Kanan Tamneira...
- Details
- Written by Uriam Timiti
Tariu ao maneu bon iai te kaubai ae ti riai n ataia ba boni iai iroura ba bon Tamnein ke Maiun te Atua inanora. Ti riai ni kaotia n taai nako ba bon korakoran, maakan ao mimitongin te Atua ae mena inanora ao Ngaia ae na riai n noraki ba tiaki are boni ngai. Inanon maakan te Atua inanora ao ti na bon aki kona n namakina te taenikai ngkana ti taonaki n te rawawata, ti na aki kona ni barannano ngkana a mino ara kantaninga, ti na aki kona ni maroa ngkana ti kitanaki, ti na aki namakina te uruaki ngkana ti oreaki ao ti na uouota Rabatan Iesu ae maraki mani bainikirinaki ba ti aonga ni kaota Iesu ae maiu inanon rabatara. Ba te maiu n Atua inanora e na noraki ngkana ti tauraoi ni mate ma Iesu inanon te babetito ao ni mangauti ma Ngaia inanon ana tokanikai iaon te mate.
Te kaubai ae inanora ae tuangira Bauro n te bong aio man ana reta nakoia I Korinto bon te tauraoi ni mate n rabatara ao te kataua maakan ao korakoran te Atua ba e na makuri inanora ba e aonga n nebaoki te Uea n te karabraba ibukin ana karatia te Atua ae anganira n tai nako ingkai e kororaoi ana tangira ibukira ao e tangiriira ba ti na maiu ma Ngaia n tai nako inanon kororaoin te mimitong i Karawa.
Ti kauringaki n te bong aio n te ewangkerio ba tera arora ae ti na kona iai ni kakororaoa te maiu ibukin te Uea. Eng, e reita ana reirei Iesu nakoira n te bong aio ba ti riai ni karekea te inaomata ni koaua ni karaoa nanon tuua ake ti a tia n anganaki. Ti riai n ongotaeka n te tua n aron are tuangira Iesu: te aki butimaai iango ni kaibabaru irarikin te aki wenenibure; te aki un ao ni kairiribai irarikin te tiritiri; te tauraoi n tibatibai ara bai ma raora irarikin kabakaan te angabai; te tauraoi n tangiria ara kairiribai irarikia ake bon raora; ao te tauroai n anga kaubaira nakoia ake a anai mai roura.
Tariu ao maneu e bon tangiriira Iesu ba ti na riai ni kabure maiura nakoina ba ti aonga n aki manga riki ba toro ngaira ma bon raona ao tani baibai ma Ngaia i Karawa. E na bon ti reke te inaomata ni koaua iroura ngkana ti kaburei maiura nakon Iesu ba ti na maiu ao ti na mate ibukin te Uea.
- Details
- Written by Uriam Timiti
Tariu ao maneu bon aio nanon te Uea ibukira ba ti riai n riki ba Otan te Atua nakoia aomata ni kabane ni uouota bannan te Atua ae maiu ni koaua ibuakora. Bon te Tamnei ae Raoiroi ae maiu ni koaua inanora ae E onikiira ni karikiira ba aomata aika boou aika tan uouota te Rongorongo ae Raoiroi. Ke otanako Otan ana kamaiu te Atua iroura ao inanora ba e aonga n noraki irouia aomata nako.
Inanon te ewangkerio n te bong ao e kauringira Iesu ba "ngkana e aki rianako ara raoiroi nakoia tan koroboki ke baritaio ao ti bon aki kona n rin n Abanuean te Atua. Ao e na reke aio ngkana ti karaoa nanon te tua tiaki ibukina ba ti maku ma ibukina ba ti a tia ni karekea te inaomata iroun te Tamnei ae Raoiroi ni karaoa nanon te Tua ibukin kaotan ara tangira nakon Iesu ao kan karaoakin Nanona. Ba ike e maeka iai te Tamnei ae Raoiroi ao e reke naba iai te inaomata, ao e na bon reke aio ngkana ti tanrikaaki nakon te te Uea ae bon te tamnei. Inanon te Tamnei ao ti na bon tatakaruaea taekan Iesu ao tiaki taekara ngaira aika bon tooro ibukin Iesu aika tan tia kakoroa nanon te tua.
