Kanan Tamneira...
- Details
- Written by Uriam Timiti
Wiki 33 Kanimabong
Warekan te moa ni Boki ae taekaia Makabe..4: 36-37, 52-59
Ngke e a tae aia kai ana tanga Antiokuti irouia I Iutaia, ao a taku Iuta ma tarina: “A konaki ara kairiribai: ti na waerake ni kaitiaka Uman te Atua ma ni manga katabua.” Ao e bane te tanga n ararakea te maunga ae Tion. A uti maka n te karangaina, n te bong are te kauabui ma nimaua, n te ririki tebubua abui ma wanua, ao a anga te karea, n ai aron te tua, i aon te baonikare are a tiba kateia, n te tai ma te bong are e bainataeaki iai ngkoa irouia bekan; ao a manga katabua, n tangin anene, raea, abi ma timbara. A bane te koraki ni bobaraki ma ni katorobubua i aontano, ao a katituraoa te Atua are angania te tokanikai. A wakina katabuan te baonikarea i nanoni wanibong, ao anga karea ni kabuokaki, ma te kimareirei, ao karea ni katituraoi ma n nebonebo. A katamaroa matan te Temboro n taian bau aika koora, a manga karaoi kaman ma ru ake a uruaki, ao a karekei mataroaia. E bati ni kukurei te botanaomata, ao e mauna kamaemaeana irouia bekan. E motikia Iuta ma tarina, bao te koraki ni Iteraera ni bane, ba e na katoa ririki kauringani katabun te baonikarea, n taina, i nanoni wanibong, man te bong ae te kauabui ma nimaua, n te namakaina ae Itireu, ma te kabaia ao te kimareirei.
Te Taramo 1 Rongorongo 29:10-12
Kaekana: Te Atua ae Ko maka, ti neboa aram.
Ko na karaoiroaki, te Uea, ae Atuani Iteraera ae ara baktibu,
mangkoa ao n aki toki. K.
Te Uea, am bai te kakanato ma te maka, te raneanea, te tokanikai, ao te mimitong,
ao bai nako i karawa ao i aon te aba. K.
Te Uea, am bai te tautaeka, moan te rietata Ngkoe i aoni bai nako,
e nako mairoum te kakanato ma te maka. K.
Alleluia, alleluia.
Ierutarem, neboa te Uea: E kanakoa ana taeka nako aon te aba. Alleluia.
Euangkerio
Warekan ana Euangkerio Ruka…19: 45-48
E rin Iesu n te Temboro, ao E kakioia nako nake a kabobai iai, ao E kangai nakoia: “E koreaki ae kangai: ‘E na atongaki umau ba te Uma n tataro,’ ao ngkami kam karaoia ba bangaia tan ira!” Ao E katoa bong n reirei n te Temboro. A ukera angani kamateana mataniwia berebitero ma tani koroboki, ao ai aroia naba unimanen aonteaba. Ma a aki reke angaia, ba a bane aomata ni kan ongongora irouna.
Tibatiba: Ti na waerake ni kaitiaka Uman te Atua ma ni manga katabua
- Details
- Written by Uriam Timiti
Wiki 33 Kaabong
Warekan te moa ni Boki ae taekaia Makabe..2: 15-19
A roko i Morein, i bukin te angakarea, ana aomata te uea ake a tebonia Iteraera ba a na kaki aia Aro. A maiti Iteraera ake a kawaria, ma a tiku i boni irouia Matatia ma uake natina. A taetae ana aomata te uea nakoni Matatia ni kangai: “Bon te mataniwi ngkoe, ao bon te aomata ae kakanato n te kawa aei, ao iai tani buokiko ba natim ao tarim. Ma ngaia ae ko na nakomai moa, ao ira ana moti te uea, n ai aroia botanaomata nako, ao n ai aroia mataniwini Iuta ma uake a tiku i Ierutarem. Kam aonga n riki ba raraon te uea, ngkoe ma natim, ao kam na karineaki ma n anganaki te koora, te tirewa ao karea aika bati.” E kaeka Matatia n te bana ae korakora ni kangai: “Ngkana tao a bane botanaoma akana i an te uea ni ira nanona, ma ni kaki aia Aro aia bakatibu, ba a na ira nanon ana moti te uea, ao ngai ma natiu ao tariu, ti na kawakina aia berita ara bakatibu. Ke e kawakinira te Atua ba ti na aki kaki te Tua ma taiani baire. Ti na aki ongo iroun te uea; ti na aki raure ma ara Aro n te itera teuana ke teuana.” Ngke e moti ana taeka, ao e waki naba temanna te I Iutaia, i mataia aomata, ba e na angakarea i aon te baonikarea are i Morein, n ai aron ana moti te uea. Ngke e noria Matatia, ao e urarake nanona, ao e waerakeia te un ni ira tangan te Tua, ao e eweka te aomata arei ni kamatea i aon te baonikarea, ao e kabaka te baonikarea. E bane nanona ni ira tangan te Tua, n ai aroni Bineati ngkoa ngke e kaitara Timri ae natin Taru. E takarua Matatia n te bana ae korakora, ri nanon te kawa, ni kangai: “Ngkami ni bane aika kam nanona te Tua ma ni ira tangan te Berita, kam na irai.” Ao e birinako, ngaia ma natina, nakoni maunga, ao a katikui aia bai ni kabane i nanon te kawa.
