Kanan Tamneira...
- Details
- Written by Uriam Timiti
Tariu ao maneu te bai ae kakawaki inanon maiura aio ba kakoauana ba n te aua ae ti aki ataia ao ti aki kantaningaia ao e na manga roko Iesu te ka-uatai ni motika taekan aonteaba nakon te maiu ke te mate ae akea tokina. Ti riai ni rineia ba e nga ae ti kan mena iai; te maiu ae akea tokina ke te mate ae akea tokina.
Inanon maiura aio to ti riai ni kawakina te tua ma taeka n reriei ae ti a tia n anganaki inanon te taetae n te wi ke inanon ana taeka te Atua ae te tia kairira nakon te maiu ae akea tokina. N te ewangkerio n te bong aio ao ti kauringaki ba ti riai ni karaoi ao ni maiuakini baai ake ti na kamaiuaki iai ao tiaki ibukin te kan atongaki ke ni kamoamoaki iai. Ti riai n aki katotongia baritaio ake a kamoamoaia ba a ira nanon te tua ni kabakai aia angabai ma a maninga are bon te oinibai n te tua are te motikitaeka, te nanoanga ao te kakaonimaki nakon te Atua. E kaotaki ikai ba te bai ae kakawaki bon te nano ao tiaki te kan atongaki. E a manga kamatoaki aio ngke ti a manga kauringaki ba ti na aki katotongia Baritaio are a ti kaitiaka akun te mangko ba e aonga raoiroi taraakin te mangko mai tinaniku, e ngae ngke e barekareka nanona. E kauringiira Iesu n te ewangkerio ba ti riai kaitiaka moa nanon te mangko ao imuina tinanikuna. E nori bai nako te Uea ao akea te bai ae ti kona ni karaba mai matana.
- Details
- Written by Uriam Timiti
Ngkana ti kaitaraaki ma te kaririaki ao kakorakorako ni butia te Uea ana buoka. Ngkana ko baka n te bure ao tai tiku ni maan iai ni barannano. Baina te nanorinano ao tai babarannano; karinanoko ma tai kabara nanom. Nanomaraki ni koaua ao bubuti ba ko ana kaitikaki man mamaram ao ma kairua ao tai kabua onimakinan te Atua n ana nanoanga ae akea tiana ma tokina are toka riki iaon rawawatan am bure. Karekea te motinnano ni kaetii arom nni kabane ma tai onimakiniko i bon iroum ma onimakina te Atua ae Ngaia te tia anganiko te korakora ba ko na teimatoa. Karika te Uea ba otangam ma am barengaru ae na kataniko ma taian kanganga ao ko na aki manga baka nakon aekan te bure aika bati.
Tai kubanako ni mamaram ma tauraoi ni butimaea ae bon arom ae ko kainnanoa ana buoka te Uea n tai nako ba ko mamara. Ko riai ni mama n arom n aki kakaonimaki nakon te Atua ao onimakinna ni baai nako ao tauraoi ni kitana aomatam are ngkoa ao ni muiokoiko inanon bain te Uea ae na kawakiniko ao n tararuaiko n ai aron te tei ae e muiokoi arona ni kabane ananon bain tinana ae akoi man tangira.
- Details
- Written by Uriam Timiti
Bon iai ana kakao te Uea nakoira n tatabemaniira ba ti na kaea ana baka n amarake ae bubura i Karawa. Ngkana ti kaeka ana kakao te Atua aio ao ti riai ni katauraoi raoi n noria bat i na oneira raoi n te kunikai ae bane itiakina ao akea te meemea iai.
Tariu ao maneu te bai ae kakawaki ae nanonaki n te kunikai bon taekan nanora ba a na riai n itiaki ao n akea te bareka iai. Ibuakon mamarara ao ara aki toki ni kairua ao ni bure imatan te Atua ao iai te kantaninga ae ti anganaki ba bon teimatoan ana tangira ao ana nanoanga te Atua ibukira n tauraoi ni butimaira ngkana ti a manga okiria ma te nanomaraki ni butia ba E na kabarai ara bure. Bon aio uaan marakin ao maten Iesu ibukira iaon te kaibangaki ike e anai iai ara bure ni kabane ao e katokai iaona kanga ai airon ae bon te tia bure Ngaia. Eng, inanon matena ma mangautina ao e anganiira te Atua te manga kabouaki n riki ba kariki bai aika bou aika kororaoi tamaroaia n aron are ti moan karikaki iai ba katotongan te Atua. Ti na bane n tataro ni bubuti nakon te Atua E na karika te nano ae bou ao E na kaboua tamneina inanora ba ti aonga n teimatoa ni kakaraoa ae Nanona ao ni maiu ma Ngaia n aki totoki i Karawa.
