Kanan Tamneira...
- Details
- Written by Uriam Timiti
Iai niman ateinimane n te kura n tama are te PRS ake a angabeba n te Kanimabong n te wiki ae nako ; aman (4) aika e reke irouia te Diploma of Divinity ao temanna (1) are reke irouna te Bachelor of Divinity. Ni kaotan te boutoka irouia ara koraki ni Katorika i aon Biti ao a bon maiti ara koraki ake a roko ni kaea te tutia n anga beba aio.
Inanon te bong n angabeba ao bon iai teniua tibangau aika reke ngke I tabe ni iangoia raoi ba tera raoi nanon te angabeba ibukia taan kata te nakoa ni Berebitero. Te moan tibanga bon kaekan teuana te titiraki ae I tabe n iangoia ae kangai; "Tera bukina ngkai E rineia ana Abaotoro Iesu?" Ao kaekana are e reke ba E rineia Abotoro Iesu ba taan kairiri ao taan reitanako are E a tia ni karaoia. N au iango ao I taku ngai ba e reitaki nako te makuri irouia Abotoro are mairoun Betero inanon te Nakoa ae Tabu. Are nanona ngkanne ba Berebitero boni ngaia Abotoro are a na reita nako ana makuri Iesu.
Te kauoua n titiraki are roko irou e bon kangai," Tera aroia Abotoro ao (Berebitero) ni kanakoaki iroun Iesu?" Ni kaekana i nanou ao E kanakoia ana Abotoro ao Berebitero Iesu ma baai aika teniua:- 1) te kauniwae; 2) roon (kabaean) nukaia; ao 3) te eko ke te kai. Ao ai kakatekera te aro ni kanakoaki aio. Tariu ao maneu I taku ba ngkana ti karaua raoi ni kananoi baai aika teniua aikai ao ti na kona n ota raoi iai ba tera nanon te nakoa ni Berebitero.
Te kateniua n tibanga are e reke irou bon aroia ataeinimane ake a bane man te PRS ba ai tera ae a na karaoia ngkai. I taku ba te bai ae na riki nakoia ateinimane aikai e na bon titebo ma aroia Abotoro ma reirei imuin maten ao mangautin Iesu. Ba e ngae ngke a bon tia Abotoro ni irira Iesu n te tai ae maan ao man tia n ongongora irouna ao E noria Iesu ba a bon tuai n tauraoi ba iai riki te bai ae a kainnanoia. Ao aio are ti bane n ataia ba te Tamanei ae Raoiroi. A na tataninga ngkanne ateinimane aikai nakon te tai ni katabu are a na kaonrakeaki iai iroun te Tamnei ae Raoiroi inanon te takaramentu ae te Nakoa ae Tabu. Ao mai ikanne are a nang kona iai ni waaki ni manga reita ana makuri Iesu i aonteaba. Ti na reitaki n uringiia ara ateinimane ao ataeinaine ake a tia kaburei maiuia nakon te Uea ba a na anganaki te kakaonimaki ao te ongotaeka ni karaoa muikoaia are bon reitakin ana makuri ni kamaiu Iesu nakoia aomata ni kabane.
- Details
- Written by Taranieta
E karikira te Atua ao e anganira ikeikena ae Tamneina ao ti maiu. Ti ataia ba nnera ni koaua bon karawa, irarikin te Tia Karikira, inanon te maiu n Tamnei. Are nanona ba bon ngaira natin te Atua aika tamnei inanon taian rab'ata aika a mamate. Ti riai ni maiu n te maiu n tamnei n tainako inanon rab'atara aika a mamate.
N te bong aio ao ti kaongoaki aroia aine ake kibono ake tengaun.
Ti bon kona ni kabotauia ma ngaira, te utu ni Kiritian ni kabane, n te aonnaba.
Iai ibuakora aika a teimatoa uram'akan aia taura n tainako ba iai aia b'aa aika a tauraoi n tainako ba kauran aia taura ao e teimatoa n otanako. Nakai ake a teimatoa inanon te maiu n tamnei ao e otam'aka otaia n aroia ni maiu n tamnei, n aron te maiu n tangira, n taetae n akoi, n ibuobuoki ao kanoan te maiu n tamnei nako, ake a teimatoa ni kakaonimaki nako iai, ni karokoa e roko te tia iein, aia tangira ae Iesu.
