Kanan Tamneira...
- Details
- Written by Uriam Timiti
Bon aikai ana taeka te Uea ake I kankananoa ma ngkami tariu ao maneu n te bong aio. Eng e bon aki tangiria Iesu ba e na bua mairoura ao e na matebuaka te bai ae moan te kakawaki ae a tia n anganira; Te Maiu n Atua ao te riki ni koaua ba naati ngaira aika tan baibai irarikina i Karawa n aki totoki. Bon nanon aio Iesu ibukira ba e tangirira ba ti na nim ma Ngaia n tai nako ba ti aonga ni kawakina te Maiu n Atua ae bon te Maiu ae Onraken te Maiu.
E anganira te kabotau ae moan te tikiraoi Iesu ba ti aonga n ota raoi iai ba e aera ngkai e rangi ni kakawaki ba ti na nim ma Ngaia n tai nako. Ti tuangaki n te ewangkerio ba Iesu bon oin te kainikurebe ao ngaira bon maangana. E na teimatoa te maiu n te maanga ngkana e toma ma te boto n tai nako. Ngkana e mae nako te maanga ma te boto ao e na mate ao a na akea manenana ba ti te teweakinako ao te kabuekaki.
E tuangira naba Iesu nte ewangkerio n te bong aio ba tera te bai ae na kakukureia ao man karaoiroaki n te kimareirei iai te Tama ao are na anganira te aki nano uoua ba a na kaekaaki ara bubuti nako ake ti tabeki nakon te Tama. Eng aio bon te kariki ua ke karaoan makuri aika raraoi nakoia raora ake e na neboaki iai te Tama. N aron are ti ongora ngkoananoa ao ti riai n nim ma Iesu ao ni kamatei nanora nakon tangiran te kaubai ma katokan kakukureian nanora ni bain oanteaba ao ti riai naba ni karaoi makuri n tangira man ibuobouki nakoia tarira ma manera ba ti aonga ni karekea te maiu ae akea tokina. Ti na maeka n tai nako Inanon Iesu n ai arona ae E maeka n tai nako inanora.
- Details
- Written by Uriam Timiti
Ngke e nang waerake Iesu nako Karawa ao e muiokoia Abotoro ma ana reirei ba e na katuka irouia te Raoi. Ma e kamatata ba tiaki te raoi n ai aron are anga aonteaba ma bon te Raoi are mai Irouna ngke e kangai "I angani ngkami AU RAOI" Ba bon aio Te Raoi are mairoun te Tama ae boboto iaon tangiran Iesu n ai aron are E a tia n tangirira iai.
N te boki are "Imitation of Christ" Ke Katotongan Kristo ao ti tuangaki ba e na bon kanganga reken te raoi iroura ngkana ti katabei nanora ma bain aonteba ke kaibabarun aonteaba ao ti katabeira ma aia waaki ma aia taetae ni kawai tabeman. Eng e na bon aki kona n reke te raoi ae teimatoa iroura ngkana ti katabetabeira ma aroia tabeman. Ti na bon rangi ni karaoiroaki ngkana ti bwabwaina te nanorinano ao te nimamannei. Bon akea te bai ae ti na tabeianga iai ma ti a bon kukurei naba n te bai ae reke iroura ao ti aki kakabotauira ma are irouia raora.
Eng ana Raoi Iesu are kan anganira bon mairoun te Tama iroun Tamneina ae Raoiroi. Te raoi ae kan anganira Iesu bon te mamaeka inanon te maiu n riki n titeuana ma te Atua n tai nako. Te raoi ae kan anganira Iesu bon te tiku inanon te kaiokaki ma Ngaia ibukina ba ti teimatoa inanon te raoiroi ni kakaraoa nanon te Atua. Eng e na bon reke te raoi ae na aki kona ni mauna iroura ngkana ti mate nakon bain aonteaba, ni baai ake tatangiri rabatara ba aongkoa ti na kukurei iai.
