Kanan Tamneira...

Details

Written by Uriam Timiti

Created: 31 December 2021

Kiritimati           Kanimabong.

Warekan ana moa n Reta Ioane. 2: 18-21

Ataei, bong aikai boni kaitira ni bong. Kam a tia n ongo ba e na nakomai te Antikristo, ao a maiti antekristo aika tia ni kaoti ngkai; ti ataia iai ba boni kaitira ni bong aikai. A nako mai buakora, ma bon tiaki raora. Ngke arona ba raora, ao a na tiku i buakora, ma e riai ni kaotaki ba tiaki raora ngaia.

Ao ngkami, kam a tia ni kabiraki iroun Teuare Tabu, ao kam anganaki te ataibai. I koroboki nakoimi, tiaki bukina ba kam aki ata te koaua, ma boni bukina ba kam ataia, ao bon akea te kewe ae reke man te koaua. 

Te Taramo 96: 1-2, 11-13

Kaekana:Ke a kimareirei karawa ma aonaba.

Anenea te Uea n te kuna ae bou, anenea te Uea, aonaba ni bane,

Anenea te Uea, neboa arana. Katanoata ana kamaiu ni katoa bong. K.

Te kabaia i karawa, te kimareirei i aonteaba! ke e rurunga marawa ma kanoana,

ke e kukurei aontano ma baina nako, ke a takarua arokani buakonikai. K.

Ke a bane ni kimareirei i matan te Uea, ba E nakomai n tautaeka i aon te aba,

E na motika taekan aonaba n te eti, ao taekaia botanaomata n te koaua. K. 

Alleluia, alleluia.

E oti i aora te ngaina ae raoiroi. Nakomai, botanaomata, taromauria te Uea.

E ota te ota ae ababaki i aon te aba n te bong aei. Alleluia. 

Euangkerio

Warekan ana Euangkerio Ioane. 1: 1-18

I main tai nako, ao iai te Taeka, ao e mena te Taeka iroun te Atua, ao bon te Atua, te Taeka. E mena iroun te Atua mangkoa. A karikaki irouna bai nako, ao akea te bai ae aki karikaki irouna. Bon otani bai nako Ngaia, ao bon otaia aomata, te maiu; ao e ota te ota i buakon te ro, ao e aki kona n rotia te ro.

E roko te aomata mairoun te Atua, ao arana Ioane. E roko ba te tia kakoaua, ba e na kaota kakoauan te ota, ao a na bane aomata ni kakoaua irouna.

Tiaki te Ota Ngaia, ma te tia kakoaua te ota.

Bon te ota ni koaua te Taeka are kaotaia aomata nako, ao E roko i aon te aba. E mena i aon te aba, ao e karaoaki aon te aba irouna, ao e aki kinaa, aon te aba. E kawaria ana koraki, ao a aki akoia, ana koraki. Ma E angania akana akoia te kona n riki ba natin te Atua, akana kakoaua arana.

Ba E aki bungiaki Ngaia man te rara ke te iriko, ke n ana iango te mane, ma bon mairoun te Atua. Ao e Riki ni iriko te Taeka, ao E maeka i buakora, ao ti nora mimitongina ae mimitongin te Tama nakon ana Rikitemanna, ao oni n te akoi ma te koaua.

E kaotiota taekana Ioane, ni kangai: “Aei Teuare I taekinna ni kangai: E roko i muiu, ao E a rimoau, ba boni Ngaia i maiu.”

Ti bon bane n anganaki man onrakena te akoaki teuana ma te akoaki teuana. Ba e roko te Tua irouni Mote, ao te akoaki ma te koaua, a roko irouni Iesu Kristo.

Akea ae a tia n nora te Atua; ma E kaotiota taekana te Nati ae te Rikitemanna, ae memena i nanon te Tama. 

 

Tibatiba: “Aei Teuare I taekinna ni kangai: E roko i muiu, ao E a rimoau, ba boni Ngaia i maiu”

Tariu ao maneu ao aikai na taeka Ioane te tia babetito ibukin kabarabaran Iesu are e tabe n nakonako nakoina ba E na babetitoaki irouna. Ao aio Iesu ae te Atua ni koaua are aongkoa are E rimuin Iesu ibukina ngke e bungiaki rimoa Ioane ma E a manga rimoana ibukina ba E a a kaman iai Iesu ngkoa ao boni ae a karikaki bai nako Irouna ao Ibukina. Are nanona ngkanne ba Iesu E roko ba E na anganira koraoin te kamaiuaki are mairoun Tamana. Ngkai Iesu boni Ngaia te Ota ao te Koaua ao ti bane ni weteaki ba ti na ongo ao n onimakinna ba ti aonga ni kamaiuaki.

