Kanan Tamneira...
- Details
- Written by Uriam Timiti
Tariu ao maneu e koaua ae n angin te tai ao bon aio te bai ae ti kona n taekinna ibukia ake ti kinania ao a kona n taekin taeka aika rangi ni katekenano ao man tamaroa. Eng ti rawa ni kan kinai aia tarena ma aia konabai raora aika raka riki nakon are iroura.
Ma ti riai ni kakoaua mamakurin te Uea inanora n tatabemaniira ao muikoara aika kakaokoro ibukin te kantaninga ae ti teuana. N ana rinerine te Atua inanon Tamneina ae Raoiroi ao ti anganaki tibangara aika kakaokoro ba ti na karaoi ao bukin aio ao ti bon anganaki naba taian karea aika kakaokoro ba ti aonga ni kona ni karaoi tabera ma muikoara.
Ti riai ni kauki nanora ni butimaea Iesu nakon maiura ngkai boni Ngaia natin Atua are roko nako aonteaba ba e na kamaiura. Ngkai bon te Atua Iesu ao ti kakoaua ba e a tai n n anganaki te maaka ao te korakora n tautaekana i Karawa ao I aonteaba. Ti riai n onimakina te Atua ba boni ngaia te tia kawakiniira ae tararuaira ni katoa ni bong ao n taai nako.Ti riai n nim man Ngaia ba e na anganira te maiu ao te korakora ao e na reireiniira arora aika ti na kona ni kakrekea iai te maiu ae akea tokina.
- Details
- Written by Uriam Timiti
Te aomata ae wanawana bon are ataia ba bon te Atua ae na onimakinna ba te tia buokia n taai nako. Are nanona ba e ataia ae bon akea te bai ae kona ni karaoia i bon irouna ma e kainnanoa te Atua n tai nako. Ao ngkana e kan kauka ao ni kateimatoa kawain te buoka aio mairoun te Atua ao e ataia ba e riai ni kakaraoa nanon te Atua inanon maiuna. E riai n aki kataua ba e na tautaekanaki maiuna iroun te riaboro.
Ma E anganiira te inaomata te Atua n rinea te aekan maiu ae ti kan iria inanon mairura. N ara tai ni mate ao e nang kamatoaki iai aron are ti a tia n rineia inanon maiura ao aron are na motikaki iai taekara. Eng, ni bon te koaua ao boni ngaira ae ti na bairea aron motikan taekara man ara makuri ake ti kakaraoi. Bon tiaki te Atua ae na motiki taekara ma bon ngaira ae ti na ataia ba tera motikan taekara man noran ara kekeiaki ni maiura aio. Te bai ae kakamaku ba ngkana ti a tei imatan te Atua ni kantaninga motikan taekara ao ti na noora iai maakan te taeka. Ngkana e taetae Iesu ao e a bon karaoaki naba kanoan ana taeka. Irarikin anne ao bon iai taian anera naba aika a na tauraoi ni karaoa nanon ana taeka Iesu n tain te motikitaeka.
E ngae n anne ao bon iai te bai ae na riai n anganiira te kantaninga inanon maiura aio- bon ana Nanoanga te Atua ae akea tiaina ao tokina. E tauraoi Iesu ni buokira n taai nako ni kabarai ara bure. Ao bon akea buburan ara bure ae kona n riaon ana Nanoanga. Tariu ao maneu ti na kauki nanora nakon ana wewete Iesu nakoira n te bong aei ao ti na nakoina ni butia ana nanoanga ao ana kabarabure ao ni kakaraoa nanona ba ti aonga ni karekea te kaniwanga are te maeka ma te Atua i Karawa n aki toki.
- Details
- Written by Uriam Timiti
Inanon te ewangkerio n te bong aio ao e kabotauaki te Abanuea ae Karawa ma te itii ni karao buraua are renganaki ma te burawa ni karokoa ae riki te burawa ke e a tia ni buti inanon te burawa te itii. Eng, e roko Iesu nako aonteaba ba e na kaota miterion te Abanuea ae Karawa. Iesu boni Ngaia te Taeka ae Koaua ae ruo mai karawa ba E na kaotaa aonnaba ao E na urua maakan te roo. E kakororaoa rokon otan te Abanuea Iesu ngke tauraki iaon te kaibangaki ao e mate ao e mangauti. A kakororaoaki baai ni kabane iroun te Tamnei ae Raoiroi ae maeka inanora ao e kairiira nakon te Tama.
