Kanan Tamneira...

Details

Written by Uriam Timiti

Created: 17 January 2022

Wiki 2           Moanibong 

Warekan te Reta nakoia Ebera. 5: 1-10

E rineaki te mataniwi ni berebitero nako mai buakoia aomata, ao e kateaki ba buokaia aomata n aroia ma te Atua, ba e na anganga karea ma takiribitio i bukini bure. E kona n nanoangaia akana babanga ma akana kairua, ba e taonaki naba ngaia n te mamara. Ma ngaia ae e bae n anga karea i bukin oin ana bure ma aia bure aomata. Akea ae na karekea kakannatona aei, ba ti ane weteaki iroun te Atua, n ai aron Arona. Ai aron naba Kristo: E aki karekea karineana n riki ba te mataniwi ni berebitero, ma E anganaki iroun Teuare kangai nakoina: “Natiu Ngkoe, I Karikiko n te bong aei.” Ao E manga kangai n te tabo teuana: “Te berebitero Ngkoe n aki toki n ai aron nakoani Merekitereka.” Ngke E mena Kristo n te rabata, ao E anga taian tataro ma taiani bubuti, n raonaki ma te takarua ao te tang, nakon Teuare kona ni kamaiua man te mate; ao e butimaeaki ana bubuti i bukin ana raoiroi. E ngae ngke te nati Ngaia, ma E anganaki nab ate maraki, ba E na reireiaki te ongotaeka. Ngke e kakoroaki raoi arona, ao E riki ba kawain te maiu ae aki toki i bukia ni kabaneia akana ongo irouna, ao E atongaki iroun te Atua ba te mataniwi ni berebitero n ai aron nakoani Merekitereka. 

Te Taramo:

Kaekana: Te Berebitero Ngkoe n aki toki n ai aroni Merekitereka.

E kangai te Uea nakon au Uea: “Tekateka i angataiu:

N na kaweneia aiam i ani waem. K

E na kabuta makan am tautaeka, Te Uea mai Tion;

Ko na uea i aoia aiam. K

Te natinuea Ngkoe mangke te tei, i aon te maunga ae tabu;

I karikiko i main te karangaina.  K

E na aki bitaki ana taeka n tuea te Uea: “Te berebitero Ngkoe n aki toki

n ai aron nakoani Merekitereka. K 

Alleluia, alleluia.

Kaurei matau, te Uea, ao N na nori kamimi aika muin am tua. Alleluia. 

Euangkerio

 

Warekan ana Euangkerio Mareko. 2: 18 - 22

A tabe n aki mamatam ana reirei Ioane ma Baritaio. Ao a roko aomata n tuanga Iesu ni kangai: “A aki mamatam ana reirei Ioane ma aia reirei Baritaio. Ao a aera am reirei ngkai a aki baina te aki mamatam?” E kaekaia Iesu ni kangai: “Tao a riai n aki mamatam raon te tia iein, ngkai e mena i buakoia te tia iein? A bon aki riai ni baina te aki mamata, ngkai bon raoia te tia iein. A na roko bong aika e na uotaki nako iai te tia iein mairouia; a na bane n aki mamatam n te tai anne. Akea ae na itua te moti ni kunnikai ae bou i aon te kunnkai ae mane, ba e kawa ni katika te kunnikai ae mane te moti ae bou, ao e na abaaki riki raeuakina. 

Akea naba ae na atoa te uain ae menaai i nano baotoro ni kun aika mane, ba a kawa n tabwenaua batoro, ao a na uaia ni bua te uain ma taiani kun. Ma a riai n taiani kun aika bou i bukin te uain ae menaai.”

 

Tibatiba:

Details

Written by Uriam Timiti

Created: 13 January 2022

Wiki 1            Kaabong 

Warekan te Reta nakoia Ebera.  3: 7-14

E kangai te Tamnei ae Raoiroi: “Ngkana kam ongo banana n te bong aei, ao tai kamatoai nanomi, n ai aromi n tain te kauntaeka ni bongin te kataki i nanon te rereua, ngke a kataai ma ni karawawataai ami bakatibu, i muin noran au makuri i nanon abui te ririki. Ma ngaia are I un nakon te roro arei, ao I kangai: A aki toki ni kairua nanoia, a aki ota n au katei; ai ngaia are I taetae n tuea ma te un ni kangai: A na aki rin i nanon au motirawa.” Tatarai ngkami, tari, ba e na akea temanna i buakomi ae e na reke irouna te nano ae buakaka ma te rawa n onimaki, ba e na kitana te Atua ae maiu. Kaungai nanomi i boni iroumi ni katoa bong ao ni kabongnga, ba e aonga n akea temanna i buakoni ae e na kamatoaki nanona n ana kariri te bure. Ba ti ibuokanibai ma Kristo ti ngkana ti kawakina ara moa n onimaki ni matoatoa, ni karokoa te toki. 

