Kanan Tamneira...
- Details
- Written by Uriam Timiti
Teuana te bai ae kainnaoia te aonaba n te tai aio bon te Raoi. E bon teimatoa te buaka i marenaia aba ao tautaeka are a tia iai ni bua maiua aomata aika bati n ikotaki ma te koraki ake bon akea aia bure. A maiti naba utu ma tanga aika a tia naba n uruaki ao ni maekanako ibukin taian itabarara ma kauntaba aika bati.
E teke nanou n aron ana taeka Iesu imuin mangautina nakoia ana reirei are e kangai,"Te raoi iroumi". Ti kakoaua ae E taekina aio Iesu tiaki ti teuana te tai ma e bon maiti. Ao tao tera bukina ngkai E katuua taekan te raoi nakoira Iesu imuin mangautina? Tao a na bon kakaokoro ara reke ma ngai irou e bon kaotia Iesu nakoira ba te kamaiuaki ni koaua are E anganira tiaki nakon te rabata ma bon nakon te tamnei. E na reke te raoi bon mai nanora ao tiaki mai kiraroa. Ngke a karikaki ara moan karo iroun te Atua ao ti ongora ba E buabua te tano ao iana, ngke E noria ba e a nakoraoi tein te rabata are E buabuaia ao E ukia ni karina te maiu inanona. Are nanona ba te maiu ni koaua bon te aro ni kaiokaki ma maiun te Atua are inanora are ti a tia ni bane n anganaki. Te raoi ngkanne bon te riki ni katiteuanaki ma te maiu n Atua are inanora.
N te taina ao I uringa ae I a tabe ni kan kabarabara ba tera raoi nanon te taeka ae te Raoi. Imuin te tai ae maan ni karaua ni iangoa raoi nanon te taeka aio ao e a reke kabarabaran te raoi irou ba te aro ni maiu are akea iai te tabeianga ke te maku. Baai aika uoua aikai a reke iroura ngkana ti ataia ba ti a tia karaoa te bure ae kaitara ma banaan te Atua i nanora. Ti na bon tiku ma te tabeianga ao te rawawata ngkana ba ti a tia ni karaoa te makuri ae aki eti. E ngae ngke akea ae norira ma e na tiku iroura ataakin karaoan te bure ba kanga te rekenikai are na kabua mairoura te mweraoi ao te rau. Ao teuana riki ba ti na tiotio nako n aiaron Kain ngke e kewe nakon te Atua ibukin tarina are Abera are e tiringa.
Karekean te raoi bon te kona ni kataua maiun te Atua inanora ba e na kairira inanon maiura, ke te riki n teuana n ara makuri ao maiun te Atuan inanora. E anganira te Raoi aio Iesu mai iaon ana kaibangaki inanon rarana ae ranganako ba e na kaitikira ao ni katabuira. Ti karaba te Atua n ana tituaraoi nakoira ngkai e karekea inanon Natina ae Iesu te kona ni katiaki man ara bure ao te kona ni kainamoataki man taian tabeianaga, maaku ao rawawata ake ti taonaki iai ngkana ti karaoa te bure. Ma ti kakoaua ae bon akea rawawatan ara kairua ao ara bure ae kona n riaon ana nanaoanga te Atua. E na reke ngkanne te raoi iroura ngkana ti kairaki ni banan ao maiun te Atua are i nanora. E na reke te raoi ngkana ti kakaraoa nanon te Atua ao ti kararoa mairoura unin te Atua n airon ae ti ongora n te wiki aio n ana kamaraia Iesu nakoia baritaio. Ngkana ti kairua ao ti na waekoa ni manga kaiaoaki ma te Uea inanon te takaramentu ni Benetenia. Ti na butia Nei Maria ae Uean te Raoi ba e na tataro ibukira ba e na teimatoa te raoi n ara utu ao inanora n te aro ba ti aonga ni kona ni katonga Karawa ikai i aonteaba.
- Details
- Written by Uriam Timiti
Iai te karaki teuana are bon taekan temanna te aomata are mate ao e a manga uti. Inanon ana tai ni mate ao e nora rabatara inanon te ru ni mate n te onaoraki ao inanon ana tai n tiku ikekei ao akea ba e a taonaki n te ota teuana are e ataia ba bon mimitongin Iesu ae kawaria. Iai te titiraki ae ongo ae kangai, "Iai te bai ae ko a tia ni karaoia ibukiu inanon maium?" Imuin te ota anne ao akea ba e a nora tamneina n aiaron are mataku n birim ae oti n te video. E nora aron maiuna ma ngke e ataei ni karokoa ae e a ikawai. Inanon ana tai ni mataku ao e kataia ni kakaea tamneina ae karaoa iai te makuri ae raoiroi ibukin te Uea ma bon akea. Ngke e tia ni mataku ao e a bon taonna te nanokawaki, rarawata ao te maaku ba titebo ma e a ata te bai ae nang riki nakoina. Akea riki nnena ba ti te nako moone. E aki tabara ma e a takarua naba ni bubuti nakon te Atua ba e na anganaki riki ana tai n okira aonteaba ba e na kataia ni bita aron karakinan maiuna ni kabatia te tai ibukin karaoan nanon te Atua.