Bon nanon te Atua ba ti na nim ma Ngaia n tai nako ba ti aonga ni kamaiuaki ao n reke iroura te Abanuea ae Karawa. Bon Nanon te Atua ba e na okira arona baai ni kabane ana karikibai ni managa bane ni kaonrakeaki n Tamnein Iesu ao maiun te Atua. E kauringiira te Uea n te bong aio ba ti riai n nim ma Ngaia n tai nako ba ti aonga n teimataoa n riki ba ana botanaomata ngaira ao Ngaia ba Atuara. N aiaron Iteraera ao ti na teimatoa n riki ba ana kamoamoa ao kakatongan te Atua ngaira ngkai e maiu Tamein te Atua inanora.
- Details
- Written by Uriam Timiti
E roko Iesu nako aonteaba ba e na unika ana taeka te Atua are bon taekan te Abanuea are E tangiria ba ti na maeka ma Ngaia iai n aki totoki. E na reke te Abanuea aio iroura ngkana ti butimaea ana Taeka te Atua ao ni kataua ba e na maiu inanora ao ni kariki ua. E na bua mairoura te Abanuea ngkana ti aki butimaea te Taeka aio ao ti butimaea te Riaboro ba e na unika te buakaka ma te bure inanora.
Tariu ao maneu te bai ti noria ba e na karekea ke ni kabua te Abanuea mairoura bon tauraoira ke aki taiuraoira ni kauki taningara ao n ongo iroun te Uea. Te bai ae na karekea nakoira te kamaiuaki bon te ONGOTAEKA. Te ongotaeka bon te tauraoi ni kauki taningara ni butimaea ana Taeka te Atua ao ni karaoa Nanon te Uea ni maiura.
Tariu ao maneu e bati n nanoanga te Atua ao E taotaonannano. E tataningaira te Uea n tai nako ba ti na kauka mataroan nanora nakoina ao ti na kataua ba E na maeka inanora ao n tautaekana maiura. E rawawata Nanon te Uea iroura ngkana ti raurenako ma Ngaia ibukina ba e aki tangiriira ba ti na mate n aki totoki ma ti na maiu ma Ngaia inanon kororaoin te mimitong ao te kukurei i Karawa.
- Details
- Written by Uriam Timiti
Ti anganaki iroum te tia taramo n te bong taian manewe aika rangi ni katekenano aika a na kairiira nakon te koaua ae ti kainnanoia ba e na kairii maiura nakon ae bon te oinibai- te Maiu ae Onraken te Maiu.
N te moan wareboki ao ti ongora ana kabeabea te Atua nakon te burabeti are Ieremia ba e na takaruaea ana baebaeti nakoia ana botanaoamata ae Iteraera n aroia n rawa n ongo ana taeka te Atua ao n tannako mairouna ao n toro irouia bouanti ke atua tabeman. E tuanga Ieremia ba e na kaota aia bure aika uoua aika a tia ni karaoia ana botanaoamata ae Iteraera; a tia ni maninga taekau, Ngai ae bon koburake n te ran ni kamaiu; a tia ni karaoi aia tangke n ran ae aki kona n taua te ran ba a raran.
Eng a tia n riki ana botanaoamata te Atua ba te koraki are bono taningaia n rawa ni kakauongo ao n ongo; a rawa n noraba ao a kaini nanoia. Tariu ao maneu ti riai ni kauki nanora nakon ana wewete nakoira te Atua ba ti na rairaki nakoina ba a aonga n reke iroura miterion te kamaiuaki ae karabaaki ngkoa ma E a kaotia Iesu ngke e riki n iriko ao e maeka ibuakora; ngke e maraki, e mate ao e mangauti. Bon man ara nanorinano ni bubuti nakon te Atua ba e na nanoangaira ao n anganiira ana karatia ba ti aonga n namakina te taka ni koaua ibukin te ran ni kamaiu are bon akea riki te tabo ae kona reke mai iai ma bon ti man Atinibanna ae moan te Tabu are boni ngaia te koburake n Ran ae Maiu ni koaua. E kauka ikoakin rarikina Iesu aika moan te Tabu nakoira ba kawain te ran ni kamaiu n raanga nakoira ni kabane ake ti taka ni kan kamaiuaki ao a uki nanora.