Kanan Tamneira...
- Details
- Written by Uriam Timiti
Avenete Wiki 3 Kauabong
Warekan ana Boki te burabeti ae Tebania. 3: 1-2, 9-13
E na maraia te kawa ae tautaua arona, ae kamara, ae tiritiri. E rarawa n ongo te wewete, e rarawa ni butimaea te reirei, e rarawa n onimakina te Uea, E rarawa ni kania Atuana. N na angania botanaomata ngkanne ria aika itiaki ba a aonga ni bane ni kona ni wetea aran te Uea ma n toro irouna n te nano ae ti teuana. A na uoti karea nakoiu tani bubutiai mai maiakini karangan Itiobia. N te bong anne, ao ko na aki manga bae ni mama n arom ni kabane aika ko bure iai nakoiu, ba N na kararoaia ma ngkoe tani kainikatonga aika kamoamoako i aon au maunga ae tabu. Akea ae N na katikua i nanom ba ti te botanaomata ae nanorinano ma n ongeaba, ao a na katania n aran te Uea nikiraia Iteraera. A na aki manga karaoa ae buakaka: a na aki manga atonga ae kewe, e na aki manga reke te taeka ni kamane i nanoni wia. Ma a na kona n amarake ma ni motirawa n akea ae na kakiriweia.
Te Taramo 34: 2-3, 6-7, 16, 18-19
Kaekana: E ongo te Uea n tangin te kainnano.
N na karaoiroa te Uea n tai nako, N na neboia n aki toki;
E kakatonga tamneiu iroun te Uea, A na ongo akana mangori, ao a na kukurei. K.
Tan nakoina, ao ko na ota, Ao e na akea te mama ni matam.
E wewete te kainnano, ao E ongo te Uea, E kamaunai rawawatana nako. K.
E kaitaraia tani buakaka te Uea, Ni kamaunai uringaia mai aon te aba.
A wewete akana raoiroi, ao E ongo te Uea, E kamaiuia ma n rawawataia. K.
E kan te Uea ma akana a uruaki nanoia, E buokiia akana a bara nanoia.
E kamaiu tamneia ana toro te Uea; ane katanna irouna, ao e na aki kabuakakaki. K.
Alleluia, alleluia.
E nakomai te Uea ni kamaiua ana botanaoamta. A kabaia akana tauraoi ni butimaia. Alleluia.
Euangkerio.
Warekan ana Euangkerio Mataio…21: 28 - 32
E kangai Iesu nakoia mataniwia berebitero ma aonteaba: “Tera ami iango? Iai temanna te aomata are uoman natina. E kaeka te karimoa ni kangai: “Natiu, n te bong aei nako ni makuri ni nnen te kainikurebe.’
Ao e kaeka ni kangai: ‘I rawa.’ Ma rimui, e bitaki ana iango ao e nako. E kaeka natina are temanna n te taeka naba anne, ao e taku teuarei: “Te toka, N na nako.’ Ao e bon aki nako.
Antai irouia akana uoman are ira nanon tamana?” Ao a kangai: “Te karimoa.” E taku Iesu nakoia: “I tuangingkami te koaua: a tabe n rimoami bubirikano ma kaebkau n Uean te Atua. Ba e kawaringkami Ioane ni kawain te etin, ao kam aki kakoauaa; ma a kakoaua bubirikano ma kabekaau ao ngkami, ngke kam nora anne, ao a aki bitaki naba ami iango ba kam na kakoauaa.”
