Kanan Tamneira...
- Details
- Written by Uriam Timiti
Mauri tariu ao maneu n ana tangira te Uea
I a rimoa moa ni karaba te Uea n ana tangira ae moan te kororaoi nakoira n taai nako, riki ngkai E a tia n anganira te kantaninga ae bou ibukin te kamaiuaki inanon marakina, matena, ao mangutina. Ti karaba te Uea inanon tarira ao manera ae Wayne n ana ibuobuoki ni manga makuri iaon te website ba e na manga maiu imuin matena man September n te ririki ae nako ni karokoa te bong aio.
Manga maeun te website n te bong aio e bon kanikinaea naba manga bungiakin St Padre Pio iaon Tarawa ao Kiribati. Eng n tairikin te Kauabong ae ngkoananoa ao ti a botaki ara koraki tabeman n St Padre Pio mai Biti ibukin manga kamaeuan te rereitaki iroura ao karekean naba ara ibuobuoki nakon ana waaki te charismatic iaon Kiribati n reitaki ma tarira ao manera ni charismatic aika I-Kiribati i tinanikun Kiribati.
Tairu ao maneu ti anganaki iroun tinara te Ekaretia ara tai ni bukamarua te Bakate inanon 50 te bong are na toki n te Bentekota. N te bong aio ao ti nora aroia Abotoro ma ana reirei Iesu ni waki inanon te ninikoria n tataekina Iesu nakoia aomata ba aonga ni kinaa ao ni kakoaua man onimakinna ao ni karekea te kamaiuaki. Bon aio naba te muioko ae na kamatoaki nakoira inanon te Bentekota ngke E ukira Iesu n anganira Tamneina ae Raoiroi ao ni muiokoira ba ti na nako tokin aonnaba ao ti na babetitoia aomata n aran te Tama, Te Nati ao te Tamnei ae Raoiroi.
Eng tariu ao maneu bon aio ngkanne nanon Iesu ibukira inanon tain te Bakate aio ba ti na riki ba taan kakoauaa nakoia te botanomata ba E maiu Iesu are kan anganira te kamaiuaki ngkana ti onimakinna mani kakoaua. Eng ti riai ni butia Iesu ana karatia ba ti na kona ni kaota bannan ni koaua ana tangira ma ana nanoanga nakoia aomata ni maiura, n ara taetae ao ara makuri. Ti riai n riki ba kanga ai aron taian tirotaam aika bane itiakiia ni kaota Tamnein Iesu nakoia aomata. Bon tinara Nei Maria te tia reireinira ao ni buokira ba ti na riki ni koaua ba taan kakoaua ibukin Iesu nakoia aomata ni bane.
- Details
- Written by Uriam Timiti
Eng aio te koaua ae moan baan te kakawaki ibukira ba E aki kona ni bibitaki aron te Atua nakoira ma bon ngaira aomata aika a bibitaki arora nakon te Atua. E onrake te Atua n te akoi ma te atataiaomata ao te tangira ao E bon aki kona ni bitaki arona. Bon nanon te Atua ba ti na nim ma Ngaia n tai nako ba ti aonga ni karekea te maiu ae aki totoki irarikina.
Man te moan tai ao E anganira ana tua te Atua aika a koreaki iaon taian atibu ba kairan maiura nakon are ti na kamaiuaki iai, man te tai aio E anganira ana tua te Atua aika koreaki inanora iroun Tamneina ba ti aonga ni karekea kororaoin te kamaiuaki Irouna. E anganiira Tamneina ae Raoiroi ba E na raonira n taai nako, ba e na riki ba te tia buokira, te tia kairiira ao te tia onikira ba karikibai aika bou. Eng inanon te Berita ae Bou ao ti a nora iai kakororaoan ana berita n akoi te Atua nakoia ara bakatibu ba e tiku ba raora n tai nako inanon te Tamnei ae Raoiroi.
Ti weteaki iroun te Tamnei ae Raoiroi ba ti na karokoi ana baintangira te Atua ae te Teniman n Temanna irouia tarira ao manera inanon te katoka bai. Ngkana ti katokai baira ao ti na karaoia n aran Iesu ae Natin te Atua ni kaotia ba ti karaoa ana makuri Iesu ni kamaiuia aomata nako. Eng bon aio te anga ae ti kona ni kabuta nako iai abanuean te Atua ibuakora ao ni buakana ao ni kamaunanakoa ana urubai te riaboro.