Iai naba ibuakora, aika aiaroia aine ake e bane aia ba ao otan aia taura e a mate, ao ngke e a roko te tia iein ao a biriaitua ni kakaea aia ba ma e a aki kona n reke ba ain taian tabo ni bob'ai.
Aia taura a bon tangira timtimin te b'aa ba e na karekea te ura ao te ota, ake bon makuri n te maiu n tamnei n aron te kaioki, taian taeka n akoi, te ikabarabure, ao makuri n te maiu n tamnei nako, ake a na manga kona ni kaona aia batoro ni baa ba e na aki toki uram'akan aia taura.
Ti a butia Iesu n te tai aio ba e na anganira te nano n aiaroia kibono ake a wanawana man kaikoa kaubain tamneia ao n uramaka aia taura ma te kakaonimaki n tainako. Ngkana ti namakina uran ara taura ba a memere ke a bon aki ura ao ti a butia Iesu, ba e na buokira n anganira norakin b'ai ake a kamatei ara taura ao n anganira te korakora ni manga karekei timtimin b'aa ba ti na manga kaurai iai ara taura, m'akan Ana Tangira.
- Details
- Written by Taranieta
E maiti riki inanon aran Iesu nakon ae ti ataia.
Aio ana taeka Iesu nakoira n te bong aio ao ti na karaua ni iangoia ba tera ae E nanonna nakoira n tatabemanira nako..
Ti kamaiuaki n Arana, ti tokanikai n Arana, ti kabaia n Arana.....ao e aki toki ikanne iangoana ma atakina ba e na nako riki ara iango iaon Aran Iesu.
Iroun te tia bure ao e tokanikai n Aran Iesu ao a maiti riki baika a reke irouna n aron te rongorongo aio are e na reke ba tibangara n te bong aio.
Man te boki ae "Rinanon Ana taratara Iesu"
"Ia uti n te karebwerebwe n te mataroa. Bon ana tia makuri teuare ana taboniruaa are ti tiku iai.
"Ao aio te amarake, ae e kabuebue, ko riai n amarake ngkai ba ko aki amarake ngke tairiki," e taetae nakoiu ma te akoi.
"Ko rab'a, N na nakoati, I aki maan," I kaeka.
"Ko bon aki ataia ma e a koro m'aitin te koraki aika a tataningaiko i tinaniku. A bon roko man taian kawa aika a uarereke irarikira ao a roko naba man kaawa aika a bubura, ao bon iai naba tautian Roma ibuakoia," e kaongoraeai.
"N na amarake teutana ao I a otinako naba nakoia. Ngkana ko kona, ao nako butia ba a na tekateka n rau ao n atong aia tataro tabeua ngkai a tataninga?" I bubutia.
"N na nako,...ma...I m'ain ae I nako, I kona...." e taetae ni karaurau ao man taraa aontano.
"Tuangai te bai ae ko kan butiai, ao ngkana e botau ma nanon te Tama, ao ko na anganki," I kaeka ma te moangare.
"Iesu, I kona ni weteiko n Aram?" e titiraki.
"Ko bon kona, ba e m'aiti riki inanon Arau nakon ae ko ataia," I kaeka ngke e tarai matau ma te moangare, ao n aki ota raoi n nanon te b'ai are I taekinna.
"Ko rab'a Iesu, ma e bon rangi ni kaineti nakoiu. I kona ni kaina te mataroa?" e taku, ngke e kaina te mataroa.
"Tera ngaia, Raraou?" I titiraki.
"Ko ataia, I bon mama teutana n taekinna ma ngkai bon te mm'ane Ngkoe ao au kantaninga ba ko na bon ota," e taku, ngke I tekateka n aki karongoa, ba I a bon kaman ataa te bai are e nang bubuti.
"Iesu, I aki kona n aki tangiria aine nako. Iai buu ae e rangi ni botonnaine ae te toro naba n te tabo aio ao I rangi n tangiria, ma ngkana I nore te aine ae botonnaine ao I a manga tangiria naba. Ko ata te b'ai ae I nanonna?" E titiraki ma moamoana ae e a ura n te maama.