Ti kauringaki naba n te moan wareboki ba tai aika ti mena inanona ngkai boni kaitira ni bong. Are nanona ba bong aikai bon bong ni kakatauraoi imain manga okin kaua Iesu inanon te maaka ma te korakora ao te mimitong ba E nang motika taekan aonteaba. Inanon taian kaitira ni bong ao ti tuangaki ba ti na riai n taratara ao n tantanni ba ti aki ata te tai ma te aoa are E na roko iai Iesu. Ngkana ti taratara ao ti tantanni ao ngkanne ti na bane n aki maku ba ti na bane n tauraoi ni butimaea Iesu ngkana E roko. Te bai teuana ae kakawaki inanon bongi ni kaitira ba ti na riai taratara raoi ba ti na aki mwane irouia tan kewe ke anti-Kristo ake a na mamanaira ngkai bon ti teuana aia kantaninga ba a na kamaneira ba ti aonga n aki roko n te Abanuea ae Karawa are boni nnera ao mwengara ni koaua.

Ti bon riai ngkanne n taratara raoi ao ti na nim ma te Atua n tai nako ba ti aonga ni kawakainaki raoi ao n aki kona n reke n te kabuanibai. Ti riai naba n riki ba tani buokia tarira ma manera ba a na aki aki reke n te kabuanibai ao kanganga man ana kewe ao ana mamanai teaure bukakaka are bon Tatan. Ti na bange n tekeraoi n te ririki ae bou ao ti na butia Nei Maria ba e na kairira n tai nako inanon kawain Natina ae Iesu te Tei. 

Details

Written by Uriam Timiti

Created: 21 December 2021

Avenete Wk 4  Moanibong 

Warekan ana Boki te Burabeti ae Itaia. 7: 10-14

E taetae te Uea nakon Akati, ni kangai: “Butia te uea am kanikina teuana, mai mone i nano ke mai karawa i eta.” Ao e taku Akati: “N na aki bubuti, N na aki kata te Uea.”

Ao e kangai Itaia:

“Ongora, ngkami ana utu Tawita: A aki toki nanomi ni kakuaia aomata?Kam na kata naba Atuau? Ma ngaia ae bon te uea ae na angani ngkami te kanikina. Ba e na kariki te ataeinaine, ao e na bungia natina te mane ae na aranaki ba Emmanuera, ae nanona “Te Atua-I-buakora.”

 

Te Taramo 23(24): 1-6

Kaekana: Ke E nakomai te Uea ae mimitong.

Ana bai te Uea aonaba ma kanoana, aon te aba ma kaina nako.

E kateia Ngaia i aoni marawa, E katoroa i aoni karanga. K

Antai ae na ararakea ana maunga te Uea? Antai ae na tei n ana tabo ae tabu?

Ana e aki bure baina, ae e itiaki nanona, Ane aki ri ni baika akea maneia. K

E na reke kabaiana mairoun te Uea, Ao kaniwangana irou te Atua are kamaiua.

Bon anne aroia akana ukeria, Akana ukera matan Atuani Iakoba. K 

Alleluia, alleluia

Nakomai, ana king Tawita Ae ko kauka mataroan te Abanuea: Kabaraia taenikai man te ro ao te mate. Alleluia. 

