Kanan Tamneira...
- Details
- Written by Uriam Timiti
Aio bon te taeka n rabakau ae kakawaki ibukira n te bong aio. Ti riai ni kabanei korakoraraao ara tai n ukeukera te kaubai ae na tiku iroura n taai nako ao n aki totoki. Ti na bon riki ba taian burababa ngaira ngkana ti kabanei korakorara ma ara tai n ukera te kaubai ae a kai mka, ni kanaki n te koa ao te rara. Tariu ao maneu ti riai ni kairaki n te wanawana ba ti na ataia raoi ba tera te bai ae ti riai ni karaoia inanon maiura ae ti anganaki ao are ti ataia ba kanga ai aron te ue ae noraki tamaroana ao tikiraoina n te ingabong ma e na manga rai nakon te bakantai ao e na mate n te tairiki. Ngkai e bon uarereke ara tai ni maiu ao ngkai ti aki kona n ataia ba e na toki ningai te maiu aio ao tiaki ba e riai iroura ba ti na ira nanon banaan te wanawana ni babaina te tatauraoi n tai nako ao ni maiu n ai aron are ai ara kabanea n tai ni maiu te bong aio?
Ibukin kaikoan kaubain te maiu ae na roko ao ti riai n tauraoi ni kabongana raoi matara are boni ngaia tauran rabatara ke te winto are e rin mai iai te ota nakon nanon rabatara. Ngkana e raoiroi te mata ao e na bon raoiroi naba te ota are n rinnako n rabatara. E riai naba n rabakau matara n riki ba kanga te raumea ae na rineia te bai ae raoiroi ao e na katuka te bai ae na uotira nakon te bure. Ibukin aio ao ti bon kainnanoa Otan te Atua are bon te Tamnei ae Raoiroi ba e na kaotai kawaira ba ti aonga ata te raoiroi ao te buakaka, te koaua ao te kairua, te maiu ao te mate.
Tariu ao maneu ti na ongo banaan te Uea nakoira n te bong aio ni kaikoa te kaubai ae aki mamauna ao ti na aki kataua ba mataiakinan te bai ae mamauna e na kabuaa mairoura reken te kaubai ao te maiu inanon te kabaia ae aki totoki i Karawa.
- Details
- Written by Uriam Timiti
Tariu ao maneu ti uringa ara Tama ae Fr Koru n ana rekenibong n te bong aio inanon nakoana ni berebitero. Bon ara inga, ara katekeraoi ao ara karabaraba ae moan te bati nakoim Tamara ibukin am beku ae moan te bati ibukira ao ibukin ara botaki ni charismatic iaon Kiribati. Ko a tia n riki ba te korakora ae kakawaki nakoira inanon ara kekeiaki n iriira Iesu ao n riki ba bannan ao rabatan Iesu nakoia aomata, riki te koraki ake a bua man raroanako ma ana tangira Atiniban Iesu ae moan te tabu.
Ti reitira naba ni karaba te Uea ibukin ana baintangira ae boni ngkoe ara berebitero ao ara tia kawakin tibu. N ai aron are e taekinna Bauro nakoia I Korinto n te bong aio ao ti reiti nanora n tataro ibukim ba ko na riki ba te karea ae itiaki n tai nako nakon te Atua are e na aki rotaki n ana kewe ao ana mamanai teaure buakaka. Ko na tekeraoi n am bong aio te Tama ao ke karangaa nakoim Ana karaoiroi ma Ana kakabaia te Atua ae te Teniman Temanna. Am bau te Mauri te Raoi ao te Tabomoa.
Tariu ao maneu I kan tiba ngkanne ma ngkami teken nanou n taian wareboki n te bong aio n reitaki ma te boto n iango are te 'maiu n te itiaki ibukin te Uea'. Eng bon aio te rongorongo ae katuruturua nakoira Bauro n te bong aio are taku ba e rangi ni kookootiira ba ti na riki ba karea aika ti kainrouaki ma Kristo aika akea barekaia. Eng e tangiria Bauro ba ti na teimatoa inanon maiuakinan te itiaki ibukin Kristo. Ti boni kainnanoa ana buoka te Atua ba ti na katanaki ao ni kawakinaki man ana maamanai te riaboro ba e aonga n teimatoa ara anganano ao kaburean maiura nakon ao ibukin Kristo.
