Kanan Tamneira...
- Details
- Written by Uriam Timiti
Bon aio te bong are e a kakoroaki iai miterion ana kamaiu te Atua nakon aonnaba. Aio te bong are e a reitaki iai Karawa ma aonnaba iroun Iesu are E a tia n riki n aomata n ai arora ao E a okira ngkai te tabo are nako mai iai are boni Karawa. Aio te bong are a kakoroa iai ibukin te kantaninga Iesu ni kaotia ba mwengara ni koaua bon irarikina i Karawa ngkai bon taan baibai ngaira ba ti a tia n riki nati ngaira iroun te Tama. Aio te bong are kaotia iai Iesu ba te rabata ae mkamka aio ao ae mamate aio e na bon tabekakirake naba nako Karawa n ai aron ae ti noria ao ti kakoaua iroun ni waeraken Iesu nak Karawa n te bong aio.
Tera tibangara ae anganira Iesu imain waerakena nako Karawa? E kangai Iesu; "E a tia ni koreaki ba E na maraki, mani mate ao ni manguti te Metia imuin tenibong..ao e na takaruaeaki rongorongon te rairannano ibukin te kabarabure n arau nako tokin aonnaba, moa mai Ierutarem." Are nanona ngkanne ba ti na tabekakirake nako Karawa ngaira ake ti rairi nanora ao ti maiuakina te raoiroi ni katotonga Iesu. Iroun Iesu ae waerake nako Karawa ao e a kanikinaeaki iai tokin te kabuakakaki ao ti a inaomata man maakan te mate.
Te ka-uoua n tibanga ae ti anganaki iroun Iesu n te bong aio bon ana berita Iesu ngke e kangai; "Ao noria N na kaoka ao ni kanakoa nakoimi te Tia Ibuobuoki ma kam riai n tiku i Ierutarem ni karokoa are e a tia n toka iaomi te kunnikai ni kakorakora mai i eta". E kaotia ikai Iesu nakoira ba ibukin kabutan te rongorongo ae raoiroi ao te rairannano ao ti kainnanoa te korakora teuana are bon te Tamnei ae Raoiroi. Ma e na ti reke aio iroura ngkana ti tiku i Ierutarem n te ruu are ieta n tataro ni kakatanginga ao ni kariaria. Ti na reitaki ma ma tarira ao manera ao Nei Maria n tiku n tataro i Ierutarem ba ti aonga n tauraoi ni butimaea te Tamnei ae Raoiroi ngkana E ruo n te Bentekota. Bon aio te tai are ti nang kaonrakeaki iai n te Maiu n Atua ngkana a uki nanora man tauraoi ni butimaea te Tamnei ae Raoiroi.
- Details
- Written by Uriam Timiti
E na oki ni banin te maiu n Atua iroura ngkana ti kaonrakeaki n te Tamnei ae Raoiroi. Ma e na ti roko Tamnein te Atua iroura ngkana a uki nanora ni kan butimaea te Tamnei ae Raoiroi. Ti a tia n anganaki te natinaki iroun te Atua rinanon Iesu ngke maraki mani mate iaon te kaibangaki ao E a mangauti ba kanga te baintangira are ti bane ni kaonoaki iai ao akea ae aki reke irouna. Ma kakoroan te natinaki aio bon te kaonrakeaki n Tamnein te Atua are na katabanina te maiu n Atua inanora ao iroura. Ba rinanon te Tamnei ae Raoiroi ao ti anganaki iai kororaoin baai ni kabane ao Onraken te Maiu.
Tariu ao maneu bon iai te tamnei ae ti a tia n reireinaki iai ba kanikinaean te Tamnei ba kanga newen te ai aika a na toka iaon atuura. Ngkana ti taratara tamneia abotoro ao reirei n tain te Bentekota ao ti nora newe n ai aika toka iaon atuuia aomata. Are nanona ba te Tamnei ae Raoiroi e na ruonira n tatabemanira ao tiaki ni botaki. Nanona ba e na ruonira te Tamnei ae Raoiroi ngkana ti tauraoi ni butiamea ao ngkana a uki nanora nakoina ni butimaeia nako nanora. E na bon aki ruonira te Tamnei ae Raoiroi ngkana aki uki nanora. Te toa ae Bentekota ngkanne bon tain ana baintangira te Atua ibukira ni kabane ma e na bon ti reke iroura ngaira aika a uki nanora.
Ngkana e maeka ni koaua Tamnein te Atua inanora ao ngkanne a na riki nanora ba bon mwengan ke ana temboro ni koaua te Atua ae Maiu. Ao ti na riki ngkanne ba tan neneboa te Atua ao airan Tamnein te Atua ae na ranga ni uota te kamaiuaki nakoia aomata nako. Inanon te Tamnei ae Raoiroi ao ti riki ba tan neboa te Atua ni kaotaa are ana bai Iesu nakoia ake uki nanoia ni kan karekea te Maiu ae Onraken te Maiu.
