Kanan Tamneira...
- Details
- Written by Uriam Timiti
Bakate Kaabong.
Warekan aia Makuri Abotoro. 3: 11-26
Ngke e nimta Betero ma Ioane te mauku are kamaiuaki, ao a baneakinaki irouia te koraki n te kaman ae aranaki ba ana Kaman Toromon. Ngke e nora anne Betero, ao e taku nakon te koraki: “Mane aika Iteraera, e aera ngkai kam kuba n aei? E aera ngkai kam tataraira, ba aongkoa ti kanakoa te aomata aei n oini makara ke i bukin ara raoiroi? Bon Atuan Aberaam ma Itaaka ma Iakoba ae Atuaia ara bakatibu, boni Ngaia ae neboa ana tabonibai ae Iesu, are kam kaburea ma ni kakewea i matani Birato ngke e tia n ana iango ba e na kabara. Ngkami, kam kaburea Teuare tabu, Teuare raoiroi; kam bubuti kabaran teuare tiriaomata ao kam kamatea Teuare mataniwin te maiu. E kautia Iesu ma kakoaua ae kaoka marurungin te aomata aei, ao kam noria ma ni kina, ao boni kakoauani Iesu ae katoka aorakina i matami ni bane. I atai ngkami, tari, ba kam karaoa anne n aki ataia, ao ai aroia naba ami mataniwi. Ma e kakoroaki iai bukin te taeka are E a kamani kaotia te Atua ni wia burabeti ni bane mai maina, ba E na maraki ana Kristo. Ma ngaia are kam na raraoma ma ni rairi nanomi, ba a aonga ni kamaunaki ami bure, ao e aonga ni kanakomaia te tai n raoi te uea. E na kanakomaia te Kristo are rineaki i bukimi, ae Iesu, ae riai n tauaki i karawa ni karokoa te bongi ni kamaiu ae kabuta, are E taekinna te Atua ni wia ana burabeti ae a raoiroi. E kangai moa Mote: “E nang kateirakea temanna, te Uea ae te Atua, mai buakoia tarim ba te burabeti n ai arou; kam na ongo ni bai ni kabane aika e na tuangi ngkami. Ane aki ongo iroun te burabeti anne, ao e na kamaunaki man te botanaomata.” Ai aroia burabeti ni bane naba ake i muina, mairoun Tamuera ma tan ruamuina, a bane n taekini bong aikai. Ao ngkami, bon natia burabeti, ao natin te berita are E karaoia te Atua ma ara bakatibu ngke E kangai nakoia Aberaam: “A na bane ni karaoiroaki botanaomatan aonaba am kariki.” E kauta ana tabonibai te Atua i bukimi moa, ao E kanakoa ba E na karoiroingkami ma n rarikingkami nako man aroma ni buakaka.”
Te Taramo 8; 2, 5-9
Kaekana: Ai kakanato ra aram i aonaba ni kabuta!
Te uea ae Atuara, ai kakatao ra aram, i aonaba ni kabuta!
Ao ait era te aomata ngkai Ko rekennanoia? Tera natin te aomata ngkai Ko mutiakinna? K.
Ko karaoia n ti teuana i an te Atua, Ko rabunna n te mimitong ma te kakanato;
Ko kateia i aoni baike Ko karaoia nib aim, Ko kawene bai nako i ani waena. K.
Tibu ma kao ni bane, Ao manin naba buakonikai,
Mannikiba ma ikan tari, Aika tou kawaini marawa. K.
Alleluia, alleluia.
Aei te bong are E karaoia te uea; Ti na kimareirei ma ni kakatonga iai. Alleluia.
