Kanan Tamneira...
- Details
- Written by Uriam Timiti
Wiki 1 Kauabong.
Warekan te Retanakoia Ebera. 2: 5-12
E aki kateia anera te Atua ba tan tautaeka n te aba ae na roko, ae ti taekinna ngkai. Iai ana taeka temanna n te tabo teuana ae kangai: “Tera te aomata ngkai Ko iangoia? Tera Natin te aomata ngkai Ko mutiakinna? Teutana am tai ni karinanoa aia anera. Ko baunna n te mimitong ma te kakanato. Ko kawenei bai n kabane i ani waena.” Ngkai E kawenei bai ni kabane i ana, ao e aki tiku te bai teuana ae na aki mena i ana. Bon te koaua ba ti tuai n noria ngkai ba a bane bai i ana; ma Teuare karinanoaki tabeua te tai i aia anera, ae boni Iesu, ao ti noria ba E baunaki n te mimitong ma te kakanato, kioina ba E a tia n taonaki n te mate: e riai ba E na nora te mate, n ana akoi te Atua, i bukia aomata nako.
Te Taramo 8: 2, 5-9
Kaekana: Ko katea Natim i aoni bai ni kabane.
Te Uea ae Atuara, ai kakanato ra aram, i aonaba ni kabuta!
Ao ai tera te aomata ngkai Ko rekennanoia? Tera natin te aomata ngkai Ko mutiakinnna? K.
Ko karaoia n tei teutana i an te Atua, Ko rabaunna n te mimitong ma te kakanato;
Ko kateia i aoni baike Ko karaoi ni baim, Ko kawenei bai nako i ani waena. K.
Tibu ma kao ni bane, ao manin naba buakonikai,
mannikiba ma ikan tari, aika tou kawaini marawa. K.
Alleluia, alleluia.
Te Uea, e maiu nanou n am taeka, A ota matau n am reirei. Alleluia.
Euangkerio
Warekan ana Euangkerio Mareko.1: 21 - 28
A rin i Kaberenaum Iesu ma ana reirei. Ngke e a roko te bong ae te Tabati, ao E rin n te tinakoka, ao E reirei. A teke nanoia n ana reirei, ba E reirei n ai aron te aomata ae iai makana, ao tiaki n ai aroia tani koroboki. N te tai naba anne, iai n te tinakoka temanna te aomata ae taniaki iroun te tamnei ae kamara, ao e takarua ni kangai: “Ko na iranira, Iesu te I Natareta? Ko nakomai ba Ko na kamaunaira? I ataiko ba Teuare Tabu ae ana aomata te Atua.” Ma E kamatoa ana taeka Iesu nakoina ni kangai: “Kainababu, ao otinako mairoun teuanne.”Ao e ioioa te tamnei ae kamara, n aki karaua, ao e otinako mairouna ma te takarua ae korakora. A bane ni maku aomata, ao a titiraki i bon irouia ni kangai: “Ai tera aei? Bon te reirei ae bou ae iai makana! E tuatua naba nakoia tamnei aika kamara, ao a ongo irouna!”Ao e buti naba rongorongona n tabo nako, ni kabuta te aba ae Kariraia.
Tibatiba: Ko katea Natim i aoni bai ni kabane.
- Details
- Written by Uriam Timiti
Wiki 1 Moanibong
Warekan te Reta nakoia Ebera. 1: 1-6
E taetae te Atua ngkoa nakoia ara bakatibu, n tai aika maiti ao n aro aika maiti, ni wia burabeti. Ao ni bong aikai, aika kaitira ni bong, E taetae nakoira ni win Natina. E katea Natina ba te tia baibai ni bai ni kabane, ao E kariki bai ni kabane Irouna. Ao Natina anne, bon raneaneani mimitongina ma katotongan arona. Boni Ngaia ae katia te makuri ae kaitiakakini bure; ao E nako ngkanne n tekateka i angatain Teuare mimitong i eta. E riki iai ni kakanato i aoia anera, ba bon oin ana bai te ara ae moan te rine nakon araia nako.
