Kanan Tamneira...
- Details
- Written by Uriam Timiti
E tangira te rairannano ni koaua Iesu mai iroura imain ae e kabonganaira. Ngkoananoa ao ti nora aron rineaia ana abotoro Iesu. N te bong aio ao e kamatata ana kantaninga Iesu ba e tangira te nano ae e rairaki n kaitiakaki n koaua n tainako n aron nanon ana abotoro Santo Betero ba e aonga ni kakabonganaira!
N te Euangkerio n te bong aio ao e kaoti arora Iesu aika e na reke iroura iai kabaian te Abanuea are i Karawa are e moa mai iaon te aba. Ti a kabaia ngkana ti kainnano, ti baki, ti tang, ao ngkana ti ribaki ibukin arora n taetaekina Iesu, ba ara bai te abanueana are i karawa. Ti kona n taraia ni kangai ba e na reke te kabaia anne iroura ngkana akea bain nanora ao a baki ao a taka ni ukera ana raoi ma ana tangira ao ana nanoanga ibukira ao ibukia raora ma ara kairiribai.
A karibaaki nanora n tainako n te aro ae ti aki kona n karaoa raoi tabera anne. E aki kona n toki te kataaki nakoira ao katikitikin kaibabarun te rabata ma te nano, ma ngaia are e kakorakoraira Santo Bauro n te bong aio. E tuangira ba ti na kamatei man tiringi kateira ma anuara ao nanora aika bon kaibabarun te rabata. E na tiku n taka ao ni kan kanuaiaki. E kabarabara te Euangkerio aron ana taeka Iesu ba antai ae na kabaia ao antai ae na kananoanga. te aomata are e baki, n taka man ukeukera te kaonrakeaki n ana nanoanga ma ana tangira Iesu, ke te aomata are e a nuai, e ngarengare n onrake nanona n kaibabaru ma bain aonteaba
N te Taramo n te bong aio ao e kaotia ba ti riai n neboa te Atua n tainako ao ti na bon ti kona n neboia raoi ngkana a itiaki nanora ao n onrake n ana tangira ma ana nanoanga Iesu. Ti weteaki n tainako ba ti na raonia ana aomata te Atua aika a tabu i Karawa ao iaon te aba. Ti weteaki n nakoara n abotoro ba ti na karaoiroa te Atua ma n tatakaruaea makana ma mimitongin Abanueana nakoia te botanaomata ni bane. E kaotia naba te Taramo ba E kakaonimaki te Atua nakon ana taeka ni kabane ao E bon tituaraoi n ana makuri ni kabane. E ngae n anne ao Santo Bauro e kaotia ba unin te Atua ti bon weteia nako aora n arora aika a bure aikai, ngkana ti aki kan rairaki mai iai. Ma e anganira te inaomata Iesu ba E na buokira, n ana taeka are e kangai: ukeuke ao e na reke, karebwerebwe ao e na kaukaki, bubuti ao ko na anganaki.
Ti a bon tannakon Atiniban Iesu, ni karebwerebwe, n onnon ni bubutia n te tai aio ba e na tebokira n rarana ae e moan te tabu. E na taua baira ni kaoka kawaira, n tanrikaki nakoina ao E na raira nanora, ni kanakoi baina ni kabane ao ni kabaei ian ana kaibangaki. Ti na butia ba E na uotira nako matan Tamana ao ni kaonrakei nanora n ana ota ma ana karea te Tamnei ae e Raoiroi ao n riki ngkai ni koaua ba ana abotoro. Ti a butia ana karatia ae te teimatoa ao makan ana tangira ba ti na kabonganaa ni kairia aomata nako, nakon Atinibanna ae koburaken te kabaia, ni katoa bong.
E kakaonimaki te Uea nakon ana taeka n tainako ao e tituaraoi n ana makuri ni kabane. Ko raba te Uea.
- Details
- Written by Taranieta
N te tairiki teuana ao e waki te katoki aoraki imatan te Eukari i Bikenibeu ao I noria ba te aoraki bon iai irouna tamnei aika a buakaka. E roko te mwengabuaka, te maroa ao te maku irou ba I a tiba ira te waki ni katoki aoraki ao I a bon tiba nora te aekaki n aoraki arei. Ai kamira ba ngke e roko te ang ni maku arei ao I wetea Iesu. I uringa ana tangira Iesu are e kabaroa nakon buroou n au tai ni moan komunio ao I a manga namakinna naba n te tai arei ngke I weteia. Bon n te tai naba arei ao I namakina te ang ae kamimi. E a bon roko naba te raoi ao te korakora ae e kamimi ngke I a manga mena inanon namakinan te tangira arei ao I a ira buakon te nebonebo ma te nano are e koburake n ana Tangira Iesu. N tokin te katoki aoraki ao e bane n namakinaki te raoi ao te rau ao ngai naba I namakina te koburake n nano n ana Tangira Iesu ae korakora ao te kimareirei. E kamaiuaki te aoraki ao ngaira ni kabane, ti bon manga bane ni katonga naba te kamaiuaki, te rau, te kimareirei ao te kakatituaraoi ma te aoraki.
