Kanan Tamneira...
- Details
- Written by Uriam Timiti
Avenete Wiki 1 Kauabong Sto Anterea te Abotoro
Warekan ana Reta Bauro nakoia I Roma…10: 9-18
Ngkana ko kaotia ni wim ba te Uea Iesu, ao ngkana ko kakoaua i nanom ba E kautia te Atua mai buakoia mate, ao ko na kamaiuaki. Ba e karaoiroaki te aomata n te kakoaua ae i nanona, ao e kamaiuaki n te kaotioti ae i nanoni wina. Ba e kangai te koroboki: “Ane kakoaua, ao e na aki maneang.” Ai ngaia ae akea okoron te I Iutaia ma te I Erene, ba ti Temanna aia Uea, ae tituaraoi nakoia akana butia. Ba “ane wetea aran te Uea, ao e na kamaiuaki.”
Ma a na kanga ni wetea aran te Uea, ngkana a tuai ni kakoaua? A na kanga ni kakoauaa ngkana a tuai n ongo taekana? A na kanga n ongo taekana ngkana akea te tia taekinna? Ao antai te tia taekinna ngkana e aki kanakoaki? Ba e kangai te koroboki: “Ai tamaroa ra waeia tani uoti rongorongo aika raraoi!” Ma a aki bane ni ira nanon te Rongorongo ae Raoiroi. Ba e kangai Itaia: “Te Uea, antai ae kakoauai ara taeka?” Ma ngaia e e reke te onimaki man te ongora, ao e reke te ongora man ana taeka Kristo.
Ma I taku: Tao a tuai n ongo? A bon ongo, ba “A tangi banaia n tabo nako, ao a roko aia taeka i tabon aonaba.”
Te Taramo 18: 2-5
Kaekana: E buta aonaba n aia taeka.
E katanoata mimitongin te Atua karawa, E kaota muini baina tinanikuni karawa.
E karakina te ngaina nakon te ngaina, E kaota taekana te bong nakon te bong. K.
Tiaki te taeka, ao tiaki te taetae, ao akea te bana ae oti,
ma a roko banaia i tabon aonaba, a roko aia taeka n tian aon te aba. K.
Alleluia, alleluia.
E kangai te Uea: “Nakomai, irai, ao N na karaoi ngkami ba tan akawaia aomata.” Alleluia.
Euangkerio
Warekan ana Euangkerio Mataio. 4: 18-22
Ngke E nakonako Iesu i rairikin namani Kariraia, ao E noriia tari ake uoman, ba Timon are aranaki ba Betero ao Anterea are tarina. A tabe ni kabaka aia karaun, ba tan akawa ngaia. E taku nakoia: “Nakomai, irai, ao N na karaoingkami ba tan akawaia aoamta.” Ao a kitan naba aia karaun ao a iria.
Ngke E nako riki teutana, ao E manga noriia tari riki ake uoman, ba Iakobo are natin Tebetaio ao Ioane are tarina. A toka n te boti ma tamaia are Tebetaio, ao a tabe ni bonoti aia karaun. E weteia, ao a kitana naba aia boti ma tamaia, ao a iria.
Tibatiba: Ti karaoiroaki n te kakoaua inanora ao ti kamaiuaki n te kaotioti ae inanon wiira
Tariu ao maneu e roko te kamaiuaki iaon te aonnaba mairoun Iesu are ana Rikitemanna te Atua are kanakoaki nakon aonteaba ba E na uota ao n takaruaea te Rongorongo ae Raoiroi nakoia aoamata ni kabane ba aonga n ongo ao a na kamaiuaki akana a onimakinna ao ni maiuakinna.
N te moan wareboki man ana reta Bauro nakoia I Roma ao ti tuangaki ba ti na tatakaruaea ba te Uea Iesu ao ngkana ti kakoaua ba E kautaki Iesu iroun te Atua mai buakoia mate ao ti na kamaiuaki. Ma ti na kanga ni kamaiuaki ngkana ti aki wetea aran Iesu ao ti na kanga n ongo te Rongorongo ae Raoiroi ngkana akea ae kanakoaki ba e na takaruaea te Taeka? N tai aikai ao E boni kabonganaira Iesu ba ti na taetaekina te Rongongo ae Raoiroi nakoia aomata nako are nanona ngkanne ba a na riai n iai ibuakora ake a na tauraoi n anga nanoia ba a na riki ao a na kanakoaki iroun Iesu ba tan tataekina te Rongongo ae Raoiroi. Ba ngkana iai aika kanakoaki ba a na taekina te Taeka ao ngkanne ti na kona n ongo ao ti na kamaiuaki ngaira ake ti kakoaua inanora ao ti na manga tauraoi n taekina te Rongorongo ae Raoiroi nakoia tarira ma manera.