- Details
- Written by Uriam Timiti
Tariu ao maneu ti a kabaiara ngkai inanon Iesu are e riki n aomata ao e tiringaki ao e mate ibukin ara bure iaon te kaibangaki ba ti aonga ni bane ni kamaiuaki ao n riki ba naati ngaira ni koaua aika tan baibai iroun te Tama.
Eng bon Tamnein te natinaki iroun te Atua ae a nganira te kona n takarua ni kangai Abba te Tama. Are nanoan ngkanne ba ngkai bon naati ngaira ao bon ngaira naba taan baibai irarikin Iesu iroun te Tama.
Ti kauringaki n te taramo n te bong aio ba ti na nako tokin aonnaba n tatakaruaea te rongorongo ae raoiroi ba ti a bane ni kamaiuaki ao ai akea te kakaokoroaki iroura imarenan te Iutaia ke te Tientaire, te toro ke te inaomata ma bon ngaira natin te Atua aika ti a tia tabekaki iroun te Tama. Are nanona ba te Atua bon tamara ni koaua ae na kawaniira ao tararuaira. Ngkana ti nim ma ngaia n tai nako ao ti na bon karekea te kaniwanga ae moan te kakawaki ba te maeka ma Ngaia ni mwengara ni koaua are Karawa.
Tariu ao maneu ti kabanei korakororara ni kabuta te rongorongo ae raoiroi ae te tabekaki ba naati ngaira iroun te Atua te Tama are boni Ngaia te tia anganira kororaoin te kamaiuaki iroun Tamneina ae Raoiroi.
- Details
- Written by Uriam Timiti
Tariu ao maneu ti riai n tauraoi n tai nako ni kaota te tangira ao te nanoanga nakon ane kainnano ke ane roko iroura ni bububti ara ibuobuoki ma ara tangira. Ti kauringaki n te karaki are ti ongora n te ewangkerio n te bong aio ba ngkana ti bubuti ke ti karebwerebwe ao ti na bon anganaki mani kaukaki te mataroa nakoira iroun te Tama ae onrake n te tangira ma te nanoanga ao te akoi.
Ma tera te bai ae kakawai nakoira ibukin teimatoan karekean taian baintangira ma kamimi mairoun te Tama? Ti kauringaki ikai ba te bai ae kakawaki bon te onimakina te Tama ao te ukinnano ni butimaea te Tamnei ae Raoiroi. Te Tamnei ae Raoiroi boni Ngaia te tia anganiira kororaoin te kamaiuaki mairoun te Atua ao te tia buokiira ao te tia kaotai kawaira inanon te Koaua nakon te Tama. Ngkana iai te onimaki ao te Tamnei ae Raoiroi iroura ao ti na bon kona n takarua ni kangai Abba te Tama ao ti na ataia ba bon ara bai te kamaiuaki ngkana ti bubuti ba ti na anganaki.
- Details
- Written by Uriam Timiti
E kabarabaraaki n te bong ba antai raou ao e matata n ana kaikonaki Iesu ba raou bon au kairirbai ae I noria ba e ikoaki ba muon te makuri n iowawa nakoina ao e kainnanoa au ibuobuoki. N angin te tai ao ti taku ba raora bon te koraki ake ti tatangiriia ke te koraki ake kona ni kabooa muin te makuri ae raoiroi ae ti a tia ni karaoia nakoia. Eng, e kauringiira ao e reireiniira Iesu ikai ba raora bon are kainnanoa ara ibuobuoki n aki tabe ba ti tatangiria ke e kona muin ara makuri n tituaraoi ke ara makuri n akoi.
I taku ngai ba n te bong aio ao ti riai ni bon manga titirakiniira ba antai raou ni koaua inanon maiu aio. Eng, bon raou ni koaua bon Iesu are tangirai ba e na reke irou kororaoin te kukurei ao te kabaia irarikina i Karawa. Tao ti bon riai n noriira naba ba kanga ai aron te aomata are tanabaiaki ngai n te tai aio ae I kainnanoa buokau ao kamaiuau man te kanganga ao te ikoaki ae I mena inanona n te tai aio. Eng ti kona naba n riki ba taian kakaiaki ngaira ba muian ana makuri teuare e buakaka ae a tia ni kaikoakiira ao ti a kani mate. N te tai aio tariu ao maneu ao ti a wetea Iesu ae bon Ngaia raora ni koaua ba e n roko ni buokiira ao ni kamaiuira. Ngkana ti wetea aran Iesu ao e na bon roko ni buokiira ao e na kairiira nakon te tabo n irua are a na bautaki iai ikoakira ao tin a buokaki ba ti aonga ni manga marurung ao ni kamaiuaki.