"Eng," I kaeka
"I ataia ae ko katoki aorakia aomata, ao au kataninga ba ko kona naba ni kamarurungai man aio? I bon rangi n tangira buu ma I aki kona n katoka arou ae te wenenibure ma aine nako. I aki tangiria ba e na kitanai buu, ma e ngae ngke I atia ni kakataia n te tai ae e m'aiti, ma ti te bo ma I bon aki kona n toki man tangirakiia aine nako. Ngkana e kunea aio buu ao e na bon rangi ni korakora uruakin nanona. Ko kona n taiaoka ni buokai," e titiraki ma te kantaninga ae e ababaki irouna ba e na buokaki.
"Raraou, ane i bon i nanom ba ko na katokia. E na ti mena moa inanom ni koaua ba ko bon kan katokia," I kaeka.
"Ma bon anne te bai ae I tangiria, I kan karaoia," e kaeka.
"Ao ngaia, ni katoa te tai ae ko nora te aine ae ko mataiakinna, iangoa te maraki are ko na karekea nakon buum ngkana koa kaakeaa. Ao ngkanne manga iangoa te rekenikai nakon te aine are e karaoa te bure ni wenenibure, ao aroia raom ni m'ane ae ana karaoia nakoina ni karebanaia ni kamatea n taian atibu. Nori taian Tua ake E anga te Atua nakon Mote, ao nora aron kamatauningaan te Atua iroum n am makuri nako. Ngkana ko katikui aikai n am iango, ao te tai ae e aki maan ao am kaibabaru aikanne a na bon maunanako, " I anganna taeka ni ibuobuoki.
"Ma n tai tabetai ao e bon riki n te tai ae e rangi n tawe, taian iango ao namakin, a kaman mena inanou imain ae I ataia," e kabarabaraa.
"Raraou, tataro nakon te Atua ibukin te korakora ba ko na tokanikai, ao ngkana e anganiko te Atua te korakora, ao butim'aia." I tuangnga.
"Te tataro, I tuai kataa anne. Tao e na bon karekea ae e raoiroi kataakina," e kaekai man taua bangena n bubuia.
"Te Tataro bon te baintangira mai iroun te Atua. Ngkana arona ba ko bon kakoaua mai inanom ba te bai are ko bubutia te Atua n am tataro e na bon kaekaki, ao e na kaekaki, ngkana te bai ae ko bubuti n am tataro, e raoiroi ibukim. Te Tataro, e aki toki ni katinanikuaki, ma bon rinanon te tataro, are a tibatibaki iai taian baintangira ao taian karatia. Te Tataro bon te tai ae rangi ni kakawaki, ba inanon te tataro, ngkana ko kauka nanom ni koaua, AO E TAETAE NAKOIM TE ATUA. Tataro ao kunea te raoi." I tuangnga ao I katoka baiu iaon atuna.
"Nnang tataro, Nnang tataro," e taku ma te ungannano. "Nnang moanna mangkai," Ao e a moana naba atongakin te Taramo are e kaota ana Tangira te Atua nakoia te botanaomata, (Taramo 41).
I a nakon te ruu are teuana n amarake ao te mmane arei, e otinako ma te moangare n te mataroa, ao n atongi kibun te Taramo 41.
E rin Betero ao e taku, "E rangi n taraa ni kimareirei,"
"Eng, e a kimareirei, ba n te bong aio ao ana tataro, ana bon kaekaki," I kaeka.
Ti uaia n tekateka man amarake ni kainababu ao I tabe n iangoa aron te bure ni kab'akab'akaia m'ane, aika a raraoi nanoia ma a kai m'am'anaaki, aika a taku ba te rabata, e na bon karekea nakoia te kukurei, ao a maninga iai are te kimareirei ni koaua, e ti kuneaki n te maiu n tamnei.
Ai bon wanawanara Tatan ba inanon te taeka ae te TANGIRA ao e kona ni kam'aneia aika a rangi ni m'aiti ba a na tibanako n rangirang, ao ni karaoi makuri aika a kammaira.
Ti a butia Iesu n Arana ae moan te Tabu ba e na buokira n tokanikai n taian kariri n tainako.