Ba antai te anera ae E tia ni kangai te Atua nakoina: “Natiu ngkoe, I karikiko n te bong aei?” Ke tao E kangai: “N na riki ba Tamana, ao e na riki Ngaia ba Natiu.” Ao Ngke E karokoa am moa n Nati i aon te aba, ao E manga kangai: “Ke a bane ana anera te Atua n taromauria.”
Te Taramo 96: 1-2, 6-7, 9
Kaekana: Ke a bane ana anera n taromauria.
E tautaeka te Uea, ke e kukurei aonaba, Ke a kimareirei abamakoro nako.
E rabunaki n te nang ma te ro, E tei kaintokana i aon te Raoiroi ma te Eti. K.
E kaota ana eti karawa, A bane botanaomata n nora mimitongina.
Bobaraki i matana, ngkami tamnei nako. K.
Ba boni Ngkoe te Uea, Ko rietata i etan aonaba,
Ko raroa i aoia tamnei nako. K.
Alleluia, alleluia.
Taetae, te Uea, ba e ongora am toro: A mena iroum taekan te maiu ae aki toki. Alleluia.
Euangkerio
Warekan ana Euangkerio Mareko.1: 14 - 20
Ngke e a tia ni kabureaki Ioane, ao E nako Iesu nako Kariraia. E taekina te Rongorongo ae Raoiroi ae mairoun te Atua, ni kangai: “Rairi nanomi, ao kakoaua te Euangkerio.” Ngke E ri rarikin namani Kariraia, ao E nora Timon ma Anterea ae tarina ba a kabaka aia karaun n te nama ba bon tan akawa ngaia. E taku Iesu nakoia: “Nakomai, irai, ao N na karaoingkami ba tan akawaia aomata.”Ao a kitan naba aia karaun, ao a iria. Ngke E nako riki teutana, ao E nora Iakobo ae natin Tebetaio, ao Ioane are tarina, ba a mena naba n aia boti, ao a karaoi aia karaun. E weteia; ao a kitana tamaia ae Tebataio i nanon te boti, ma aia tia makuri, ao a iria.
Tibatiba: Natiu ngkoe, I karikiko n te bong aei
Tariu ao maneu akea ba ti a roko ni moan wikin te ririki aio imuin te Kiritimati ao te Epibane. Ao ni kaukan te ririki aio ao e moanaki n te toa ae babetitoan Iesu iroun St Ioane te tia Babetito. Eng n te bong aio ao ti a kitana te tai are ti tara ngkoa Iesu ba te merimeri are a tiba bungiaki ao ti neboia n aron kanakoana iroun te Tama ba E na uota Otan te Kamaiuaki nakon aonnaba ke E na kainaomataraira man rotongitongin te bure are e taona te aonnaba. N te tai aio ao ti a bane nora Iesu ba ai tiaki te merimeri ma ai bon te ikawai ae a tauraoi ni moana ana makuri ibukin kamaiuan aonnaba.
Inanon te Ebibane are a katanoataki iai ba Iesu boni Ngaia te Messia ibukin aonnaba ni bane ao n te tai aio ao ti a manga nora aron Iesu ba e kaotaki ba bon Ngaia Natin te Atua ae a karikaki bai ni kabane Irouna ao Ibukina ao are ti riai ni bane n ongo Irouna ao ni kakoaua ao ni maiuakina ana tangira ba ti aonga ni bane ni kamaiuaki. Are nanona ba ni babetitoan Iesu ao ti noria ba ai aron ae katabuaki iai Iesu ibukin te muiokoaki ae anganaki ba E na kamaiua aonnaba. Ao bon iai te taeka ae ti ongo n ana tai ni babetitoaki ae kangai; “Aio Natiu ae bane Nanou Irouna.. Kam na Ongo Irouna.