Te Taramo 94: 6-11

Kaekana: Ngkana kam ongo banana,          ao tai kamatoai nanomi.

Rin, bobaraki, katorobubua, Ti na taromauria te Uea ae karikira.

Bon Atuara Ngaia, Ao ngaira ana botanaomata ae E kairia

ma ana nanai ae E kawakinna ni baina. K.

Ongoa n ana taeka n te bong aei: “Tai kamatoai nanomi n ai aromi i Meriba

Ngke kam mena i Matia n te rereua, Ngke a kakatai ma ni kaunai ami bakatibu,

Ao a bon nori au makuri. K

A kaunai te roro aei abui te ririki, ao I kangai: “Bon te botanaomata ae nanoro,

Ae aki Ota n au katei.”Ao I taetae n tuea ma te un, ni kangai:

“A na bon aki rin i nanon au motirawa.” K. 

Alleluia, alleluia.

Te Uea, reireiai kawaiu, Kairai n te kawai ae eti. Alleluia.

Euangkerio 

Warekan ana Euangkerio Mareko. 1: 40 – 45 

E kawara Iesu temanna te rebera, ni butia, ao e katorobubua ma n taku: “Ngkana nanom, ao Ko kona ni kamaiuai.”e rotaki Iesu n te nanoanga, ao E arora baina n ringnga, ao E taku: “Bon nanou, ko na maiu.” Ao e toki naba reberana, ao e marurung. Ma E karawawata ana taeka nakoina temanna, ma nako, kaotiko nakon te berebitero, ao anga te karea are e baireia Mote, i bukin kamaiuam, ba aia bai ni kakoaua.” Ma ngke e nako, ao e taekinna ma ni katanoata rongorongona. Ao ngkanne E aki kona n rin Iesu n te kawa teuana, n aki karaba; ma E titiku i tinaniku, n tabo aika rereua; ao E kawaraki man tabo nako.

 

Tibatiba: Ngkana kam ongo banana n te bong aei, ao tai kamatoai nanomi

Tariu ao maneu inanon ara kekeiaki inanon maiura aio ao ti riai n ataia ba iai uoua bai aika ti kantaningaira n tokin maiura aio ba te maeka ma te Atua n aki totoki ke te maiu inanon te mate ae aki totoki.Ti riai n ataia ba antai ae karikira ao tera raoi ana kantaninga te Atua ibukira. Eng ti bon riai ni kakoaua ba E karikira te Atua nako aonteaba ao bon ana kantaninga ibukira ba ti na bane karekea te maiu ae tokina ni maeka ma Ngaia n te baretaiti are i Karawa.

N te bong aio ao E taetae te Tamnei ni kaota Nanon te Tama nakoira ba ti riai n aki kamatoai nanora ngkana ti ongo banana n te bong aio. Ngkana ti ongo n ana Taeka te Tamnei ae Raoiroi ao nanona ba ti a tia ni kabongana te wanwana are ti tia n anganaki   ao ti a tia n rineia ba ti na karaoa te bai ae na anganira kororaoin te maiu iroun Iesu. Ba ti riai ni kakoaua ba bon ti iroun Iesu ae ti kona ni karekea te maiu ae aki totoki. Ti na bubutia ngkanne te Atua ba ti na anganaki te wanawana n ongo banan te Atua nakoira ao riki ti na bubuti te korakora n toua kawain te Koaua ngkana e taonira ana kariri te bure n rawa n ongo banana te Atua are bon maten nanona ibukira ba ti kamaiuaki. Ti riai n tai nako n irira te Atua ao ni kakaraoa Nanona inanon maiura aio ba ti aonga ni karekea te maiu ae akea tokina.

