Kanan Tamneira...
- Details
- Written by Uriam Timiti
E roko Iesu ba E kan anganira kororaoin te kamaiuaki iroun Tamneina ae Raoiroi. Ti a kabaia ngaira ake ti kona n noora rokon ao mamakurin Iesu ibuakora ao ni kauki nanora nakon ana rongorongo ao ni butimaia ba ti na kamaiuaki. E teretere raoi ikai ba te kamaiuaki e bon reke ngkana a uki nanora ao te uki n nano e na reke n te nanorinano ao te taka ibukin ana kamaiu te Uea. Ti kakoaua aron te tiku inanon te bure ba aiaron ae ti korea uaean te maiu are tomaira ma koburaken te maiu ao ti nang tabe ni mate. Inanon te bure ao aiaron ae ti kabaeaki n taian taurekereke ni katotongiia te koraki ake a kabureaki n te karabuti. Inanon te bure ao ti kabua te inaomata ni koaua.
Tariu ao maneu te bai ae ti kainnanoia bon te bubuti nakon te Atua ba E na nanoangaira mani kabarai baen nanora ao ti aonga ni kona n namakina ao n ringaki ni kakamakurin Tamnein te Atua ibuakora. Ti na bubuti ba ti na kona n namakina karen te ang mai meang ke mai maiaki. Ti na bon rangi ni kananoanga ngkana E kaoti Iesu irarikina ni karaoi ana kakai ao ngaira ti bon aki nooria ke ringaki iai. Ti kainnanoa te nano ae maraurau ae kai rotaki kanga aiaron te tano ae mauteretere are rotaki ngkana e baka te karau ao e karika te maiu nakon taian aroka ba a na kariki ua aika bati. Ti na bubuti ba ti na aki reke n ana kamaraia Iesu ae taekinna n te bong aio nakoia taabo ake E karaoi kakai iai ao a matoa man rawa nanoia ni kan rairi nanoia. Eng, a na bon rawawata riki motikan taekara ngkana ti a tia n noori ao n ongo ana kakai Iesu ao ti rawa n rairi nanora nakoia kain Totom ao Komora are noori ana kakai Iesu ao a rairii nanoia.
- Details
- Written by Uriam Timiti
E kauringiira Iesu n te bong aio ba ti na rairi nanora man ara bure ao ti na manga okiria ba a aonga ni bongana ke ni boiarara ara waki n taromauria ao ara angakarea n nebonebo nakon te Uea. E katerea raoi Iesu nakoia kain Totom ao Komora ba akea kukureina n aia angakarea ke aia taeka n nebonebo ngkai a bon teimatoa ni karaoa te bure. E kaotia ba a raroanako nanoia ma aia angakarea ao anne ae bon aki kukurei iai te Atua. Ba bon akea bongan taian karea ni kabuokaki ngkana e aki raonaki n te nano ni koaua.
Eng tariu ao maneu, ti kauringaki n te bong aio ba ti riai ni maiuakina nanon te Atua ni katoa bong n uouota ara kaibangaki. Bon uouotan ara kaibangaki ni katoa bong ae ti na kakoaua iai ba irian irakin Iesu bon te maraki ibukin te kaitara ao te kauntaba n ana kairiri te rabata ma aonteaba. E kauringiira naba te Atua ba te moan bai ae kakawaki inanon maiura bon tangiran te Atua ao karaoan Nanona ao imuina ai bon tangiraia ara utu ao raora. Ti na karaoi makuri ni katoa bong aika titebo ma Nanon te Atua ao tiaki ae titebo ma nanoia aomata. Ba e raoiroi riki te maiu n ira nanon te Atua ao a na motikaki taekara irouia aomata nakon te maiu n ira nanoia aomata ao a na motikaki taekara iroun te Atua.
I reitai ma ngkami tariu ao maneu ni bubutia te Atua ana nanoanga ao ana buoka ba ti na manga rairi nanora ao n okiria ao ti na kekeiaki ni karaoa ae nanona n uota ara kaibangaki ao n iriria ni katoa bong.
Ti karaba te Atua ibukin te wiki ae a tia n nako ibukin te kukurei ao te motirawa ao ti a bon karaba riki te Atua ibukin abara ae moan te tangiraki iroura ni kabane ae Kiribati. Ke kawakinira ao ke kawakina abara ae Kiribati te Atua ngkai ao n aki totoki.