N reitaki ma ara katauraoi imain Kiritimati ao ti riai n rairi nanora ao ni kakoaua ba bon Iesu te Kristo boni Ngaia Uean aonnaba ao Natin te Atua ae roko ba E na kairira nakon te Tama ba ti aonga ni bane ni kamaiuaki. Ti riai ni manga kabuta nakoia aomata kakawakin te katauraoi inanora ba a na riki ba mwengan Iesu te Tei ngkana e bungiaki nakoira n te Kiritimati.
- Details
- Written by Uriam Timiti
Avenete Wiki 1 Moanibong
Warekan ana Boki te burabeti ae Itaia. 2: 1-5
Mini Itaia ae natin Amoti, n taekani Iua ma Ierutarem.
Ni bong aika na roko, ao e na kateaki maungan ana Temoboro te Uea i taberan taiani maunga, ao e na neboaki rake i aon taberani maunga. A na baroakinna botanaomata nako; a na roko iai botanaomata aika maiti, ao a na kangai: “Nakomai, ti na ararakea ana maunga te Uea, ti na nakon ana Temboro Atuani Iakoba, ao E na kaota kawaina nakoira, ao ti na toua nanona; ba e na nako mai Tion te Tua, ao ana taeka te Uea mai Ierutarem. E na tau taekaia botanaomata, E na motiki taekaia botanaomata aika maiti; a na riki aia kabang ba aia bai n ribana, ao aia kai ni buaka ba aia taaba n erere. E na aki manga buaka te botanaomata teuana nakon te botanaomata teuana e na akea riki te kataneiai nakon te buaka. Ana utu Iakoba, nakomai, ti na nakonako n otan te Uea.”
Te Taramo: 1-4, 8, 9
Kaekana: I kukurei n ongo ae kangai: “Ti na nakon uman te Uea.”
I kukurei n aia taeka ae kangai: “Ti na nakon uman te Atua.”
Ti a roko iai ba a tei waera, ni mataroani Ierutarem. K.
E tei Ierutarem ba te kawa, ae ti teuana rabatana;
A waerake iai baronga, aika ana baronga e Uea. K
I kangai: “Teraoi nakoimi!” i bukin tangiraia tariu ma raou.
I tataro ni bubuti kabaiam, i bukin tangiran uman te Uea ae Atuara. K
Alleluia, alleluia.
Nakomai ao kamaiuira, te Uea ae Ataura; Kaota matam, ao ti na maiu. Alleluia.
Warekan ana Euangkerio Mataio…8: 5-11
Ngke E rin Iesu i Kaberenaum, ao e nakoina temanna te mtaniwi ni bubua, ao e butia ni kangai: “Te Uea, e wene au tabonibai n au auti, ba e naakibaina ao e korakora marakina.” E taku Iesu nakoina: “N na nako ni kamaiua.” E kangai te mataniwi ni bubua nakoina: “Te Uea, I aki riai ba Ko na rin i an umau, ma ti teuana am taeka, ao a maiu naba au tabonibai. Ba boni iai naba au mataniwi ngai, ao iai tautia i aau; I kangai nakon temanna: ‘Nako’, ao e nako; I kangai nakon temanna: ‘Karaoa aei’, ao e karaoia.” Ngke E ongo Iesu, ao E mimi, ao E kangai nakoia ake a iria: “I kaotia ma te koaua, I tuai n nora te onimaki ae ai aron aei iroun temana i buakoia Iteraera. I bon tuangingkami, ba a na maiti akana na roko mai mainiku ao mai maeao, ao a na amarake ma Aberaam, ao Itaaka ao Iakoba n te abanue ae karawa.”
Tibatiba: I kukurei n ongo ae kangai: "Ti na nakon uman te Uea."