Euangkerio
Warekan ana Euangkerio Ruka 24: 35-48
A karakini bai ni kabane reirei, ake a riki i nanon te kawai, ma aroni kinakini Iesu irouia n otean te bwerena. Ngke a tabe naba n taekini baikanne, ao E roko Iesu n tei i buakoia, ao E kangai nakoia: “Te raoi nakoimi.” A kuba ni maku, ba a taku ba te tamnei. Ma E kangai nakoia: “Kam ti maku? ao tera bukin te nanokokoraki ae riki i nanomi? Tarai baiu ma waeu, boni Ngai. Ringai ao taraai: ba akea irikon te tamnei ma rina, ao kam noria ba iai irou.” I muin ana taeka anne, ao E kaoti baina ma waena nakoina. Ao kanga a rawa naba ni kakoaua i nanoni kukureia, ba a tuai toki kuban nanoia. Ma ngaia are E titirakinia ni kangai: “Iai kanami iroumi ikai?” Ao a anganna te makoro ni ika ae tinimaki, ao E anaia ni kanna i mataia. E manga taku nakoia: “I bon tuangi ngkami ngke I mena naba i buakomi, ba a riai ni kakoroaki bukin bai ni kabane ake a koreaki ba taekau n ana tua Mote, ao irouia burabeti, ao n taian taramo.” Ao E kauki nanoia ba a na ataia nanon taiani Koroboki. Ao E taku nakoia: “Noria, e koreaki ba E na bae ni maraki te metia, ma ni mangauti mai buakoia mate i muin tenibong, ao e na katanoataki nakoia botanaomata nako, ni moa mai Ierutarem, te rairannano n arana, i bukini kabarani bure.”
Tibatiba: Kinakini Iesu inanon otean te Bwerena
Tariu ao maneu ai kakukureira bat i a roko n tain the mangauti are bon te tai ni karabaraba nakon te Atua ba e a koro nanon ana Berita n Akoi ni karokoan ana kamaiu iroun Natina ae Iesu. Ai tiaki toro ngaira ma ai bon tarin ao manen Iesu ao tani baibai irarikina i Krawa. Ti a riki ngkai ba tani maeka ma Ngaia i Karawa. Ba bon oin ana kantaninga te Atua i bukira ba ti na bane n rinnako n te Abanuea ae Karawa ao ti na katonga te kabaia ae akea tokina. Inanon te bure ao ti na bane ni karekea te motintaeka ae kanananokawaki ba te mate ao te kabuakakaki n aki totoki.
N te moani wareboki n te bong aio ao ti ongora aroia Betero ma Ioane ni miakinaki ao ni kamoaaoaki irouia te koraki ngke e kamaiuaki te mauku are e nimtiia. Eng a taku te koraki ba bon iai te maka irouia Betero ma Ioane ni katoki aoraki ma e taku Betero ba bon tiaki ngaia ake a karaoa te makuro ni kamaiu ma bon Iesu ae Natin te Atua are E roko ba E na maraki ao ni mate ibukin kabaran ara bure. E reitia Betero ni kaotia ba bon Iesu are a tia kakewea ao ni kamatea iaon te kaibangaki ae makuri inanoia ao e kamaiua te mauku.
Tariu ao maneu inanon te ewangkerio ao ti ongora aroia ana reirei ake uoman a moanna ni bara nanoia ao e moti aia iango ba a na kitana Ieruyarem ao n okira mwengaia ae Emmaus. E nanoangaia Iesu ao e kataua ba a na kina reirei akekei inanon otean bwerena ma Ngaia. E kaotia ikai Iesu ba ti na kona ni kina Iesu ngkana ti nori ikoakini baina ma rarikina ao ti kakoaua. Ba inanon katean te Eukari n te Kabong n Tabu ao kakororaoan te angakarea aio ngke tauaki mani bainikirinaki ao e tingaki Iesu iaon te kaibangaki ao ti riai ni kamatoaki n ara onimaki ba ti na bane ni kamaiuaki ngkana ti a manga katonga Rabatan ma Raran Iesu n tutia ao ngkana ti kawara Iesu n te takaramentu ae moan te Tabu ae te Eukari.
- Details
- Written by Uriam Timiti
Warekan aia Makuri Abotoro. 2: 36-41
E kangai Betero nakoi I Iutaia: “Ke e bane n ataia te Utu ae Iteraera, n aki nanououa: ba Iesu are kam tauria n te kaibangaki, ao E karikia te Atua ba te Uea ao te Kristo.” Ngke a ongo taeka akanne, ao e ewaraki nanoia, ao a kangai nakoia Betero ma Abotoro: “Tari, tera ae ti riai ni karaoia?” E kaekaia Betero ni kangai: “Kam na rairi nanomi, ao kam na bane ni karekea babetitoami n arani Iesu Kristo i bukini kabaran ami bure, ao e na reke iroumi te karea ae te Tamnei ae Raoiroi. Ao e karaoaki te motintaeka i bukimi ao i bukia natimi ma aomata nako aika raroa, ni maitia are E na weteia iai te Uea ae Atuara.” Ao a maiti riki ana taeka n anai nanoia ma ni kaungaia ni kangai: “Kamaiu ngkami mai buakon te roro ae buakaka aei.” Ao a butimaea ana taeka, ao a babetitoaki. Ao raoi ake a reke n te bong anne, tao teninga te aomata.