E na koro bukin ana kantaninga te Atua ibukira ngkana ti butimaea te kamaiuaki are ti anganaki iroun Iesu ba ti aonga ni manga kaiokaki ma te Tama imuin kabuan te maiu n Atua inanon te bure n riki. Eng e na bon kaoka te maiu n Atua butimaean te Raoi ao maiuakinana ao katinanikuan ma kaitaraan ana mamanai teuare buakaka are akea kukurein nanona ba ti te kan kamaenakoira ma ana tangira te Atua.
- Details
- Written by Uriam Timiti
Aikai bon ana taeka Iesu nakoira n te bong aio are kan kamatoa nakoira ba e aonga n akea te nanoua iroura ba tera ana kantaninga te Atua man te moan tai ibukira. Eng tariu ao maneu iai ngkoa te rongorongo are I tibaia ma ngkami tao n 2011 are bon taekan te "Law of Gravity" ao te "'Law of Divine Grace". Eng e tataekinaki irouia tan rabakau ba iai n tai nako ana katikitiki aonteaba n te aro are ngkana arona ba iai te bai ae ti kaaki mai baira ao e na bon baka nako naano ba iai te katikitiki. N te tua aio ao bon kawain bai nako ba a na baka nako aontano ao bain aonteaba a na bane ni baka. Ma ngaira aomata ake ti a tia ni karikaki ba katotongan te Atua ao bon kawaira man te moan tai ngke ti karikaki ba ti na bane ni mwemwe rake nako karawa nakon Tamara ae te Atua. Ti a tia ni bane ni karikaki ba ti na tabekakirake nako Karawa ao ti na aki baka.
Eng n te tai aio ao E kamatoa nakoira Iesu ba ike E mena iai ao ti na mena naba iai ngaira. Bon Iesu ae ana Rikitemanna te Atua are kanakoaki nakoira ba E na kaota miterion ana tangira ma ana kamaiu te Atua ibukira. Bon Iesu Ngaia te Atua ae riki n aomata ba E na kakoroa nanon ana Berita n Akoi te Atua mai moana. N te ewangkerio n te bong aio ao ti ongora aron ana kabanea ni maroro Iesu nakoia ana reirei imain waerakena nako Karawa. E kangai Iesu; "tai katabeaingai nanomi ma onimakina te Atua ao onimakinai" Ba a maiti tabo ibukimi n ana Auti Tamau ao ngke arona e aki koaua anne ao Nna bon aki tuang ngkami ba N na nako ni katauraoa nnemi i Karawa". Eng ti bon riai n onimakina ana taeka Iesu ba a maiti tabo ibukira i Karawa.
Tera ngkanne nanon ana Taeka Iesu ae na manga nako ni katauraoi ara tabo i Karawa? Eng bon tiaki nanon aio ba e na nako Iesu n tiba katei ara auti ma bon nanon aio ba Iesu are bon Ngaia te Atua ao te aomata e a tia ni kauka karawa nakoira ni kabane ngke E riki ngaia ae te Kristo moanuaan te anga karea nakon teTama ngke e mate ao E mangauti. nakon te maiu ae akea tokina. Bon Iesu inanon waerakena nako Karawa are E kauka ao n reita Karawa ma aonnaba ao e kaota nakoira kororaoin te kukurei ao te mimitong are ti na roko naba iai ngkana ti iriira Iesu. E kauringira naba Iesu n te bong aio ba ti na bane n roko i Karawa ngkana ti karika raoi Iesu ba te Kawai , te Koaua ao te Maiu". Eng bon aio Tuan Ana Karatia te Atua ibukira ngaira ana karikibai ba ti na bane ni mwemwerake nako Karawa nakon te maiu ae akea tokina ao ti na aki kataua ba ti na tineaki n ana katikitiki aonteba nakon te mate ae akea tokina.
- Details
- Written by Uriam Timiti
N te bong aio ao ti kauringaki kanoan ana Berita n akoi te Atua are kaotia nakoira Iesu. Boni maiuakinan ana tangira moa Iesu n ai aron are E a tia n tangira iai ngke E maraki ao ni bainikirinaki ao E uoti rawawatan ara bure iaon te kaibangaki ae na anganira te kamiuaki ni koaua ae aki totoki. Eng bon aio kanoan te tua ae bou ae ti anganaki inanon te bakate ba ti na baina te itangitangiri.Ti na tangiria tarira ma manera n ai aron are ti a tia n tangraki iai iroun Iesu.