- Details
- Written by Uriam Timiti
Ai kamira aron ana tangira te Atua ibukira ba boni Ngaia ae a kaman tangirira ao ti a kaman rin inanon ana Babaire ni Kamaiu te Atua mai moan karikan aonnaba. E kawakinira inanon baina te Atua, E a kaman atai arora ni kabane; E atai maitin iran atuura. Are nanona ba ti bon aki manennanti n riki; ti karikaki nako aonteaba ao te maiu aio ibukin ana kantaninga te Atua ae kakannato ibukira. E boni kainnanoira te Atua ba ti na karaoa te makuri ae kakannato ibukin ana Babaire ni Kamaiu nakon te aonnaba. Tariu ao maneu e boni koaua ba ti a kaman rineaki iroun Iesu ibukin karaoan nanon te Tama n ai arona ae kanaoaki iroun te Tama.
Ao tera te bai ae ti rineaki ibukina?Tera te bai ae ti muokoaki iai iroun Iesu. Eng n te bong aio ao ti kauringaki ba ti riai ni kariki ua aika a na aki mkamka ke ni maunanako ma a na tiku n taai nako n ua tokin aonnaba. Eng iai uoua baai aika ti kauringaki iai n te bong aio ba te kariki ua ae na ti kona n reke iroura ngkana ti maiuakina ana tua te Atua n tangiriia raora ke maiuakinan te itangitangiri n aron are a tia n tangira iai te Atua ao are kaotia Iesu nakoira.
Eng ibukin maiuakinan te tua n tangira aio ao ti kauringaki ba ti riai moa n tangira te Atua ma nanora ni kabane, tamneira ni kabane ao korakorara ni kabane ao iaon bai ni kabane ba ti aonga ni kona ni manga tangiriia tarira ao manera. Tariu ao maneu bon iai te bai kakawaki ae tangirira te Atua ba e na reke iroura ba te maiu ni kakabaia inanon te mimitong ae aki totoki. Bon tiaki nanon te Atua ba ti na karekea te mate ae akea tokina. Bon tiaki ana kantaninga te Atua ba ti na kabua karekean te bai ae aki mamauna ibukin tangiran ao mataiakinan te bai ae mamauna. Ti bia anganaki te wanawana n tai nako ba ti na ataia inanon maiura te oi ni kaubai ae ti na ukoria ao ni karekea. Bon te kaubai ae aki kona ni mamaunna; te kaubia ae aki mkamka mani kanaki iroun te koa ma te raraa.
Ao tera ngkanne nanon te kariki ua ae aki kona ni mauina ke ni mkaa? Eng te maiu ni karikua ae nanonna Iesu ikai boni karaoan te makuri n tangira nakoia raora tiaki ibukin karekean kabaiara imuina ma ibukin kakukureian te Atua ao karekean te kaniwanga ae te maiu ae akea tokina ma te Atua i Karawa. Ti riai n ira nanon ana reirei Mother Teretia are kangai; Love until hurts; ke tangira ni karokoa ae ko rotaki n te maraki.
- Details
- Written by Uriam Timiti
Imain ae I waaki nako n au tibatiba n te bong aio ao I kan reitai ma ngkami tariu ao maneu ni karaba te Atua ni kororaoin ana tangira nakoira ba e a manga kaoka ara nutibeba ae "Emmnauera; Te Atua Ibuakora." Eng tao e na bon riai n ataaki iroura ba Emmanuera bon teuana te kanika ae korakora iroura ngaira kain te charismatic ae ti kona n nora iai ana makuri te Atua ibuakora. Bon Emmanuera te tia kauringira tabera ae kakawaki ba ti na riai n aki toki n tatakaruaea te Rongorongo ae Raoiroi. I bon irou ao I ataia ba e na bon aki tabanin aron ara kekeiaki ibukin te Uea ngkana ti aki reitaki ni kaotia ba e maiu te Uea ibuakora rinanon Emmanuera.
Tariu ao maneu teuana te bai ae e a kaonrakeaki iai nanora n te kukurei ae moan n te bati n te tai aio bon koroa nanon ara motinnano ibukin te Uea ae ti baireia ba ti na karaoia inanon te namakina ae May. Te kauoua ni bai ae kakawaki ae ti noria ni manga otinakon Emmanuera n te namakaina aio bon kaotan nnen Nei Maria inanon ara kekeiaki ba ti ngaia te tia buokira. Ti kakoaua naba ba ngaia te namakaina ae May bon ana tai tinara Nei Maria ni buokira ba ti na manga kaboui maiura ibukin karaoan nanon Natina ae Iesu.