Te Taramo 33: 4-5, 18-20, 22
Kaekana: E on aonaba n ana akoi te Uea.
E koaua ana taeka te Uea, A eti ana makuri nako.
E tatangira te eti ma te raoiroi, E on aonaba n ana akoi. K.
E tataraia akana makua, Ao akana onimakina ana akoi,
E kawakin tamneia man te mate, E karekei maiuia n tain te rongo. K.
A kantaninga te Uea tamneira, Boni Ngaia buokara ma otangara.
Te Uea, ke e mena am akoi i aora, Ba boni Ngkoe ara kataninga? K.
Alleluia, alleluia.
Aei te bong are E karaoia te uea; Ti na kimareirei ma ni kakatonga iai. Alleluia.
Euangkerio.
Warekan ana Euangkerio Ioane: 20: 11 – 18
E teitei Maria i rarikin te nne ni mate, i tinaniku, ao e tang. Ngke e tabe n tang, ao e baraki n tara nanon te nne ni mate, ao e noriia uoman anera ake a mainaina kunnikaia, ake a tekateka ike e a tia ni wene iai rabatani Iesu, temanna i etan atuna, ao temanna i bukini waena. A taku nakoina: “Neiko, ko aera ngkai ko tang?” Ao e kangai: “Bukina ngkai E uotaki nako au Uea, ao I aki ata te tabo ike E katukaki iai.” I muin ana taeka anne, ao e tanrikaki, ao e nora Iesu ba E tei, ma e aki kina. E taku Iesu nakoina: “Neiko, ko aera ngkai ko tang? Antai ae ko ukeria?” E taku neierei ba te tia kawakina te nne n aroka, ao e kangai nakoina: “Nao, ngkana boni ngkoe ae ko uotia nako, ao tuangai te tabo are ko katikua iai, ao N na nako n anaia.” E taku Iesu nakoina: “Maria!” E rairaki neierei, ao e kangai nakoina n te taetae n Ebera: “Raboni!”ae nanona te Tia Reirei. E taku Iesu nakoina: “Tai ringai, ba I tuai waerake nakon Tamau; ma nako, tuangia tariu au taeka ae kangai: I waerake nakon Tamau ae Tamami naba, ao nakon Atuau ae Atuami naba.” Ao e nako Maria Matarena n tuangia ana reirei ba e nora te Uea, ao e kangoia ana taeka.
Tibatiba: Tari, tera ae ti riai ni karaoia?
- Details
- Written by Uriam Timiti
Karemo Wiki 5 Katenibong.