E kauringira Iesu n te ewangkerio ba e taku "Tai kamamate" ao ngai I taku nakoimi ba "ane un ao e motika taekan tarina ao e na motikaki taekana. Ane e taku nakon tarina ba te baba ao e na bon teweaki nako i Kenna ibuakon te tang ma te kangenge wii." Ngkana ti uoti ara karea nakon te baonikarea ao ti ataia ba iai aki kukurein tarira temanna iroura ao e riai ba ti na katuka moa ara karea ao ti na raoiakiniira moa ma tarira ao i aana ti kona n okira ara karea ni karokoa ni nnena. Ba ngkana ti aki karekea moa te raoi ma tarira ao ti a roko i matan te Uea ao titebo ngkanne ba ti a bon uotira nako matan te Tia Moti ba a ana motikaki taekara ao ti na teweaki nako nanon te karabuti.
Tariu ao maneu e na bon otanako Otan te Uea iroura ngkana ti maiuakina te raoiroi ao ti katoka iaora bannan te Atua ba a na noria aomata nako.
- Details
- Written by Uriam Timiti
Ti kauringaki n te bong aio aron te Uea n rineia Banabas ma Tauro ba E na kabonganaiia ibukin karaoan Nanona. E bon rineira naba te Uea n te bong aio ba ti na tauraoi ni karaoa ae Nanona n takaruaea taekan te rongorongo ba e kan Abanuean te Atua. E kaumakira te Uea ba ti riai ni waaki ni mmakuria kabutan te Rongorongo ae Raoiroi ba ti aonga ni bane ni kamaiuaki.
Tariu ao maneu bon aio ana wewete te Uea ba ti na riki ba tan uota te Rongorongo ae Raoiroi nakoia tarira ao manera ba aonga ni waekoa n rairaki nakon te Uea imain ae oimwui. E bon aki tangiria te Atua ba ti na mate n aki totoki ma e tangirira ba ti na bane ni kamaiuaki. E weteira Iesu ba ti na tauraoi n anga te bai ae kakawaki are ti a tia ni karekea mairouna are bon te kamaiuaki ngkana ti kakoaua Iesu ao ti onimakinna. Ti riai n tauraoi ni kaburei maiura ao arora ni kabane ibukin karaoan Nanon te Uea. Ao ngkana ti waki n tataekina te Rongorongo ae Raoiroi ao bon akea te bai ae ti na tabe iai ba tera kanara ke ara kunikai ngkai bon te Uea ae na tabeiakinira ibukina ba ti tabeakina Nanona. Bon aio te koaua ae kakawaki ibukira ba ngkana ti kaburei maiura ibukin makurian Nanon te Uea ao boni Ngaia ae na tabeakin ara kanganga nako.
Te bai naba ae kakawaki ngkana ti beku ibukin te Uea ba ti na tauraoi n angaanga ngkai bon akea te bai ae ti kona n taku ba oin ara bai. Ba baai ake iai iroura a bon bane n reke mairoun te Uea. Ngaia are ti bon riai n tauraoi ni manga kaoka nakon te Uea are bon ana bai.
- Details
- Written by Uriam Timiti
Kawain te kamaiuaki are uotia Iesu nako aonteaba bon reitan Ana Babaire ni Kamaiu te Atua te Tama are a kaman wene mai moan bai nako ao n aki totoki. Bon ana Babaire ni Kamaiu te Atua are moanaki mai irouia burabeti ian te Tua ao n reitaki nako iroun Iesu.
Rokon Iesu i aonteaba bon kaotan kororaoin ana tangira te Atua ibukira ba ti nang bon noora rabatan te tangira aio ba e a maeka ibuakora te Atua. Ngkai te Atua moan bai nako ao tokiia ao ti kakoaua ba e bon aki kona ni bibibtaki te Atua ao rokon Iesu nako aonetaba bon kakoroan nanon te Babaire ni Kamiau are a kaman wene mai moan karikan baai.