Tariu ao maneu tera tibangam are reke n te karaki aio? Antai ae na motiki taekara ngkana e a toki ara borau iaon te aba? Antai ae ti na bukinna ibukin te motikitaeka ae na reke iroura?
Iai te koaua teuana ae titiku n au iango are maiura aio kanga bon ara tai ni koroi ara karaki bon ibukira are e na tiku inanon roro ma roro. Ao tera te aeka ni karaki ae ti tangiria ba e na tiku i muira ngkana ti a kitana te maiu aio. Tao e na bane n titebo ara kantaninga ba tera aron taekara ma rongorongora are ti tangiria ba e na tiku inanon taian boki ni korokaraki. Ba ti tangiria ba e na iai inanona karakinan taekara ae ti kabanea iai ara tai ibukin karaoan nanon te Atua. Te koaua are ti riai n noria ba e mena te kainikoroboki inanon baira ao boni ngaira aika ti n a korokaraki. Are nanona ba bon ngaira aika ti n a kona ni baireia ba terana ae na rin inanon ara karaki. Te karaki aio a na bane ni kauarerekeaki n riki ba kanga aiaron te CV are na oti iai ara makuri aika raraoi ake a na karinira i Karawa. Tamaroan kanoan ara CV kanga ai bon ara batibooti (passport) n rin i Karawa. Are nanona ngkanne ba boni ngaira aika ti na motiki taekara man aron tein karakinara are ti na koreia i aonteba. Ti na butia te Atua ana karatia ba ti na kona ni koroi ara karaki aika tamaroa man raoiroi ni maiura aio ake a reke ba kawain karekean iroura kororaoin te kukurei inanon te mimitong i Karawa.
- Details
- Written by Taranieta
- Details
- Written by Uriam Timiti
Ti a tia n anganaki kororaoin te kamaiuaki iroun Iesu ngke E mate ao E a mangauti i bukira. Ti a riki ngaia ni kabane ba naati iroun te Atua. Bon nanon Iesu i bukira ba ti na baibai ma Ngaia irarikin Tamana i Karawa.
Ti kauringaki n te bong ba akea riki te kanikina ae ti na kantaningaia ibukin kamaiuara ba ti are iroun Iona are e kanakoaki nakoia kain Niniwe ba e na uota te rairannano nakoia ba a aonga ni kamaiuaki man te rekenikai. N ara tai aio ao Iesu bon Ngaia te kanikina ae ti anganaki ibukin kamaiuara. E bon riai ngkanne ba ti na bane ni baina naba ana motinnano Santa Agnes are moan te kakateke are e kangai, "Bon am bai Ngai Iesu".
Ti a manga kauringaki n te bong aio ba ti kaboui ara motinnano ni maiura ba ti na bainaki ni koaua iroun Iesu n arora ni kabane. Ti na aki kataua ba bain te aonaba aio a na kabua mairoura te kaubain te kamaiuaki aio ae E a tia n anganira te Atua iroun natina ae Iesu. Te rongorongo aio kanga aiaron te kakao nakon te baka n amarake are E katauraoia te Uea ibukira n te maunga are Tion ao E tangirira ni kabane ba ti na roko iai ni katonga te wain ae moan te tamaroa ao te amarake ae moan te kangakang ake a tia ni katauraoaki.
Ngkana ti aki ongo te kakao aio ao ti na riki n aiaroia kain Moaba ake a na tiiringaki mani aia kamoamoa n aron baai ake a karaoi iaon te aba. N aron are E taku Iahawe ao ti na riki ni katotongia kain Moaba ake a na bakaraki ma ni mate n aia nono ake a karaoi aika ririeta ake a na uruaki mani baka i aoia. Te rongorongo ae kakawaki ibukira ba ngkana ti kabanei ara tai ni kaikoi bain te maiu aio ao a na bon manga reke ba kaira ao maraiara ba a na kamateira.
Tariu ma maneu ti na uaia ni butia te Uea ba E na anganira te rairannano ni koaua ao ni motinnanoia ba man te bong aio ao bon ana bai ngaira Iesu ni koaua. Ti na bubuti naba ba ti na kawakinaki n taai nako ba ti n aki raure nako ma Iesu. Bon Nei Maria te tia buokira ao te ti tataro ibukira riki ngkana ti marurung nin kabongana te tataro ae te korona. Ti a reitaki ni kabane n anaa ara tataro ae uarereke n te bong aio ae e kangai, AM BAI NGAI NI KOAUA IESU.
- Details
- Written by Taranieta