Warekan ana Boki te burabeti ae Taniera. 3: 14-20, 24-25, 28
E taku te uea ae Nebukaneta nakoia Tiateraka, Metiaa ao Abeteneko: “E koaua ba kam aki toro irouia atuau, ao kam aki taromauria te tamnei ae te koora are I kateia? Kam tauraoi ni katorobubua ma n taromauria te tamnei ae I karaoia ngkana kam ongo tangin te konete, te kaibaba, te abi, te takebati, te raera, te taretima ma aekani bai ni katangitang nako? Ngkana kam rawa n taromauria, ao kam na tewenakoaki, n te tai naba anne, I nanon te ai ae uramaka. Ao antai te Atua ae na kamaiu ngkami mai nanoni baiu?” A kaeka te uea ae Nebukaneta uake Titeraka, Metiaka ao Abeteneko ni kangai: “Ti aki bae ni kaboa am titiraki anne. Ngkana e kona ni kamaiuira mai nanon te ai ae uramaki ao mai nanoni bain te Atua ae ti toro irouna, ao E na kamaiura. Ma ngkana tao E aki, ao ko na ataia, te uea, ba ti na aki toro iroun atuam, ao ti na aki taromauria te tamnei ae te koora are ko kateia.” Ngke e ongo anne te uea ae Nebukaneta, ao e koro unna, ao e onikaki moana i mataia Tiateraka, Metiaka ao ABeteneko ma n tewenakoia I nanon te ai ae uramaka. E kuba nako te uea ae Nebukaneta, ao e teirake, ao e titirakinia raona ni kangai: “Tiaki a boni kabaekai aomata akana teniman akanne ma n tewenakoaki inanon te ai?” Ao a taku: “Bon te koaua, te Uea.” Ao e kangai te uea; Ma I noriia aomata aika aman ngkai aika bon aoria n nakonako i nanon te ai, n akea kainnanoia, ao te kaaman, ai aron ae taran natia atua.” Ao e kangai Nebukaneta: “E na karaoiroaki Atuaia Tiateraka, Metiaka ao Abeteneko, ngkai E kanakoa ana anera ba e na kamaiuia ana tabonibai ake a onimakinna, ao a riaon ana tua te uea, ma n anga rabataia ba a na aki toro iroun te atua temanna, ke n taromauri temanna ae tiaki Atuaia. “
Te Taramo Taniera 3: 52-56
Kaekana: Ko na neboaki n aki toki, Atuaia ara Bakatibu.
Ko karaoiroaki, te Uea ae Atuaia ara bakatibu;
Ko na neboaki, ma ni kamoamoaki n aki toki.
E na karaoiroaki aram ae kakanato.
Ko na neboaki, ma ni kamoamoan aki toki. K.
Ko karaoiroaki, n umani mimitongim.
Ko na neboaki, ma ni kamoamoaki n aki toki. K.
Ko karaoiroaki, i aoni kaitokan Ueam.
Ko na neboaki, ma ni kamoamoaki n aki toki. K.
Ko karaoiroaki, Ngkoe ae Ko nora nanomi marawa.
Ko na neboaki, ma ni kamoamoaki n aki toki. K.
Ko karaoiroaki i eta i karawa. Ko neboaki
ma ni kamoamoaki n aki toki. K.
Imain te Euangkerio
Aei te tai ae angaraoi, aei te bong ni kamaiu.
Euangkerio
Warekan ana Euangkerio Mataio.8: 31-42
E kangai Iesu nakoia I Iutaia ake a kakoauaa:
“Ngkana kam maeka n au taeka, ao bon au reirei ni koaua ngkami, ao kam na ata te koaua, ao e na kainaomatai ngkami te koaua.”
A kaeka ni kangai: “Bon ana kariki Aberaam ngaira, ao ti tuai n toronaki iroun temanna. Ko kanga n taku ba ti na kainaomataki?” E kaekaia Iesu ni kangai:
“I bon tuangingkami ae kaoua, te aomata nako ae bure, ao bon te toro. Ao te toro, e aki maeka raoi i nanon te auti, bon te nati ae maeka raoi iai. Ma ngaia ae ngkana E kainaomatai ngkami te Nati, ao kam na inaomata ni koaua. I bon atai ngkami ba ana kariki Aberaam, ma kam kani kamateai ba e aki mena au taeka i nanomi. I taekina ae I noria iroun Tamau, ao ngkami kam karaoa are kam noria iroun tamami.”
A taku nakoina: “Tamara, bon Aberaam.” E kangai Iesu nakoia:
“Ngke arona ba natin Aberaam ngkami, ao kam na karaoa are e karaoia Aberaam. Ma kam kani kamateai, Ngai ae I tuangi ngkami te koaua are I ongo iroun te Atua. E aki karaoa anne Aberaam. Ngkami, kam karaoa are e karaoia tamami.” A kangai nakoina: “Ti aki bungiaki n te wenenibure; ti temanna Tamara ba te Atua.” E taku Iesu nakoia:
“Ngkana arona ba te Atua Tamami, ao kam na tangirai, ba I nako mairoun te Atua, ao E kanakoai; I aki nakomai n oin nanou, ma boni Ngaia are kanakoai.”