Ni katoa bong ao iai n tainako ana makuri te Atua, ae moa man ae e uarereke, are e tangiria ba ti na karaoia n ara kabanea n tamaroa, man ana ibuobuoki te Tamnei ae e Raoiroi. E anganira arora ni karaoa raoi ara makuri Santo Bauro n te wareboki n te bong aio. E taku ba e rangi ni kakawaki ba ti na uringnga ba ti na maiu inanon Iesu n tainako . E taku ba ngkai e a maeka inanora Iesu, ao ti na riai ni waka inanona, ao ti na rikirake ao n matoatoa n ara onimaki inanona. Te Euangkerio e kaota aron Iesu n rineia ana abotoro ake 12 mai ibuakoia ana reirei ao e iriia ma ni waki ma ngaia n katoki aoraki, kanako taimonio ao ni kamaiu. I taku ba nake e rineia Iesu, e a kaman kinaia ba bon taan bure riki ma tao a babaina te rairannano ni koaua (n aki warekaki Iuta Itikariota)! E teretere iai ba tokanikaira iaon ara makuri bon ti Iesu ae ara Tangira are e maiu inanora ao ngaira inanona. Ngkana tiaki maiu n aron aio ao tina bon konaki ao n aki kona ni karaoi raoi muiokoara iroun Iesu.
E noria Santo Bauro ba ti na bon boo ma taian kanganga ma ti na bon aki mainging. E tuangira ba ti na aki kariaia temanna ba e na kabonganaira n ana iango aika a kewe ma ni buakaka, aika bain te aonnaba aio ao tiaki mai iroun Iesu.
Tao tera arora ni kakawakinira man taian kamane aikanne? Aikai tabeua iango ake a rio man te katoki aoraki arei aika ana kona ni buokiira:
Ti bane n ata te taeka are e kangai ba te Atua bon te Tangira. Ngkana ti teuana ngaira ma Iesu ao ti kona n namakina n tainako, te mwengabuaka , n tabo ake ti mena iai ,ao akea te tangira iai. Ngkana ti kararoaira ma Iesu ao e na memere te namakin anne ao ti na bon kai reke n taian kamane aika e taekin Santo Bauro.
Ngkana ti roko inanon te botaki, te makuri ke iango aika a kewe, a bure ao a buakaka ao akea te tangira ma te raoi iai ae ti kona n namakinna, ti na bon ti namakina te mwengabuaka mairoun teuare e buakaka. Ngkana akea namakinan ao norakin te tangira ao te raoi i mataia ao aia makuri raora, ao ti ataia ba tiaki mai iroun Iesu.
Ma ngkana ti karokoa ana kamaiu Iesu ibuakon kanganga aikanne ao ti na bon namakina te rau te raoi ao kimareirein ana Tangira Iesu inanoia ao inanora naba.
Ti a butia te Atua ba e na kateimatoaira inanon ana karatia. Ti a butia ba e na kaboui nanora n ara rairannano ni koaua ao e na kaonrakeira n ana Tangira n tainako. Ti a butia Iesu ba e na rineira ba raona ma ana abotoro ake 12 ake e rineia n te wareboki n te bong aio. Ti na kataua ba ti na iriria inanon m'akan ana tangira, n ana makuri ni kamaiu ao ni katoa bong inanon maiura. E bia riki kabouan nanora aikai, ao tao baikara riki, ba ara baintangira nakon Tinara Nei Maria n ana bong ni bung n te Kabong n te wiki aio. Ao ti a bon kakatituaraoa man neboneboa te Atua n ana tangira ibukira ngaira natina ni kabane. Ko raba te Atua.
- Details
- Written by Taranieta
Aio ana bong te Atua ae moan te kakawaki ibukin neboakina ibuakon bong nako ake e a tia n kataua ba ti na makuri iai.
I tinanikun te auti n te tai aio, n iteraan te aonnaba mai maiaki, ao a buurake uee aika a kakaokoro mataia, teia ao tamaroaia, ao iaon kawaia n ure. Aika a ure n te tai aio, a bon rangi ni boiarara man kamimi aron tamaroaia. E a katauraoi bwebweraken te maiu ae boou n iteran te aonnaba mai maiaki (Spring) ao e a katauraoi nakon te maitoro te aonnaba meang (autumn). E ngae n anne ao ti kona n nora aron tamaroan ana karikibai te Atua n taabo nako ake ti mena iai; i meang, maiaki ke iaon te Ekuatoa, inanon taian uee, uanikai, marawa ma karawa, ngkana ti tei moa n te tai aio n miiakin.
Ai bon ti te arona naba te tamaroa ae ti kona n noria ngaira aika ana kabanea n tamaroa ni karikibai te Atua ngkana ti taraia raora nako aika ti tangiria ke ti ribaia! Ngkana ti kamataua raoi taraakira ao ti na nora iai tamaroan bannan te Atua bon iroura ao inanoia raora ni kabaneia, n ikotaki ma ara kairiribai.