Ti anganaki te tua ba nuun are bon te oinibai are na roko imuina. Iroun Moote ao a kairaki te bonaomata iaan te tua. Inanon te otinako mai Aikubita ao ti noora iai kanikinaean te kainaomataki man te tautornaki ao bon ana kantaninga te Atua ibukia ana botanaoamata ba a na ataia ba bon Iawe ao ngaia bon ana botanaoamata. Bon ana kantaninga te Atua irouia aItwerea ana botanoamata are E rineia a na managa man te tautoronaki n te rabata nakon ae bon te inaomata ni koaua are bon te kabaraaki man te tautoronaki n te bure. Bon ana kanataninga te Atua ikai ba e kan anganira are te oinibai are bon te kainaomataki nakon te maiua ae akea tokina i Karawa. Ba iaan te tua n te berita ni kawai ao ti na bon bane ni mate ma iaan te Tamnei ae Raoiroi n te berita ae bou ba ti na bane ni karekea te maiu ae aki totoki i Karawa.
Inanon te tua bou iroun Iesu ao bon ana kantaninga te Atua ba ti na karoai bai nako ibukin maakakin te tua ma ti karaoa nanon te tua ibukin te inaomata ni kona ni motikia ao n rineia ma te kukurei ba ti na ira nanon te Tua. Tairu ao maneu bon aio te moani bai ae kakawkai inaon maiura aio ba ti na riai ni kakaraoa te Raoiroi tiaki ibukin te maaku ma ibukin ara tagira nakon Iesu ao nanora ngkanne bab bonkukurein nanora ni kan karaoa Nanon te Uea.
N ai aron Iesu ae ongoataeka iroun Tamana nua te mate iaon te kaibangaki ao ngaira ti na riai naba ni kaburei maiura aio bati na kakaraoa Nanon Iesu ao te Tama. Eng iroun te Tamnei ae Raoiroi ao a koreaki ngkai taian tua i nanora ake e anganira Iesu. Ti riai ni makuria nanon te Atua aio n taetaekina te rongorongo nakoia aomata ao ni baetitoia n aran te Tama, te Nati ao te Tmanei ae Raoiroi.
- Details
- Written by Uriam Timiti
Tariu ao maneu ti anganaki n te bong tibangara ae moan te kakawaki ba ti bane ni wetaeki nakon tangiran Iesu ibukin kamarakeia ao kawakinaia ana botanaomta te Atua. Ti riai ni katikii nakoira taian titiraki aikai n noriira ba E titirakinira naba Iesu ngkai ba ti tangria ke ti aki.
Eng tariu ao maneu e kainnanoi ara tangira Iesu tiaki ibukina ba e kainnanoia ke e raka raka arona iai, ma bon ibukina ba E tangiria ba ti na aki bua ma ti na rinnako inanon te tangira anne ao n riki n ti teuana ma Tamana. Bon aio ana kantaninga Iesu are kaotia n ana tataro nakon Tamana are ti ongora ngkoananoa.
Inanon ana kaeka Betero ao bon iai te bai ae ti noria ae moan te katekenano. Ba e nora mamarana Betero inanon ana kateniua n tai Iesu n titirakinna ba e tangiria ao e bon taonaki Betero n te rawawata ao e kaeka ni kangai; "Te Uea Ko noori bai ni kabane; Ko ataia ba I tangiriko". Irou ao I taku ba nanon ana kaeka Betero aio e kaotia nakon Iesu ba e ngae ngke e taetae ba e tangira Iesu ao e bon noora mamarana Iesu ao E ataia naba ba bon ti Ngaia ae kona n anganna te karatia n tangira. I taku ba bon aio te aeka ni kaeka ae ti riai naba ngaira n atongnga ngkana ti titirakinaki iroun Iesu. E bon noori bai ni kabane Iesu E noori mamarara ao kabakara n aki kona n teimatoa n iriria ao ti kainnanoa te karatia mairouna n tangiria ma nanora ni kabane, tamneira ni kabane, korakorara ni kabane ao iaon baai ni kabane.
Ti kakoaua ngkanne ba inanon nakoara ni kairiri ao ni kawakin tiibu ao ti ataia ba te muioko aio e riai ni boto iaon ara tangira ma Iesu ao ao te onimaki ba inanon mamarara ao E bon tauraoi Iesu n anganira taiankaratia are ti kainnanoi ba ti aonga ni kona ni kamarakeia ao ni kawakinia ana botanaomata te Atua ake ti muikoaki irouia.