Ngaira ni kabane aika ti kainnanoa te kamaiuaki iai te bai ae ti anganaki n te bong aio ba ti na kakoaua Iesu ae bon Natin te Atua. Ao inanon te onimakai aio ao ti na reitaki ma anera inanon te taramo n te bong aio n taromauria te Uea. Ti bon weteaki naba iroun te Atua ba ti na bane n rairi nanora ba ti aonga n anaganaki nab ate korakora ao te kakaonimaki ni karaoi tabera ae ti muikoaki iai iroun te Atua bat i na reitaki ana makiuri Iesu obiki kamaiuaia tarira ma manera.
- Details
- Written by Uriam Timiti
Wiki i muin te Ephiphany Kaabong
Warekan ana moa n Reta Ioane ..4:19; 5:4
Ti na tangira, ba E a tia n tangirira moa te Atua. Ngkana e kangai temanna: “I tangira te Atua”, ma e riba tarina, ao bon te tia kewe. Te aomata ae aki tangira tarina are e noria, ao e aki kona n tangira te Atua ae E aki noria. Ao bon aei, te tua ae ti anganaki irouna: Ane tangira te Atua, ao ke e tangira naba tarina.
Ane kakoaua Iesu ba te Kristo, ao e rki mairoun te Atua. Ane tangira te Tama are karika te Nati, ao e tangira naba te Nati ae riki mairouna. Ti ataira ba ti tangiriia natin te Atua ngkana ti tangira te Atua ma ni karaoa are E tuangira. Ba tangiran te Atua boni kawakinan an atua, Ao aki rawawata ana tua, ba ne riki mairoun te Atua, ao e a tia ni kataea ana kai aonteaba. Ao te tokanikai ae kataea ana kai aonteaba, bon ara onimaki.
Te Taramo 72: 1-2, 14-15, 17
Kaekana: A na bane botanaomata n taromauriko, te Uea.
Te Uea, angan te uea am moti, angan natin te uea am eti,
ba e na kaira am botanaomata me te eti, ao e na kaeti taekaia am aomata aika kainano K
E na kamaiuia man te ioawa ma te tiritiri, a na kakawaki maiuia i matana.
E na aki toki te tataro i bukina, e na bane botanaomata n atonga kabaiana. K
E na neboaki arana n aki toki, e na teimatoa i an taai.
A na bane kain aonaba ni kabaia irouna, a na bane botanaomata n atonga kabaiana. K
Alleluia, alleluia.
E kaoti te burabeti ae kakanato i buakora: E roko te Atua ni kawara ana botanaomata. Alleluia.
Euangkerio
Warekan ana Euangkerio Ruka…4:14-22
E okira Kariaraia Iesu, ma makan te Tamnei ae Raoiroi, ao e buta te aba arei n taekana. E reirei n aia tinakoka, ao a bane aomata ni kamoamoaa. E roko i Natareta ike E kaikawaki iai, ao E rin n te tinakoka, n ai aroni katein te tabati, ao E teirake ni wareboki. E anganaki ana boki te burabeti ae Itaia; ngke E kauka te boki, ao E bo ma te koroboki aei:
“E mena i aou Tamnein te Uea, ba E kabirai ni katabuai. E kanakoai ba N na uota te Rongorongo ae raoiroi nakoia kainnano, ao N na kaota te bara nakoia aika kainaki, te manga noraba nakoia mataki, ao N na kainaomataia aika karawawataki ma ni katanoata te ririki n akoi mairoun te Uea.”
Ao E kaina te boki, ao E kaokia nakon te tabonibai, ao E tekateka. A bane mataia kain te tinakoka irouna. Ao E taetae nakoia ni kangai: “E kakoroaki bukin te koroboki anne i taningami n te bong aei.” Ao a bane ni butimaea ana rongorongo, ao a mimi n taeka n akoi ake E atong.
Tibatiba: Te aomata ae aki tangira tarina are e noria, ao e aki kona n tangira te Atua ae E aki noria.