Bon Nanon te Atua ba E na tabekira man arora ni kananonga ngkai ti a tia ni kabuakakaki ba muin aia bure ara moani karo. Bon aio te kantaninga ba ti na bane ni ararakea te maunga ae Tion ba ti na bane n neboa te Atua n Umana ae Moan te Tabu. Ba iroun Natina ae Iesu are maraki mani mate iaon te kaibangaki obukira ao ti a tia ni bane ni karikaki ba nati ngaira aika tan baibai n te Abanuea ae Karawa. N aron ae kabotauaki ma te maunga ae Tion ao ti kaotaaki iai ba bon tiaki mwengara ni koaua te aonnaba aio ao ti bon aki karikaki ba ti na tautaekanaki ni bain aonteaba ma bon nnera n aki totoki bon Karawa. N te aonnaba aio ao ti riai n ataia ba ti na aganaki ara tai ae uarereke ni katauraoira nakon te maiu ae aki totoki irarikn te Atua. Are nanona ba ti na riai n aki kabanei nanora ni mataeiakina bain te maiu aei ao a na aki kabua mairoura te kabaia ae akea tokina I Karawa.
Ngaia are ti na riai ni bane n ongo ana baebaebati te tia areru n te bong ni kaota te bae ae rangini mataiakinna nanona n te maiu aio ba te kona n ararakea te maunga ae Tion ba ti aonga n neboa te Atua ao ni katonga kororaoin te kimareirei ae akea tokina I Karawa. Ti na moana ara katauraoi ni butimaea manga kauaokin Iesu inanon te maka ma te korakora inanon ara katauraoi ni butimaea Iesu te Merimeri ma nanora aika a itiaki mani tauraoi ni kaitibo ma Iesu inanon te kabaia ae akea tokina.
- Details
- Written by Uriam Timiti
Wiki 34 Kauabong.
Warekan ana Boki te burabeti ae Taniera. 2: 31-45
E taku Taniera nakon te uea ae Nebukaneta: “Te Uea, ko mi, ao ko nora te tamnei, ba te tamnei ae moan te raneanea: e tei i matam ao e kakamaku taraana. Atuna, bon te koora ae itiaki; babana ma baina, bon te tirewa; birotona ma rangana, te burati; waena ma taboniwaena, bon te biti makorona, ao te tano makorona. Ko tabe n taraia, ao e rebenako te atibu, n aki karenakoaki iroun te aomata, ao e oroi waen te tamnei, ao a maerikiriki, waena ake biti ma tano. Ao a uaia ni maerikiriki te biti, te tano, te burati, te tirewa ao te koora. Ai aroni mangen te uita i nanon te marae n tain te kabuebue, a ubaranako n te ang ao a aki noraki muia. Ao te atibu are orea te tamnei, e riki ba te maunga ae ababaki ao kaona aonaba ni kabanea. Bon anne te mi, ao ti na kaota nanona i matan te uea.
Boni ngkoe te uea, ae aia uea uea, ao ko anganaki iroun Atuani karawa te tautaeka, te maka, te korakora ao te mimitong. E anganiko naba natia aomata, manin aon te aba ao manini karawa n tabo nako ike a maeka iai, ba ko na tautaeka i aoia. Boni ngkoe te atu ae te koora. I muim ao e na teirake te abanuea teuana, ae na mangori riki nakoim; ao i muina, te abanuea teuana ae te katenua, ae te burati, ae na tautaeka i aonaba ni kabuta. E na iai te kaaua n abanuea, ae n matoatoa n ai aron te biti. N ai aron te biti ae ibei ma ni iki bai ni kabane, ao e na urui ma ni kamaei abanuea akekei ni kabane, n ai aron ana urubai te biti. Ko nori wae ma taboniwae, ake a renganaki iai te tano ni karao mangko ma te biti: bon te abanuea ae makoroua; iai i nanona matoatoan te biti, n ai aron are ko nora te biti ae renganaki ma te tano ae bokaboka. Ngkai a renganaki te biti ma te tano n taboniwae akanne, ao e na matoatoa makoron te abanuea anne, ao e na maraurau are te makorona. A na renganaki naba aomata, n ai aron are ko nora te biti n renganaki ma te tano, ma a na aki nim i boni irouia, n ai aron te biti ae aki bo ma te tano. N aia tai uea akanne, ao E na kateirakea te abanuea teuana Atuani karawa: bon te abanuea ae na aki ururuaki, ao e na aki nakon te botanaomata teuana. E na urui ma ni kamaunai abanuea akekei ni kabane, ao e na teimatoa ngaia n aki toki. N ai aron are ko nora te atibu are rebenako man te maunga, n aki karenakoaki iroun te aomata, ao e urua te biti, te burati, te tano, te tirewa ao te kora. E kaotia iai te Atua ae kakanato nakon te uea ba tera ae na riki rimui. E koaua te mi, ao e eti kabaran nanona.”
