Kanan Tamneira...
- Details
- Written by Uriam Timiti
Tariu ao maneu ti kauringaki n te bong aio aron bannan maiura n aiaron are a tia ni kaotia Iesu ni maiuna. Ba ti katotonga Iesu n rinanon te maraki ao rawawata n te maiu aio ao imuina ti na kaonrakeaki n te kukurei ni butimaai kaniwangara ae bon te maiu ae akea tokina irarikin te Atua I Karawa.
Te bai ae kakawaki nakoira n te bong aio bon kakoauana ba ti na kamaiuaki ngkana ti nim ma te tia kamaiu n tai nako. Are nanona ba ti na maiu ti na mate ao ti na mangauti ma Iesu. E na bon aki reke iroura te kamiauaki ngkana ti maenako ma Iesu ibukin ara bure.
Ngkana ti muiokoi maiura inanon bain Iesu ao ti riai n onimakinna ba Iesu e na bon kawakiniira ao man buokiora inanon taian rawawata ma kainnano. Ti riai n onimakina Iesu ba e buokiira riki inanon taian kataaki ao karawawata. Ti riai n aki onimakiniira i bon iroura ba ti na onimakina temanna are Iesu ba e na uoti rawawatara ao ni karokoira n tokin kawaira are bon te aba ni rau ao ni berita nakoira ni kabane. Inanon te ewangklerio ao e kauringiira Iesu ba ti riai n tauraoi n nimma kanoan te mangko are na mooi iai Iesu ba ti aonga ni kamaiuaki. E kaotia ikai Iesu ba ti aki kona ni kamaiuaki ngkana ti aki tauraoi n uota ara kaibangaki ao n iriira Iesu.
- Details
- Written by Uriam Timiti
Bon Nanon te Atua ba ti na bane n reke ba ana nanai n tiibu ngaira aika E na tararuaira ao E na kamarakeira n te uteute ae mawawa ao ni kataniira man taian kabuanibai. Ngkana ti riki ba ana nanai n tiibu te Atua ngaira ao ti na rauaki n tai nako ibukina ba E na teimatoa ni kaota ana nanoanga ma ana akoi nakoira ao E na anganira ana kamaiu. Bon Nanon te Atua ibukira ba ti na riki ngaira ba ti te nanaina ao ti temanna ara tia kawakin tibu.
Ngkana ti iriira Iesu ao nanona ngkanne ba ti ba katotonga ao ti karaoa ae Nanona. Are nanona ba ti na bane ni kairaki iroun Tamneina ae Raoiroi. E weteira ngkanne Iesu ba ti na kaburei maiura nakoina ba e na tautaeka ao ni baina maiura. Ngkana ti kaburei maiura nakon Iesu ao a na bon aki bua maiura ma ti na karekea te maiu ae akea tokina irouna ao irarikina i Karawa.
Tariu ao maneu ti a manga weteaki n te bong aei ba ti na bane ni kaoka te aro n natinaki iroun te Atua n rairii nanora ao ni kaburei maiura nakon Iesu ni karaoa nanon Tamana ao tamara ae te Atua. Ti na bane n manga n rin inanon te oo n tiibu ba ti aonga ni kawakinaki raoi iroun te tia kawakin tiibu ni koaua ae Iesu.
- Details
- Written by Uriam Timiti
N te bong aio ao ti ongo banaan Iesu ni wewete nakoira ae kangai;"Nakomai ngkami aika kam kua man rawawata ao N na angani ngkami te motirawa." N tabetai ao ti tabe n ukeukera te kukurei ao te maiu raoi ao ti taku ba e reke ngkana akea ae tautaekaniira ma ti bon tiku i bon iroura ni karaoa ae ti taku ba ti kan karaoia. N tabetai ao ti taku ba te inaomata ni koaua e reke ngkana ti aki kabaeaki iaan te tua.
N te bong aio ao ti kauringaki iroun Iesu ba te inaomata ao te kukurei ni koaua e reke ngkana ti nim ma Iesu. Ao te maiu ma Iesu bon te tauraoi ni kakaraoa Nanon Iesu ni maiura ao te rineia ma te kukurei ni kan irii nanon tuua ake ti anganaki. N aron are taku te burabeti ae Ieremia ao tua aikai a tia ni koreaki ngkai inanora ngkai e a maeka Tamnein te Atua inanora.
