki ke n tebokaki n te raanga n ran ni kamaiu. N aiaron te raanga n ran are baro man te temboro are e tei iaon te maunga, ao ngaira ngkanne ti na bon ni baroaki n te ran ni kamaiu ngkana ti mena n te tabo are rinano riki nakon te koburake n ran. Nanona ngkanne ba ti na ti kona ni kamaiuaki n te raanga n ran ni kamaiu aio ngkana ti baina te nanorinano. Ti na bon aki kona n rotaki n te ran ngkana ti baina te nanorieta.
I taku ba tibangara naba ae kakawaki man kanoan taian wareboki n te bong aio bon aron noran ana kantaninga te Uea ibukira n tatabemanira. Inanon te babetito ao ti a tai iai ni katabui nanora ba ana temboro te Uea. Kamaiuara bon kawakinan itiakin ana Temboro te Atua ake bon nanora n taai nako. Ba ti bane ni kamaiuki ngkana E maeka ni koaua I nanora te Atua. Ma ti na ti kona ni karikirakea te maiu aio inanora ngkana ti kona ni manga tibaia nakoia tarira ma manera. Bon nanon te Atua ngkanne ibukira n tatabemanira ba ti na manga kona naba ni kabaroa te ran ni kamaiu aio ma ana temboro te Atua ake bon nanora nakoia tarira ma manera ni kabane. Ngkana ti baina n tai nako te nanorinano ao ngkanne ti na bon teimatoa ni karekea iroura te ran ni kamaiu are bon Iesu inanon Tamneina ae Raoiroi.
- Details
- Written by Uriam Timiti
Aio te tibatiba iroun Akorita Teebanako Savili are e a tia ni kabanea itiua te ririki n te Kura n Tama i Biti ao ni karekea ana beeba ae te Bachelor of Divinity. E karaoa ana kooti are Te Maiu ae Onraken te Maiu ma kain St Padre Pio i Suva ao e kainaomataki n te Tabati ae nako, 6 Nobemba, 2011.
Mauri tariu ao maneu n ana tangira te Uea.
I a bon reita banami ni kangai Alleluia!! nakon te Uea ae Atuara ngkai E kona ni kaota mimitongina ni baika E tangiri ba ti na karaoi i Bukina. E raba te Uea. I bon rangi ni kan tibaia nakoimi ae ana Tangira te Uea e kona ni kauma ke ni urua ana makuri ni kairiribai te riaboro. Moan te kakawaki naba irou ba N na tiba aron kinakin ana tangira te Uea ae i kakoaua ba akea tiana.
Tebongina i main ae I kainaomataki ao e tuangai Uriam ae ti na tutia i Nabua ao e karaoaki naba te kainaomata imuina. Ngke e tuangai te rongorongo anne ao man te tai anne are e a bon tena naba ribakin Uriam irou. E a roko te iango are kanga e taumatoai ba N na kainnaomataaki ao a maiti riki. I kakaea te anga ae N na aki roko i Nabua ma te Tamnei ae Raoiroi E a bon aki kan tataninga ngaia ae E kairai nakoni bai ni kabane. Ngkanne ngke I a roko n ana auti Uriam ao au kairiribai e rangi ni korakora; kanga bon te bai ae rangi ni kamimi aron te buaka aio.
Aio te buaka ae kanganga arona ngkana akea aika a buokiko ao ngkana akea naba nanom iai. Ngai irou e bon rangi n ringa maeu te kainaotama are e a tia n nako ba e kaotia te Uea ae n ti tabeua te teekan (second) ao "ko kona kinai (te Uea) ni koaua iai". Aio e tibaia Uriam ma ngaira imwin te nebonebo. Ao e taku nakoiu ba "ai kamimira aron te Uea nakoira ngkana E na rineira ba E bon kakaoka ana banna are iroun St Betero ngke e kaakea Iesu teniua te tai. Ma ngke e tang te moa te kateniua n tai ao kam ataia ba tera ae riki? N te tai anne Betero e tara Iesu ao Iesu e tara Betero. Mani kaitiboon mataia anne ae e aki reke teuana te miniti ao Betero E rangi ni uruaki n ana makuri are tia ni kaakea Iesu."