Te Taramo Taniera 3: 57-61
Kaekana: Karaoiroia, neboia n aki toki.
Ngkami ana makuri te Uea, Karaoiroa te Uea.
Ngkami ana anera te Uea, Karaoiroa te Uea.K
Ngkami ana karawa te Uea, Karaoiroa te Uea.
Ngkami ranin etani karawa, Karaoiroa te Uea?
Ngkami makan te Uea, Karaoiroa te Uea. K
Alleluia, Alleluia
Tantani, ao tauraoi, ba ko aki ata te tai ae E na roko iai Natin te aomata Alleluia.
Euangkerio.
Warekan ana Euangkerio Ruka. 21: 5 – 11
A taekina te temboro temangina ma katamaroana n taian atibu aika raraoi ma taiani karea. Ao E taku Iesu: “A na roko bong aika e na aki tiku iai te atibu teuana i aon te atibu teuana ni baika kam tarai akanne: a naba bane n uruaki.” Ao a titirakinna ni kangai: “E na roko ningai anne? ao tera te kanikina ae e na ataki iai rokona?” E kaekaia ni kangai: Noria ba kam na aki mamanaki ba a na bati aika a na riki n aatauman taku ba ‘Boni ngai!’ ke ‘E a kan te tai.’ Tai irarang irouia. Ngkana kam ongo taekan taiani buaka ma kiriwe, ao tai maku, ba a na bane ni kaoti moa baikanne, ma e tuai n roko naba te toki.” Ao E manga taku nakoia: “E na teirake te botanaomata teuana n eka nako te botanaomata teuana, ao te abanuea teuana. A na korakora rurun aon te aba, ao n tabo tabeua a na buti aoraki aika kamamate, ao a na kaoti taian rongo, a na noraki baika kakamaku ao kanikina aika ababaki i karawa.”.
Tibatiba: Tantani, ao tauraoi, ba ko aki ata te tai ae E na roko iai Natin te aomata
Tariu ao maneu ngkai ti a roko n tokin ana karenta te Ekaretia ao ti kauringaki ba ti a tabe n roko n tokin kawaira ao tokin te tai. N te bong aio ao ti kauringaki n te Alleluia ba ti riai n tantani ba ti aki ataa te tai ae na roko iai Natin te Aomata. Eng bon aio taekan manga rokon Iesu are e na roko inanon te maka ma te mmimitong ba E na motika taekan aonnaba. Aio te tai are a na motikaki iai taekara nakon te maiu ae akea tokina ke te mate mate ae akea tokina. Aio te tai are e nang toki iai ara tai ni kona ni bubutia te Atua ana nanoanga ma kabaran ara bure. Aio te tai tai are e a toki iai kakaean ana nanoanga te Atua iroun Natina ae Iesu.
Inanon te euangkerio ao e kaota aron te tai aio Iesu are a na bon akea te atibu teuana ae e na toka iaon te atibu teuana. Aio te tai are a na uruaki bai nako ake ti a tia ni mataiakin inanon maiura aio.
Ma ningai te tai ae na roko iai Iesu ke tera taian kanikina aika a kaota rokin te tai aio? Eng bon akea ana kamatata Iesu iaon rokon te toki ma bon iai kanikina aika e na kaotia ba e kan te tai. Ma ibukina ba akea ae kona n ata raoi te tai ae na manga roko iai Natin te Aoamata ao te bai ae kakawaki iroura ba ti riai n tantani ke ti riai n tauraoi n tai nako. Tiai n aki matu ma ti na taratara ba ngkana E roko Iesu ao ti na tauraoi ni butimaea ma baan ara taura are bon taian raoiroi aika ti kakaraoi n aron ana kantaninga te Atua.