Ti uringa aroia Iteraera ngke a kitana Aikubita ao a rinanon taari are uraura ba a inaomata n rabataia man te tautoronaki irouia i Aikubita ma inanon manangaia inanon te rereua ao a bon kan manga okira Aikubita ba a aonga ni kana te buraua ma te irikomaiu. Are nanona ngkanne ba e ngae ngke a inaomata n rabataia man te tautoronaki ao a bon teimatoa n tautoronaki n tamneia. Ba a iri taian tua ibukin te maku ao tiaki man tauraoin ao kukurein nanoia.
Ti na onimakiuna ana takea Iesu nakoira ni weteira bat i na kawaria ba e na anganiira te motirawa ni koaua man te taneaiaga ao te rawawata. Ti ataia ba ngkana ti iriira Iesu ao ti na bon namkina te kukurei n taai nako ngkai ti ataia ba ti karaoa nanon te Uea n maiura.
- Details
- Written by Uriam Timiti
E baeta nanona ni kanaeng te Uea ngkai ti bon teimatoa ni kamatoai nanora ao n rawa n ongo ana wewete nakoira ba ti na rairi nanora. E takarua nakon maunga te Uea ba e aera ngkai ti teimatoa n tannnako mairouna. Tariu ao maneu bon aio banan te Uea nakoira ni kaotia ba e korakai nanona ngkana ti teimatoa n rawa nakoina ngkai E ataia ba man ara aki ongotaeka ao ti na bane n uotaki nakon te mate ma te kabuakakaki n aki totoki. N te taramo ao e weteira te Uea ba ti na riai ni kaeti arora ba ti aonga ni kamauiaki ni maakan te Atua. Eng, ti na bane ni kamaiuaki ngkana ti irira ao ni kakaraoa Nanon te Atua ao n uouota ana kaibangaki ao n ririmuin Iesu. Ti na bon aki kamaiuaki ngkana ti karaoi makuri aika aki iraki ke iranaki ma nanora ao ara makuri.
Ba bon akea te kanikai ae ti kantaningaia inanon maiura ni kekeiaki n te maiu aio ma bon ti are kaotia Iona ngke e takaruaea te raira n nano. Are nanona ngkanne ba ti riai ni rineia ma te kukurei ba ti na karaoi makuri aika a raraoi aika botau ma Nanon te Atua.
Ngkana ti ongo banan te Atua n te bong aei ao ti riai n aki kamatoai nanora ma ti na kauki nanora ao n nakonako ma te Uea. Ti na riai ni baina te nanorinano ae kan kaonrakeaki n ana taeka te Atua. Ti na butia te Atua ana nanoanga ba ti tan rikaaki nakoina ao ongo ana wewete nakoira ba toua kawaina nakon te kamaiuaki.
- Details
- Written by Uriam Timiti
E koreaki n te baibara ba e kukurei nanon te Uea ni kan reitaki ma te nano ae nimamannei man nanorinano kanga ai aroia ataei aika uarereke. Te nano n ataei bon te nano ae tauraoi ni kanoaaki ao ni buabuaki nakon are tangiria te Atua. Te nano n ataei bon te nano ae e itiaki man inaomata ni butimaea te taeka ibukina ba akea te eti inanona ae na totokoa rinin te taeka. Te nanorinano bon te nano ae ata nnena ba e kakantaninga iroun te Tia Karikibai are Ngaia moan baai nako ao a mananga bai ni kabane mairouna. Bon te kamoamoa ae kaitaraan te nanorinano ae kairira nakon te baka ibukina ba ti rawa ni butimaea are bon arora ba ngaira aika ti karikaki iroun te Tia Karikibai ae te Atua.
Ni moan rokon Iesu I aonteaba ao kaota nakoira te banna ae katekenano ba e rineia ba e na bungiaki n aia tabo maan n amarake ao moan aoamata ake a roko ni kawaria bon taan kawakin tibu. N rokoia anera n neboa te Atua ao a kaotia ba e neboaki te Atua I Karawa ao I aonteaba irouia aoamata aika nanoraoi.
Tariu ao maneu e roko Iesu nako aonteaba ba E na kaota nakoira miterion ana tangira ao ana kamaiu te Atua te Tama inanon marakina ao matena iaon te kaibangaki ao mangautina man te mate.
Ti na butia te Atua ba e na anganira te nano ae maraurau ao ae uki nakon ana kamaiu te Atua ba ti aonga ni bane ni kamaiuaki.