A maiti ake a ukera te raoiroi ma te eti, ao a nako ni maeka i nanon te rereua.
Te Taramo 49: 1-2, 5-6, 14-15
Kaekana: E na kamaiuaki ane e eti arona.
E taetae te Uea ae Atuaia atua, Ni kaeka aon te aba
Man otin taai n ua bungina: E ota mai Tion ae koron te tamaroa. K.
“Bootia i matau au koraki, Aika berita ma ngai n te angakarea.”
Ke e kaota ana eti karawa, Ba bon te Atua te tia motikitaeka. K.
“Angan te Atua am karea ni katituaraoi, Kakoroa bukin am taeka ni bau nakoina.
Weteai n tain te rawawata: N na kamaiuko, ao ko na neboai.” K.
Alleluia, alleluia.
E raoiakina aonaba te Atua i nanoni Kristo, ao E anganira taekan te raoi. Alleluia.
Euangkerio
Warekan ana Euangkerio Ruka…19: 41-44
Ngke E a kan Iesu ma te kawa ae Ierutarem, ao ngke E noria, ao E tangi i aona, ao E kangai: “Ko bia ata kawain te raoi nakoim, ngke naba, n te bong aei! Ma ai kawa ra ngkai e raba mai matam! E na roko te tai are a na katobibiko iai am kairiribai n te marua ni buaka, ao a na otabaniniko ma ni kiariko mani itera nako. Ao a na toubekaiko, ngkoe ma natim aika i nanom, ao a na aki katuka te atibu teuana i aon teuana, kioina ngke ko aki ata am tai ni kawaraki.”
Tibatiba: E na kamaiuaki ane e eti arona
- Details
- Written by Uriam Timiti
Wiki 33 Kauabong
Warekan te kauoua ni boki ae taekaia Makabe.6: 18-31
Ngke a bainikirnaki Iteraera iroun te uea ae Antiokuti, ao iai te aomata ae arana Ereata, i buakoia tani koroboki ake a kakanato. E a boni mane, ao e mataraoi. E tebonaki ba e na kaurea wina ma ni kana te iriko ni beki. Ma e tangira riki te mate ae raoiroi nakon te kamarakaki, ao e bururua te amarake mai wina, n ai aron ae e riai irouia akana ninikoria n rawa n te amarake ae e tabuaki kanakina, i bukin tangiran te maiu. A kamani kina Ereata uake a muiokoaki n te amarake ni bekan ae tabuaki n te Tua. Ma ngaia are e kairia ni kaokoroa, ao a wiwinna ba e na kaoa te amarake are e katauaki kanakina, are e na katauraoia boni ngaia, ao e na bakaea te kana te iriko n ai aron ana moti te uea. E aonga n aki kamateaki, ao e na reke akoana: kioina ngke boni kaman raoraoia ngaia. Ma e motika nanona n te aro ae kakanato, ae boraoi ma arona n unimane ma maitin ana ririki ao iaian atuna, ao etirurun arona man ana tai n ataei, ao riki i bukin te baire ae raoiroi are kateaki iroun te Atua. Ma ngaia are e kaekai ma n tuangia ba a na kamatea n te tai naba arei. E kangai: “E bon aki tau ba ti na kekeweia aomata ngkana ti a roko n ara roro aei. A kawa n taku te roro n ataei ba e baka nakoni katei inanena Ereata, are ruabui ana ririki. A kawa ni mamanaki n au bure, ngkana I kewe i bukini kawakinan te nikira ni maiu ae ti teutana, ae N na karekea iai barekau ma kamamaeau ni kara. Ngke arona ba I kawakinai man aia karekekai aomata, ao I aorai ni maiu ke ni mate, ma N na aki tibanako ma bain te Atua. Ma ngaia ae I a kitana te maiu ngkai, ma te ninikoria, ao I karekea iai atongau ni kara. Ao I angania ataei te kakairi n te ninikoria, ngkai I mate n te raoiroi, n oin nanou ma te nanomaka, i bukin te tua aika kakanato ma ni kakawaki.”