Euangkerio 

Warekan ana Euangkerio Ruka. 1: 26-38

E kanakoaki te anera ae Kabiriera iroun te Atua nakoni kawani Kariraia ae arana Natareta, ba e na nakon te ataeinaine temanna ae kainrouaki ma te aomata ae arana Ioteba, are kain ana utu Tawita. Ao aran te ataeinaine, Maria. E nakoina te anera, ao e kangai nakoina: “Ko na mauri, ngkoe ae ko onrake n te karatia; E mena te Uea iroum; ko karaoiroaki i buakoia aine; ao e karaoiroaki uani birotom.” Ngke e ongo anne, ao e nako nanona, ao e taku n ana iango ba tera te kamauri anne. Ma e taku te anera nakoina: “Karaua nanom, Maria, ba ko akoaki iroun te Atua. Noria, ko nang kariki, ao ko na bungia natim te mane, ao ko na aranna ba Iesu. E na kakanato, ao E na atongaki ba Natin Teuare Moan te Rietata; ao  E na anganna ana kaintokanuera Tawita are tamana te Uea ae te Atua. E na uea i aon te utu ae Iakoba n aki toki, ao e na akea tokin ueana.” Ma e taku Maria nakon te anera: “E na iranaki ni karaoaki anne, ngkai I aki ata te mane?” E kangai te anera nakoina: “Ane e na ruoniko te Tamnei ae Raoiroi, ao e na rabuniko makan Teuare Moan te Rietata. Ai ngaia ae e na moaniban te raoiroi Natim, ao E na atongaki ba Natin te Atua. Ao ae e a karika naba natina te mane neiere am bu are Eritabeta ngkai e a unaine, ao ai ana kaonoua n namakaina aei neiere atongaki ni kanoabo; ba akea te bai ae aki konaki iroun te Atua.” Ao ngkanne e kangai Maria: “Ana toro te Uea ngai: e na karaoaki nakoiu n ai aron am taeka.” Ao e a kitanna te anera.

 

Tibatiba: Ana toro te Uea ngai: e na karaoaki nakoiu n ai aron am taeka

N te bong aio ao ti moana ongorara ni kanoan te bai ae riki inanon tain te Kiritimati are bon taekan rinean Nei Maria ibuakoia aine ni kabane ba e na riki ba Tinan Iesu ae te Atua ni koaua. Ikai are ti ongora aron moan reken Iesu ba E na roko iaon te aba ao E na maeka ibuakora inanon biroton Tinana Nei Maria. E a moanaki inanon te karaki te bitaki ae moan te bubura n rongonrtongon te aonnaba ba e a roko i aonteaba Iesu ae te Messia ke te tia kamaiua aonnaba. Tariu ao maneu inanon te karaki aio ao ti ataia ba e kanga n roko te kamaiuaki n te aonnaba. Bon man kaekan ana kamauri te Atua iroun Nei Maria are e kangai “Ana toro te Uea ngai E na karaoaki nakoiu n ai aron am Taeka.”

Eng ti ongo inanon te KAEKA ana ENG Nei Maria nakon ana rongorongo te Atua. Ti ongo inanon te kaeka aio ana anganano ao ana tauraoi Nei Maria ni kabonganaki iroun te Atua ibukin ana kanatninga te Atua. Ti ongo ao ti nora inanon ana kaeka Nei Maria aron te ONGOTAEKA ae kororaoi ae boto iaon te nanorinano ao te onimaki ni koaua.

E reireinira Nei Maria ikai ba ngkana ti kan butimaea ao ni kaoa Iesu te Tei nako Nanora ao ti riai ni katotonga Nei Maria n angan Iesu ara ENG ba ti na riki ba tabonibai ngaira aika ti tauraoi ni kabonganaki Irouna ibukin karaoan Nanon te Uea.

 

Details

Written by Uriam Timiti

Created: 30 December 2021

Kiritimati           Kaabong.

Warekan ana moa n Reta Ioane. 2: 12-17

Ataei aika kam uarereke, I koroboki nakoimi, ba a tia ni kabaraki ami bure ni makan arana. I koroboki nakoimi, karo, ba kam ata Teuare iai mangkoa. I koroboki nakoimi, rorobuaka, ba kam kataea ana kai teuare Buakaka. I a tia ni koroboki nakoimi, ataei, ba kam ata te Tama. I a tia ni korobki nakoimi, karo, ba kam ata Teuare iai mangkoa. I a tia ni koroboki nakoimi, rorobuaka, ba kam nanomatoa ao e maeka ana taeka te Atua i nanomi, ao kam kataea ana kai teuare Buakaka.

Tai tangira aonteaba ke te bai teuana i aonteaba. Ane tangira aonteaba, ao akea tangiran te Tama irouna. Ba bai ni kabane aika i aonteaba, ba ana kaibabaru te rabata, aia kaibabaru mata ao kainikatongan te kaubai, a aki nako mairoun te Tama ma boni mai aonteaba.

Ao e tabe ni mauna nako aonteaba ma ana kaibabaru. Ma ane ira nanon te Atua, ao e teimatoa n aki toki. 

Te Taramo 96: 7-10

Kaekana: Ke a kimaireirei karawa ma aonaba.

Angan te Uea, ngkami botanaomata, angan te Uea te nebonebo ma te maka,

angan te Uea neboan arana. K.

