Kanan Tamneira...
- Details
- Written by Uriam Timiti
"N ai aron are I kanakoaki iroun Tamau ao Ngai I a manga kanakoi ngkami". Tariu ao maneu aio bon ana taeka Iesu nakoira ni kabane n te bong aio ae na riai n anganira aron kinakira ni koaua ba antai ngaira ao tera raoi ana kantaninga te Uea ibukira. Eng ti riai n ataia ba aron kinakira ngaira Kiritian bon te kanakoaki ba ti na karaoa Nanon Iesu ao ngkana ti karaoa aio ao nanona ngkanne ba ti bon karaoa Nanon te Tama. Are nanona ngkanne ba te makuri ae ti na karaoia bon tiaki are oin nanora ma bon karaoan Nanon te Tama.
Ti riai n aki maninga aio ba aio ae na kamatata raoi ba antai ngaira ao tera raoi oin ana kantaninga te Uea ibukira. Inanon te nakoa are ti kanakoaki iai ao ti riai n namakinna n taai nako ba ngaira bon bain te Rabata ae ti teuana are Rabatan Iesu ao ti riai naba n riki ba taan kakoaua ibukin Teuare ti kanakoaki Irouna.
Eng n angin te tai ao ti karika te kanganga nakoira ba ti aki beku ibukin te Uea ma ti beku i bon bukira. N angin te tai ao ti bon beku ibukin karekean arora ma kabaiara ao tiaki ibukin te Uea. N te bong aio ao ti kauringaki n te ewangkerio ba te bai ae kakawaki ae ti na uotia nakoia tarira ma manera bon Iesu ae Rabatan ana tangira ma ana nanoanga te Atua ibukia te botanaomata. Eng bon aio te tangira ao te nanoanga are akea tiatianakina ao e tauraoi ibukira n taai nako ke e "unconditional" ngkai bon aio anuan te Atua ae te kororaoi n taai nako. Bon aio te aeka n tangira ae tuangira Bobe Benetito XVI n te bong aio ba ti kamaiuaki iai ao ae na riai n aana aron te kanakoaki are e weteira nako iai Iesu. Bon aio naba kinaakin Iesu are ti riai n takaruaea ao n uotia nakoia tarira ma manera ba a na kakoauaa man onimakinna ba aonga ni kareke te kamaiuaki ae tokina ao te baibai irarikin Iesu i Karawa.
- Details
- Written by Uriam Timiti
N te bong aio ao ti ongora n te moan wareboki aron rinean onean muin te abotoro ae Iuta Itekariota are kamwanea ngkoa Iesu nakon te kamateaki. N aron are ti ongo ao e teirake Betero ngkai boni ngaia temanna ae a mane ibuakoia abotoro ma reirei ao e taku, "Tariu ao maneu e aki e bon riai ba ti nang rinea onean muin Iuta ae temanna ae a tia n airiri ma ngaira". E bon nanonna ikai Betero ba temanna are na rineaki bon are a tia ni mamaeka ma ngaiia ni karokoa mangautin Iesu. E katuruturua Betero ikai ba te tia onomui are na rineaki e riai n tia ni kakoaua mangautin Iesu ngkai boni mangautin Iesu bon te koaua ae kaotaki nakoia ti tabeman ao bon aio te rongorongo ae kakawaki ae ti na taekinna nakoia aomata nako.
Tariu ao maneu ti mena ngkai inanon te tai ni Bakate are bon ara tai n neboa ao ni karaba te Atua ibukin kamimin ao kororaoin te kamaiuaki ae ti anganaki iroun Iesu ae maraki, e mate ao e a mangauti. Ti riai n rinanon naba te mangauti ba ti aonga n riki ba taan kakoaua ibukin Iesu nakoia aomata. Ngkana ti aki kakoaua Iesu ba e mangauti ao ngkana akea te mangauti iroura ao ngkanne bon akea te bai ae ti kona n takaruaea nakoia aomata. Ti na butia Iesu are bon te mangauti ba E na anganiira te kabouaki ao te kamaiuaki man aomatara ni kawai ao ti na kaonrakeaki iroun te Tamnei ae Raoiroi are na mamakuri inanora ao iroura n tatakaruaea te mangauti nakoia aomata nako. Ti na butia tinara Nei Maria n ana namakaina aio ba e na reireinira arora n onimaki ao ni kaburei maiura ni kabane ibukin karaokin Nanon natina ae Iesu. Ti bia waaki ngkai n iriira Iesu ao ni maiuakina ana tua n tangira ae ti anganaki naba n te bong aio ba n aiaron are E a tia n tangiriira iai te Atua ngke E anganira Natina ae Iesu ao ti riai naba ngaira n tangiria tarira ao manera ao ni maiuakina te itangitangiri.
- Details
- Written by Uriam Timiti
I uringa karakinan ngkoa te mitinare n te aro ni kamatu teuana ae arana Alex Jones are tuangia kain ana aaro ba e nang karaua ni karioa aron aia waki n taromauri ae rangi ni kakannato ao ni kaineti ma kanoan te Nu Tetamenti ke te Berita ae Bou. E tuangiia naba kain ana aaro ba e na kataia ni kabobongai raoi bitaki aikai imuin teuana te namakaina. E karaoa ana ukeuke iaon te aekaki n taromauri ae te kabanea ni kakannnato ao e teretere irouna imuin ana kakae ba te kabanea ni kakannato n taromauri bon are iai iai te angakarea are bon kareanakin Rabatan ao Raran Iesu. Are nanona ba te kabanea ni kakannato n taromauri bon are e kauringaaki iai aron marakin ao maten Iesu ao ana angakarea Iesu iaon te kaibangaki ibukin kabaraan ara bure.