Tariu ao maneu ti kauringaki inanon maiura ba ngkana iai te tangira iroura ao ti kaotia ba ti mananga ke ti riki mairoun te Atua are nanona ba ngkana ti baina te tangira ao bon iai iroura te Maiu n Atua ngkai te tangira bon mairoun te Atua. Ti kauringaki inanon te Kiritimati ao riki te Ebibane ba bungkiakin Iesu nako aonteaba ao maekan te Atua ibuakora bon kaotan rokon te kamaiuaki inanora ngkai E a roko Otan te Atua inanora ao bon te Ota aio are na manga kaotai kawaira are ti na toua ba ti aonga ni karekea te maiu ae akea tokina inanon te kabaia ao te mimitong. N te toa ae te Ebibane ao ti ongo n te moan wareboki ana wewete te Atua nakoira ba ti na ota ngkai e a roko te Ota iaora. Are nanona ba inanon karaoan makuri aika raraoi ao ti a manga uota te Ota nakoia raora ba a aonga ni manga kamaiuaki naba.
N te bong aio ao ti reireiaki arora ae ti na maiu inanon te koaua ao tiaki te kewe. Ngkana ti taku ba ti tangira te Atua ao ti aki tangiria raora ao bon tan kewe ngaira aika ti aki kona ni kamaiuaki. Ba ti bon aki kona n tangira te Atua ae ti aki kona n noria ao ti aki tangiria raora ae ti kona n noria. Eng ngkai bon te Atua te tangira ao ti na kona n tangiria raora ni koaua ngkana e a tia reke iroura tangiran te Atua. Are nanona ngkanne ba te tangira ni koaua e na riai n raonaki ma tangiraia raora. Arora ni maiuakina te tangira bon aron te buti inanon te nama n te waa n oo are ko na riai kaberanta te bwenarina ke aoao man iteran te waa aika uoua. Ba ngkana ko aoao man iteran te waa ae ti teuana ao ko na bon aki kona roko ni kawaim ba are e a bon minomino naba waam n aki aki kona ni butirake. E oti n te kabotau aio ba maiura n tangira e na karokoira n tokin kawaira ngkana ti karaoa Nanon te Atua ao ti tangiria raora.
- Details
- Written by Uriam Timiti
Wiki i muin te Epiphany Kanimabong
Warekan ana moa n Reta Ioane…5: 5-13
Antai ae kataea ana kai aonteaba? Bon teuare kakoaua Iesu ba Natin te Atua. Boni Ngaia Iesu Kristo are roko n te ran ao n te rara; tiaki ti te ran, ma boni n te ran ao te rara. Bon te Tamnei te tia kakoaua. Ma ngaia ae bon teniman tani kakoaua: ba te Tamnei, te ran ao te rara, ao a boraoi ngaia n teniman. Ti kariaia aia kakoaua aomata, ma e kakanato riki ana kakoaua te Atua. Ao aei ana kakoau te Atua n taekan Natina: ane kakoaua Natin te Atua, ao e mena i nanona ana kakoaua te Atua. Ane aki kakoaua te Atua, ao e arana te Atua ba te tia kewe ngkai e rawa n ana kakoaua te Atua n taekan Natina. Ao aei te kakoaua anne: E anganira te maiu ae aki toki te Atua, ao e mena te maiu anne i nanon Natina. Ane iai te Nati irouna, ao iai te maiu irouna; ane akea te Nati irouna, ao akea te maiu irouna.
I koroi baikanne nakoimi ba kam aonga n ataia ba iai te maiu ae aki toki iroumi, ngkai kam kakoaua aran Natin te Atua.
Te Taramo 147: 12-15, 19-20
Kaekana: Ierutarem, neboa te Uea.
Ierutarem, neboa te Uea, Tion, neboa Atuam.
E kamatoai kaini mataroam, E kakabaiaia natim akana i nanom. K
E kawakina te raoi i aon tiam, E kanuaiko ni burawan te uita.
E kanakoa ana taeka nako aon te aba, e buti maka ana rongorongo i aona. K
E kaota ana taeka nakoni Iakoba, ao ana tua ma ana moti nakoni Iteraera.
E aki karaoa anne nakon te aba riki teuana: a aki atai ana makuri. K
Alleluia, alleluia
E na neboaki Kristo ae kaoti i aon te aba, E na neboaki irouia akana kakoaua. Alleluia.