Tibatiba: Ke kamaiura Te Koaua
Tariu ao maneu ngkai ti nang roko n tokin te karemo ao ti bon riai ni kamatoai nanora ba ti na aki mwane iroun te tia kamwane ao te tia kamarua are bon rutibero. Inanon kororaoin ana Berita n Akoi te Atua te Tama ao E kanakoa Natina ae te Rikitemanna te Atua ba e na uota te kamaiuaki nakoia aikana butimaeia mani kakoaua. Ngkai e nako Iesu mairoun te Tama ae te koaua ao nanona ngkanne ba Iesu bon Rabatan te koaua. E roko Iesu ba E na kainaomataira man rotongitongin te bure are e na kamaenakoira ma te Atua. Ao ngkana ti karina buakakan te bure inanon rabatara ao ti na bon karekea te mate ae akea tokina. Ma a na bon akea te bai ae ti kona ni kamaenakoaki iai ma te Atua ngkana arona ba ti maiu inanon te koaua ao ti babaina te koaua.
Inanon tain te karemo aio ao tia n airi ma Iesu inanon te rereua ao e ngae ngkana ti kaitibo ma taian kariri ao ti na bon aki kona ni mane ngkai bon Iesu ae na buokira ao ni kawakinira ngkana ti onimakinna. Ngkana ti a tia ni kakaonimaki inanon ara motinnano inanon te karemo ao ti riai n ataia ba e na bon kabanea riki korakorana te riaboro ba e aonga n tokanikai iaora. Ngaia are bon kakawaki iroura n te tai aio ba ti na kamatoaira ba muina a na matebuaka ara kekeiaki ao ti na kabanea ngaren ak kukurein tatan n ana tokanikai ao te rekenikai ae na reke nakoira.
- Details
- Written by Uriam Timiti
Karemo Wiki 5 Kaabong
Warekan te Boki ae Karikan bai.17: 3-9
E bobaraki i aon tano Aberaam, ao E taetae te Atua nakoina ni kangai: “Aei au berita ma ngkoe: ko na riki ba tamaia botanaomata aika maiti. Ko na aki manga aranaki ba Aberam, ma ko na aranaki ba Aberaam, ba N na karikiko ba tamaia botanaomata aika maiti. N na kabatiai am kariki, N na karaoiko ba te botanaomata: ao a na oti uea mairoum. N na katea au berita i marenau ma ngkoe, ma am kariki i muim i nanon roro nako, ba te berita ae e na akea tokina, ae N na riki ba Atuam ma Atuaia am kariki i muim, te aba ae ko maeka i aona, ae te aba ae Kanaan ni kabanea, ba abami n aki toki, ao N na riki ba Atuami.” E taku te Atua nakon Aberaam: “Ao ngkoe, ko na kawakina au berita, ngkoe ma am kariki i muim i nanon roronako.”
Te Taramo 105: 4-9
Kaekana: E uringa ana berita te Uea.
Ukera te Uea a makana, ukera matana n tai nako.
Uring kamimi ake E karaoi, ana kakai ma ana motintaeka. K.
Natina Aberaam ae ana toro, natini Iakoba aika E rineia,
bon Atuara te Uea, E motikitaeka i aonaba ni bane. K.
E uringa ana berita n tai nako, Ba te taeka i bukin te nga n roro,
Ana berita nakon Aberaam, Ao ana taeka n tuea nakoni Itaaka. K.
I main te Euangkerio.
Te Atua, karika nanou ae itiaki; kaeka kabaiau ae am kamaiu.
Euangkerio
Warekan ana Euangkerio Ioane.8: 51-59
E kangai Iesu nakoia I Iutaia: “I bon tuangingkami ae koaua, te aomata nako ae kawakina au taeka, ao e na bon aki nora te mate.” A taku I Iutaia nakoina: “Tao Ko kakannato riki nakon Aberaam ae tamara, ae mate? A mate naba burabeti. Ko taku ba antai Ngkoe?” E kaekaia Iesu ni kangai: “Ngkana arona ba I neboai boni Ngai, ao akea manen neboau; bon Tamau ae neboai, Ngaia ae kam taku ba Atuami, ao kam aki ataia. I ataia Ngai; ngke arona ba I taku ba I aki ataia, ao bon te tia kewe Ngai, n ai aromi. Ma I ataia, ao I kawakina ana taeka. E kimareirei Aberaam are tamami ngke e kantaninga noran au bong; e noria, ao e kukurei iai.” A taku I Iutaia nakoina: “A tuai koro nimabui am ririki, ao ko nora Aberaam!” E kaekaia Iesu ni kangai: “I bon tuangingkami te koaua, ba i main Aberaam ao boni iai Ngai.” Ao a rikoi atibu ba a na karebanaia; ma E raba nako Iesu n otinako man te Temboro.