Tariu ao maneu te aro n taromauri aio boni ngaia ae ti anganaki iroun tinara te Ekaretia Katorika ae te Tutia. Boni ngaia are tuangiira Iesu n te bong aio ba Rabatana ma Rarana ake ti kareanna nakon te Tama ao are ti a manga anganaki ba kanara ma nimara inanon te komunio n te tutia.
N te bong naba aio ao ti ongora n te moan wareboki aron Tauro ni bitaki iroun Iesu ngke e taonaki n te ota ao ni baka i aontano n aki noraba ngke e mananga nako Tamateko iaon kawaina ba e na kabureia kiritian. Eng E bon taetae Iesu nakoina n titirakinna ba e aera ngkai e bainikirinna. Ti noria ikai ba e maiu ni koaua Iesu irouia ao inanoia Kiritian ao te bai are ti karaoia nakoia tarira ma manera ti bon karaoia naba nakon Iesu. Ti ongo naba ba e kamarurungaki Tauro imuin ana katokabai Anania ao ngke a marurung man oki ana noraba ao e bitaki arana nakon Bauro ao man rineaki ba te Abotoro imuin mangautin Iesu.
Te reirei ae kakawaki man ana taeka te Uea n te bong aio bon anganakira iroun Iesu arora ni karekea te kamaiuaki ni koaua inanon kanakin te amarake ni koaua ae Rabatana ao Rarana inanon te komunio.Ti na bon teimatoa naba ni katotonga St Bauro ni beku ibukin te Uea ao n tatakaruaea te rongorongo ae raoiroi.
- Details
- Written by Uriam Timiti
Mauri tariu ao maneu n ana toa Nei Maria n te bong aio ae bon kauringaan kaotina i Fatima. Ti bon karaba tinara Nei Maria n tauraoina ao tabeakinara n tai nako ba ti na kaeti kawaira ao maiura riki n tai ake ti a tia n tannako iai mairoun natina ae Iesu ao ni baireia ba ti na karaoa te bure are na kararoaira mani kamaraka natina.
Eng nte bong aio n 1917 ao e bon moani kaoti iai Nei Maria nakoia ataei ake Baraniko, Iacinta ao Lucia iaon Portugal n tuangiia unin te Atua ae moan te bati ibukin te bure ao e tua Nei Maria te rairannnano, te benetenia ao te tataro ibukin kabaraan ara bure.
Eng kaotin Nei Maria i Fatima bon kaotan tabeiangan nanon tinara Nei Maria ibukira ngaira natina n aki tangiria ba ti na mate n aki totoki ma ti na bane ni kamaiuaki n uan ana tangira ma ana nanoanga natina ae Iesu ngke e maraki mani mate ibukin kabaraan ara bure i aon te Kaibangaki ao e a mangauti ni kaota te tokanikai iaon te mate.
Ti a reitaki ngaira kain te charismatic n te tai aio ni kabatia riki ara waaki ni kaota rakan tangiran tinara iroura n ara makuri ni mitinare n uota te rongorongo ae raoiroi nakoia aomata ba a aonga ni manga tanrikaki ao n okira natina ae Iesu. Ti na bubutia naba Nei Maria inanon ana namakaina aio ba e na reireinira arora ni kakukureia nanon natina ae Iesu n ara makuri ni kaota ana nanoanga Iesu nakoia aomata ae akea tiana ao tokina.. Ti a reitaki naba ni kaburei maiura ngaira kain te charismatic nakon Atiniban Nei Maria ae Imakurata. Ti bia naba reita aio ni kabureira ngaira n ara utu nakon Atiniban Nei Mria ae Imakurata.
- Details
- Written by Uriam Timiti
Ti a tabe ngkai ni mananga nakon taberan te baintangira ni Bakate ibukira are bon ruon te Tamnei ae Raoiroi. Inanon manangara ao ti tuangaki n te bong aio kanara ao ara tianaki ni borau ae bon Iesu te Bwerana ni Koaua ae na anganira te Maiu ae akea tokina.
N te bong aio ao I karekea ana taeka ni karabaraba ara Tama n te charismatic ae Fr Koru ni karabaraba ibukin ara anganano ngaira kain te charismatic ni manga tabeakina butin ara web site ao ara nutibeba are Emmanuera. E taekinna te Tama ba aio bon kanikinaean mamakurin te Tamnei ae Raoiroi ibuakora ao inanora ae na kairi kawaira nakon Tama are i Karawa ba uan marakin, maten ao mangautin Iesu. Bon aio te koaua ae moan te kakawaki ibukira ba ti riai ni kataua te Tamnei ae Raoiroi ba e na kairi maiura ni katoa bong ao ngaira ti riai ni kainaomata te Tamnei ae Raoiroi ba e na mamakuri inanora ao iroura n tai nako.
Tariu ao maneu taberan te baintangira ae ti anganaki n te Bakate bon Iesu ae anga Ngaia nakoira ba kanara ni Bakate ae maeka irarikira n te Eukari n aron ana taeka imain waerakena nako Karawa ae kangai "Ao noria N na mena irarikimi ni karokoa tokin Aonnaba". Eng ti tuangaki naba n te ewangkerio n te bong aio ba a kana ngkoa te manna Iteraera n te rereua ao a mate ma ngaira ti anganaki Iroun Iesu te Amarake ni Koaua ae ti na kanna a ti na aki manga mate iai. Ti na butia tinara Nei Maria ba e na raonira ao n tataro ibukira ba ti na teimatoa ni n tau ni katonga te amarake ni koaua ae Iesu n te komunio ao ti na n ongotaeka nakon ana kairiri te Tamnei ae Raoiroi.