Kanan Tamneira...
- Details
- Written by Uriam Timiti
E maeka te Atua n tabo nako n arona ni banin ao ni kororaoi n aiaron ana Taeka te Atua are a tia n anganira ngke e kangai; " Ngai te Atua ae I rangi ni kaan nakoimi ao I aki raroanako mairoumi" (Ieremia 23,23). Ai ngaia are te Atua ae ti kakakaea E bon aki maeka n te tabo ae raroanako mairoura ngkai ti ataia ba e a tia n riki n iriko te Taeka ao E maeka ibuakora. E boni maeka inanora ao ngaira i nanona. Aio are e a bon tia naba n taekinna Bauro ngke e kangai; "Ba inanon ao iorun te Atua ao ti nakonako, ti kunea ao ti karekea arora ae banin ni kabane.
Ma antai ae kona ni ninianako aron te Atua ae raba mairoura man aki kona ni kabarabaraaki? Antai ae kona n tebona nako aron te Atua? Antai ae na kamoamoa n taku ba e ataa kabarabaraan aron te Atua ni kabane? Eng ngkai boni ngaira ana karikibai te Atua ao ti na bon aki kona n ataa aron te Atua ae te tia karikibai. Ma ti riai n onimaki ma te kakoaua ae matoatoa ba te Atua boni Ngaia are iai ngkoa, iai ngkai ao iai n taai nako n aki kona ni bibitaki. Boni Ngaia moan baai ao tokia ae ti bon aki kona n roota maakana ma wanawanana rietatana ao nanona. Ti na bon riai n aki kataia n roko Irouna ba ti raawa n reke n te bure ni kainikatonga.Â
- Details
- Written by Uriam Timiti
Tariu ao maneu ti karaba te Uea n ana rongorongo nakoira n te bong aio ba ti riai ni maukina te eti ao te riai ba ti aonga ni bane ni kamaiuaki. Bon aio te boton iango ae ti weteaki nako iai n te bong aei ba ti maiuakina rabatan te eti ao te riai nakoia raora ba ti aonga n reke ba rabatan te rongorongo ae raoiroi nakoia tarira ma manera; rabatan te rongorongo ae aki takaruaeaki n te taetaenikawai ma e oti rabatana n te makuri. Ba e taku te taeka n rabakau teuana ba te tangimaaka riki te makuri nakon te taetaenikawai.
Karaoan te makuri ae raoi bon kanga te ota are taekinaki nakoira n te ewangkerio n te bong; te ota ae na nooraki irouia aomata nako ba a na manga kabuta nako te ota anne nakoia raoia. Ti na iangoia n tai nako ba maiura aikai a na riai n riki ba te ota nakoia raora. Bon anne ana wewete nakoira Iesu n te bong aio ba ti na riki ba oota ngaira. Ngkana ti aki riki ba oota ngaira ao a na bon motikakki taekara nakon te kabuakakaki.
E bon makuri te riaboro inanon bai aika karabaaki ao ti kauringaki ikai ba bon akea te bai ae karabaaki ae na aki kona n ataaki. Ti reireinaki naba ikai kawaira ni buakana te riaboro ao ni kamaiuaki man ara kangannga ba ti riai n uoti ara kanganga nakon te ota ao ngkanne ti na bon kamaiuaki. Ngkana ti karaba i bon iroura n ti ngaira ao ngkanne e na bon makuri iai teuare buakaka ao ti na kabuanibai iai. Ti riai ni butia Iesu ana karatia ba ti na teimatoa ni maiuakina te eti ao te riai nakoia raora.
- Details
- Written by Uriam Timiti
Ngkoananoa ao ti kaotaaki n nanon te taeka ae Ana Nanoanga te Atua ba bon te tangira are riaon rawawatan ara bure are nanona ba bon akea ara bure ae ti taku ba a rangi n rawawata ao aki ni kabaraaki iroun te Atua. N te bong aio ao ti a manga reita te kamatata n nanon te taeka Ana Nanoanga te Atua. Ba bon ana Nanoanga te Atua ae e teimatoa ibukira n tai nako. Are nanona ngkanne ba bon akea te tai ae e kona n aki bara iai ara bure iroun te Atua ngkana ti nakoina ma te nanomaraki ao te nanorinano ao te bubuti.
N te bong aio e kauringiira Bauro te rongorongo ae raoiroi ae ti kamaiuaki iai. Bon taekan ana Tangira ao ana Nanoanga te Atua ibukira ni kabane. Te tangira aio are kaotaki iroun Iesu n rokona nako aonteaba, marakina ao matena n te kaibangaki ba e na kaboi ao ni kaitiakiira iai man ara bure bq ti aonga n natinaki. Ti a manga kaungaki iroun Iesu n te bong aio ba ti na okira te Atua ma te nanomaraki ni koaua ao ni butiia kabaraan ara bure. Ti na bane n tataekina te rongonrgo ae raoiroi nakoia raora ni kabane ba e akoi man nanoanga te Atua ao akea tokin ana tangira. E bon roko Iesu ibukin aei ba e na kamaiuia akana bure man aoraki ao e na tebokia ao ni kamunanakoi barekan aia bure. Ti na katotonga te aine are taekinaki n te ewangkerio n arona nakon Iesu n teboki rangana n rani matana, ni kabiri rangana n te kabira ae moan te boiarara ao ni kamaui rangan Idesu n iranatuna ao ai aron kamaiuana ngke e bane ni kabaraaki iroun Iesu.
