Kanan Tamneira...
- Details
- Written by Uriam Timiti
Bon iai tuani bai nako iaon te aba ba a na bane ni katikakI rikaaki ao a na baka nako aontano. Ngkana ko tei ao ko kaaki te atibu mai baim ao e na baka nako nano ba iai te katikitiki ae aranaki n te science ba te "force of gravity". Ma te aomata are a tia ni karikaki ba katotongan te Atua bon aron karikana ba e na mwemwekaki ke n uotakiraki nako Karawa ba bon anne ana babaire te Atua.
Ma tera te bai ae kona n riki? Eng e boni kona n aki kona ni mwemwerake te aomata ibukin ba a maiti katinebuana. E tineia tabeainga ibukin kaikoan kaubain te maiu aei; e taonaki n rawawatan te bure, ao e tineaki n ana kabaebae teuare buakaka. E kabanebuaka ana tai ni atuani bain te aonnaba ao e a bon aki kinaaaki aron tikiraoina ngke a tia ni karikaki ba katotongan te Atua ba are e katokai baai aika raka iaon rabatana. E a riki ba ai bannan te riboro ao tiaki te Atua are E karikia.
Eng e bon riai ba ti na kataia ni kanakoi mai iaora baai ni kabane aika ti karawawataki iai ba ti aonga ni kona ni mwemwerake nako Karawa n okira te Atua are ti a tia ni karikaki ba ktotongana. Eng, bon aio tuan ana karatia te Atua ba ti na bane ni mwemwekaki iai nakon Tamara ae te Atua i Karawa ike ti na karekea iai kororaoin te kukurei inanon te mimitong ae akea tokina.
- Details
- Written by Uriam Timiti
N te bong aio ao ti reireinaki iroun Iesu ba ngkana ti kan rin n te Abanuea ae Karawa ao ti riai n aki kaubai ngke ni baina te aro ni mangori. Ti ongora taekan temanna te maane n te ewangkerio are titirakina Iesu ba tera ae riai ni karaoia ba e aonga n rin n te Abanuea ae Karawa. Ngke e tuanga Iesu ba e riai ni kawakin taian tua ao e taku te maane aio ba e a tia ni karaoi ao imuina e tuanga Iesu ba ngkana e kan kororaoi ao e riai ni kabonakoi ana bai nako ao n anganiia kainnano ao e na irira Iesu ni katoa bong. Ti ongo ba ngke e tuangaki te maane aio ana taeka Iesu ao e taonaki n te rawawata ao taonnanko ni kitana Iesu.
Bon te maiu ni mangori ae ngaia ae na katauira ba ti na anga baai nako ao ni kabanei maiura ibukin Iesu. E tuangira ikai Iesu ba ngkana ti inaomata man tangiran bain te aonnaba ao ngkanne ti a tiba kona n kaburei maiura ni kabane mani karaoa Nanon te Uea. Ngkana ti anganako bai nako ibukin te Uea ao ngkanne ti na karekei baai nako are bon te maiu ae akea tokina. Ngkana ti kaikoi bain te maiu aio ao ngkanne ti namakina te rawawata ao te tinebu inanon ara borau nako Kanaan ao ti na kua ao ti na aki roko n tokin kawaira.
Ngkana ti tara maiun Iesu mangke e moan bungiaki ni karokoa matena ao ti na kakoaua bon akea te kaubai irouna. E bungiaki n aia tabo maan n amarake ao ngke E tine iaon te kaibangaki ao bon ti te makoro ni kunikai ae rabuna rabatana are onrake n te bareka, baware, te rara ao te ikoaki. Eng e anga bai ni kabane Iesu iaon te kaibangaki ba ti aonga ni kona ni karekea te maiu ae akea tokina.
- Details
- Written by Uriam Timiti
Teuana te bai ae taku Bobe Bauro VI ba e kainnanoia te aonnaba bon te waaki inanon te tangira. Irarikin anne ao e taku naba Bobe Bauro ba ti na bon aki kona n roko n te tia aio ngkana ti waaki iaon ana reirei Moote are te mata bona te mata ao te wii bona te wii. Ba ngkana ti waaki n ira ana tua Moote ao e na bon bua iai te tangira ibukina ba akea te ikakabarabure iai. Te bai ae kakawaki ba te aro ni kabarabure n aron are kauringira Iesu iai n te bong aio. E oti n ana kaeka ba Iesu ba ti riai kabarai aia bure raora tiaki itiua te tai ma itibui ma itiua te tai. Are nanona ba ti riai ni kabarai aia bure raora mai nanora ni koaua n te aro are ti na maninga n aki manga uringnga. E riai ni boboto te aeka ni kabarabure aio man te nanoanga ae kororaoi are a tia ni kaotia Iesu mai iaon te kaibangaki. Bon aio te nanoanga are boboto iaona ana makuri ni kamaiu Iesu te Messia ae boni Ngaia te Tibu te Tei ae kamaunai buren aonnaba ni kabane.
Te oinibai ae kainnanoia te Ekaretia ao te aonnaba n taai aikai bon maiuakinan te nanoanga n aron are a tia n reireinira iai Iesu. Ti riai n tauraoi ni kabarai aia bure tarira ma manera n ai aron are e tia ni kabarai iai ara bure Iesu. N akean te ikakabarabure ao e na tiku te aonnaba aio n riki te tabo ae na uruakaki n te kairiribai ao te uamaenako.