Tariu ao maneu E kamatoa Iesu nakoira n te bong aio te koaua ae moan te kakawaki ba ngkana ti tangira Iesu ma nanora ni koaua ao ngkanne E na tangirira te Tama ao a na roko Iesu ma te Tama ni maeka iroura ao inanora. Karaua raoi n iangoia tariu ao maneu ba tera raoi aron te kakukurei ae na reke iroura ngkana ti ataia ba E nang rin te Atua inanora ao ni karika nanora ba mwengna n ai aron ae tuangira Iesu n te bong aio? Tera riki te bai ae kakawaki nakon ae nang roko te Atua ni maeka iroura ao inanora?
Te bai ae kakawaki iroura n te bong aio ba ngkana ti tangira Iesu ni koaua ao ti na maiuakina te tua n tangira are E a tia n anganiira nakoia aomata ao ngkanne e na rin Iesu inanora ao e na karika autin nanora ba mwengana ni koaua.
Ao tera arora ae ti na karaoia ba e aonga ni kan karaoa mwengana te Atua inanora? E reireinira Iesu n te bong aio ba ti riai n rairi nanora ao ti riai n teimatoa ni maiuakina ana tua Iesu ni karaoa ae raoiroi ao n aki waekoa ni manga okira te bure ngkana e roko te kaririaki. Te teimatoa n nim ma te Uea ao aki tannako mairouna n tain te kataaki bon ngaia kaotan te tangira ni koaua nakon Iesu are ti na tangiriki iai iroun te Tama ao e na karika te Atua ba e na kan rin inanora ao ni kan karekea ba mwengana ni koaua ao ti aonga ni karekea iroura kororaoin te kukurei ao te Maiu ae Onraken te Maiu.
- Details
- Written by Uriam Timiti
E roko Iesu i aonteaba ba E na kaota nakoira te koaua ae moan te kakawaki ae bon ataakin te Atua ao kororaoin ana tangira ae anganira te kamaiuaki ae aki totoki.
E reita te koaua aio Iesu man n tuangira te ewangkwerio n te bong aio ba "ane butimaea temanna ae kanakoaki Irouna ao e bon butimaea naba Iesu ao ngkana ti butimaea Iesu ao ti bon butimaea naba Teuare E kanakoa"are bon te Tama.
Eng bon aio miterion kamaiuakira are kaotia ao e karokoa Iesu nakoira ngke E riki n aomata ao E maraki mani mate ao E mangauti. Ti karaba te Atua ae onrake n te atataiaomta ibukina ba E a tia ni kakoroa bukin ana Berita n Akoi aio nakoira ni kabane ba ti aonga ni karekea te kamaiuaki aio inanon Rabatana ae te Ekaretia n taian reirei ma katei ake ti a tia n anganaki man te roro teuana nakon teuana ao mairouia ara bakatibu ni karokoa te bong aio.
Eng taekan te kamaiuaki aio boni ngaia are a kaman tataekinaki irouia burabeti ao are a kakoroaki bukina iroun Iesu rinanon Tamneina ae Raoiroi. E reitaki aio ngke e ukiia ao E kanakoia ana Abotoro Iesu ba a na kabuta te Rongorongo ae Raoiroi nakoia te botanaomata ao a na babetitoia n aran te Tama te Nati ao te Tamnei ae Raoiroi. E a manga reitaki ao ni kawakinaki banin te koaua aio iroun tinara te Ekaretia inanoia Ebikobo ake a onei muia abotoro
Bon aio naba kaotan te koaua ae taekinna Iesu n te bong aio ba butimaean temanna are kanakoa Iesu nakoira bon butimean Iesu ao butimaean te Atua te Tama are kanakoa. E oti naba ikai ba bon ti teuana te Ekaretia ae kateia Iesu ba bon te Katorika ae Tabu, ae Abotorika ao e Katorika ke e kabuta aonnaba. Kinaakin ao kabarabaraan te Ekaretia bon te kanakoaki ibukin tatakaruean te Rongorongo ae Raoiroi are na anganira te Maiu ae aki totoki.