Tibatiba: E ongo te Uea n tangin te kainnano
Tariu ao maneu ti na reita ara maroro n te bong aio iaon ara katauraoi imain te Kiritimati. N te bong are ngkoanana ao ti ongora n ana wewete te Uea nakoira ba tera te kawai ae ti na toua inanon te Avenete aio ao kaekana a bane ni botaki iaon ana taeka Iesu nakoira are kangai bon Ngai te Kawai te Koaua ao te Maiu. Are nanona ba ngkana ti irira Iesu ao ti bon aki nanououa ba ti na bane n roko n te maiu ae aki totoki i Karawa. N te bong aio ao E a manga tuangira Iesu ba e aera ngkai ti riai n tan nakon te Uea ao ni muiokoia ba E na buokira mani kakawakinira n ara kekeiaki ni kabane ba ti aonga ni bane n roko n tokin kawaira. Eng E a kaman ataia te Uea ba tera ae na reke nakoira inanon ara kekeiaki ni maiura aio.Ti tuangaki n te bong aio ba te bai ae ti kona n onimaki iai m tai nako ba E nanoanga te Uea m tai nako ao E tauraoi ni buobuokira ngakana ti kainnanoa buokara mairouna. Ngkana ti tauraoi ni kakoaua ao onimakinna ao E tuangira ba E na bon aki kona n rawa n nanoangaira ao ni buokira ba ti aonga ni bane ni kamaiuaki ao ti na aki mate.
- Details
- Written by Uriam Timiti
Avenete Wiki 3 Moanibong
Warekan te Boki ae Warekaia Iteraera…24: 2-7, 15-17
E tararake Baraam, ao e noriia Iteraera ba a botaki ni koroutuaki n ai aron aia baronga nako. Ao e ruoanna tamnein te Atua, ao e atonga kunana ae kangai:
Ana taeka Baraam ae natini Beora, ana taeka teuae matairiki, ana taeka teuae ongora n ana taeka te Atua. E nora ae E kaotia nakoina Teuare maka, e kaekaki iroun te Atua ao e ure matana. Ai raoiroi ra umam, Iakoba! Ai tamaroa ra mwengam, Iteraera! Ai aroni marua aika rababa, ai aroni nne n aroka i etan te karanga, ai aron taian aroe aika unikaki iroun te Uea, ai aron taian tita i rarikin te ran. E teirake te aomata ae kakanato mai buakon ana kariki, e tautaeka i aoia botanaomata aika maiti. E kakanato riki ana uea nakon Akaka, e rikirake mimitongina.
E manga atonga kunana Baraam ni kangai: Ana taeka Baraam ae natini Boera, ana taeka teuae matairiki, ana taeka teuae ongora n ana taeka te Atua, ae ata ana atatai Teuare moan te Rietata. E nora ae E kaotia nakoina Teuare maka, e kaekaki iroun te Atua, ao a ure matana. I noria, ma e tuai n roko; I taraia, ma e tuai ni kaan: e riki ni mataniwi te itoi ae oti mairouni Iakoba, e teirake te kainua ae oti mairouni Iteraera.
Te Taramo 24: 4-9
Kaekana: Te Uea, reireiai am kawai.
Te Uea, tuangai am kawai, reireiai kawaiu.
Kairai i nanon te koaua, kaotaai; boni Ngkoe te Atua ae kamaiuai. K.
Uringa am akoi, te Uea, ma am tangira ae mangkoa.
Tai uring au bure n au tai n ataei. Uringai n am akoi. K.
E akoi te Uea, ao E eti, E kaota te kawai nakoia tani bure;
E kairia akana nanorinano n te eti, E reireinia kainnnao ana kawai. K.
Alleluia, alleluia.
E na nakomai te Uea; nako n butimaia: bon Uean te raoi. Alleuia.
Euangkerio
Warekan ana Euangkerio Mataio…21: 23-27
E a tia n rin Iesu n te Temboro, ao E tabe n reirei. Ao a nakoina mataniwia berebitero ma unimanen aonteaba, ao a kangai nakoina: “Ko karaoi baikanne n te maka ra? Ao antai ae anganiko te maka anne?” E kaekaia Iesu ni kangai: “N na titirakini ngkami naba Ngai, n te titiraki ae ti teuana. Ngkana kam kaboa, ao N na tuangi ngkami naba ba te maka ra are I karaoi iai baikanne. Mai ia ana babetito Ioane? Mai karawa ke mairouia aomata?” Ma a tabe ni iango ni kangai: “Ngkana ti taku ba mai karawa, ao E na kangai nakoira: ‘Ao e aera ngke kam aki kakoaua?’ Ao ngkana ti taku ba mairouia aomata, ao ti makuia te koraki ngkai a bane n taku ba te burabeti Ioane.” Ma ngaia are a kaeka Iesu ni kangai: “Ti aki ataia.” Ao E taku Iesu nakoia: “Ao Ngai naba, I aki tuangi ngkami ba te maka ra are I karaoia baikanne iai.”