- Details
- Written by Uriam Timiti
Imuin aia bure ara moan karo ao ti riki ba kanga ai aroia aomata aika kananoanga baa kea kanaia, a barekereka man aki kakaitiaki ao akea tarakiia n aomata. A riki ba kanga ai aoria ataei aika tiba bungiaki man aki kaitiaki man te rara ao te monamona are rabuna rabataia ao aki tebokaki man kabiraki n te baa.
Te kaoka te aro n inaomata man toronaomata te Atua iorun natina ae Iesu ngke riki n oamata ao amate iaon te aibangaki. E kaoka nakoira Iesu te aro n tamaroa mani mimitong ao ti manga riki ba oinaomata ngaira. Ma ngkai ti ikawai ao akea ba ti a manga maninga nako ao ti a manga rawa ni kan riki ba ana botanaomata te Atua ngaira ao ti a moanna n taku ba ti aki kainnanoa te Atua inanon maiura. Ti moanna n taromauria atua riki tabeman ao ni kakaea te kukurei inanon te kaibabaru ma baikorakin te maiu aio ao te bure. Ao tera ae na reke n tokina? Ti a manga okira arora n te moan tai n riki ba kananoanga ngaira ae ai aroia nati ae akea aia karo ao a bakataeaki.
Ma e akoi man nanoanga te Atua ao akea tokin ana tangira. Ngkai bon tiaki ana kantaninga ba ti na maekanako ma Ngaia ao e tataninga te Atua ao ni karebwerebwe ni mataroan nanora ba ti na kaukia ao ni kataua ba e na rin ao ni maeka inanora . Bon Nanon te Atua ba ti na manga okiria ao ni maiu inanon ana tangira ba ti aonga ni karekea te maiu ae akea tokina i Karawa. Bon Nanon te Atua ba ti na karokoa rongorongon ana nanoanga ae moan te bati nakoia tarira ao manera riki ake a maninga nako ba a aonga ni manga oki nakon te Uea ao ni karekea te maiu ae akea tokina.
- Details
- Written by Uriam Timiti
Ti reitiia anera ma kain karawa n te bong aio n neboa te Atua ibukin kororaoin te kamaiuaki are karokoa i aonteaba inanon Nei Maria ngke e rineia ba e na riki ba tinan natina ae Iesu. Man ana ongotaeka ao ana nanorinano Nei Maria ao e a karokoa te kamaiu nako aonteaba ba e a riki n iriko te Taeka ao e a maeka inanora ao ibuakora. Rinanon Nei Maria ao e a kotaki nakoira miterion te kamaiuaki ao te kantaninga nakon te aonnaba ba ti na kona naba ni karekea te karaoiroaki ao te mimitong i Karawa.
Rinean Nei Maria ba tinan te Atua bon te bai ae a kaman baireia te Atua mai moan karikan aonnaba ba e na katauraoia n anganna te bungiaki inanon te itiaki ke te Riki n Immakurata ao e aki tataninga tokin aonnaba reken te minitong iroun Nei Maria ma e riki inanon maiuna ngke e uotakirake nako Karawa rabatana ao tamneina. Ao ngkai e a riki ba Uean Karawa Nei Maria ao ti anganaki te kantaninga ba ti na bane n roko naba i Karawa ngkana ti katotonga maiuna ao e na riki naba ba te tia buokiira mai Karawa n tataro ibukin kamaiuara. E riki naba Nei Maria ba te tia tei ibukira riki inanon ara tai ni mate. Bon nanon Nei Maria ba ti bane n roko irarikina ao ti na katonga kororaoin te kukurei are ti bane ni weteaki nako iai. Ti na butia Nei Maria n ana toa aio ba e na tataro ibukira ao e na taui baira ba ti na toua kawain natina ae Iesu n tai nako ba ti aonga n roko naba irarikina i Karawa.
Ti reitiia anera ma kain karawa n te bong aio n neboa te Atua ibukin kororaoin te kamaiuaki are karokoa i aonteaba inanon Nei Maria ngke e rineia ba e na riki ba tinan natina ae Iesu. Man ana ongotaeka ao ana nanorinano Nei Maria ao e a karokoa te kamaiu nako aonteaba ba e a riki n iriko te Taeka ao e a maeka inanora ao ibuakora. Rinanon Nei Maria ao e a kotaki nakoira miterion te kamaiuaki ao te kantaninga nakon te aonnaba ba ti na kona naba ni karekea te karaoiroaki ao te mimitong i Karawa.
Rinean Nei Maria ba tinan te Atua bon te bai ae a kaman baireia te Atua mai moan karikan aonnaba ba e na katauraoia n anganna te bungiaki inanon te itiaki ke te Riki n Immakurata ao e aki tataninga tokin aonnaba reken te minitong iroun Nei Maria ma e riki inanon maiuna ngke e uotakirake nako Karawa rabatana ao tamneina. Ao ngkai e a riki ba Uean Karawa Nei Maria ao ti anganaki te kantaninga ba ti na bane n roko naba i Karawa ngkana ti katotonga maiuna ao e na riki naba ba te tia buokiira mai Karawa n tataro ibukin kamaiuara. E riki naba Nei Maria ba te tia tei ibukira riki inanon ara tai ni mate. Bon nanon Nei Maria ba ti bane n roko irarikina ao ti na katonga kororaoin te kukurei are ti bane ni weteaki nako iai. Ti na butia Nei Maria n ana toa aio ba e na tataro ibukira ao e na taui baira ba ti na toua kawain natina ae Iesu n tai nako ba ti aonga n roko naba irarikina i Karawa.