Kanan Tamneira...
- Details
- Written by Uriam Timiti
Tariu ao maneu ti kakoaua ba e tabe ni warerikaki ngkai te bong imain te Bentekota ao a uara ara katauraoi? Eng ti nang manga nora ao ni katonga ngkai te tai are a nang kaitiboaki Karawa ma aonteba ao a nang riki n ti teuana iroun te Tamnei ae Raoiroi. E nang roko te tai are ti nang kona ni moana katongan Karawa ikai i aonteaba. Ao e na kanga n riki aio? N ana tataro Iesu ao e nang uki Karawa ao e nang ruo te Tamnei are Raoiroi nako aonteaba ao ti na ongo ana taeka te Tama are kanga; "Bon aio natiu ae babane Nanou Irouna... Ongo Irouna."
N taian wareboki n te bong aio ao e a kaotaki nakoira te bai ae na riki ngkana ti kabanea maiura ni kakoaua Iesu are maraki e mate ao e a mangauti. Bon maiura ni kakoaua ao n onimakina Iesu ae na karekea te kaniwanga nakoira ae moan te kakannato ae te riki n ti teuana ma Te Tama, te Nati ao Te Tamnei ae Raoiroi. N te ewangkerio ao ao ti nora aron nanon Iesu n ana tataro nakon Tamana ba ti reitaki n te tangira ae ti teuana ao ti anganaki ngaira taan irira Iesu te katiteuanaaki ma Iesu ao te Tama inanon te Tamnei ae Raoiroi.
Inanon te Bentekota ao ti nang bane ni kaonrakeaki n te Tamnei ae Raoiroi ae ruo mai Karawa ao ti na kunikaiaki n te maaka ao te korakora ae na onikira nakon te karaoiroaki ao te riki ba katotongan te Teniman n Temanna. Bon aio te tai are ti nang moana iai katongan Karawa ikai i aonteaba. Bon aio te tai ae ti na kaonrakeaki n te korakora are ti waaki iai ni kabuta te rongorongo ae raoiroi nako tokin aonnaba ao ni babetitoia iai te botanaomata n aran te Tama te Nati ao te Tamnei ae Raoiroi. Ti na bane ni katotonga Bauro n ninikoriana ao marurungina n kabuta te rongorngo ae raoiroi inanon te onimaki ba n tokina ao ti na karekea te kaniwanga ae te kimareirei ae akea tokina i Karawa.
- Details
- Written by Uriam Timiti
Tariu ao maneu ti bon riai n tauraoi n ataia ba tera tibangara ae na anganira te Tamnei ae Raoiroi ngkana e ruonira n tain te Bentekota. Teuana tibangara ae taekinaki n te bong aio bon kawakinan ao maeuakinan te koaua. Bon ana tataro Iesu ibukira ti na katabuaki ibukin te koaua. Ngkana ti katokabai ibukiia tarira ao manera n tain te kainaomata ao ti aki toki ni babaina te anene are Tamnein te Atua... ao Tamnein te Koaua... Eng bon aio te bai ae moan te kakawaki ibukira ni maiura ni charismatic ao maeura ni Kiritian ba ti na kawakina ao ni maiuakina te Koaua. Te koaua bon te bai ae ti aki kona ni birinako ma iai ao ti aki kona ni kabaoua ba muina ao ti maraia iai. Aio bon te bai ae kakawaki riki irouia tan kairiri ake a muiokoaki ibukia tariia ma maneia. Aio are bon rangi ni kakawaki ibukia tan kawakin tibu.
N te wareboki man aia makuri Abotoro n te bong aio ao ti ongora aron Bauro ni kauringia ana reirei ba a na riai n tantani n tai nako ibukia ake a muiokoaki iroun te Tamnei ae Raoiroi ba a na kakamarakeia ao ni kakawakiniia ake bon kain Rabatan Iesu ae te Ekaretia ake E a tia ni kaboia n Rarana ae moan te Tabu.
E katuruturua riki nakoia tan kawakin tiibu ba a riai ni kawakiniia aia tiibu mairouia taian kameanti are a na roko ni kamaruaia ma te ioaoa n akea aia nanoanga. E taku naba Bauro ba kamenanti aikai a boni kona naba n roko mairouia tan kairiri n Ekaretia. E kauring naba Bauro nakoia tan kairiri ba a na aki karawawataia aomata n bubuti te mane nakoia ngkai ti na boni bane ni karaoiroaki riki man te anganga nakon te anganganaki.
