Kanan Tamneira...

Details

Written by Uriam Timiti

Created: 13 August 2018

Tariu ao maneu aio bon kibun koraatin te kuna are "E roko Iesu" ae kaota aron te ingainga n nano nakon te tai are na ti nora iai kororaoin te kukurei inanon noran matan Iesu ni mimitongina n arona n Atua. Aio bon te kantaninga ae ti anganaki inanon te onimaki are Iesu e kororaoi ana tangira ibukira ao e a tia n anganiira te natinaki ngke e mate iaon te kaibangaki ba ti aonga ni kamaiuaki man ara bure. Ara kakoaua ba e kawakinira te Atua ngkana ti nim ao ti maiu ma Ngaia boni ngaia ae anganira te kantaninga ba ti na bane ni kamaiuaki.
Tariu ao maneu ngkai e maiu tamnein te Atua inanora ao ibuakora ao ti riai ni kona ni katonga mimitongin ao kakannaton te Atua ikai iaon te aba. Ma bon te kanganga ba ngkai ti tautaekanaki n te rabata ao ti bon aki kona n nora kororaoin tamaroan ao mimitongin te Atua ngkai. Ma ti riai ni bubuti ba ti na anganaki te ingainga n nano ni kantaninga te tai anne are ti nang bon kona ni katonga iai kororaoin te kukurei i Karawa. Ti riai n taia inanon te tai aio kanrinnra ba ti aonga n rin i Karawa. Ti riai ni kaikoi kaubain te maiu ae na roko ngkai ao tiaki kaubain aonteaba are na kairiira nakon te mate ao te kabuakakaki ae akea tokina.

Details

Written by Uriam Timiti

Created: 08 August 2018

E reitaki te rongorongo n te bong aio ma are ngkoananoa ibukin taekan te onimaki. Ti ataia ba ti a kona n onimaki ngkai ba uan tamnein te natinaki (adoption) are e a kaman anganiira te Atua inanon ana berita n akoi are karaoia ma ara bakatibu ae Aberaam, Itaaka, Iakoba ao Moote ba ti na riki ba ana botanaomata ngaira ao Ngaia e na riki ba Atuara. Eng bon te berita n akoi aio are a kakoroaki nanona iroun Iesu are riki n aomata, ao e maraki, e mate ao e mangauti. Ngkai bon naati ngaira ao ti riki ba tan baibai ngaira aika taan katonga ana kakawakin ao ana nanoanga te Atua ae Tamara. Bon te aro n natinaki ngkanne ae ngaia ae anganira te onimaki ba ti na karekei baai nako e ngae ngke bon akea te bai ae iai iroura.
Bon aio naba te bai ae kakoaua te aine ae karakinaki n te ewangkerio n te bong aei. E ataia ba ngkai e bon onrake Iesu n te nanoanga ao e na bon aki kona n rawa ni kaeka ana bubuti ma kainnanona. E ngae ngke e ataia ba tiaki ngaia te tia amarake ba te I-Tientaire ngaia ao e bon onimakinna naba ba ngkana e ti anganaki te tamruru n amarake ao e na kamaiuaki iai natina te aine.
Ti kauringakingkanne iroun te aine aio ba ti riai n onimakina tangirara iroun te Atua ao ni kakoaua ba ngkana ti bububti n aran Iesu ao ti na anganaki boon ara bubuti iroun te Tama. Ti riai n aki katotonga aron Betero are nanoua ao e a inako naba. Inanon ara onimaki ao a na kamaiuaki tiaki ti tamneira ma ti na anganaki naba te kona ni kamaingi maunga are nanona bon te kona ni karaoi kakai n aiaron Iesu. 

Details

Written by Uriam Timiti

Created: 09 August 2018

Inanon maiura aio ao bon iai n tai nako te raoiroi ao te buakaka. Ngkana ti karina te buakaka inanon rabatara ao ngkanne e a reke ba te bure are karaureira ma te Atua ao ma te Ekaretia. Inanon te bure ao e weteira te Atua ba ti rairi nanora ao ti na onimakina ana tangira ma ana nanoanga ibukira are kaotaki iroun natina ae Iesu ngke e mate iaon te kaibangaki ibukin kabaraban ara bure. Tariu ao maneu bon aio te wewete are ti riai ni kaeka ba ti aonga ni kaota ara kakaitau nakon Iesu are e tia n tauraoi ni uoti rawawatan ara bure ni kabane iaon te kaibangaki n aiaron are ai bon ngaia te tia bure ni koaua. E tauraoi ni kammarakaki ao ni bainikirinaki ao ni kamamaeaki ba ti aonga ni bane ni kamaiuaki. Ti bon riai n aki bakataea ana tangira Iesu aio ao n tauraoi n anganna te kukurei ni manga rairi nanora.
E moanaki te kamaiuaki ngkana ti kona ni katuturua ara taratara iaon Iesu ae tine iaon te kaibangaki. Ngkana ti okiria ma te nanomaraki ao e na kabarai ara bure ao e na kaokira nako nanon Atinibanna ae moan te Tabu ae boni ngaia te koburake n ran ni kamaiu. Ti na tobaaki inanon te kororaoi n te kimareirei ma te kakabaia are bon te maiu ae onraken te maiu. Ti na manga rin inanon te katiteuanaaki ma tarira ao manera are bon Rabatana ae te Ekaretia. Ti na manga riki ni kaubai ni baai nako ao bon akea te bai ae ti na kona n tare iai. Bon aio kaubain te aro n natinaki are ti bane n anganaki n te babetito.

Details

Written by Uriam Timiti

Created: 07 August 2018

Aomata nako ake a matoa nanoia iaon te kantaninga are nene n te onimaki a na bon akea te bai ae kona n tare iai. Ba ngkana ti onimaki, e ngae ngke bon akea ara bai ma inanon te onimaki ao e na akea te bai ae ti kona n tare iai. Ba e taku te koroboki: Ba baai nako ake kam bubuti n arau ao a na karekeaki nakoimi" ba e kaan ma ngaira te Uea ao akea te bai a ti na raraoma ke n tabeaianga iai.
N tabetai ao te bai ae ti na baka iai bon ara kan wanawana ma ara kakan eti n ara iango n taku ba akea ae ti kainnanoia bat i bon kona uotara iroura. Ba ngkana e aki mena inanon te bai ae ti karaoia te Atua ao a na bon matebuaka ke a na akea uaan ara waaki ao ara makuri. Ba ngkana ti onimakina oin korakorara ao ti taku ba ti aki kainnnaoa te Atua ao ngkanne e na reke iroura te maku. N aiaraon Betero are nanoua ao e maku ibukina ba e manga onimakinna i bon irouna ao te bai ae riki ba e tabe n iinako. Ma te bai ae kamaiua Betero bon ana bubuti nakpn Iesu ba e na kamaiua ba e a moanna n iianako. E kauringiira te onimaki ba "Ane e maaku inanona ao e na bon iinako" ao e reitaki te taeka ni kangai;"Kam aki anganaki tamnein te toronaki ba kam na baka iai nakon te maaku ma kam bon anganaki tamnein te natinaki iroun te Atua" ba kam na inaomata inanon te onimaki ao te kantaninga inanon te Atua.
Bon ti te onimaki ae na anganira te kantaninga are ti na kona iai n tokanikai iaon taian kanganga ma kataaki. Ti n te onimaki ae ti kona ni karekei iai bai ni kabane e ngae ngke bon akea te bai iroura.