Kanan Tamneira...
- Details
- Written by Uriam Timiti
Ngke e roko n te tabo teuana Iesu ao e butimaeaki ma te aoraki ae uouotaki iaon te kai. E rotaki nanon Iesu n te nanoanga riki n noran aia onimaki te koraki n iangoa kamaiuan te tenaaki baina aio man aorakina. E taku Iesu nakon te aoraki,"Tai maaku, a kabaraaki am bure". E bon aki taetae ni karabaraba te aoraki ba e kantaningaia ba e na kamaiuaki man aorakin rabatana. A uun naba nanoia te koraki n taku ba e karereanti Iesu. A taekina aio ibukina ba a aki kinaa raoi Iesu ae boni Ngaia Natin te Atua.
Ma Iesu are atai baai ni kabane e noori nanoia ao e tuangia ba tera ae bebete riki irouia; te tuanga te aoraki ba a kabaraaki ana bure ke te kangai "teirake ao nakonako".
Tariu ao maneu ko mena n te karaka aio. Tera te bai ae kakawaki riki iroum. Aorakin te rabata ke te tammnei? Tao bon maitira a karika te Uea ba kanga ba te batin are ti kabongana ibukin katkan aorakira ao ti maninga naba taekana. Te bai ae kakawaki iroun Iesu bon karekean te maiu n nanora ma tamneira. Bon aio te oinibai n te kamaiu- bon kamaiuan tamneira. Inanon te aoraki ao e kan kamarurungiira Iesu ba ti aonga ni karekea te maiu n reitaki ma Ngaia ni maiu inanon ana Tangira. Te maiu ma te Atua bon aiaron te maanga are a manga nim ma te boto ba e na manga katika te maiu ao e na manga kariki ua.
- Details
- Written by Uriam Timiti
E aera ngkai e tuangaki Iesu ba e na kitana te kawa arei? E oti n te ewanglerio n te bong aio ba bon iai aomata n te kawa arei ae a taua bukin ke a bainaki iroun te riaboro. A kiriue n rokon Iesu ao titebo ma ae a kammarakaki n roko Iesu. Aio bon iteran mamarara n aomata are ti taku ba ti mwengaraoi iroun te riaboro ao ti tangiria n tiku n arora anne. Ma inanon maiura aio ao taian mamara aika ti taonaki iai ao e na bon aki kona ni bua mairoura mamakurin te Atua inanon te banaa n nano are ti kairiraki naba iai nakon te raoiroi. Ti bon aki toki ni maiu inanon te buaka imarenan te raoiroi ao te buakaka. Te bai ae kakawaki ba ti na mena ia ngkana e roko Iesu te kaua-tai ba e na motika taekan aonteaba. Inanon te raoiroi ae na karokoira n te kabaia ae aki totoki, ke inanon te bure ae na anganiira te mate ae akea tokina.
E bon kakoaua te Ekaretia ba bon ti Kristo are mate ao e mangauti man waerake nako Karawa ae kona n anganiira inanon Tamneina te ota ao te korakora ni maiu inanon ana kantaninga te Atua. Bon ti inanon te ara ae Iesu ae ti kamaiuaki iai. Bon tii inanon Iesu ae ti karekea te kiing irouna nakon te maiu ni koaua ao ae ti kunea irouna tokin te kantaninga ibukin maiura n aomata n te aonnaba aio. Ti riai n ataia ba inanon taian bitaki aika bati ao bon iai baai aika a na aki kona ni bitaki ba a boboto iaon Kristo are ti tebo arona ngkoa, ngkai ao n aki totoki. Ti na tataro ba ti na anganaki te ukinnano ni butia Iesu ba e na tiku ao ni maeka inanora ngkana e roko ni kawariira.
- Details
- Written by Uriam Timiti
E taku te taeka ni kakabaia teuana,"A kabaia akana mangori man nimamannei ba aia bai te Abanuea ae Karawa." Eng bon aio te bai teuana ae ti na riai n uringga n taai nako ba aron karekean te kaubai ae akea tokina. Ti bon anganaki ngaira aika ti mangori man kananoanga te kantaninga ae moan te kakawakin ba kawaira nakon te maiu ae akea tokina. Ti riai ni karaba te Uea ibukin tibangara aika e anganiira riki te kainnnano ma te aki rauaki ni baai aika iai iroura n te maiu aio. Ba ngkana ti namakina te kannnao ni maiura aio ao ti ataia ba ti na bon riki ba kaubai ngaira nakon te maiu ae na roko.
Ma ti noria ba ngkana ti aki karaoa ae raoiroi nakoia aika mangori ao n aki mutiakiniia ao ngkana ti bainikiriniia ao ngkanne ti na bon manga oreaki ao ni kabakaaki man te maiu ni kainikatonga ao n rki ba taian kananoanga. Are nanona ngkanne ba ngkana ti maiu ni kaubai iaon te aba ngkai ao ti ma manga riki ba taian kananoanga na ao ti na mate nakon te tai ae na roko.