Ao anne are I taku ngai ba e riki nakoiu ba ngai ae I tuatua ba N na kooti ao ngke e a manga bane au kooti ao I a manga tuanga Uriam ba nningai tain te kainaomata? Ma ngke e a bo taina ao I bon katotonga raoi Betero n ana makuri.
Ngaia ae I riai ni karabaraba nakoia kain St Padre Pio ba a tia ni katauraoai ni koaua ba N na riki ba ana tia beku te Uea ni koaua.
E raba te Uea are Uean te Tangira, te Akoi ao te Nimamannei, Alleluia! Alleluia! Alleluia!
- Details
- Written by Uriam Timiti
Ngkana ti rairi nanora ao ti kekeiaki n irira Iesu ao bon iai temanna ae rangi aki kukurei iai ba bon te riaboro are e namakinna ba e nang bon aki tokanikai iroum. Ti riai ni kakoaua ae n te tai aio ao e na bon kabanea korakorana te riaboro n iangoia ba ko na bon aki bua mairouna.
Teuana te katei ae rangi n tamaroa inanon ara kekeiaki ba ti na bubuti n taai nako ba ti na kawakinaki ao a na katanaki tibangara ake E a tia n anganira te Uea. Iroura ngaira kain te chraisamtic ao riki irouia ake a tabe ni kooti n te Maiu ae Onraken te Maiu ao e bon rangi ni kakawaki n taai nako ba ti na bubuti ibukia tarira ma manera ba a na kawakinaki ao ni katanaki.
E kamimi ba e rangi ni korakora riki ana makuri n urubai te riaboro nakoia aika a kooti ao a maiti ake a tia n aki kainaomataki ibukina ba e a bon roko te riaboro n urua te tibanga ae tamaroa are a nang karekea. E na bon kaoti ana urubai te riaboro n anga aika bati, n aron te kairiribai ae a bon roko naba, ke te un inanon te utu, ke taian ka-anagbuaka aika a ti kaoti naba. I taku ba ti reireinaki ikai ba te kabanea ni bai ae rangi n ribaia te riaboro ba e na reke iroura bon kainaomatan te Tamnei ae Raoiroi. Are nanona ba te bai ae na urua ana tautaeka ke korakoran te riaboro i aonteba bon mamakurin te Tamnei ae Raoiroi.
Tariu ao maneu ti na bubuti ba e na kawakinira te Atua man ana kamane nako te riaboro ao ba ti na anganaki naba te korakora ni buakana te riaboro n ana waaki ni kabane. Ti na riai n tatarara raoi ba a na aki anaaki mairoura ana baintangira te Atua ake E a tia n anganira ba muina ao a na riki ni matebuaka ara kekeiaki ni kabane. Ba ngkana ti karaoa ae buakaka ngkai ao ti na ataia ba a bane ni bua taian atamroa ao te raoiroi ake ti a tia ni karekei. Ti na bon aki kataua te riaboro ba inanon ti tabeua te miniti ke te teekan ao a na bua mairoura bai ake ti a tia ni kekeiaki ni kaikoi inanon te tai ae maan. Ngkana ti mamara ao ti na riai ni waekoa n ataia ae bon te riaboro ae e kan urui man kabuai kanuangan ara kekeiaki. Ti na bon aki kataua te riaboro ba e na tokanikai ao mani ngareakinira ngkana ti kataua te bai ae ti karaoaia inanon tabeua te teekan ba e na kabuai baai ni kabane mairoura.
Ti na aki toki bubuti n tai nako ba ti na katanaki inanon Raran Iesu ae te Tibu te Tei ae kamaunai buren aonaba ni bane. Ti na bubutia naba tinara Nei Maria ba e na katoka iaora ana rabuna ni katantan ba ti aonga n aki toki ni kawakinaki inanon ara kekeiaki ni karaoa Nanon Natina ae Iesu.