- Details
- Written by Uriam Timiti
Tariu ao maneu e akotaki nakoira inanon karakin ana katoki aoraki Iesu ana kantaninga te Atua are E kan anganira kororaoin te kamaiuaki ao ana tokanikai te mangauti iaon te mate. Are nanona ba inanon mangautin Iesu ao ti bane n anganaki te kantaninga ba ai akea te mate ba e a tia n uruaki makaana iroun Iesu ngke e maraki ao ni wawa nako Rarana iaon te kaibangaki ao ngke e mate ao e mangauti. Ba rabatara are mamate aio E a atia n anaia Iesu ngke E riki n aomata ao E a manga karina te aki mamate iai inanon mangautina. Bon ana kantaniga te Atua ba e na roko te maiu n te aonnaba ao iroura ngaira aomata. Ngkana ti maraki n te aoraki ao e kaotia Iesu ba e tauraoi ni kamaiura ngkana ti nakoina ma te onimaki. Ma ae bon kakawaki riki bon kamaunakoan matan te mate iroura inanon te bure. Bon ana kantaninga Iesu ba ti na aki toki n reitaki ma ngaia n ti teuana n aiaron te tangira imarenan te ataeinaine ma kainnabana inanon te kukurei, te ibuobuoki ao te berita ma te kakaonimaki. Ba ngkana ti riki n ti teuana ma Iesu ao e maiu inanora ao ngaira ti maiu inanona ao ngkanne ti na bon aki kona n rootaki n te mate ma ti na maiu n aki toki.
Ti a bia riki ni kabane ba te botaoamata ae ti onimaki ao ti nim ma Atuara n taai nako. A na bona akea iroura te tang ma te nanokawaki ao ti na bane ni kariaria ma te onimaki nakon te tai are ti na katong iai kororaoin te kukurei irarikin te Tama i Karawa. Ti na bane n nora tokin maiura ba te matu ni kakantaninga rokon Iesu ba E na taui baira ao ni kateirakeira nakon te maiu ae akea tokina.
- Details
- Written by Uriam Timiti
Ao imuin mamanangan Iesu ni kabuta rongorongon te Abanuea ao ni katoki aoraki ao e noriia aomata aika bati Iesu ao e ringaki nanona n te nanoanga ba titebo ma taraaia aomata aika tiku n akea aia tia kawakin tibu.
Tariu ao maneu tera raoi te bai ae nanonna Iesu n te tai ae bati? Te tai ae bati bon te makuri ae riai ni karaoaki ibukin karokoan te kamaiuaki irouia aomata ake a tuai man ataa te Atua ao ana tangira ma ana nanoanga ao uotan te rairannanno nakoia aonmata.
Ti riai ni kauki nanora nakon ana wewete te Atua ba ti na karekei tibangara n uouoata ana tangira te Atua nakoia aomata. Ti riai ni marurung ni karokoa te rongonrongo ae raoiroi. Ti riai ni katotonga naba Iesu n rotaki n te nanoanga ibukia aomata ake a tuai man ataa te Uea ke te koraki ake a manga maiu inanon te bure ao man karaureaki nako ma te Atua. Ti riai ni karaoa tabera ma te onimaki ao te kantaninga ngkai ti ataia ba ibukin ara kakaonimaki ni makuri inanon te o n aroka ao ti na bon karekea te kaniwanga are bon te maiu n aki totoki irarikina i Karawa. Bon karaoan nanon te Atua ni maiura aio ae ngaia ae na anganiira te kabaia ae akea tokina.
- Details
- Written by Uriam Timiti
Maakan Iesu ni kabarai buure boni ngaia rabatan ana tangira te Atua are uotaki nakoira. Bon aio te maaka are raanga nako man ikoan rarikin Iesu aika moan te tabu iaon te kaibangaki imuin ewarana iroun te tautia. Bon Raraan Iesu ae moan te Tabu ae kauka nakoira taian takaramentu ibukin karekeaan taian karatia aika ti kainnanoi inanon maiura aio. Maakan Iesu ni kabarai ara bure e bon karekea man marakina, matena iaon te kaibangaki ao mangautina man te mate. N aiaroia kain Iteraera are kainaomataaki man te tautoronaki irouia I Aikubita ao ngaira ti a kainaomataaki man te bure iroun Iesu. I aon te kaibangaki ao Iesu e kauka kawain te kamaiuaki ngke e riki Ngaia ba te berebitero are te tia angakarea ao e riki naba Ngaia ba te karea nakon te tama ibukin kabaraan ara bure.
E anganiira te maaka ni kabarabure Iesu inanoia Berebitero are a tei n onea muin Iesu ibuakora ni karokoi taian kamaiuaki ake uan matena iaon te kaibangaki ao mangautina.
Tariu ao maneu ti a karaba te Atua ibukin ana tangira ae kororaoi ibukira ae akea tiana ma tokina. Ti a kauki riki nanora nakon ana wewete nakoira te Atua ba e roko ibukiia aika a aoraki ao tiaki aika marurung. Bon aio banaan Iesu are e tei i matan mataroan nanora n tataninga te tai are ti na kaukia iai. Eng e bon kan anganiira kororaoin te kamaiuaki Iesu n rabatara ao riki bon nanora ma tamneira. E koaua ae ti bon bane n mamara ao ti kainnanoa te Uea ba e na kamaiura man ara bure. Te Uea nanoangaira ao buokiira inanon mamarara ba ti aonga n oki nakoim. Kabouira inanon Tamneim ae Raoiroi ba ti aonga ni manga riki ba am karikibai aika boureirei ao taan neneboiko n aki toki.