Ngke e tia n atonga anne, ao e waki naba nakon te tabo ni kamaraki. A bitaki nanoia uake a kairia, man te akoi are mai maina nakon te kairiribai, i bukin ana taeka ake e atong, ba aongkoa taeka ni baba. Ngke e nangi mate, n ana tai n oreaki, ao e ngira ao e kangai: “E atai bai ni kabane te Atua; E ataia raoi ba I kona n rinea te aki mate; ao I namakina oreau ae rawawata, ae kamaraka rabatau. Ma I kataua ma te kabaia i nanou, i bukini makakin te Atua.” Bon anne arona ni kitana te maiu aei. E anga te bai ni kakairi i bukin te ninikoria, ao te kanuringa i bukin te raoiroi, tiaki ti nakoia ataei, ma bon nakon te botanaomata ni kabane.
Te Taramo 3: 2-7
Kaekana: E kawakinai te Uea.
Te Uea, ai maiti ra tani kamarakai, ma tani buakanai aika kaitaraai!
Ai maiti ra akana taekinai ni kangai: “Bon akea buokana iroun te Atua!” K.
Boni Ngkoe, te Uea, otangau ae rabunai, Kakanatou Ngkoe, Ko kaeta atuu.
I kanenea banau ni wetea te Uea, E kaekaai man ana maunga ae tabu. K.
I wene ngai ni matu, Ao I uti, ba E kawakinai te Uea.
I aki makuia nga n aomata, Aika kaitaraaai mani itera nako. K.
Alleluia, alleluia.
Am taeka, te Uea, bon te koaua; Katabuira i nanon te koaua. Allelui.
Euangkerio.
Warekan ana Euangkerio Ruka…19: 1-10
E nakonako Iesu n te kawa ae Ieriko. Ao e kaoti te aomata ae arana Takaio. Bon temanna te mataniwi irouia bubirikano, ao bon te kaubai. E tabe ni kan nora Iesu, ma e aki reke angana, ba e bati te koraki, ao e uarereke rabatana. Ma ngaia are e biririmoa, ao e tamarakea te kai ae te tikamoa, ba e na nora Iesu ngkana E rikekei. Ngke E roko Iesu n te tabo arei, ao E tararake, ao E taku: “Takaio, bareiko ruo, ba N na kawara am auti n te bong aei.” Ao e kawaetata n ruo, ao e butimaia ma te kukurei. Ngke a nora anne aomata, ao a bane ni winanti ni kangai: “E nako ni mena iroun te aomata ae buakaka!” Ma e tei Takaio, ao e taku nakon te Uea: “Te Uea, N na anga iteran au bai nakoia kainnano, ao ngkana iai au babakanikawai nakon temanna, ao N na kaoka ana bai ni kaaua maitina.” E kangai Iesu: “E roko te maiu n te auti aei n te bong aei, ba bon natin Aberaam naba teuaei. Ba E roko Natin te aomata ba E na ukera ma ni kamaiua ane bua.”
Tibatiba: E atai bai ni kabane te Atua….Ma I kataua te kamateaki ma te kabaia i nanou i bukini makakin te Atua.
- Details
- Written by Uriam Timiti
Wiki 33 Katenibong
Warekan te kauoua ni Boki ae taekaia Makabe…7: 1, 20-31
A kabureaki tari ake itiman, ma neiere tinaia. E tebonia ma n bubutia te uea ba a na kana te iriko ni beki, are tabuaki n te Tua; ao e oroia n te ueba ma te kai ni kataere.