Tibatiba: Te Uea, reireiai am kawai
N tain te Avenete ao ti kauringaki ba ti riai ni katauraoira raoi ni butimaea Iesu te Tei are bungiaki iai nako aonteaba ba E anganira te kamauiaki ae kororaoi. E roko Iesu ba te ota ae na kaotai kawaira ao E e kairira nakon te Abanuea ae Karawa. Ngkana ti kani kamaiuaki ao ti riai ni butia te Uea ba E na reireinira ana kawai. Tarii ao maneu ti bon riai ni kabanei korakorara ma ara kekeiaki n reireinira te kawai mairoun Teuare E a tia ni kanakoaki iroun Tamana ba E na kaota nakoira te kawai. E na reireinira ao ni kaota nakoira te kawai Iesu iroun Tamneina ae Raoiroi are bon mamaeka inanora. Ibukin aio ao e riai moa ba ti na babetitoaki n te ai ma te ran ba e aonga ni maiu inanora koraan te maiu ae Onraken te Maiu ao te Natinaki iroun Tamara ae te Atua. Teuana riki te bai ae kakawaki ngkana ti toua kawain Iesu bon te tauraoi ni kakeaira I bon iroura; te tabeki ara kaibangaki ao te irira Iesu ni katoa bong. Eng, e kabarabaraki te kawai ae ti toua ba kawan te kaibangaki ike ti na kaitibo iai ma rawarawata, maraki ao kanganga ao te tauraoi ni butia Iesu ana nanoanga ma ana kabarabure ngkana ti taonaki n te mamara ao ti bure.
Ngkai E a tia n taekinna Iesu ba boni Ngaia te Kawai te Koaua ao te Maiu ao ngkanne ti riai n tai nako ni katotonga maiun Iesu iaon te aba. E riai n riki Iesu ba ara Uea ao ngaira ti riai n riki ba toro aika ti na bainaki ibukin kakaraoan Nanon Iesu n tai nako Irouna.
- Details
- Written by Uriam Timiti
Avenete Wiki 1 Kanimabong S. Baraniko Tawerio
Wareboki 1 Warekan ana Boki te Burabeti ae Itaia…60: 1-6 (vg)
Teirake, Ierutarem, ota, ba ae a roko otam, e oti raneanean te Uea i aom; Ba e nang rabuna aonaba te ro, ao a na rabunaki n te ro botanaoamta, ngkai E kaoti te Uea i aom ao e nang oti mimitongina i aom. A na kawara otam botanaomata, a na roko ni kaea otin am ota.
Tabeka matam, taratara nako: a bane ni botaki, a waki nakoim, a nakomai natim mai kiraroa, a rarikinaki natim aine. Ane ko na nora anne, ao ko na kukurei, ao e na kimareirei ma ni maiu nanom, a na kabatiaki kaubaini marawa nakoim, ao a na reke iroum aia kaubai botanaomata. A na otabaniniko bota ni kamero ao kameroni Mirian ma Eba; a na bane n roko mai Tieba ma uotaia te koora ao te ribano, ao a na kaota neboan te Uea.
Te Taramo 96: 1-3, 7-8, 10
Kaekana: Kaongoia botanaomata ana kamimi te Uea.
Anenea te Uea n te kuna ae bou, Anenea te Uea, aonaba ni bane.
Anenea te Uea, neboa arana. K.
Katanoata ana kamaiu ni katoa bong, Taekina mimitongina nakoia bontaomata,
Taekin ana kamimi nakon aba nako. K.