N te ewangkerio ao e a manga kamatoa aio Iesu nakoira ngke e kaeka nanon teuare e kan irira Iesu ni kabanei bongin maiuna. E kangai Iesu nakoina,"Iai aia tabo ni maeka kameanti ma man ni kiba ma bon akea ana tabo natin te aomata ke te Uea (Iesu) ni kawenea atuuna. E kaotia ikai Iesu ba ngkana ti iririia ao ti na tuaraoi n uouoti ara kaibangaki ni katoa bong ao n uringa ba te kainnano ma te aro ni mangori ae ti rinanona n te maiu aio bon kawain karekean te kaubai ma te kabaia nakon te maiu ae na roko.
- Details
- Written by Uriam Timiti
Bon aikai ana taeka Iesu nakon Taomati are bon temanna ibuakoia abotoro are aki onimaki ba e a mangauti Iesu man te mate. Are nanona ba e bon tuai raoi Taomati ni kina Iesu ae bon Ngaia te Atua ae akea ana tautaeka te mate iaona. E ngae ngke e a tia n iriira Iesu n te tai ae maan ao e bon tuai naba ni kina raoi Iesu. N aiaroia abotoro ake tabeman ao e bon rotaki ana onimaki ngkai e a tia n nora aron Iesu ni maraki ao ni mate ao e mate naba aia onimaki.
Te bai ae rangi ni katekenano n te karaki aio bon aron Iesu ni kaotia ba antai raoi ngaia nakon Taomati. Eng, E rineia Iesu ba e na kaotia ba boni ngaia te Atua man muin ikoakina; ikoakin rarikina are muin te kainiwai are ewaraki iai, ao ikoakin baina ba muin taian neera ake tauraki man tine iai. E aera ngke aki kaota arona n Atua Iesu ni maakana ma mimitongina? Eng I taku ba e rinea te kawai aio Iesu n reireiniira iai ba ti riai naba ngaira ni kaota Iesu nakoia raora man ara makuri n nanoanga ao n ara tangira ibukia tarira ma manera. E tangiria naba Iesu ba ti na kinaa n ababakin ana tangira ma ana nanoanga ibukira ngke e tauraoi n anga maiuna ibukira ba ti aonga ni kamaiuaki . Ti riai ni kina Iesu n ana kaibangaki are tauraki iaona ibukin kabaraan ara bure.
E weteira Iesu ba ti na riai n onimakina ana tangira ibukira ao ti riai n tauraoi n uouota ara kaibangaki ni katoa bong ao n ririmuina.Ti riai n ririmuin Iesu ma te onimaki ba ti aonga ni karekea te karaoiroaki are taekinna nakon Taomati are kangai,"A kabaia akana a kakoaua ao aaki norai"
- Details
- Written by Uriam Timiti
N te bong aio ao ti kauringa iai aia toa St Betero ao St Bauro. Tao e na bon iai te titiraki irouia aomata aika bati a e aera ngkai a botaki Abotoro aikai n aia bong n toa ae ti teuana n aiaroia Abotoro ake tabeman. Au kaeka i bon irou ao I taku ngai ba a botaki aia toa abotoro aika uoman aikai ba e aonga ni kaota nakoaia ae kakawaki n te Ekaretia ba boni Ngaia tan boboua te Ekaretia mai moana iroun Iesu nakon te Ekaretia are muina Iesu n te tai are e a tia ni kitaniia abotoro Iesu ni waerake nako Karawa.Bauro, n aron ae ti ataia, ao boni ngaia te abotoro ae rineaki iroun Iesu imuin waerakena nako Karawa. Bauro boni ngaia are aki nora Iesu ma e onimaki ao e irira Iesu ao ni maiuakina maiun Iesu n aiarora.
Inanon Betero ao Bauro ao ti a anganaki baninin te koaua iaon te Ekaretia are kateia Iesu ba ngaia ae ti na kamaiuaki inanona ao rinanona. Ba rabatan te Ekaretia ngaia are reke ba Rabatan Iesu iaon te aba. Tariu ao maneu ti bon riai ni kakoaua raoi ba ti aki kona ni kamaiuaki i bon iroura ma bon ti ngkana ti nim ma rabatana ae te Ekaretia. Ba inanon te Ekaretia ao ti kairaki ba ti na bane n nakonako rinanon Raran Iesu are e kaitiakiira ao e karikiira ba karikibai aika boou aika mimitong ba iai te maiu n Atua iroura. Iai reirei aika uoua aika a riai n reke ba tibangara inanon te bong aio ba i) E na kanakoa ana anera te Atua ba e buokiira man taian kabuanibai ke kanganga n aiaron St Betero ao 2) Ba ti riai n aki bainikirina te Ekaretia ngkai boni ngaia Rabatan Iesu. Boni Iesu ae katea te Ekaretia ngke e kangai, "Boni Betero ngkoe ae te Baa, ao iaon te Baa aio ao Nna katea au Ekaretia... Nna anganiko kingin te Abanuea ae Karawa."