Uota ami karea, rin i matana, taromauria te Uea n umana ae tabu,

Ko na maku i matana, aonaba ni bane. K.

Kangai nakoia botanaomata: “E uea te Atua.”E kamatoa aonaba n akea ingina.

E na motiki taekaia botanaomata n te eti. K. 

Alleluia, alleluia.

E taetae te Atua nakoia ara bakatibu irouia burabeti. E taetae nakoira ngkai iroun Natina.

Alleluia.

   

Euangkerio

 

Warekan ana Euangkerio Ruka.1: 36-40

Ngke a uota Iesu te Tei ana karo nakon te Temboro, ao iai te burabeti te aine ae arana Anna, are natini Banuera, ma te utu ae Atera. E a bon unaine, ao itiua ana ririki ni maiu ma buna i muin ana tai n ataeinaine; ao i muin anne, ao e akea naba buna, ao a koro wanibui ana ririki. E titiku n te Temboro n taromauria te Atua ni bong ao ni ngaina, n te aki mamatam ma te tataro. Ao e roko neierei n te tai naba arei, ao e neboa te Atua ao e taekina aron te Tei arei nakoia aomata nako ake a karia kamaiuaia Iteraera. Ngke a tae nangini bai ni kabane, n ai aron ana tua te Uea, ao a okira abaia ae Kariraia ma aia kawa ae Natareta. Ao E ikawai rake te Tei ni matoa, ao E rikirake ni wanawana, ao e mena irouna ana akoi te Atua.

 

Tibatiba: Ti na neboa te Atua ba E kamaiura iroun Natina ae Iesu

Tariu ao maneu ti mena ngkai inanon te tai ae te Okitawe ni Kiritimati ke te waniua ni bong are ti tatakaruaea iai te rongorongo ae moan te kakukurei ba E a bungiaki nako aonteaba ao nakoira n tatabemanira Iesu te Tei are kaman iai mangkoa, ngkai ao n aki totoki. Eng bon aio te rongorongo ae moan te kakukurei ba e a roko te Ota are kaota te rootongitong are ti a tia n taonaki ba muin aia bure ara moan karo. Iroun Iesu te Tei ao e a roko te kamaiuaki nako aonteaba ngkai E a riki n iriko te Taeka ao E a maeka ibuakora. Rokon Iesu e a kania Karawa ma aonteaba ao ti bane ni kona ni kamaiuaki ngkai E a tia ni kaboi ara bure Iesu ngke E maraki, E mate ao e mangauti ba ti aonga ni karekea koraoin te kamaiuaki.Te kamaiuaki aio e bon tangaina nakoira ni kabane ti ngkana ti rairi nanora ao kakeaira i bon iroura, ti tabeka ara kaibangaki ni katoa bong ao ti iriria Iesu.N te moan wareboki ao e kauringira Ioane ba ngkai e a roko Iesu ibuakora ao ngkana ti butimaia nako nanora ao ngkanne e a maeka ni koaua ana taeka te Uea inanora are ngaia ae na kairira ao E na karokoira n tokin kawaira n te Abanuea are i Karawa. Eng, kariarian rokon Iesu boni ngaia te bai are a kaman ni kakantaningaki man te Berita ni kawai n aron are taekinaki nte ewangkerio iroun te burabeti are Anna ao Timeon. Eng ti bon riai ni bane ni kukurei ao ni katituaraoa te Uea n ana tangira ao moan te kororaoi nakoira n tai nako. Ti reita te kukurei n te aonnaba inanon waniua te bong n te Kiritinati ibukin kamaiuakira iroun Iesu te Tei ae a bungukai ao E a maeka ibuakora.

Details

Written by Uriam Timiti

Created: 15 December 2021

Avenete Wiki 3            Katenibong 

Warekan ana Boki te burabeti ae Itaia. 45: 6-8, 18, 21-26

Bai ni kabane i rarikiu, bon te akea. Bon te Uea Ngai, ao akea ae ai arou. I karaoa te ota, ao I karika te ro, I karaoa te kabaia ao I karekea te kabuanibai, boni Ngai te Uea ae I karaoi baikanne ni bane.

Karawa, karokoa te tokanikai n ai aron te aoi, ao ke a kabaka te karau nang. Ke e uki aontano ba e na otirake te kamaiu. Ke e rikirake naba te kainaomata ae N na karikia, Ngai te Uea.