- Details
- Written by Taranieta
Aio ana taeka Iesu nakoira ni kabane n te bong aio ao n tainako inanon maiura, "Raraou". E raonira irarikira n taai nako, e weteira ao e kaekaira ao e taetae nakoira Iesu ni kangai, "Raraou", ba e tangiria ba ti na kabuaira inanon Atinibanna, n onimakinna ao ni katukui baai ni kabane inanon baina, ba te rao ni koaua Ngaia n akea kaburena., E rangi ni kan kaotia nakoira ao man tangiria ba ti na kakoaua. E korakora rawawatan nanona ngkana ti aki kan butimaea ae E kan anganira ae bon Ngaia ae Raoraora ni koaua ao Atuara.
E a kaman atai arara Iesu ao e weweteira n tainako man tataninga ma nanona ae e onrake n te kaub'ai nakon Raraona ae ngai ao ngke. E a kaman ataia naba ba ti na ongo banaana ni kan riki ba raoraona ngkai ke ti na aki kubaria ba ti na tabeakina riki moa nanora ao raoraora n aonteaba, ba are e a kaman atai baai aika ti na taekin man karaoi ke n iangoi im'ain ae ti karaoi, ma iriana rawawatan Nanona ngkana tiaki ongo, ke kimareirein nanona ngkana ti ongo ana wewete.
Ma E teimatoa n wewete ma te b'ana ae akea kabotauan tamaroana. N te tai are ti ongo ana wewete iai ao E nakoira man m'anokaira inanon Ana Tangira ae b'aro man buroona, are ti namakinna ma kab'arab'aran te namakin anne ae e bane inanon te taeka ae "Raraou".
Tera ae e nanonna Iesu n ana taeka aio nakoira?
Ngkai Arona ni kabane nakoira, a bon bane ni kabarabaraki inanon te taeka ae "Raraou" ao E tuangira ba ti na katotongnga n tainako. Are nanona ba ti na katotongnga n atonga Raraou, ma te namakin ni kabane ake inanon te taeka aio n aron are E karaoia nakoira Iesu, nakoia aomata ni kabane.
Ma n tabetai ao ara reitaki ma raora, ma ngke ti uarereke ni karokoa ti a ikawai, e bitaki n aki tiku inanon te kimareirei n iraorao ba iai baika a kona n riki n urua ke ni kakiriwea te kukurei ao te reitaki n iraorao. A kakai toki ao a kakai mauna kukureira aikai ao aki teimatoa n aroia, n ara iraorao n aonteaba.
E tuangira Iesu ba ti na aki motikitaekaia raora ba ana bai te Atua te motikitaeka. Ngkana ti motikitaeka ao ti bon motika reitakira ma raora iai ao tiaki kona ni kangai nakoia ni koaua, "Raraou". Ti motika naba ara reitaki ma Iesu.
Ngkana ti kataia n taekinna "Raraou", mai inanora ae e motikitaeka, ao e na otinako ba ti te taeka, ao nanora, are e na riai n onrake ma nanon te taeka aio ni koaua, e onrake n te kewe, te kairiribai, te karekekai ao a maiti riki.
Iai te bai ae a aki kona n anganira raoraora, bon ti Raoraora ao Atuara ni koaua ae Iesu ae e kona n anganira..... te MAIU, n nanona ni kabane.
Ti a butia Iesu n te tai aio ba e na anganira n tainako, te kona ni katuka te motikitaeka nakon Tamara ae te Atua, ao E na botira n tainako ma Ngaia, ao ma raoraora ao ara kariribai ni kabane, inanon Ana Iraorao iroun Tamneina ae e Raoiroi, Ao ti a butia ba ti na kona n iriria ao man onimakinna n tainako, ba Raraona ni koaua ngaira.
- Details
- Written by Taranieta
Te Atua bon te koaua. Te koaua ae e kainaomataira n tainako.
E karikiira te Atua ni katotongana. Are nanona ba arora ae ti bungiaki iai, ti bon riai ni kawakinira iai n tainako ba ti tabu, n Aiarona, ao ti riai n teimatoa n tabu. Man anne ao arora ni maiuakina maiura ao arora nakoia raora, ao nakon karaoan tabera, ti riai ni karaoi naba inanon te kokoaua, te eti ao te kakaonimaki n tainako. E na bon aki bua iai aron tabura are e karikiira iai te Atua, ao ti na kariki uaa aika a maiti ibukin ara Uea ae Iesu. Kaitaraana bon te maiu inanon te kewe, ke te aki kokoaua, are e anganira te maaku ao te aki rau, tiaki te raoi ma te kimareirei.