Angan te Uea, ngkami botanaomata nako, Angan te uea te nebonebo ma te maka,
Angan te Uea neboan arana. K.
Kangai nakoia botanaomata: ‘E uea te Atua.’E kamatoa aonaba ba e na aki ing;
E na motiki taekaia botanaomata n te eti. K.
Wareboki 2. Warekan ana moa n Reta Bauro nakoia I Korinto…9: 16-19, 22-23
I aki kamoamoaai ngkai I kaotiota te Euangkerio, ba boni baeu ae I anganaki. N na boni maraia ngke arona ba I aki kaotiota te Euangkerio. Ngke arona ba I rinea te makuri aei, ao e na boni bae n reke kaniwangau; ma ngkai I aki rinei, ao bon te muioko are I anganaki. Ao tera ngkanne kaniwangau? Bon aei: N na kaotioti, ao N na anga te Euakerio n aki kaboaki, ma n kaki are I riai n anganaki man te Euangkerio.
Ma ngaia ae I aki bae iroun temanna, ao I toro irouia aomata nako, ba I aonga n anai nanoia akana maiti riki. I kabanea korakorau i bukia aomata nako, ba I aonga n anai nanoia temangina. Ao I karaoi baini kabane akanne i bukin te Euangkerio, ba e aonga n reke tibangau ni uana.
Alleluia, alleluia.
Nako, reireinia botanaomata ni kabaneia: I a raoningkami ni bong nako Ni karokoa tokin aonaba. Alleluia.
Euangkerio
Warekan ana Euangkerio Mataio….9: 27-31
Ngke E mananga Iesu, ao a rimuina mataki ake uoman, ao takarua ni kangai: “Natin Tawita, nanoangaira!” Ngke E roko Iesu n te auti, ao a nakoina uake a mataki, ao E kangai nakoia: “Kam kakoaua ba I kona ni karaoa anne?” Ao a taku: “Eng, te Uea.” Ao E ringi mataia Iesu, ao E taku: “Ke a karaoaki nakoimi n ai aron ami onimaki.” Ao a ure mataia. Ao E kamatoa ana taeka nakoia ni kangai: “Taratarai ngkami ba e na aki ata aei temanna.” Ma, ngke a nako, ao a katanoata taekana ni kabuta te aba arei.
Tibatiba: Teirake, Ierutarem, ota, ba ae a roko otam, e oti raneanean te Uea i aom
- Details
- Written by Uriam Timiti
Wiki 2 Avenete Katenibong TE RIKI N IMMAKURATA
Wareboki 1
Warekan te Boki ae Karikani bai. 3: 9-15, 20
E wetea te aomata te Uea ae te Atua, ni kangai: “Ko mena ia?” Ao e taku te aomata: “I ongo banam n te nne n aroka, ao I maku ba akea karabau, ao I karabaai.” E taku te Atua: “Antai ae tuangko ba akea karabaam? Ngaia ko kana uan te kai are I tuangko ba ko na aki kanna!” Ao e kangai te aomata: “Bon te aine: “Tera ae ko na karaoia?” Ao e taku te aine: “E mamanaai te naeta, ao I amarake.” E taku te Uea, ae te Atua nakon te naeta:
“Ngkai ko karaoa anne, ao ko na maraia i buakoia man ni manana ma man ni kakang ni kabaneia. Ko na aeae i aoni birotom ao ko na kangi tano ni katoabong n ua matem. N na karekea te kairiribai i marenam ma te aine, ao i marenan am kariki ma ana kariki. E na kamanatua atum, ao ko na tena bukini waena.”
Ao e arana te aine te aomata ba Ewa, ba bon tinaia akana maiu ni kabaneia.
Te Taramo 98:1-4
Kaekana: Neboa te Uea n ana makuri aika kamimi.
Anenea te Uea n te kuna ae bou, ba a kamimi ana makuri.
E karekea te tokanikai, ni makani baina ae tabu. K.