N te ka-uoua ni wareboki ao E kauringira Iesu ba maeuakinan ao kawakinan te koaua boni ngaia ae na karekea nakoira te kaniwanga ae moan te kakawaki are bon te riki n te teuana ma Iesu ao te Tama inanon te Tamnei ae Raoiroi. E bon riai ngkanne ba ti na katabuira inanon te koaua n aron kanoan ana tataro Iesu nakon Tamana ba ti na bane ni kawakinaki ngaira ba ti na aki bua ao ti na riki n ti teuana ma Ngaia. Bon tabera imatan te Atua ae a na motikaki taekara iai buokaia raora ba a na bane ni kawakinaki inanon te koaua ao ba a na akea ae na bua mai ibuakoia. Bon tabera ae kakawaki ba ti na kaokia raora nakon Iesu n te rairannano ba a aonga ni kabaraaki aia bure ao ni katiteuanaki ma Iesu ao te Tama ao ni karekea te kabaia inanon kororaoin te mimitong i Karawa.
- Details
- Written by Uriam Timiti
Tariu ao maneu inanon ara tai ni kakatauraoi imain Bentekota ao ti boni bae n titiraki iroura ba tera te aro ni katauraoi ae ti riai ni karaoia? Eng tariu ao maneu te katauraoi ae ti kainnanoia bon te rairannano. Ti kainnanoa te kaitiaki n ai aron ana babetito Ioane are taekinaki nakoira n te moan wareboki n te bong aio. N ana titiraki Bauro nakoia te koraki ba a tia ni butimaea te Tamnei ae Raoiroi ao a taku te koraki ba aki ataa te Tamnei ae Raoiroi. E tuangiia ngkanne Bauro ba imuin te rairannano ao te kaitiaki ao ngkanne ti kainanoia te babetitoaki n Aran Iesu ba ti aonga n ruonaki ao ni kaonrakeaki n te Tamnei ae Raoiroi.
Ngkana ti ruonaki ao ni kaonrakeaki iroun te Tamnei ae Raoiroi ao te bai ae riki ba ti a riki ni koaua ba natin te Atua ao ai ti teuana ngaira ma Iesu ao te Teniman n Temanna. Bon te katiteuanaaki aio ngaia ae karekea nakoira te kabouaki ao te kona ni kairaki iroun te Tamnei ae Raoiroi. Ngkana e inaomata iroura Tamnei te Atua ao nanona ngkanne ba ti ririmuin manekan te Tamnei ae Raoiroi ao ti aki rimoana ke ti bon toua te kawai teuana. Bon te aro ni maiu aio ae na kabarabara raoi nakoira nanon te taeka ae te Maiu ae Onraken te Maiu are ti na bon namakina iai n taai nako te raoi ao te rau i bukina ba ti muiokoa te Atua ba E kawakinira ao e kakaiririira. E na reke te raoi iroura ibukina ba ti ataia ba ti maeka inanon Iesu ao Iesu e maeka inanora. Ao ngkana E maeka Iesu inanora ao bon akea te bai ae ti na na tabeaianga iai ba bon te Atua ba e maeka inanora Teuare are a tia n tokanikai iaon bai ni kabane are E tautaeka iaon bai ni kabane n tai nako.
Tariu ao maneu a na bon rau nanora n tai nako ngkana ti nim ao ti riki n ti teuana ma te Atua are ti kakoaua ba Ngaia moan bai ao tokia, Ngaia te Areba ao te Omega, Ngaia are iai ngkoa, iai ngkai ao iai n taai nako. Ngaia are aki kona ni bibitaki n arona n kororaoi ao n onrake n te raoiroi, te tangira, te nanoanga ao te kakaonimaki. A taku ba ngkana ko uaua i marawa ao ko na kunea ba e rangi ni buaka eta ma ngkana ko tebo nako nano ao ko na kunea ba e rangi n raoi. Ai uana naba ma aron maiura aio ba a na bati kanganga aika ti na kaitibo ma ngaai ma ngkana ti kan karekea te rau ao ti na riai n ruo rikaki nako nanora ao ikanne are ti na kaitibo iai ma te Uea ao ti na kunea iai te raoi ao te rau ni koaua.
- Details
- Written by Uriam Timiti
Tariu ao maneu akea ba ai ti tabeua riki te bong ao e a roko te Bentekota. A uara ngkai ara katauraoi ibukin butimaean te Bentekota? Teuana irian ara katauraoi are I taku e rangi ni kakawaki bon kaongoakia raora ba a riai naba ni katauraoia ao n ataia ba e nang roko te Bentekota are bon ana tai te Atua n anga ana baintangira ae moan te kakawaki nakoira are ba kakoroan nanon te kamaiuaki are ti a tia n anganaki iroun Iesu ni marakina ao matena iaon te kaibangaki.
Tariu ao maneu bon te kananokawaki teuana ngkana e a roko tain te bentekota ao tabeman, riki kain ara utu ma ake ti kinaia a bon aki ataa te bai ae riki. Ti riai n tabeakina te itera aio ao ti na kaongoia tarira ma manera rokon te Tamnei ae Raoiroi ba aonga n tauraoi ni butimaia.Te bai riki teuana ae kakawaki bon kauringakira n te tai aio kakoroan nanon ana Tua te Ekaretia are "Ko na komunio n te Bakate". Ba e nang roko tokin te Bakate n te Bentekota ao ngkana e tuai n reke ara komunio man te mangauti ni karokoa ngkai ao ai bon ti aio ngkanne ara tai ni karekea ara komunio imain Bentekota.