- Details
- Written by Uriam Timiti
Wiki 34 Kanimabong
Warekan ana Boki te burabeti ae Taniera. 7: 2-14
E taetae Taniera ni kangai: “I mataku n te mi, ni bong, A katakarebua marawa ae ababaki angini karawa ake aua. Ao a aerake mai tari man ake aman ake totoa, ake a kakaokoro taraaia. Te moa ni man, ai aron te raian, ao iai baina ni kiba, aika bain te ikare. I tarataraia, ni karokoa a taekaki baina, ao e kateirakeaki mai aontano, ao e kateaki i aoni waena ake uai n ai aron te aomata, ao e anganaki te nano n aomata. Te man temanna, ae te kauoman, ai aron te bea, ao e tei i aon iterana ae te iterana, ao tenai te rinikaokao I nanoni wina; ao e kangai te taeka nakoina: ‘Teirake, kangai iriko ni kabatia.’ I muina, ao I taratara, ao I nora te man temanna ae ai aron te rebari, ao aai baini ni kiba i aon akuna, ao aua atun te man anne, ao e anganaki te tautaeka. I muin anne, ao I mataku n te mi ni bong, ao I nora te man temanna, ae te kaaman, ae kakamaku, ae tara n tiritiri, ao moan te korakora; wina boni biti aika moan te bubura; e kakangi bai ma ni kangkanti, ao e toubekai nikiraia ni waena. E kaokoro ma man ake i maina, ao tengauni korona. I tarai korona, ao akea ba e waerake te koro teaina I marenaia, ao a butaki korona ake tenai mai moana; ao iai mata i aon te koro arei, aika ai aroni matan te aomata, ao te wi ae taetae ni kanikatonga. I tabe ni mataku:
A kateaki kaintokanuea, ao e tekateka temanna te unimane. E mainaina kunnikaina n ai aron te tinoo, ao iranatuna, ai aron te buraentibu ae itiaki.
Ana kaintokanuea, bon uran te ai, ao nirana te ai ae uramaka. E ranga nako te ai I matana, Nga ni nga tani buokia, ao rebu n rebu tan tei i matana. E wakinaki te kabowi ao a kaukaki boki.
I taratara, ngke e karongoa ana taeka ni kanikatonga te koro arei, ni karokoa e a tiringaki te man, ao e kamateaki rabatana ma ni kabuokaki n te ai. E anaki naba te tautaeka mairouia man ake tabeman, ao a kaanauaki maiuia ni karokoa te tai ae baireaki.
I mataku n te mi ni bong. Ao akea ba e nakomai i aon mangini karawa ae ai aron te nati n aomata. E nako ni kawara teuare te Ikawai ao e kairaki nako matana. Ao e anganaki te maka, te neboaki ma te tautaeka, ao a bane n toro irouna botanaomata, aba ma taetae. Ana tautaeka, bon te tautaeka ae akea tokina, ae na aki bua, ao e na aki kamaunaki ueana.”
Te Taramo Taniera 3: 75-81
Kaekana: Karaoiroia, neboia n aki toki.
Ngkami maunga ma tabuki, Karaoiroa te Uea.
Ngkami aroka aika rikirake i aon te aba, Karaoiroa te Uea. K
Ngkami koburake n ran, Karaoiroa te Uea.
Ngkami marawa ma karanga, Karaoiroa te Uea. K
Manini marawa ma manin tari, Karaoiroa te Uea.
Ngkami nako, manini karawa, Karaoiroa te Uea.
Man ni bane aika kam kakang ke ni manana, Karaoiroa te Uea. K
Alleluia, alleluia.
Tantani ao tataro n tai nako, Ba kam aonga n tauraoi n tei i matan Natin te aomata. Alleluia.
Euangkerio
Warekan ana Euangkerio Ruka..21: 29 – 33
E taetae ni kaiknaki Iesu nakoia ana reirei ni kangai: “Tara te biku ma kai nako; ngkana a bwebwerake, ao kam noria ma n ataia iai ba e a kan te tai ni kabuebue. Ai aromi naba ngkana a kaoti baikanne, kam na ataia ba e a kaan Uean te Atua. I tuangingkami ae koaua: e na aki mauna te roro aei i maini kaotini baikanne ni kabane. A na mauna karawa ma aonaba, ma a na aki mauna au taeka.”
Tibatiba: Neboa te Atua, Karaoiroia n aki toki
- Details
- Written by Uriam Timiti
Wiki 34 Moanibong
Warekan ana Boki te Burabeti ae Taniera. 1: 1-6, 8-20
N ana kateniua n ririki n uea Ieoiakim, are ueani Iuta, ao e mananga Nebukaneta, are uean Baburon, ba e na buakana Ierutarem. Ao E kaburea Ieoiakim te Atua nako nanoni baina, ma bain nanon Uman te Atua tabeua; ao e uoti baikanne nakon te aba ae Tina, ao e karin i buakon ana bai atuana.