Tibatiba: Te Atua, karika nanou ae itiaki; kaeka kabaiau ae am kamaiu.
Tariu ao maneu ai ti tabeua riki te bong ao e nang toki tain te karemo. N aron are e a tia ni kauringira Tamara te Bobe ao ti riai n iangoia ba ti na karekea te karemo aio ba ara tai n n ununiki n ara makuri aika raraoi ba ti aonga ni kona n tai n taint e Bakate ao ni katonga uan ara kekeiaki ao riki ni karekea te kaniwanga ae akea tokina are bon te kabaia inanon te mimitong ma te Atua I Karawa n aron are E a tia ni berita iai nakon Aberaam ni kangai,” Nna katea au Berita n Akoi ma ngkoe ao kanoam ba Nna riki Atuaia ao ngaia a na riki ba au botanaomata.Tariu ao maneu bon aio te Berita ae na aki totoki ke n tai nako. Eng ti bon riai ni karabaraba nakon te Atua ngkai bon akea tokin ana tangira ma ana nanoanga ao are ti na riai n nora iai aron tangirara ngke e kanakoa ana Rikitemanna te Atua ba E na anganira te kamiauki ae akea tokima. Eng ti riai n onimakina ana taeka te Atua are boni Ngaia te Koaua ae na kairira nakon te maiu ae akea tokina. Ti na riai ni kauki nanora nakon ana wewete Iesu are kauringa n te karemo ba ti na rairi nanora imain ae toki te karemo. Ti riai ni karekea ara tataro ana tataro Tawita ba ara tataro n nanomaraki ao ni bubuti te Atua ni kangai, “te Atua karika nanou ae itiaki; kaeka kabaiau ae am kamaiu” ..”ba I aonga n nora Tamaroan te Uea i abaia akana Maiu” (Taramo 27,13).
- Details
- Written by Uriam Timiti
Karemo Wiki 5 Moanibong
Warekan ana Boki te burabeti ae Itaia. 13: 1-9, 15-17, 19-30, 33-62, (13:43-62)
Iai ngkoa i Baburon temanna te aomata ae arana Ioakim. Neiere buna bon Nei Tutana ae natin Eretia. Bon te aine ae moan te Tamaroa, ao e mamaka te Atua. Moan te raoiroi nake ana karo, ao a kaikawa neiere natia n ai aron ana tua Mote. Bon te aomata ae kaubai Ioakim, ao iai te onaroka i rarikin ana auti. A maiti I Iutaia ake a roroko irouna, ba e tatangiraki riki Ioakim nakoia aomata nako. N te ririki arei, a rineaki ba tani moti uoman unimane i buakoia te koraki, ao bon aekaia aomata ake a kangai taekaia iroun te Uea: “E nako te buakaka mai Baburon irouia unimane, aika tani moti aika baka ni kairia te koraki.” A kakawara naba ana auti Ioakim unimane akekei, ao a kakawaraki irouia aomata nako ake iai tangitangia. Ngkana e kaan te tawanou, ao a bane n nako te koraki, ao e rin Tutana n te nne n aroka ae ana bai buna, ba e nakonako iai. A nonora Tutana unimane ake uoman ngkana e rin ma n nakonako i nanon te onaroka, ao e rin tangirana i nanoia. A karina te buakaka i nanoia ao a tinanikua iangoani karawa ma baire aika eti. A tabe ni iangoa reken aganaia, ao akea ba e rin naba Tutana n te onaroka n ai aroarona ni bong ake i maina. Akea raona ba ti ataeinaine ake uoman. Ao kioina ngke te bong ae kabuebue, ao e iangoa te tebotebo. Akea kain te onaroka, ba ti unimane ake uoman ake a karabaia ni kaninganinga. E taku Tutana nakoia ataeinaine: “Uota mai kabirau ao te boiarara, ao kaina mataroan te onaroka, ba n na tebotebo.” Ngke a tia n otinako ataeinaine, ao a teirake unimane akekei, ao a nakon Tutana, ao taku nakoina: “A in mataroan te onaroka, ao akea ae norira; ti mate n tangiriko, ma ko na iri nanora. Ngkana ko rawa, ao ti na kaota taekam ba ko kanakoia ataeinaine bai ai raom te ataenimane.” E tang Tutana, ao e taku: “I a bon kawa n anga nako: Ngkana I iri nanomi, ao I a boni mate; ngkana I rawa, ao kam na bon aki nanoangaai. Ma I a tau riki ni kabuakakaki iroumi nakon ae N na bure i matan te Uea.”