N te bong aio ao I kan reita te kantaninga ibukin te maiu inanon te itiaki ma te bai ae E reireinira iai Iesu n arora ngkana ti tataro. Ti kauringaki ba ti na aki reianau ke ni kaananau n ara tataro ba e a bon kaman atai kainnanora te Atua imain ae ti tabeki Nakoina. Ma te bai ae ti kainnanoia ba ti na butia Tamara bon kanara ae ti a tau iai, kabaraan ara bure ao katanara n tain te kaririaki. Ti riai ni bubuti ao n rauaki n taai nako ni kanara ae bon tau n te bong teuana ma teuana, ao tiaki ae rangi ni bati ae riaon are ti boni kainnanoia n te bong teuana. Nanona ba bon akea bonganan ae ti na kaikoi kaubaira ba a na bon riki ba katabetabeara ao tinetineara n ara kekeiaki. Ngkanne ibukin oin kainnanora are ti na bubuti iai nakon Tamara bon ti iaon baai ake a na kabua mairoura te maiu inanon te itiaki are bon te bure. Ti kainnanoa ana buoka te Atua ba E na kabarai ara bure n ai arora ngkai ti kabarai aia bure raora nakoira ao E na kawakiniira man taian kaririaki. Eng kanoan ara bubuti ake ti tabeki n ara tataro ae Tamara are I Karawa bon ibukin kateimatoakira ni maiu inanon te itiaki inanon ao ibukin te Uea.
- Details
- Written by Uriam Timiti
Tariu ao maneu bon te bai ae ti aki toki ni kakaraoia inanon maiura ni kekeiaki n irira te Uea ba n angin te tai ao baai aika ti tauraoi ni karaoi ibukin te Uea a bon babane nanora iai ao ti karaoia ma te kukurei; ma te kanganga ba ti ti kakaraoia ngkana e reke taina iroura ke e anga raoi.
N te bong aio ao I kan reitai ma ngkami ni karakai ara kekeiaki nakon are tamaroa riki ni kataia ni motikia mai nanora n te bong aio ba ti na kaburei maiura ibukin neboan te Uea ao kakaraoan Nanona inanon maiura. Eng, bon ana wewete nakoira te Uea n te bong aio ba ti riai ni kababaneira Nakoina n ai arona ngkai E a bon tia Iesu ni kababanea nakoira ibukin tangirara ao kamaiuakira. Ti kakoaua ba ana tangira te Uea nakoira e bon kororaoi n tai nako ao e aki kona n anganira iteraan ke kaamakoron ana tangira ma e anganira te kororaoi ngkai bon aio anuan te Atua ba e kororaoi n taai nako.
Te maiu ni kabureira nakon te Uea bon te maiu ae riai ni boboto iaon nanora ni koaua n tangira Iesu ao n tangiria raora. Ma ti ataia ba ti aki kona n tangira te Atua n oin korakorara ma ti kainnanoa ana buoka te Atua. Ti riai moa n rabakau n tangira Iesu ti man ana buoka ao ana karatia te Atua. Ba ni korakoran ara tangira aio ao ti a tiba kona ngkanne n tangiriia raora. Boni man korakoran te tangiria aio ao ni maakan te Tamnei ae Raoiroi ae ti kona iai ni kaburei maiura ibukin karaoan Nanon Iesu. Bon ana karatia te Atua ae na kakorakoraia n ara anganano aio ba ti aonga n teimatoa ni kaburei maiura nakon te Uea. Bon man korakoran ara tangira aio are ti kona n ira nanon ana kairoro Iesu nakoira n te bong aio ba ti na tangiria raora ao riki ara kairiribai. Ba kaniwangan ara tangira ao ara makuri e na ti reke ngkana ti karaoia nakoia aomata ake aki kona ni manga kaboa muin ara makuri n tangira. Ti na kamatoaki n tai nako ngkana ti katotonga te Atua ae tauraoi n anga ao n tibatibai taian kakabaia tiaki ti nakoia aikana raoiroi ma nakoia naba aika buakaka. Eng a riai n oti ao n namakinaki ara makuri n tangira nakoia aomata nako n ai aron te Atua ae kaotaa taai iaoia aomata nako.
- Details
- Written by Uriam Timiti
Tera te kaniwanga ae ko kantanigaia ibukin te makuri ae raoiroi ae ko karaoia ngkai? Eng bon iai te taeka n rabakau teuana ae I taku ba e na kaotaa raoi ba tera ae ti riai ni kantaningaia man karaoan makuri aika raraoi. E kangai te taeka n rabakau anne ba "ane e unika ae bati ngkai ao ao e na bon kantaninga ae bati nakon te tai ae na roko.". Te kaniwanga ae taekinaki ikai bon te ua ae ko na taia nakon te tai ae na roko. Teuana riki te taeka n rabakau ae na riai n airi ma aio e bon kangai; "Te aeka ni kai are ko unika koraana ngkai bon uaan te kai anne ae ko na taia man karekea nakon te tai ae na roko. " Ngkana ko unika te mai ngkai ao bon uaan te mai ae ko na kariaa nakon te tai ae na roko.