N ana taeka te Atua nakoira n ana boki ae Tabu n te bong aio ao e kamatata muiokoara ke nakoara irouna. E tuangira n te moan wareboki iroun Etekiera ba ti na riki ba ana 'uatiman'. Aio bon ana muioko te Atua ae e rangi ni moan baan te kakawaki. Antai ao baikara bai aika ti nori n te tai aio, ngaira aika ti kinaa man ataa Iesu, aika e rineira ba ana uatiman.? Iai ana karikibai te Atua ae ti noria ba e a kan reke n te kanganga? Tera arora ni buokia? Ti kan buokia ke ti aki? E matoa tuangakira , ba ti na aki wimakiki ao ti na karaoa raoi tabera anne, ba ti na bon kaeka bukinara n tokin te tai ngkana ti aki karaoa mwiokoara iroun te Atua. E matoa ana taeka n muiokoira te Atua aio ba ti na karaoa raoi tabera n aki maningakangare ibukin kateimatoan tamaroan ana karikirabai aika raora ni bane, taian uee ma bai nako aika ti nori, ba ti na bane n uaia n teimatoa inanon te tamaroa are e karikira iai te Atua. Man te Euangkerio ao Mataio e kamatata arora ni karaoa te muioko ae moan baan te kakawaki anne. Ti na kaiokiira n te tai aio ma ara kairiribai, Tiaki ti teuana te tai, tiaki n ti te anga teuana ma ti na okioki ao ni kakaei anga ba e na oki arora ma raora nako, nakon te tamaroa ao ti na kona iai n tainako n nori raoi tamaroan ana karikibai te Atua ae e otabaninira ni katoa bong.
Ti a kakatituaraoa te Atua ibukia ara utu, raoraora ao kain ara community, ao abara aika E anganira Iesu, ba ti na ibuobuoka te kimareirei inanon tamaroan ana karikibai, ao ti na uaia n buobuokiira inanon ara kaiooki ma ara kairiribai ni kaoka aron tamaroara. ao riki inanon ara reitaki n te nano ae ti teuana n ara tataro ma ara makuri!
Ti a uaia n kakatituaraoa man neboneboa te Atua n te bong aio ma nanora ni kabane. Ko raba te Atua Alleluia alleluia alleluia.
- Details
- Written by Uriam Timiti
N te bong aio ao ti kauringa ana toa Blessed Mother Teresa mai Calcutta i India. E taku ana baebaeti teuana Mother Teresa ae katekenano; “Ngai bon te I- Albania n te rara ma kain India n rabatau, ao ngai bon te Tina n te aro ni Katorika. Ma n arou ni kaeka ana wewete te Atua nakoiu ao ngai bon kain te aonaba aio. N nanou ma tamneiu ao ngai bon ana bai ni kabane Iesu.”
E teimatoa ana tangira te Atua ibukin te aonaba n taai nako ao E kanakoira, ngai ma ngkoe ba ti na riki ba Ana Tangira ma Ana Nanoanga nakoia aika a kainnano mani kananoanga. Ti bia tauraoi ni kaeka te wewete ao te muioko aio ao ni katotonga Mother Teresa n te bai are e babane nanona iai are bon katokan takan Iesu ibukin te tangira ao tamneia aomata ni kabane ake a bua man raroanako.
I taku ngai ba e rangi ni kaeineti te iango aio ma kanoan taian wareboki n te bong aio are bon kakawakin buokaia tarira ma manera ba a na kamaiuaki. E taku Bauro n ana reta nakoia I Karatia ba e anga marakina ni kabane ibukin kakoroan marakin Iesu ibukia aomata ni kabane ba a aonga ni kamaiuaki. E kaotia naba Iesu n te ewangkerio ba e karaoaki te Tabati ibukin kamaeuan te aomata, ai ngaia are E kamaiua te tenaakibaina n te Tabati.
Ti riai n nora takan te Uea ibukin ara tangira rinanoia aomata aika a kananoanga, aika a aoraki, ao a rawawata. Ti na butia te Atua ba ti na aki bakataei taian tai aika ti anganaki ba ti na kona iai ni kaitibo ma Iesu ma ni kabebetea takana inanoia aekakin aomata aikai. Ba n aron ana taeka ni kakabaia Iesu ao e kamatata raoi kawain te kamaiuaki are bon karaoan te makuri n tangira nakoia aomata, riki ake a taka mani kananoanga man aki tabeakinaki.
E na banin raoi kamaiuara tiaki ti ngkana ti tatataro ma ngkana ti karaoa te makuri n tangira. Ti bia katotonga Mother Teresa ni mauira ni riki ba ngaira bon kain te aonaba ae ti teuana ao ti na tauraoi n anga maiura ibukin te Uea n ara makuri n tangira nakoia aomata nako. Ti na uringa naba are ara makuri n tangira aio e na aki ti kaeineti ma tarira ao manera i aonteaba ma ibukia naba tarira ma manera ake a mena n te Burikatorio ake a kainnanoa ara tataro ibukin kabarakiia ao kaitiakaia ba a aonga n roko i Karawa.
- Details
- Written by Uriam Timiti