- Details
- Written by Uriam Timiti
Tariu ao maneu bon aio te titiraki ae kakawaki nakoira ba ti na ataa aron kaekana iroun Iesu. Ba e na kamatata raoi nakoira ba tera bukin rokona i aonteaba ke tera ana kantaninga te Atua ibukin ana botanaomata man te moantai. N te moan wareboki ao ti nora aron nanon Iesu ba e kan anganiia aomata ni kabane te kamaiuaki inanon Rabatana ae te Ekaretia. Inanon te Ekaretia ao E kan katerea Iesu aron miterion te tangira ae kororaoi are katiteunaaki iai ma te Tama ao e rabatanaki iroun te Tamnei ae Raoiroi. Bon aio miterion ana tangira are kan katikiira ngaira aomata nako iai ba ti aonga n riki ba te rabata ae ti teuana inanon te Tamnei ae Raoiroi.
Ngkai bon kain te rabata ae ti teuana ngaira ao bon Nanon Iesu ae atuun te Rabata anne ba a na bane aomata nako ni kamauiaki ao n riki n ti teuana ma Ngaia. E kaotaki Nanon te Atua anne inanon Ana Nanoanga are bon akea rawawatan ara bure ae kona n riaon ana tangira ibukira.
N te ewangkerio ao ti nora aron Iesu n wetea Mataio ba e na riki ba te tia ririmuina ao ti ongo naba aron ana kaeka Mataio n irirra Iesu. Ti ataia ba Mataio bon te tia rikoi angabai ae ataaki ibukin aroia ni babakanikiawai nakoia aomata. Are nanona ba bon te tia bure Mataio ae kainnanoa te kamaiuaki. Inanon ana tai Iesu n tiku n ana auti Mataio ao akea ba roko n tekateka ma Ngaia taian bobirikano ao taan bure. Ngke a nora aio baritaio ao a kaekaia ana reirei Iesu ni kangai; "E aera ami tia reirei ngkai e amamarake ma tani bure?" Ma E kaekaia Iesu man tuangia Baritaio ba e aki roko ibukia akana a marurung ba ibukia akana a aoraki.
Tariu ao maneu bon aio ngkanne kaekaan te titiraki iroun Iesu are kateterea iai nakoiu ao nakoim ba E kan kamaiura man ara bure ao E kani kaota naba ana Nanoanga ibukira ba ti na aki mate n aki totoki ma ti na maiu ma Ngaia n te mwenga are a tia ni katauraoia ibukira. E weteira Iesu ba ti reita nanona aio n tatakaruaea ana Nanoanga nako tokin te aonnaba ba aonga n rairaki aomata nakon Iesu ao man katotonga maiuna. E kairoroira Iesu ba ti na maiuakina ana Nanoanga ma ana Akoi nakoia raora ba a aonga naba ni kamaiuaki ao n riki ba kain te Rabata ae ti teuana ae bon ana Ekaretia.
- Details
- Written by Uriam Timiti
Tariu ao maneu e teke nanou n te ingabong aio n te rongorongo ae I anganaki ba ngaia e bon korereaki kawaira ni borau i aonteaba nakon nimaua te makoro. Te moan bon rokon Iesu nako aonteaba ba e na kawariira n tatabemanira ba e na kairiira nakon Tamana iroun Tamneina ae Raoiroi. Te kauoua bon kaukan kawaira iroun Iesu ngke e tauraoi n tine iaon te kaibangaki man katokai iaona rawawatan ara bure ni kabane ba ti aonga ni kamaiuaki. Bon te tangira aio are riaon rawawatan ara bure ae kaota iai nakoira ana Nanoanga te Atua ae akea tiana ao tokina. Te kateniua ni makoro ngkanne ai bon kaukan mataroan nanora nakon Iesu ba e na rinnako ao ni kabaroa ana tangira nakoira. Kaukan te mataroa aio boni ngaia te bai ae kakawaki ba e na motikia ba ti na kamaiuaki ke ti na aki. Ba e bon aki kona ni kauki mataroan nanora Iesu ba akea te kiing Irouna ma e bon tiku te kiing iroura n tatabemanira ao bon tii ngaira ae ti kona ni kauki mataroan nanora. Kaukan nanora bon te tauraoi ni rairi nanora n tai nako inanon te takaramentu ni benetenia ao te katonga ana baaka n amarake Iesu inanon te Eukari. Te kaaua ni makoro ngkanne bon te kakoaua ao te onimaki ba bon iai ara tabo ae kataraoia Iesu i Karawa irarikina ae bon Ierutarem ae boou ae akea iai te tang ma te maraki ma bon ti rau ma te raoi ao te kimarerirei ma te kukurei. N tokin kawaira ao inanon keiakinan ao maiuakinan te tangira ao te raoiroi ao ti na bane n roko n te kanimaua ni makoro are ai te maeka n te Aba n Akoi ae Ierutarem ae Boou are ti na nebonebo iai mai Nei Maria ao kaini Karawa inanon te mimitong.