Moan te kamimi aron tinaia, ao e riai ni kamoamoaki ma n ururingaki. Ba e noriia natina ake itiman ni mate n ti tebongina; ao e taona nanona iai ma te ninikoria, kioina ngke e onimakina te Atua. E kaungai nanoia, temanna i muin temanna, n aia taetae aia baktibu. E ninikoria te aine arei, ao e nanomaka n ai aron te mane; ao e kangai nakoia: “I aki atai aromi n riki i nanou; tiaki ngai are I angani ngkami te ikeike ma te maiu; ao tiaki ngai are I bairei aron rabatami. Bon te tia karika aonaba ae moa ni karaoa te aomata ma ni kariki bai ni kabane. E na nanoangai ngkami ni kaoka te ikeike ma te maiu nakoimi, ngkai kam kaki oin aromi i bukin tangiran ana tua.”
E taku Antiokuti ba e kakanikoaki ma ni kabuakakaki n taeka akanne. E tuai ni mate are te bina, ao e taetae te uea nakoina, n ana nanona; e taetae n tuea nakoina ba e na kabatia kaubaina ma kabaiana, ngkana e kaki aia katei ana bakatibu, ao e na riki ba raraona, ao e na karekea nakoana n te tautaeka. Ma e aki mutiakin ana taeka te uea ba e na ana nanon natina, ba e aonga ni maiu. Ngke e bati ana taeka nakoina, ao e kariaia neirei ba e na taetae nakon natina. E baraki nakon natina, ao e kakanikoa te uea n tiritiri, ao e taetae ni kangai n oin aia taetae: “Natiu, nanoangaai. I uouotiko i nanou ruaiua te namakaina; I kamammako tenua te ririki, ao I kaamarakeko ma ni kaikawaiko ni karokoa am tai aei. I a butiko, natiu tara karawa ma aonaba ma kanoaia nako. Uringnga ba bon te Atua are karaoi baikanne ni kabane man te akea, ao ai bon aroia naba aomata. Tai maka te tia tiritiri anne, kaboraoiko ma uake tarim; kariaia te mate, ba I aonga ni manga noriko n tain te nanoanga.” Ngke a bane ana taeka, ao e kangai naba natina: “Tera ae kam taningaia? I aki ira nanon ana moti te uea; I ira nanoni motin te Tua are a anganaki ara bakatibu irouni Mote. Ao ngkoe, ae ko karekei karawawataia Ebera, ko na aki tibanako ma bain te Atua.”
Te Taramo 16:1, 5-6, 8, 15
Kaekana: E na toki nanou ngkana I nora matam.
Te Uea, ongo te tang ae eti, Kakauongo au wewete.
Anga taningam nakon au tataro, Ba akea te kewe i nanoni wiu. K.
I tou muini manekam, E aki tibanako waeu.
I weteiko, Atuau, Ko na kaekaai: Tanimai, ongora n au taeka. K.
Karabaai n nun baim. Kaniwangan au raoiroi, ngai,
N na katoka nanou, n tara matam ngkana I a uti. K.
Alleluia, alleluia.
Butimaea te rongorongo aei, ae tiaki aia taeka aomata, ma bon ana taeka te Atua. Alleluia.