Euangkerio
Warekan ana Euangkerio Ruka. 5: 12-16
E mena Iesu n te kawa teuana, ao e roko temanna te aomata ae e buta rabatana n te rebera. Ngke e nora Iesu, ao e baka ni bobaraki i matana ma ni butia ni kangai: “Te Uea, ngkana nanom, ao Ko kona ni kamaiuai.” E arora baina Iesu n ringnga, ao E kangai: “Bon nanou, ko na maiu.” Ao e a mauna naba reberana. E tua Iesu nakoina ba e na aki kaongoa temanna, ao E kangai nakoina: “Nako, kaotiko nakon te berebitero, ao anga te karea i bukini kamaiuam, n ai aron ana baire Mote, ba te bai ni kakoaua i bukia.”
E buti nako taekana ma n raka nako, ao a baneakinna aomata ake a maiti, ba a na ongora irouna ao ana katokaki aorakia. Ma E nanako Ngaia nakon tabo aika rereua, ao E tataro.
Tibatiba: E anganira te maiu ae aki toki te Atua, ao e mena te maiu anne i nanon Natina.
Tariu ao maneu bon aio te bai ae moan te kakawaki ba e na reke iroura inanon ara borau n te maiu aio ba bon karekean te maiu ae akea tokina. Bon ana kakoaua te Atua ae ti tuangaki n te moan wareboki n te bong aei ba bon Natina ae Iesu ae Ngaia ae anganira te maiu ae akea tokina. Ngkana ti aki kakoaua aio ao ti arana ngkanne te Atua ba te tia kewe ao ti na bon aki kamaiuaki. Ma ane kakoaua ba E anganira te Maiu ae aki toki te Atua iroun Natina ae Iesu ao ti na bon kamaiuaki. Te bai kakawaki ngkanne iroura ba ti na kakoaua ba ngkana e maiu te Nati iroura ao ti na bon kamaiuaki. Ngkai E a tia ni kawarira Iesu are bungiaki inanon te Kiritimati ao nanona ngkanne ba bon iai te maiu ae maeka iroura ma ti te bai ae ti kainanoia ngkai ba ti na kakoaua Iesu ae boni Ngaia te Maiu ao ti na rairi nanora ao ni motikia ba ti na uouota ara kaibangaki ao ti irira Iesu ni katoa bong. Eng ngkana ti nim n tai nako ma Iesu ae bon te Maiu n aki toki ao ti na bon kakoaua ba E na kawakinira ao E na tararuaira ba ti na aki mwane iroun teuare buakaka are bon nanona n tai nako ba e tangiria ba ti na raonna inanon te buakaka ao te maraki i mone n aki totoki.
- Details
- Written by Uriam Timiti
Wiki i mwin te Ephihany Katenibong
Warekan ana moa n Reta Ioane.. 4: 11-18
Ngkami aika kam tatangiraki, ngkai E bati n tangirira te Atua, ao ti riai naba ngaira ni itangitangiri. Bon akea temanna ae a tia n nora te Atua. Ngkana ti itangitangiri, ao E maeka te Atua i nanora, ao e kororaoi ana tangira i nanora. Ti ataia ba ti maeka i nanona ao Ngaia i nanora, ba E a tia n anganira Tamneina. Ao ngaira ti a tia n noria, ao ti kakoaua ba E kanakoa Natina te Tama ba te tia kamauia aonaba? Ane kakoaua Iesu ba Natin te Atua, ao E maeka te Atua i nanona ao ngaia i nanon te Atua. Ao ngaira ti kina ana tangira te Atua nakoira ao ti kakoua. Bon te tangira te Atua: ane maeka i nanon te tangira, ao e maeka i nanon te Atua, ao e maeka te Atua i nanona. E na kororaoi te tangira i nanora ngkana ti aki maku n bongin te motikitaeka, ba arona Ngaia, ao ai arora naba i aon te aba. Akea te maku i nanon te tangira, ma e kamauna te maku te tangira ae kororaoi, ba e reke te maku man te karekekai: ane maku, ao e tuai kororaoi ana tangira.