Natira ma ataei aika a uarereke bon kamatatan te banna anne ao e kakoaua Iesu nakoira ba e tatangiria ataei aika a uarereke, ba aia bai te abanuea are i karawa! Arora ni karikirakeia natira, bon arora naba ni kateimatoa te banna anne irouia ke ni bitia, ake ti bon karaoi man arora aika ti wakin ngkai. Ti nora naba iai arora ni kairiia inanon te maiu n Atua ke te maiu n aonteaba, arora ni kairia nakon te maku ma te bua ke te kimareirei ma te raoi ao te korakora inanon Iesu.
Tiaki kona ni kabaoua te koaua, n rabunna, ni kamangoria, ni kamatea, ni kakeaa taekana, ni bainingareia, ni karereantiia, n taetaebuakaia......ngkai te Atua bon te koaua ao E m'aka ao E tautaeka man tokanikai n tainako.
Inanon maiura ao ti burebureaki n tainako n bain aonteaba aika tiaki taian koaua, ake a bon kaitaraa te Atua ae te koaua. Arora n karaoi bai aika tiaki taian koaua ma te eti, ibukina ba a karaoia naba aomata, ke muina ao ti taekinaki irouia aomata ba tia kakan raoiroi ke n taua te aro, a bon karekea namakinan te maaku, te mengabuaka ao te bua ma te mate iroura, ngkai a urua arora ae e koaua ao e tabu ao a bon kairiira ni kararoaira ma te Atua.
Ni bon te koaua ao n etina, ao ti riai ni maiu ni kimareirei ma Iesu iaon te aba n tainako. Arora ni kamangoriira bon ngaia ae ti na teimatoa iai inanon te koaua ao inanon ana karatia te Atua n tainako.
Iroura ngaira aine, ti maiuakina te kewe n arora ni katokai kabiran matara ma riara, ara tabia, kunnikaira aika a rangi n tamaroa, ara taetae aika a raka aroia.... A rabuna ni karaba ke a bita aron karikara aika a tamaroa ni boin arora. Kanakoakiia bon kaokakira nakon koauan arora ao kamangorakira imatan te Atua, ao okin te kimareirei ma te raoi inanora n rokon ao makurin te Tamnei ae e Raoiroi.
Ngaira m'ane, tu maiuakina naba te kewe ao te aki koaua n arora ni kakabotonimaneira ma ara iango ni kauaia ni kan karakai riki arora ma anuara ma rakara imataia aine ao ibuakoia raora, a bita aron karikara ao te koaua iroura.
A bon bita arora are e karikira iai te Atua. A kararoaa te iango ni kamangoriira ao maiuakinan te koaua i matan te Atua. Kanakoakiia ao okiran arora imatan te Atua bon okiran te kimareirei ao te raoi inanora, ma iriana are kakoauan korakoran ana makuri te Tamnei ae e Raoiroi inanora.
Ti bon kona n iangoi ara makuri ma arora aika n te tai aio, aki koaua ao ti nori ba tiaki kamangoriira iai, ao ti ataia ba a karekea iroura te maaku ao te mengabuaka ao akean te rau ma te raoi inanora ao ni mengara ma tabo nako ake ti nako iai. Arora aikanne ai bon arora naba nakon te Atua ae te koaua are E karikira n katotongana.
E aki toki ni kauringira Bobe Ioane Bauro II arora ba ti na riai n tabu ni maiura. Teuana ana taeka ae e aki toki ni tataekina nakoira ni bane, e kangai. "Fear Not." ke Tai Maku ao e tuangira ba ti na taraa Ioane (8:32) "Kam na ata te koaua ao te koaua e na kainaomatai ngkami."
Ti a butia Iesu ba e na anganira norakin bai ni kabane, e moa man ae e uarereke iaon rabatara nakon aika a bubura, aika a rabuni koauan arora iroun te Atua. Ti na butia Iesu te korakora n teimatoa inanon te koaua n tainako ao e na anganira naba te korakora ao te wanawana ni kairakiia natira nakon maiuakin te koaua n tainako.