E kaota makana ni kamaiu te Uea.E kaota arona ae eti nakoia botanaomata,
E uringa ana tangira ma ana kakaonimaki, Nakon te utu ae Iteraera. K.
E bane aonaba, n nora ana kamaiu Atuara.
Takaruaia, aonaba ni bane, katang kunami ni kukurei. K.
Wareboki 2.
Warekan ana Reta Bauro nakoia I Ebeto. 1: 3-6, 11-12
E na karaoiroaki te Atua ae Taman ara Uea ae Iesu Kristo, are karaoiroira n taiani karaoiroi aika bain te tamnei, aika maiti aekaia, i nanoni Kristo. Ai ngaia are E rineira irouna, i maini karikan aonaba, ba ti na raoiroi n akea barekara i matana, i nanon te tangira. E motikira iai, mai maina, ba ti na natinaki irouna, i bukin Iesu Kristo. Ba bon oin nanona are E tangiria i bukin neboani mimitongin ana akoi, are E akoira iai iroun Teuare tatangiraki.
Ti kaokoroaki ma n rineaki mai maina, i nanona naba, n ai aron te baire are kamani motikaki iroun Teuare kaeti bai ni kabane ni ira oin nanona, ba ti aonga n onimakina Kristo mai maina, i bukin neboani mimitongina.
Alleluia, alleluia.
Ko na mauri, Maria ae ko oni n te karatia; E mena te Uea iroum, ko karaoiroaki i buakoia aine. Alleluia.
Euangkerio
Warekan ana Euangkerio Ruka. 1: 26-38
E kanakoaki te anera ae Kabiriera iroun te Atua nakoni kawani Kariraia ae arana Natareta, ba e na nakon te ataeinaine temanna, ae kainrouaki ma te aomata ae arana Ioteba, are kain ana utu Tawita. Ao aran te ataeinaine, Maria.
E kawaria te anera, ao e kangai nakoina: “Ko na mauri, ngkoe ae ko onrake n te karatia; E mena te Uea iroum; ko karaoiroaki i buakoia aine; ao e karaoiroaki uani birotom.” Ngke e ongo anne, ao e nako nanona, ao e taku n ana iango ba tera te kamauri anne. Ma e taku te anera nakoina: "Karaua nanom, Maria, ba ko akoaki iroun te Atua. Noria, ko nang kariki: ao ko na bungia natim te mane, ao ko na aranna ba Iesu. E na kakannato, ao E na atongaki ba Natin Teuare moan te Rietata; ao E na anganna ana kaintokanuea Tawita are tamana te Uea ae te Atua. E na uea i aon te utu ae Iakoba n aki toki, ao e na akea tokin ueana.”Ma e taku Maria nakon te anera: “E na iranaki ni karaoaki anne ngkai I aki ata te mane?” E kangai te anera nakoina: “Ane E na ruoniko te Tamnei ae Raoiroi, ao e na rabuniko makan Teuare moan te Rietata. Ai ngaia ae E na moaniba n raoiroi Natim, ao E na atongaki ba Natin te Atua. Ao ae e a karika naba natina te mane neire am bu ae Eritabeta ngkai e a unaine, ao ai ana kaonoua n namakaina aei neiere atongaki ni kanoabo; ba akea te bai ae aki konaki iroun te Atua.” Ao ngkanne e kangai Maria: “Ana toro te Uea ngai: e na karaoaki nakoiu n ai aron am taeka.”
Tibatiba: Ana toro te Uea ngai: E na karaoaki nakoiu n ai aron am taeka.
- Details
- Written by Uriam Timiti
Avenete Wiki 1 Kaabong
Warekan ana boki te Burabeti ae Itaia..26: 1-6
N te bong anne, ao e na aneneaki te kuna ae kangai n te aba ae Iuta:
Iai ara kawa ae korakora; E nonoia ma ni bonoia ba e na kawakinira. Kauki mataroa, ba e na rin te botanaomata ae raoiroi, ae kawakina te kakaonimaki, ae e teimatoa ana iango, ae titiku i nanon te raoi, ba e onimakiniko. Onimakina te Uea n aki toki, ba bon te Uea ae te Ba ae akea tokina; E karinanoia ake a maeka i eta n te kawa ae rietata; E kabakaia i aontano, E tewenakoia i buakon te tano ae toubekaki irouia akana mangori ma akana kainnano.
