Kanan Tamneira...
- Details
- Written by Uriam Timiti
"N aiaron Tamau ae kanakoai ao ngai I a manga kanakoi ngkami nako tokin aonnaba ao babetitoia aomata nako n aran te Tama, Te Nati ao te Tamnei a Raoiroi." Eng aikai bon ana taeka Iesu nakoira are kamatoa iai aron ana kantaninga ibukira ni kabane inanon maiura aio. Oin tabera ao ana kantaninga te Atua ibukira bon te katotonga Natina ae Iesu are kanakoaki ba e na anganira te kamaiuaki. Te maiu ni kanakoaki ngkanne bon te maiu ibukin karaoan te bai ae ti muiokoaki iai, are nanona ngkanne ba a na motikaki taekara n arora ni karaoi tabera are ti kanakoaki iai. Ti riai n ota raoi iai ba ti riai aki maiu i bon bukira ma ti na maiu ibukin te Uea.
Te maiu ibukin te Uea bon te wewete ae kakawaki ibukira ba boni ngaia ae ti kamaiuaki iai. Ti riai ngkanne n ataia ba ti na kanga ni maiu ibukin te Uea. Eng ti riai n ataia ba e na kanga aron kaotin te Uea nakoira. N aron are ti noria ni maiun St Francis n Assissi ao ti ataia ba ana moan tai ni kaitibo ma Iesu te Santo aio bon ngke e irabati ni koona te rebera. Inanon kammairan ao kanimumutan te rebera ao e a kunea St Francis ba ngaia bon rabatan Iesu are rabatia. Bon aio ana kaitibo Francis ma Iesu are e bitii bai ni kabane ibukina ba e na kitana te maiu ni kaubai ao ni mweraoi ao e na maiu ni kainnano. Eng, ngkana ti kakeaira i bon iroura ao ti bon kamwai nanora ni kataua Iesu ba e na tautaeka iaon maiura ao ni bainiira ba ti aonga ni karekea kororaoin te kamaiuaki ae akea tokina i Karawa.
- Details
- Written by Uriam Timiti
I uringa te karaki teuana ae I ongo n tain te rereua teuana ba taekan te tia kamataku are nakonako n te roobu ae kabaeaki imarenan taian maunga aika rietata. Are nanona ngkanne ba iaan te roobu ao ai bon te bangabanga ae nano tao nakon tenikai ke akai te nii nanona. Are nanona ba ngkana ko baka man te roobu ao akea taekam ba te mate. Ngkana e nakonako te tia kamatau iaon te roobu ao a bane n tatakarua tani mataku ni kamoamoa ninikorian ao bbatin te te tia kamataku. Inanon ae tao ana kateniua n tai ni karaoa ana kamataku teuaei ao akea ba a manga takarua tani mataku n tua e na kookaki te teuare te tia nakonako n te wibara (wheelbarrow). E roko te maku iroun te tia kamataku ngkai e ataia ba ai tiaki ngaia ae na karaoa te kamataku ma ai bon te tia kooka te wibara. E ataia ba e nang onimakina maiuana inanon bain te tia kokooka te wibara. Imuin ae aki kakarongoa teutana te tai ao e a kariaia ba e na toka iaon te wibara are na kookaki iaon te roobu. E katikui baai ni bane iaon te onimakinan te tia kabuta te wibara are ai boni ngaia ngkai ae mena taekan maiuna inanon baina.
Tariu ao maneu bon aio te bai ae reke ngkana ti kaeka ana wewete Iesu ba ti na kaakeaira. Ti onimakina maiura inanon bain Iesu n aiaron te tia kamataku ae onimakina maiuna inanon bain te tia kooka te wibara. Ngkana ti kaaakeaaira ao nanona ngkanne ba ti onimakina Iesu ba akea te bai ae ti kona ni karaoia i bon iroura ma bon ti Iesu are tautaeka iaon ni kabane. Tariu ao maneu bon aio aron ae weteira nako iai Iesu ba ti na kabanei maiura ibukin Iesu ao bon ngaia ae kawakiniira ao n tabeakiniira n tai nako. Are nanona ngkanne ba ngkanati maiu aio ti riai n aki toki karaba ao n neboa Iesu ibukin te maiu ba boni Ngaia ae anganiira.
- Details
- Written by Uriam Timiti
Tariu ti anganaki n te bong aio te kiing ae moan te kakawaki ibukin roko i Karawa- ba bon te nanorinano ke te maiu ni mangori. E taku Iesu nakoia nakoia ana abotoro; "Nakomai ao reirei mai irou ...ba I bati n nimamannei ao I nanorinano."
Te nanorinano ao te mangori boni ngaia aan taian karea nako aika raraoi ao boni ngaia ae na kaitiakiira ba ti aonga n roko i Karawa. Bon aio ana karea Iesu ae ara tia kamaiu ae moan baan te kakannato. Ba te aomata nako are karaoi kakai aika kamimi tiaki ibukin kamoamoakina irouna ma bon ibukin kaotan maiuakinan ana karea Iesu are weteira ba ti na reirei mairouna ae te tataonannano ao te te nanorinano.