E tuatua te Uea nakon Atibenati, are mataniwia ana iunaki, ba e na kairia, mai buakoia natini Iteraera ake utu n uea ke n toka, ataeinimane aika akea waeaia, aika a raraoi taraaia, aika a koro wanawanaia, aika a kororaoi aia atatai, aika kona n tei i nanon ana bareti te uea; ao e na reireinia n aia koroboki ma aia taetae I Kareria. E katoa bong te uea n angania tibangaia man ana amarake te uea ao man nimana te uain. A na reireiaki inanon teniua te ririki, ao i muina a na tei i matan te uea. I buakoia ataeinimane akanne, ao iai ake tibuni Iuta, ba Taniera, Anania Mitiaera ao Ataria. E motika nanona Taniera ba e na aki kamaraea n ana amarake te uea ma nimana te uain; ao e butia mataniwia iunaki ba e na aki tebonna nako iai. E buoka Taniera te Atua, ba e na akoaki ma n nanoangaki irouni mataniwia Iunaki. E taku teuarei nakon Taniera: “I maka au toka ae te uea, ae a tia ni kataua kanami ma nimami: e kawa n noriko ba ko mata ni kananoanga riki I buakoia ataeinimane aika am roro, ao I kawa n tiringaki iroun te uea.” Iai te tia tei ae muiokoaki irouni mataniwia iunaki i bukin Taniera, Anania, Mitiaera ao Ataria. E taku Taniera nakoina: “I a butiko, ko na kataia am toro i nanon tebuina te bong: ko na anganira karara man te nne n aroka ao nimara te ran. Ko na tarai matara ma mataia ataeinimane aika kana ana amarake te uea, ao ko na bairei aroia am toro man am taratara.” E iri nanoia n te rongorongo anne, ao e kataia i nanon tebuina te bong. Ngke a koro tebuina te bong, ao e noriia ba a mataraoi riki riki ma ni marikarika riki nakoia ataeinimane ni kabaneia ake a kakana ana amarake te uea. I muin anne, ao e uouoti nako kanaia ma nimaia te uain te tia tei, ao e angangania amaraken te nne n aroka. A anganaki ataeinimane ake aman iroun te Atua te rabakau ma te atatai n taekan taiani koroboki ni kabane, ma te wanawana. Ao Taniera, e rabakau taekan taiani kaoti ma taiani mi n aekaia nako. Ngke a koro maitini bong ake e bairei te uea, ba a na kairaki iai nakoina, ao e kairiia teuare mataniwia iunaki nako matan te uea ae Nebukaneta. E taetae te uea ma ngaia, ao e aki reke I buakoia ni kabaneia temanna n ai aron Taniera, Anania, Mitiaera ao Ataria. Ma ngaia are a tei i matan te uea; ao ngkana e titirakinia te bai teuana n taekan te rabakau ke te wanawana, ao e noria ba tebuina rakan aia rabakau nakoia tan tabunea ma tani kaiwa ni kabaneia ake I aon abana n uea ni kabuta.
Te Taramo Taniera 3: 52-56
Kaekana: Ko na neboaki ma ni kamoamoaki n aki toki.
Ke karaoiroaki, te Uea, Ae Atuaia ara bakatibu. K
E na karaoiroaki aram ae kakanato. K
Ko karaoiroaki n umani mimitongim. K
Ko karaoiroaki i aoni kaintokan Ueam. K
Ko karaoiroaki, Ngke ae Ko nora nanoni marawa. K
Ko karaoiroaki i eta I karawa. K
Alleluia, alleluia.
Ko karaoiroaki, te Tama Ae Ueani karawa ma aonaba, Ba ko kaoti miterion te Abanuea nakoia ataei. Alleluia.
Euangkerio
Warekan ana Euangkerio Ruka. 21: 1 – 4
E tararake Iesu, ao E noriia aomata ake a kaubai ba a karin aia karea ni nnen te mane. E nora naba temanna te aine ae e mate buna, ae te kainnano, ba e anga uoua te maibibi, ao E taku: “I tuangi ngkami ae koaua: ba e ababaki riki ana karea neie e mate buna ae kainnano aei, nakoia akekei ni kabaneia. Ba a anga aia karea mai buakoni kaubaia, ao neiei, e anga mani kainnanona maiuna ni kabane.”
Tibatiba: Ti na anga ngaira ni kabane nakon te Uea ngkai E atia te Kristo n anga Ngaia ni kabane ibukira