Te Taramo 118: 1, 8-9, 19-21, 25-27
Kaekana: E na karaoiroaki Teuae nakomai n aran te Uea.
Katituraora te Uea, ba E akoi, akea tokin ana tangira.
E raoiroi riki te muioko iroun te Uea, nakon onimakinan te aomata;
E raoiroi riki te muioko iroun te Uea, nakon onimakinaia akana maka. K
Kauki mataroan te raoiroi nakoiu, ao N na rin ma ni katituraoa te Uea.
Aei ana mataroa te Uea, a rin iai akana raoiroi.
I katituaraoiko ba Ko kaekaai, Ko riki ba au tia kamaiu. K.
Te Uea, karekea te kamaiu, Te Uea, karekea te tokanikai.
E na karaoiroaki n aran te Uea teuare nakomai. Ti karaoiroiko man uman te Uea;
Bon te Atua te Uea, bon otara. K.
Alleluia, alleluia.
Kanenea banam, kaota te rongorongo ae raoiroi: E nakomai te Uea ae Atuara ma te maka. Alleluia.
Euangkerio
Warekan ana Euangkerio Mataio…7: 21, 24-27
E kangai Iesu nakoia ana reirei: “E aki rin n te abanuea ae karawa te aomata ae kangai nakoiu: ‘Te Uea, te Uea!’ ma e na rini iai ane ira nanon Tamau are i karawa.
Te aomata nako ae ongo au taeka akanne ma ni iri nanoia, ao ai aron te aomata ae wanawana, ae katea ana auti i aon te ba. E baka te karau, e ranga nakon te ran, ao e oro te ang ni karea te auti, ma e aki baka, kioina ngke e kateaki i aon te ba. Ma ane ongo au taeka akanne n aki iri nanoia, ao ai aron te nanobaba are katea ana auti i aon te bike. E baka te karau, e ranga nako te ran, e oro te ang ni karea te auti, ao e baka, ao e kakaiaki bakana.”
Tibatiba: Onimakina te Uea n aki toki, ba bon te Uea ae te Ba ae akea tokina
Tariu ao maneu n te bong aio ao e kaotaki nakoira te bai ae na riki nakoira ba muin aron ara kekeiaki inanon maiura i aonteaba. E na rin n te Abanuea ae karawa te aomata ae kateitei iaon te baa e na aki kona n rin te aomata ae kateitei iaon te tano. Antai aika a na rin inanon te kawa ae Ierutrem ae Bou? Eng e bon kateretereaki nakoira n taian wareboki n te bong ba e na rin n te Abanuea ae Karawa te aomata ae raoiroi maiuina, ae kawakina te kakaonimaki; ae teimatoa ana iango; ae titiku inanon te raoiroi ba e onimakinika te Atua. Ngkana ti kateitei iaon te baa ae Iesu ao bon te bai ae ti kona n rotaki iai. E na kare te angibuka ao e na roko te nao ae matoa ma ti na bon aki kona n rotaki ibukin ba ti kateitei iaon Iesu. Inanon taian taramo n te bong aei ti neboa te Atua ni bai a na reke nakoira mairoun Iesu. A na bon akea kainnanou iroun Iesu ba E na tararuai n tai nako. E na kakamarakeai ao E na kawakinai man taiain kabuanibai ao E na katanai mairouia aiau. Eng e tauraoi nakoira n tai nako ana kamaiu te Atua inanon ana Taeka ae Maiu ae Iesu. Ma ti na ti kamaiuaki ngkana ti butimaea ana Taeka te Aua ao ti kawakinna. Eng ti na kawakinaki n te wanawana ba ti kateitei aion te baa n aki totoki ae bon Iesu.