- Details
- Written by Uriam Timiti
Tariu ao maneu ti na bane n noora mimitongin te Atua iroun Iesu ae boni Ngaia ae Natin te Atua ao aia Uea Iteraera. Ti na nora Iesu ni mimitongina ngkai E a tia anganaki te maaka ao te korakora ni kabane n tautaeka i Karawa ma aonteaba. Ierutarem ae bou boni ngaia kainaban teTiibu te Tei ae kamaunai buren aonnaba ni kabane ao te tia kaota kakannaton ma mimitongin te Tiibu te Tei ao te Abanuea ae Karawa.
Bon te bai ae kakawaki iroura iaonteaba ba ti na kona n noora mimitongin te Abanuea ae Karawa ikai ioanteaba ba ti aonga ni kabanei korakorara ma maiura ni kaikoa kanriniira n roko iai. Ti bane n ataia ba te moani bai ae ti kainnanoia ae na reke i Karawa bon te kona n noora matan te Atua ao te kona n neneboia n aki toki. Ti ataia ba Karawa bon te tabo are akea te tang ma maraki ao te mate iai. Karawa bon te tabo ae ti kona ni katonga iai kororaoin te kukurei ma te mimiotng ao e na bon akea roon te bong iai ma ai bon ti te ngaina naba n taai nako.
Ti kainnanoa ba ti na mooi n te koburake n ran ni kamaiu are bon Iesu inanon Tamneina ae Raoiroi. Ti na tataro ba ti na kaaniaki n taai ma te koburakenran ba ti aonga ni manga riki ba taan anga te ran ni kamaiu aio nakoia tarira ma manera ba aonga n roko n te Abanuea ae Karawa ae bon Ierutarem ae Boou.
- Details
- Written by Uriam Timiti
Tao ti bon bane n ataa aron kinanakin Nei Maria teuana ae ti reireinaki n te Ekaretia ba Nei Maria bon aia Uea (n aine) kain Karawa. Are nanona ba boni ngaia aia Uea anera ma Saints ni kabane ao boni ngaia naba ae mataniwi iaoia kaini Karawa ni kabane.
N te bong aio ao e a kauringaki aron Nei Maria ni karineaki iroun te Atua n anganaki ao ni kateaki ba boni ngaia Uean Karawa. Ngkai bon te Atua ae a tia n rinea Nei Maria ba tinan Natina ae Iesu, ao boni Ngaia naba ae angan Nei Maria te aro n rine iaoia aomata nako ba e a banueaki inanon te mimitongi Karawa. E a karakoa te Atua n ana tabo are a tia ni baireia man te moan tai ba e na riki ba te tia tei ibukira irarikin natina ae Iesu are boni Ngaia ae na bairea taekan aonnaba ni kabane.
Iroun Nei Maria ae bon te aomata n ai arora ao ti a nora iai baninin ana aingo ma ana kantaninga te Atua ibukira ba ti na bane n uaiakina te roko i Karawa ao ti na katotonga Nei Maria n onimaki ao ni kakaonimaki nakon te ongotakea ni kakaraoa Nanon te Atua inanon maiura. Ti na tauraoi n kaeka ana wewete te Atua ba ti na kakaonimaki n beku n te onaroka ba ti aonga ni karekea te kaniwanga ae katauraoaki ibukira are e a tia naba n anganaki Nei Maria. Eng, ti na karekea te kaniwanga ae te maeka irarikin te Atua i Karawa. Nei Maria ti butiko tataro ibukira nakon natim ae Iesu ba ti na katotongko ao ti na roko irarikim i Karawa.