Euangkerio
Warekan ana Euangkerio Ruka..19: 11-28
Ngke a tabe n ongora aomata irouni Iesu, ao E taetae ni kaikonaki nakoia, ba a kani ma Ierutarem, ao a taku ba e nang kaoti Uean te Atua n te tai naba arei. E kangai: “Temanna ngkoa te aomata ae te toka. E nakon te aba ae raroa ba e na kaueaki, ao e na manga oki. E weteia moa ana tabonibai ake tengaun, ao e angania tebuina te baun; ao e taku nakoia: ‘Kam na karikirakei ni karokoa I a manga oki.’ Ma a riba te aomata arei kain ana kawa, ao a kanakoa te taeka n rimuina, ni kangai: ‘Ti aki tangiria ba ara uea.’Ngke e a oki teuarei ma nakoana n uea, ao e weteia ana tabonibai ake e angania te mane, ba e na nora rakana irouia nako. E roko temanna ao e taku: ‘Te uea, rakan am baun, tebuna riki te baun.’ E kangai nakoina: ‘E tamaroa, te tabonibai ae raoiroi ngkoe. Ngkai ko kakaonimaki n te bai ae uarereke, ao ko na tautaeka i aoni kawa aika tebuina.’ E roko te kauoman ao e taku: ‘Te uea, rakan am baun, nimaua riki te baun.’ E kangai nakoina: ‘Ngkoe naba, ko na tautaeka i aoni kawa aika nimaua.’ E manga roko temanna ao e taku: ‘Te uea, aei am baun ae I kawakinna n te kunnikai, ba I makuko, ba te aomata ngkoe ae ko unun: ko ana ae ko aki anga, ao ko taia ae ko aki unikia.’ Ao ngaia e kangai nakoina: ‘Te toro ae ko buakaka ngkoe: N na motika taekam n oin am taeka. Ko ataai ba I unun, ao I ana ae I aki anga ma n taia ae I aki unikia. Ao ko ti aki karina au mane ni karikirakea, ba N na anaia ma rakana ngkana I oki?’ Ao e taku nakoia aomata ake a mena ikekei: ‘Ana ana baun mairouna, ao angan teuare tebuina ana baun.’ Ma a kangai aomata: ‘Te uea, bon tebuina ana baun!’ I bon tuangingkami: ane iai ana bai, ao e na anganaki; ma ane akea ana bai, ao e na anaki naba ae iai irouna. Ao uake a ribaai n aki tangirai ba aia uea, kairia mai, ao kamateia i matau.’”
I muin ana taeka anne, ao E mananga n rimoaia ni waerake nako Ierutarem.
Tibatiba: E na toki nanou ngkana I nora matam
- Details
- Written by Uriam Timiti
Wiki 33 Moanibong
Warekan te moa ni Boki ae taekaia Makabe. 1: 10-15, 41-43, 54-57, 62-64
I buakoia uea ake a tautaeka i muin Arekantera, ao e riki temanna te aomata ae koron te buakaka, ba Antiokuti Ebibaniti, are natin te uea ae Anetiokuti. E tauaki moa I Roma ba te bure, ao imuina e riki ba te uea, n te ririki tebubua tenibui ma ruaiua, ae ririkin te abanuea n Erene.
N tai akekei, ao a kaoti mai buakoia Iteraera tani kakiriwe, ake a mamanaia aomata ake a maiti ni kangai: “Kaaraki, ti na kaboi nanora ma botanaomata ni bekan aika i rarikira nako, ba a bakarira rawawata aika bati mangke ti raure nako ma ngaia.” A kukurei n te taeka anne, ao a ienikuri kain aonteaba tabeman ni kawara te uea, ao e katauia te uea ba a na bain aia katei bekan. A katea aia marae n takakaro, ni kakairi irouia bekan; a karabai korotobibiaia; a kaki ana Berita te Atua; a toronia i an aia katei bekan, ao a anga ngaia ba a na karaoa ae buakaka. E katanoata ana moti te uea ae Antiokuti i aon abana n uea ni kabanea, ba a na bane n riki ba te botanaoamta ae ti teuana, ao a na kaki aia katei nako. A bane bekan ni ira nanon ana moti te uea. A maiti naba Iteraera ake a butimaea ana Aro te uea, ma n taromauri boua ma ni kaki taekan te tabati. N te bong are te katebui ma nimaua, n te namakain ae Kitireu, n te ririki tebubua abui ma nimaua, ao e katea te baere koron te Riribaki te uea i aon te baonikarea.
A kateaki baonikarea i nanoni kawani Iuta aika katobibia Ierutarem. E kabuokaki te ribano ni mataroan auti ao i nanoni kawain te kawa. Bokin te Tua ake a kuneaki, a bane n raereaki ma n tewenakoaki n te ai. Te aomata are e noraki bokin te Berita irouna, ke te aomata are ira nanon te Tua, ao e kamateaki, n ana moti te uea.
Ma a teimatoa Iteraera ake a maiti, ao e reke korakoraia n aki kana te amarake ae kamara. A tangira riki te mate nakon te bure n te amarake ao nakon te riaon ana Berita te Atua. Ao a boni mate. Bon te un ae korakora are bakaria Iteraera.
Te Taramo 118: 53, 61, 134, 150, 155, 158
Kaekana: Buokai, te Uea, ni kawakin am tua.