Tera ngkanne reitan te kaniwanga are ti na kantaningaia n tokin te tai ao Bentekota ae nang roko? Eng ana kantaninga te Atua ibukin maiura bon te kariki ua aika raraoi ke bon karaoan makuri ni ibuobuoki nakoia aomata n te aro ba a na kona ni manga kaokaki nakon te Uea ao te manga nim ma Ngaia ba onga ni manga karekea are bon oin te maiu are e na angania te kabaia ae akea tokina i Karawa. Ibukin te maiu ni kariki ua aio ao karaoan nanon te Atua ao ti bon kainnanoa te buoka ma te kakorakora mairoun te Atua ao boni ngaia ngkanne aio te bai ae ti na anganaki inanon te Bentekota.
N te moan wareboki ao e kaota te bai ae nang riki Bauro ngke e mena i Miretuti ba e nang kitania ao a nang bon tiku irouia ao a nang boni waaki irouia n aron are a tia n ataia man n tia n reireiaki iai. Are nanona e nang bon tiku inanon baia ngkanne aron kamateraoan te reirei are a tia n anganaki ao karekean te maiu ae aki totoki.
Iesu e katerea naba nakoira ba te kaniwanga ae ti na karekea n tokin te tai bon te karaoiroaki iroun te Atua ibukin ara makuri aika ti a tia ni karaoi are ti a tia ni kaota iai onimakinan te Atua are kaotaki nakoira iroun Iesu are kanakoaki nakoira mairoun te Tama. Te kaniwanga ae ti na karekea bon te riki n ti teuana ma te Atua ae te Teniman n Temana ae te Tama, te Nati, ao te Tamnei ae Raoiroi.
- Details
- Written by Uriam Timiti
Akea ba ti a roko n tokin ana namakian Nei Maria ao tao e bon riai ba ti na titirakinira ba tera ara waaki inanon te namakaina aio aika ti a tia ni karaoi aika karakaa aron kaotan ara tangira nakon tinara Nei Maria? Eng e bon riai ba ti na tuoi raoi muin ara kekeiaki n te itera aio ao ni kataia ni katamaroa nakon bong aika i maira. Ti bon riai ni kamatoai ara koaua iaon Nei Maria ae boni Ngaia ana baintangira ae moan te kakawaki te Atua nakoira ibukin maiura ni kekeiaki ni irira kawain Natina ae Iesu ae na kairira nakon te kabaia ae akea tokina i Karawa.
Tariu ao maneu ti na katurui ara iango iaon te bai ae riki iroun Nei Maria man te Kaoti-Taeka. Ngke roko Kabiriera nakon Nei Maria n uota ana kamauri te Atua. ao e bon mimi mani maaku Nei Maria ao e taku Anera; "Tai maku Maria ba e korakora tangiram iroun te Atua ba e rineiko ba ko na riki ba tinan Natina." E kaeka Nei Maria n titiraki ba e na kanga n reke aio ngkai e aki ata te mwaane? E kaeka te Anera man taku ba "E na ruoniko te Tamnei ao Raoiroi ao man rabuniko maakan te Atua ae Moan te Rietata ao e na riki n iriko inanom te nati te mwaane ae Natin te Atua." E a manga kaeka Nei Maria ni kangai; "Ana toro te Uea Ngai; E na karaoaki nakoiu n ai aron am Taeka."
N reitaki ma ara kakatauraoi imain Bentekota ao teuana tibangara n te bong aio bon kaotan uaan te Tamnei Raoiroi ao mmamakurina inanora. Nei Maria are kaonrakeaki iroun te Tamnei ae Raoiroi inanon te Kaoti-Taeka, e ingainga nanona ni kan kawara ai tinana are Nei Eritabeta. E taekinaki ba e kaewaekoa Nei Maria ni mananga ni kawaina ae maungaunga nakon Nei Eritabeta are kanga e a moanna n rawawata ba ai ana ka-onoua n namakaina ni bikoukou.
Ti riai naba ngaira ni katauraoira nakon ana kairiri te Tamnei ae Raoiroi inanon Bentekota ba ti na katotonga Nei Maria n ingainga ni kan kaota ara tangira ao ara ibuobuoki nakoia tarira ma manera ni uota rongorongon te rairannano ao te kabarabure. E bia riki te Bentekota ae bou 2019 ba ara tai tai n reitia Abotoro n riki ba tan kakoaua ana kamaiu te Atua are ti anganaki iroun Iesu n te Bakate. Ti bia katotongiia abotoro ni kaonaki n te korakora ma te ninikoria ni kabuta te Rongorongo ae Raoiroi.