 

Details

Written by Uriam Timiti

Created: 14 January 2022

Wiki 1            Kanimabong 

Warekan te Reta nakoia Ebera. 4:1-5, 11

E teimatoa naba i bukira ana motikitaeka te Atua nakoia Iteraera ba a na rin i nanon ana motirawa; ma ngaia ae ke e tai taku temanna i buakomi ba e aki kauia. Ba ti anganaki naba ngaira te Rongorongo ae Raoiroi n ai aroia ngaia. Ma akea uan te taeka are a anganaki, kioina ngke a aki botaki n onimaki ma uake a ongora. Ba ti rin n te motirawa, ngaira tan onimaki, n ai aron te taeka are kangai: “I taetae n tuea ma te un ni kangai: A na aki rin i nanon au motirawa.” A boni bane ana makuri te Atua ngke e karikaki aonaba, ba E taekina te kaitibong ni kangai, n te tabo teuana: “Ao E motirawa te Atua n te kaitibong man ana makuri ni kabane.” Ao E manga kangai n te tabo teuana: “A na aki rin i nanon au motirawa.” Ma ngaia ae ti na keiaki n rin i nanon te motirawa anne, ba e aonga n aki bua temanna ni kakairi n te aki ongotaeka arei. 

Te Taramo 77: 3-4, 6-8

Kaekana: Tai manuokin ana makuri te Uea.

Te baere ti ongo taekana, Are a kaongoira ara bakatibu,

Ao ti na kawakinna nakon te roro ae na roko.  Ba kakanton te Uea ma makana

Ao ana makuri aika kamimi. K.

A riai naba ngaia ni kangoia natia, Ba a aonga n onimakina naba te Atua,

n aki manuokin ana makurit e Atua, ma ana kawakin ana tua. K.

A aonga n aki katotongia aia bakatibu, Ake te roro n aki muti ma n aki ongeaba,

Ba te roro ae nano tiotio, n aki kakaonimaki nakon te Atua. K. 

Alleluia, alleluia.

Ngkana kam ongo banana n te bong aei, Ao tai kamatoai nanomi. Alleluia. 

Euangkerio

Warekan ana Euangkerio Mareko. 2: 1 - 12 

E okira Kaberenaum Iesu, ao a ongo aomata ba E mena n te auti. Ao a botaki iai aomata aika maiti n te aro ae akea te tabo ae mawa, ba e riba naba matan te mataroa. Ao Ngaia E reireinia te Taeka. Euotaki nakoina temanna te nakibaina are tabekai irouia oamata ake aman. Ma a aki kona n nakoina i bukin te koraki, ao a kabara taubukin te auti i etan te tabo are E tei iai ni karekea te bangabanga, ao a n na iai te kainiwene ma te nakibaina i aona. Ngke E nora aia onimaki Iesu, ao E taku nakon te nakibaina: “Natiu, a bara am bure.”Iai tani korobki tabeman i buakon te koraki, ao a kanga ii nanoia: “E kanga n taekinna anne? E baka n atua! antai ae kona ni kabarai bure? ao bon tit e Atua!” E ataia aia iango iesu i nanona, ao E taku nakoia: “E aera ngkai kam iangoa anne i nanomi? TEra ae bebete riki atongana? ‘A bara am bure’ke ‘Teirake, tabeka am kaniwene, ao nakonako’? Ma kam na ataia ba iai makan Natin te aomata ni kabarai bure i aon te aba,”ao E kangai nakon te nakibaina: “I tuangko, teirake, tabeka am kainiwene, ao nakon am auti.”Ao e teirake naba n tabeka ana kainiwene, ao e otinako i mataia aomata ni bane. A bane ni mimi, ao a neboa te Atua ni kangai: “Ti tuai man nora te aro aei!”

 

Tibatiba: E tangirira te Atua ba ti na rinnako inanon Ana Motirawa

Tariu ao maneu ao maneu e main maneweaki te taeka ae te ‘Rinnako iananon maturawau’ ieoun te Atua ngke E kaota unna nakoia te nati n Iteraera ngke a mananga n otinako ma Aukunita b aba kanoan ana berita n akoi te Atua nakoia ni kaekaa tangtangia ngke a tautoraki I Aikubota. E ngae a tia n nora ana makiri ni kamaiua te Atua ao a tia n ataia aron ana irantanga te Atua ao teimatoa n akokan ongotakea nakon te Atua onukina ba a teimatoa ni kan okira Aikubita ba aonga ni manga kana te burawa ao te iriko. Ao ibikin aia aki ongotaeka ao taromaurian taian bouannati ao kaota unna te Atua n tuangia motitaeka ba te koraki ake aki ongotaeka an abon aki kona n rinnako n Ana Motirawa te Atua.