Inanon tain te ununiki ao ti riai n aki karaoia ba ti aonga ni kamoamoa iai. Ba ngkana iai te kaniwanga ae ti karekea ngkai inanon karaoan te makuri ao e na bon akea te kaniniwanga ae ti na karekea nakon te tai ae na roko are boni ngaia te oinibai. Te Atua E na karekei kaniwangara man uan te kai are ti a tia n unikia ba tao te kai ae raoiroi ae na bon anga uana te raoiroi ke tao te buakaka ae ti a tia n unikia are na bon anganira uana te buakaka.
Ngkana ti karaoa te makuri ae raoiroi ibukin kamoamoakira ke tao ibukina ba e na kabooaki mwina iroun are ti karaoa te makuri nakoina ao ngkanne bon akea te kaniwanga ae aki mamauna ae na reke iroura. Bon aio ngkanne ana kauring nakoira te Uea ae kakawaki n te bong aio ba ti na unika ao ni kaikoa te kaubai ae aki mamauna ao ae na aki kona ni mka. Ao tera te kaubai ae aki kona ni mamauna? Bon te kaubai ae tiaki bain aonteaba ma bon bain Karawa. Ti na kaikoa te koa ma te raraa ae na kairiira nakon te mate ngkana ti kabanei nanora ni kaikoa kaubain te maiu aio ao ti na kabuaa te oinibai are bon te maiu ae akea tokina..
Bon aio te reirei ae moan te kakawaki nakoira n te bong aio ba ti riai n aki ukera kabaiara ibukin bai aika ti karaoi ngkai ma ti na riai ni kaota te raoiroi n ai aron Nanon te Atua. Ba ni karaoan te raoiroi aio ao e na bon neboaki iai te Atua ao Ngaia are e nora te raoiroi ae ti karaoia n te aro ae raba E na bon anganiira kaniwangara ba te maiu ae akea tokina i Karawa.
- Details
- Written by Uriam Timiti
Tariu ao maneu akea ba ti a roko n te tai ae kakawaki inanon ara kekeiaki ba ti na tan rikaaki ao n noori ana baintangira te Atua inanon maiura aika ti bon riai ni karabaraba iai ao ni kamatoa ara koaua ba tera ae bati n tangirira te Atua.
Eng ti bon karaba te Uea ba E a tia n anganira taian baintangira ao ana karatia aika ba ti aonga are karekea te oinibai ae kan anganira ni maiura aio. N te moan wareboki n te bong aio ao e kauringira Bauro ba ti riai n aki bakataea ana karatia te Uea ae a tia ni kabaroa iaora ao n anganira. E katerea aio Bauro ba bon tera bukin taian karatia aika ti anganki ao ti na bon rangi ni kaawa ngkana ti bakataeia ao e aki reke iroura are bon te oinibai are te maiu ae akea tokina ma Iesu I Karawa.
Baikara baai aikai a tia n nori ao n karekei inanon taai aika a nako ao ae ti a tia n noria n te Tabati ae ngkoananoa ao n te Tabati ae na roko? Imuin te Bentekota ao e a karokoaki n te Tabati ae ngkoananoa te toa ae te Teniman n Temanna are kaota kakannaton ao mimitongin te Atua are karikiira. Iroun Iesu are maraki ao ni mate ibukira ao ti a anganaki kororaoin bai ni kabane iroun te Tamnei ae Raoiroi aika ti na kamatoaki iai n ara onimaki. Inanon te Tamnei ae Raoiroi ao ti kaotaaki ba antai raoi te Atua are ti bon aki kona n ataia n wanawanara ao rabakaura n aomata ma ti riai ni kina n ara onimaki. N te Tabati ae na roko ao ti na neboa ao ni karinea iai te Atua ae a tia n anga boni Ngaia ba E na maeka ibuakora n Arona n Atua ae banin iaan katotongan te bane ba E na riki ba kanara ao ara tianaki ni borau nakon te maiu ae na roko.
Imuin taian toa aika bati ao ti a roko ngkanne n te ordinary time ao aio bon ara tai are ti na okiri arora are mai maina ao ti nang ni bon waaki n oin korakorara ao n tauraoi ni butia te Atua ba e na raonira ao ni kawakinira inanon ara kekeiaki. E a roko te tai are ti nang bon kataia ni kateimatoaira ni beku ibukin te Uea ba ti aonga n aki kamatebuakaa ana bantenagira ao ana karatia te Atua ao ni bane n roko n tokin kawaira ao ni karekea kaniwanga ae tataningaira ae te rinnako inanon Ierutarem ae Boou are akea iai te maraki ma te tang ao te mate ba ai bon ti te kukurei ao te kimareirei inanon te mimitong ae kororaoi n aki totoki.