E kangai te Uea ae te tia karika karawa, ae te Atua, ae karaoa aon te aba ma ni kamatoa, ba te tabo ni maeka ae e baireaki arona:

“Boni Ngai te Uea; akea temanna i rarikiu, Ngai te Atua ae eti ae te tia kamaiu; akea riki temanna i rarikiu. Tanimai nakoiu, ba kam na kamaiuaki, ngkami tabon aonaba ni bane, ba boni Ngai te Atua n ti Ngai.

I taetae n tuea i boni irou:

Ae otinako mai wiu, ao bon te koaua ao te taeka ae aki bibitaki. A na bane ni katorobubua i matau, a na bane n tuea irou, ni kangai: ‘Boni mairoun te Uea n ti Ngaia te tokanikai ma te korakora.’ A na nakoina ma te mama uake a urarake n un nakoina. E na tokanikai ma ni kakannato iroun te Uea te utu ae Iteraera ni kabanea. 

Te Taramo 85: 9-14

Kaekana: E na maeka i abara  mimitongin te Uea.

N na kakauongo ana taeka te Uea, E taekina te raoi

i bukia ana botanaomata ma raona. A kai kamaiuaki akana makua,

e na maeka mimitongina i abara. K.

E botaki te tangira ma te koaua, a iraorao te eti ma te raoi.

E riki te koaua man te tano, e baraki te eti mai karawa. K.

E karekea te kabaia te Uea, ao e anga uana abara;

e rimoana te eti, ao e rimuina te raoi. K. 

Alleluia, alleluia.

Ukera te Uea, ngkai E kai reke; Weteia, ngkai E kaan. Alleluia.

 

Euangkerio 

Warekan ana Euangkerio Ruka. 7: 19-23

E weteia ana reirei uoman Ioane, ao kanakoia nakon te Uea, ba a na titirakinna ni kangai: “Boni Ngkoe Teuare na roko, ke ti na taninga temanna?” Ngke a roko irouna, ao a taku nakoina: “E kanakoira Ioane te Tia Babetito ba ti na tuangko ae kangai: ‘Boni Ngkoe Teuare na roko ke ti na riai n taninga temanna?” Ao Iesu, n te tai arei, E kamaiuia aomata ake a maiti ake iai irouia te aoraki, te mamara, ke tamnei aika buakaka, ao anga te noraba nakoia mataki ake a maiti. Ao E kaekaia uake a kanakoaki, ni kangai: “Nako, kaongoa Ioane baika kam nori ma n ongo: a noraba mataki, a nakonako mauku, a kaitiakaki rebera, a ongotaeka tanigabono, a uti mate, e teakinaki te Rongorongo ae Raoiroi nakoia kainnano; ao e kabaia te aomata ae aki baka i bukiu.”

 

Tibatiba: Boni mairoun te Uea n ti Ngaia te tokanikai ma te korakora

 

Tariu ao maneu ti bia nora kakawakin te tai ae ti anganaki inanon tain te Avenete aio ba ti na katauraoira ni koaua ba ti aonga n tauraoi ni butimaea Iesu ae nang bungiaki nakoira are na uota te raoi ao te kimareirei nakon te aonnaba ba ti aonga ngaira ake ti tauraoi ni butimaea te raoi n rotaki ao n ringaki n te kamaiuaki. Eng e boni kakawaki iroura n tatabemanira ba ti na kakoaua te kamaiuaki aio ao n tauraoi ni butimaia ao ni kawakinna ni kabanei bongin maiura ba ti aonga n te taina ni karekea te kaniwanga ae moan te kakawaki are te kona ni maeka irarikin te Atua inanon kororaoin te kukurei ae akea tokina. Bon ti mairoun te Uea ae te Atua ae ti na kona ni karekea te kaniwanga aio ae bon te tokanikai. Bon ti te Uea ae E na anganira te buoka ao te korakora ni kona n tokinikai iaon taian kataki ma kanganga ao boni Ngaia naba ae na butimaira ni karinira I Karawa. Tariu ao maneu bon ti Iesu are Ngaia ae ti mananga mairouna ae E na raonira inanon kawaira ngkana ti anganna muiokon maiura ma arora ni kabane ba E na tautaeka iai ao boni Ngaia naba ae na butimaira ni karinira i Karawa. Ngaia ae bon riai ba ti na onimakina te Atua n ti Ngaia ba ti aonga n tokanikai ao ni maeka irarikin Iesu n tai nako.