E rotai te un ngkana I noria akana buakaka, aika kaki am Tua.
A rabunai aia kamane tani ioawa, ma I aki manuokina am Tua. K.
Kamaiuai man aia ioawa aomata, Ao N na kawakin am moti.
A nakomai tani bainikirinai aika buakaka, A raroa nako am Tua. K.
E raroa te kamaiu ma akana ioawa, Ba a aki mutiakin am moti.
E maraki nanou irouia tani kewe, Ba a aki kawakina am taeka. K.
Alleluia, alleluia.
Kaurei matau, te Uea, Ao N na nori kamimi aika muin am tua. Alleluia.
Euangkerio
Warekan ana Euangkerio Ruka. 18: 35-43
Ngke E a kani ma Ieriko Iesu, ao e tekateka temanna te mataki i rarikin te kawai, ni bubuti kanana. E ongo nakonakon te koraki, ao e titiraki ba tera. Ao e kaongoaki ba boni Iesu ae te I Natareta are toua te kawai. Ao e takarua ni kangai: “Iesu ae natin Tawita, nanoangaai.” A tiringnga uake a rimoa ba e na aki karongoa. Ma e a tiba takarua riki ni kangai: “Natin Tawita, nanoangaai.” E tei Iesu, ao E tua ba e na kairaki nakoina. Ngke e roko, ao E titirakinna ni kangai: “Tera ae ko tangiria ba N na karaoia nakoim?” E taku teuarei: “Te Uea, I bia noraba.” E taku Iesu nakoina: “Ko na noraba, e a kamaiuko am onimaki.” Ao e noraba naba. Ao e ira nako Iesu ma n neboa te Atua. Ao a bane ni kamoamoa te Atua aomata ake a nora anne.
Tibatiba: Te Uea I kan noraba
Tariu ao maneu ai te kauoua n tai aio ae ti ongora iai n te Euangkerio aio ae taekan te mataki are kan kamaiuaki ba e mataki ao ngke e ongo ba e rikekei Iesu ao e takarua “Iesu ae natin Tawita, Ko na nanoangai” Ao ngke E kawatia Iesu man titirakinna ba tera ae na ibukina ao e taku te mataki;” I kan noraba” E kaeka Iesu ao E kangai:’Ko na noraba, E a kamaiuko am onimaki”.
Tariu ao maneu tera raoi nanon te noraba are anganaki te mataki. E kamatata te Euangkerio ni kaota te bai ae riki nakon te mataki imuon kamaiuakina ba e ira Iesu man neboa te Atua ao a bane aomata ake a nora anne ni kamoamoa te Atua. Eng te bai ae ti tuangaki ikai ba inanon maiura aio ao nanon te noraba ae ti riai ni karekea man te karaki aio bon te kona n nora otan Iesu are e na kaita te kawai ae ti riai n toua n ririmuin Iesu. Te noraba inanon maiura aio bon te tauraoi ni kakeaiara i bin iroura, n tabeka ara kaibangaki ao n irira Iesu ni katoa. Tariu ao maneu bon aio ana kantaninga te Atua ibukira ngaira aika ti noraba ba ti na irira Iesu. Ao ti nora kawaira ngkana ti nora te kawai ae toua Iesu ao ti iriria. Kaniwangara ngkana ti irira Iesu n te maiu aei bon te kona ao n n itaramata ma Ngaia te maiu ae na roko. Aio are bon te kabanea ni kakawaki ao ni kakannato ni kaniwanga ae tauraoi ibukira ba te kona n nora matan Iesu ao te maiu ma Ngaia inanon te kabaia ao te mimitong ae akea tokina . Ma te bai ae riki teuana ae ti kakoaua ngkana ti rin n Abanuean te Atua bon te kaitiakaki n raran ae moan te tabu ,am ara bure nako ao aio e na reke nakoia akana a uouota te kaibangaki are tauraki iaona Iesu ao are e ikoaki iaon te kaibangaki ni kawawaea Rarana ae maon te tabu ba ti aonga ni kaitiakaki man ara bure.
Aio bon aron kabarabarakia te koraki ake a tei imatan Iesu ake a kan mora matan te Atua ao a tia ni kaitikaki aia kunikai n raran Iesu are tine ni maraki iaon te kaibangaki.