Te Taramo 72: 1-2, 10, 12-13
Kaekana: A na bane botanaomata n taromauriko, te Uea.
Te Atua, angan te uea am moti,
angan natin te uea am eti,
ba e na kaira am botanaomata ma te eti
ao e na kaeti taekaia am aomata aika kainano. K
A na angabai nakoina, uean Taatiti ma abamakoro,
a na anganna aia karea, uean Tieba ma Teba. K
E na kamauia te kainano ae wewete, ma te kananoanga ae akea buokana.
E na nanoangaia mamara ma kainnano, E na kamaiu tamneia kainano. K
Alleluia, alleluia.
E kanakoai te Uea ba N na taekina te Rongorongo ae Raoiroi nakoia kainnano ao te inaomata nakoia akana kainaki. Alleluia.
Euangkerio
Warekan ana Euangkerio Mareko. 6: 45-52
Ngke a tia n amarake ma n rauaki aomata ake nimanga, ao E kairoroia ana reirei Iesu ba a na toka n te booti, ao a na rimoa n nako Betetaita, ao Ngaia E na kanakoia te koraki. Ngke E tia ni kanakoia, ao E nako n tataro i aon te maunga. Ngke e a tairiki, ao e mena te boti i nukan te nama, ao Ngaia E mena i eta n ti ngaia. E nori kainnanoia ni buru, ba e tutuki te ang; ao ngke e a boni kaan te ngaina, ao E kawariia n nakonako i aon te nama, ao E nang kitania. Ngke a noria ba E nakonako i aon te nama, ao a taku ba te anti, ao a takarua, ba a bane n noria, ao a maku. Ma E taetae naba Iesu nakoia ao E taku: “Karau nanomi, boni Ngai, tai maku.” Ao E toka i rarikia n te boti, ao e baka te ang. E koro te maku i nanoia, ba a aki ata nanon te kakai are (kamaitakin) te bwerena; a aki ota nanoia iai.
Tibatiba: E kanakoai te Uea ba N na taekina te Rongorongo ae Raoiroi nakoia kainnano ao te inaomata nakoia akana kainaki
Tariu ao maneu inanon tain te Kiritimati ao ti aki toki n ongo ba “ Eriki n iriko te Taeka ao E maeka i buakora. Ti tuangaki ikai ba Iesu are kanakoaki iroun te Tama ba E na uota te kamaiuaki nakon aonnaba E a tia n ruo mai Karawa ao E a tia ni bungiaki iroun Nei Maria ao E a maeka ibuakora. Ao ngkai E maeka te Atua ibuakora ao ti ataia ba E a roko te kamaiu i buakora ao E kona n reke te kamaiukai ti ngkana ti kakoaua Iesu ae te Atua ni koaua ao ti riai ni kaburei maiura nakon Iesu ba E na baini maiura ao E na tautaeka iaora. Ti bon weteaki naba iroun Iesu ba ti na tangiria ni koaua ma nanora ni kabane, korakora ni kabane, tamneira ni kabane ao iaoni bai ni kabane ao ngkanne ti na kakoaua ba ti maeka inanon te Atua ao te Atua E maeka inanora. N te aro ni katiteuanaaki ma te Atua ao ti kakoaua ba ti na bane ni kamaiuaki.
N aron are kanakoaki Iesu ba E na karokoa rongorongon te kamaiuaki nakoira ao ngaira ti a manga bane ni weteaki iroun Iesu ba ti na manga karokoa rongorongon te kamaiauki nakoia aomata nako ao ti na babetitoia n aran te Tama, te Nati ao te Tamneui ae Raoiroi. Eng bon aio te rongorongo ae kakawaki nakoira ni kabane ba ngkana raora Iesu inanon te boti ao bon akea te bai ae ti na kona ni maku iai ngkai ti onimaki ba E na kawakinira Iesu n tai nako ao ti na bon aki kona n reke n te kabuanibai ba E teimatoa inanora ana tangira ao ana kamaiu te Atua.