Inanon te namakaina ae May ao ti a tabe n roroko n te tai ae ti nang kakoauaa iai ba a nang kakororaoaki iai kanoan ana Babaire ni Kamaiu te Atua ibukin te Aonnaba. Iroun Iesu ao e kaokaki nakoira te aro n natinaki are a tia ngkoa ni bua muin aia bure ara moan karo ao e nang kakororoaki kaokan te kamaiu nakoira inanon te Tamnei ae Raoiroi. Bon aio te bai ae kan anganira te Atua ba Onraken te Maiu iroun Tamneina ae Raoiroi. E na kanikinaeaki rokon te kamaiuaki aio ngkana e ruo te Tamnei ae Raoiroi iaora n te Bentekota n ai aron te newe n ai aika a na toka iaon atuura. E tuangira Iesu n te bong inanon te ewangkerio ba e bon raoiroi riki ibukira ba E na nako ba e aonga ni kaoka te Tia Ibuobuoki ae te Tamnei ae Raoiroi. Bon Iesu are Uea i Karawa ao e tei irariki Tamana ae na kanakomaia te Tamnei ae Raoiroi are na kakoroi bukin bai nako ake a tia ni karaoia Iesu i aonteaba.
- Details
- Written by Uriam Timiti
Tariu ao maneu tao ti na kakoaua ba n tabetai ao ti a bon tia naba n tabeka te titiraki aio nakoira ao tao e a tia naba n reke kaekana iroura. Irouia te nati n Iteraera ao tao a na kaeka te titiraki aio n taku ba bon ti aia bai te kamaiuaki ngkai ba boni ngaiia te botanaomata ae rineaki iroun te Atua ba E na riki n iriko ibuakoia Natina ao e na kaotaki ana tangira te Atua mai irouia. Tao nakoira Katorika ao ti na taku ba bon ti ara bai te kamaiuaki ba bon te aro ni koaua ara aro. Tao iroura ngaira kain te charismatic tao ti na taku ba bon ti ngaira aika ti na kamaiuaki ba E mamakuri iroura te Tamnei ae Raoiroi.
N te wareboki n te bong ao bon iai te titiraki ae tabekaki ibukia I-Tientaire (Gentiles) ba a na kamaiuaki naba ke e kanga? E kaotia Betero ba e ngae ngke e rineia n te moan tai te Atua ba e na nako rongorongon te kamaiuaki mai nanon wiia ana botanaomata are rineaki ao ti kakoaua ba te '"Atua are noora te nano E a tia naba ni kataua ba ti nora ana tangira nakoia I-Tientaire ngkai E kataua ba a na kona naba ni kaonrakeaki n te Tamnei ae Raoiroi n ai arora"
Tairu ao maneu bon Nanon te Atua man te moantai ba e tangiria aomata ni kabaneia ba a na riki ba kain te oo n tibu ae ti teuana ao Ngaia e na riki ba te Tia Kawakin tibu ao ngaira ba te nanai n tibu ae ti teuana. Ti kakoaua ba inanon te Kiritimati ao ti nora aron te Atua ni kaota ana Beita n Akoi ibuikin te kamaiuaki ae kan angan aonnaba. E roko moa rongorogon bungiakin Iesu irouia tan kawakin tibu ao imuina e a manga kaoti te Itoi i karawa n tuangia uea ni mainiku ba e a bungiaki te Uea ae kakaanato ao a kairaki n otan te itoi nako Beterem nakon te tabo are bungiaki iai Iesu te Tei. Ti kakoaua ikai ba e ngae ngke e moan bungiaki Iesu ibuakoia Itereara i Beterem ao e kaotaki n te Toa ae te Epipani ba E roko iesu ibukia aomata ni kabaneia. Inanon marakin, maten ao mangautin Iesu ao ai titebo arora ni kabane ba ai akea te toro ma te inaomata, te Iutaia ao te I-Tientaire, ma ti a bane anganaki te kamaiuaki ba uan ana anga karea iesu iaon te kaibangaki.
Eng te kamaiuaki bon ara bai ni kabane ae na reke iroura ngkana ti kina ao ti kakoaua Iesu, ao ti tauraoi n uouota ara kaibangaki n ririmuin Iesu. Eng ti a bane n tia n anganaki te baintangira ae akea boona iroun Iesu are bon te natinaki ma ti na kamaiuaki ni koaua ngkana ti kauki Nanora nakon te tangira aio ao ti tauraoi ni kakaraoa Nanon Iesu ian ana kairiri te Tamnei ae Raoiroi. Ti na bon aki kamaiuaki ibukina ba Iutaia ngaira ke katorika ke kain te charismaktic ngaira ma ti na kamaiuaki ibukina ba a uki nanora ni butimaea ana Tangira te Atua ao n tatakaruaea te kamaiuaki aio nako tabon annaba ba aonga ni babetitoaki aomata nako n aran te Tama te Nati ao te Tamnei ae Raoiroi.