Ao tera raoi nanon te karea ae te nanorinano? Eng te nano rinano bon te ataia ba ngaira bon ana karikibai te tia karikibai ae te Atua. Te nanorinano bon butimaean nnera ae bon taian karikibai ngaira. Ngkana ti karaoi baai ni kabane ni katotonga iai Iesu n arona ni nimamannei ao nanorinano ao ti na bon aki kona ni kabuanibai ao ti na katiakaki ba ti aonga n roko i Karawa.
Ti noora aron Iobi n te moan wareboki n aki kona ni ngurengure e ngae ngke e kataua teAtua ba e na rinanon taian kanganga ma kainnano. E teimatoa n ataia Iobu ba bon ngaia ana karikibai te Atua ae onrake n tai nako n te te nanoanga ao te tangira. Ngkana ti kan riki ni koaua ba taan iriira Iesu ao ti na kaota maiuakinan te nanorinao inanon kawakinan te tua ae bou are anganiira Iesu ba ti na itangitangiri n aron are e a tia n tangiriira iai Iesu.
- Details
- Written by Uriam Timiti
Tera aoria ao nneia aomata ake a reke ba tan tia kawakiniia ao n tararuaia ataei aika a uarereke? Eng a bon riki ba kanga aia anera ataei aikai. Ai ngaia are ti na bon riai ni aki mamaa ni memena irarikiia ataeia aika uarereke ba aia anera ake i Karawa a bon ataia ba a rangi n tekeraoi mani kakabaia ngkai a tetei irarikia ataei aika uarereke man taratara matan te Atua i Karawa. Bon anera aika tan tia kawakin aika aki toki n neneboa te Atua ao man ongongo taeka Irouna ao man iririi ana tua. Bon anera aikai aika aki toki n neboa te Atua inanon aia kakarongoa ma tangitangiia ataei aika uarereke. Ti riai n taai nako n tararuaia raoi ataei aika uarereke ao ni katotongiia aia anera aika tan kawakiniia.
E reitaki te rongorongo aio n te ewangkerio n te bong aio n tuangiira ba a kakawaki ataei aika uarereke nakoira. E tuangira Iesu ba are kan riki ba te kabanea ni kakannnato ibuakora ao e riai n riki ba ai aroia ataei aika uarereke ao ane butimaea te ataei ae uarereke n aran Iesu ao e bon butimaea naba Iesu. Ti kauringaki naba ba ti na bon aki ribaia ataei aika urarereke ba aia anera ake i Karawa a bon aki toki n tarataraa matam te Atua. Are nanona ngkanne ba ngkana e kona te Atua n kaota kakannatoia ataei n anganiia aia anera aika tan neneboia te Atua ao ngaira naba ti bon riai n aki toki ni tararuaia ataei aika uarereke ao ni katotongiia n aroia n nimamannei ao n nanorinano.
- Details
- Written by Uriam Timiti
Eng, bon aio ana kaeka Betero nakon Iesu ngke E titirakiniia abotoro ba antai Ngaia. Bon aio te kaeka ae kairaki iai Betero iroun te Tamnei ae Raokiroi are bon Ngaia Maiun te Atua ae Mamakuri inanora. Iesu boni Ngaia rabatan ana tangira ao nanoanga te Atua are kawariira ba ti aonga ni bane ni kamaiuaki ao ni maeka i rarikina i Karawa are boni Ngaia mwengara ni koaua are a tia katauraoaki ibukira ni kabane.
Inanon maiura aio ao ti riai ni kabanei korakorara ma maiura ni katotonga Iesu are boni Ngaia te Koaua, Kawai ao te Maiu. Ti na angan Iesu inaomatara ba E na baini ao ti na rineia mani motikia ba ti na uouota ara kaibangaki ao n iriira Iesu. Ti na butia te Atua ana karatia ba ti na kabonganai raoi baike e karikii i aonteaba ba kawaira ni kona ni karekea are bon te oinibai are bon te maiu ae akea tokina i Karawa. Ti na butia Iesu ae bon Uean te Maiu ba e na moani bai iroura n ara iango ao ti bia motikia ba a na bon akea naba te aomata ke te bai teuana ae na tei imarenara ma te Atua ni kabuaa reken te kona n noora ubun Iesu ao ni maeka ma Ngaia n te kabaia ao te kukurei ae akea tokina.
Tariu ao maneu ti riai n aki maninga ba Iesu are na manga oki te kauatai bon Ngaia te Tia Motikitaeka ae maaka mani mimitong ae na anganiira motikan taekara n ara tai ni mate ba te maiu ma Ngaia n aki totoki ke te mate inanon te kabuakakaki ao te raurenako ma te Atua n aki totoki.
Tariu ao maneu a na bon eti kawaira inanon maiura ngkana ti boni kina raoi Iesu ba boni Ngaia te Kristo ae bon Natin te Atua ae Maiu. Ti na bon rangi ni kananoanga ngkana ti aki kina Iesu ba e na bon aki reke iroura te Koaua are na kairiira n te Kawai nakon te Maiu. Ti na muiokoi ara kekeiaki iroun tinara Nei Maria ba e na taui baira ao ni kairiira nakon Natina ae Iesu.