N te bong ao ti ongora iannon te moan wareboki ana rongorongo te Atua ba bon akea te anga ae ti kona biribaki man ana mitukutaeka te Uea. Te motikitaeka aio bon kaotan te bai ae na riki nakoira ngkana ti ongoateka ke ti aki ongotaeka iorun te Atua. E katerea ikai te Atua ba ngkana ti ongotaeka ao ti kakaraoa Nanon te Atua ao tin a bon rinnako n ana Motirawa te Atua. Are nanona b aba kanwangan ara ongotaeka bon te raona ao te kukurei ma te Atua n aki totoki. E kaotia nab ate Atua ba n aron are jariki inanon onbong ao E motirawa n te Tabati ao E kan kaotia nakoira ba E kan kukurei ma ngira te Atua inanon motiarawana n an tai ni kariki bai are E bon jkaraoi ni kabane ibukira ngaira aomata ake eE a tia ni karikira ni katotongana.

Ngkana to rawa n ongotaeka irou te Atua n te maiu aio ao ti na bon kabua te kakabaia ae a tia ni katauraoia te Atua ibukira.

 

Details

Written by Uriam Timiti

Created: 12 January 2022

Wiki 1           Katenibong 

Warekan te Reta nakoia I-Ebera. 2: 14-18

A buokanibai natia aomata n te rara ma te iriko. Ao ai aron naba Kristo, E buokanibai iai ma ngaia, ba E mate, ni kataea iai ana kai teuare ana bai makan te mate, are bon te riaboro; ao E na kainaomataia iai ake a bane n toronaki ni makakin te mate ni kabanei aia tai ni maiu. Ba e aki tabeakinia anera, ma E tabeakinia ana kariki Aberaam. Ai ngaia are E bae n riki ba ai aroia tarina ni bai ni kabane, ba E na riki ba te mataniwi ni berebitero ae nanoanga ma ni kakaonimaki, i bukin aroia ma te Atua, ao E na kaboi muin aia bure te botanaomata. Ba E taonaki Ngaia n te rawawata, ao E kona iai ni buokiia akana karawawataki. 

Te Taramo 104: 1-4, 6-9

Kaekana: E uringa ana berita te Uea n aki toki

Katituaraoa te Uea, neboa arana, Kaongoia botanaomata ana makuri aika kamimi.

Aneneia, anenea arana, Katanoatai ana makuri aika kamimi. K.

Kamoamoai ngkami n arana ae tabu, Ke a kabaia akana ukeria.

Ukera te Uea ma makana, Ukera matana n tai nako. K.

Natin Aberaam ae ana toro, Natini Iakoba aika E rineia,

Bon Atuara te Uea, E motikitaeka i aonaba ni kabuta. K.

E uringa ana berita n tai nako, Ba te taeka i bukin te nga n roro,

Ana berita nakon Aberaam, Ao ana taeka n tuea nakoni Itaaka. K. 

Alleluia, alleluia.

Atuau, reireiai am kawai, kairai i nanon am koaua. Alleluia. 

Euangkerio 

Warekan ana Euangkerio Mareko. 1: 29 – 39. 

Ngke E otinako Iesu man te tinakoka, ao E nakon ana auti Timon ma Anterea, ao raona Iakobo ma Ioane. E wene tinani bun Timon, ba e kabuebue, ao E tuangaki Iesu taekana. E nakoina Iesu, ao E taua baina ni kateirakea. Ao e toki kabuebuena, ao e kaamarakeia. Ngke e a tairiki, i muin bungin taai, ao a uotaki nakoina aoraki ni bane ma ake a taniaki irouia taimonio, ao a bane ni botaki kain te kawa i rarikin te mataroa. E kamaiuia ake a maiti man aekan aoraki nako, ao E kanakoia taimonio ake a maiti; ma E tukia taimonio n taetae, ba ataia ba antai ngaia. Ngke e a karangaina, i main otin taai, ao E teirake n otinako, ni kaea te tabo ae akea kaina, ao E tataro iai. E mananga n rimuina Timon ma uake raona. Ngke a roko irouna, ao a taku nakoina: “A bane aomata n ukeriko.”e kaekaia ni kangai: “Ti na kitana ikai, ni kawari kawa aika kan, ba N na reirei naba iai, ba bon anne bukini kanakoau.”Ao e mananga ni kabuta Kariraia n reirei n aia tinakoka, ma ni kanakoia taimonio.

 

Tibatiba: Atuau, reireiai am kawai, kairai i nanon am koaua