Ao ngkanne e takrua Tutan n te bana ae korakora, ao a takarua naba unimane ni kabuakaka. E biri nako temanna ni kauka te mataroa. Ngke a ongo kain te auti taian takarua ake n te onaroka, ao a waetata n roko n te mataroa are i akun te onaroka, ba a na nora te bai ae riki. Ao a taetae unimane, ao a bane ni mama tabonibai, ba e tuai man ongo te aba taekan Tutana n ai aron anne.
Ngke e a ingabong, ao a bane ni botaki te koraki n ana auti Ioakim ae bun Tutana. A roko naba unimane ake uoman ma nanoia ae buakaka ni kani kamatea Tutana. A taku nakoia te koraki: “Kam na kanakomaia Tutana ae natin Eretia ae buni Ioakim.” Ao e nako ni weteaki. Ao e roko ma ana karo ao natina ao kain ana utu ni bane. A tang ana koraki ma aomata nako ake a noria. A teirake unimane ake uoman i buakoia te koraki ao katokai baia i aon atuna. E tang Tutana, ao e tabeki matana nako karawa, ba e onimakina te Uea i nanona.
A taetae ni kangai: “Ti tabe n nakonako i nanon te onaroka, ao e rin neiei ma uoman ataeinaine. E kaini mataroan te nne n aroka, ao e kanakoia ana tabonibai. Ngkanne e kawaria temanna te rorobuaka are karaba, ao e bure ma ngaia. Ti mena i tabon te nne n aroka, ao Ngke ti nora anne, ao ti biri ni kawaria. Ti bon oia, ma e aki reke te rorobuaka iroura ba e korakoroa nakoira, ao e kauka te mataroa ni birinako. Ti titirakina neiei aran te ataenimane, ma e rawa ni kaotia. Ai ngaia anne ara taeka.” A bane te koraki ni kakoaua aia taeka, kioina ba bon unimane, ao bon tani moti, ao …………………………………………………………………………………………………..
A motika taekan Tutana ba te mate. Ngkanne e kakorakora banana Tutana, ao e taku: “Te Atua ae akea tokim, Ko nori baika raba; Ko atai bai nako i maini kaotaia. Ko ataia ba a kaotioti ni kewe n teakau. Ao ngkai, N nang mate n akea au bure ni baika a bukinai iai n aia ioawa.” E ongo ana tataro te Uea. Ngke e tabe ni kairaki nakon te kamateaki, ao E wiwina te rorobuaka ae Taniera te Uea; ao e takarua Taniera ni kangai: “Akea au bure ngai nakon raran te aine aei!” Ao e tei Taniera i buakon te koraki, ao e taku: “Ngaia kam bon nanobaba, ngkami natini Iteraera; kam kaburea neie aineni Iteraera, n aki ukera taekana ao n aki ata te koaua. Kam na okira te tabo ni motikitaeka, ba bon te kaotioti ni kewe are e kabureaki iai.” A biri rikaki te koraki, ao a taku unimane nakon Taniera: “nakomai, tekateka i buakora, ao kaota am iango nakoira, ngkai E anganiko aia rabakau unimane te Atua.” E taku Taniera nakon te koraki: “Karaureia ni kaokoroia, ba N na toana temanna n titirakinna.” Ngke a tia ni kaokoroaki, ao e wetea temanna Taniera, ao e taku nakoina: “Ko a boni kara i nanon te buakaka, ao e tokariko ngkai rawatan am bure ake ngkoa, ngke ko motikitaeka ma te babakanikawai, ni kabureia akana raoiroi ma ni kabaraia akana buakaka; ma E kangai te Uea: ‘Ko na aki kamatea ane raoiroi ae akea ana bure.’ Ngkana e koaua ba ko noriia, ao kaotia, a botaki i an te kai ra?” Ao e kaeka teuarei ni kangai: “I an te matiki.” Ao e taku Taniera: “E bakara atum am kewe, ba e nangi bouaiko te anera n ana taeka te Atua.” E kanakoaki teuarei, ao weteaki are temanna, ao e taku Taniera nakoina: “E kanakoaki teuarei, ao weteaki are temanna, ao e taku Taniera nakoina: “Te I Kanaan ngkoe ae tiaki te I Iutaia; e kabakako te Tamaroa, ao e kabuakaka nanom te kariri. Ai bon aromi anne nakoia aineni Iteraera, ao a iri nanomi i bukin te maku. Ma boni iai aineni Iuta temanna ae rawa nakoimi. Kaotia, ko noria ni botaki i an te kai ra?” Ao e taku: “I an te oke.” E taku Taniera nakoina: “Ngkoe naba, e bakara atum am kewe, ba e taningaiko ana anera te Atua ma ana kabang, ba e na korouaiko ni kamateko.” Ao ngkanne a bane n takarua te koraki n neboa te Atua, ae kamaiuia akana onimakinna. Ao a rairakiia unimane ake uoman, ake e kaota aia kewe Taniera n oini wia. E motikaki taekaia ao a anganaki tuuaaia are e katuaea Tutana iai: a kamateaki. N te bong arei, ao e kamaiua te aomata ae aki bure.
Ana taeka te Uea
Te Taramo 23
Kaekana: I aki maka te kabuaniabai ba raou Ngkoe.
Bon au tia kawakintibu te Uea, akea kainanou.
E anganai te motirawa, i buakon te uteute ae maiureirei. K.
E kairai nakon te ran ae kamaiu, E kaoka maiun tamneiu iai.
E kairai n te kawai ae raoiroi, i bukin tangiran arana. K.
Ko kataura au taiboa, i mataia tan ribaai;
Ko kabira atuu n te ba, e taonako au mangko. K.
Bon iriau te akoi ma te tangira, ni katoa bongini maiuu;
mwengau bon uman te Uea, n au bongi nako. K.
Imain te Euangkerio.
Otan aonaba Ngai. Ane irai, ao e reke irouna otan te maiu.
Euangkerio
Warekan ana Euangkerio Ioane. 8: 1-11
E nako Iesu nakon te maunga are Oriwete. Ao E manga kaoti n te Temboro ngke e a moaningabong, ao E baneakinaki irouia te koraki. Ao E tekateka n reireinia. A roko tani koroboki ma Baritaio ni kaira nakoina temanna te aine are oaki n wenenibure. A kateia i mataia, ao a taku nakoin Iesu: “Te Tia Reirei, e oaki nieie ngke e wenenibure; ao e tuangira Mote n te Tua ba ti na karebanaia aine aika ai aekana. Ao Ngkoe, tera am taeka?” A taekina anne ba a ana kamaningaa, ba e aonga n reke bukinana. Ma E bobaraki Iesu, ao E koroboki n tabonibaina i aontano. Ao ngke a okioki n titirakinna, ao E kaetia, ao E taku nakoia: “Ane akea ana bure i buakomi, ao ke e moa ni karebanaia.” Ao E manga baraki ni koroboki i aontano. Ngke a ongo te taeka anne, ao a nako, temanna i muin temanna, ni moa mai irouia ake a kara riki. Ao E tiku Iesu n ti Ngaia ma te aine arei. E manga kaetia, ao E kangai nakoina: “Angaa aomata akanne? Akea ae kabureko?” Ao e taku neierei: “Akea, te Uea.” E kangai Iesu: “I aki kabureko naba Ngai. Nako, ao tai oki ni bure.”
Tibatiba: A kamauiaki akana a onimakina te Atua