Kanan Tamneira...
- Details
- Written by Uriam Timiti
Tariu ao maneu , ko ataia ba ai te ka iraua ngkai ni bong ni karemo ao ko ataia ba iraua maitin te bong ni karemo ni kabane? Ai bon te ka-18 ngkai ni baong ni karemo ao bon 40 te bong maitini bongin te karemo. I taku ngai ba a rangi ni kakawaki titiraki aikai nakoira ba a na kaota aron tabera ao ukin nanora nakon te Uea ni kaeka ana wewete nakoira n tain te karemo ao n okirikaki Nakoina ma nanora ni kabane ao ni kabatiai riki ara kekeiaki ni karaoa te raoiroi. Tariu ao maneu bon au bubuti nakoim ae mangori ba ngkana ko aki ataia ba ko mena ia ngkai n tain te karemo ao ngkana ko tuai ni moana am karemo ao teirake ao ongo banan Iesu ni wewete nakoim ba ko raira nanom ao ko na nanomaraki ao motika nanom n te tai naba aio ni kangai; "N na teirake n okira Tamau ao Nna kangai nakoina ba I bure i matam, kabarai au bure ao nanoangai." Uringa ba ngkana ko okira Tamam n te bong aio ao tera ae na karaoia nakoim? E na bon aki tauraoi ni bauraniko ao ni kataetaeko ibukin am bure aika ko a tia ni karaoi. Ma te bai ae ko na noria ba ngke iaon kawaim n oki ao ko a moanna ni kaan ma te Tama, ao ko a noria naba ba e kaman tei n tataningaiko ao ngke E moan noriko ao e a biri naba ba E na butimaiko. E na maninga ni kabane te kairua ake ko a tia ni karaoia ao e na ti onrake nanona n te kukurei ngkai ko a oki ba ko a manga MAIU, ngke ko a tia ngkoa ni mate.
Bon au tataro ma ngkami tariu ao maneu ba ti na kona n namakina nanon te Atua aio ibukira inanon tain te karemo ba E tangiria ba ti na Maiu ao ti na aki mate. N te bong aio inanon taian wareboki ao E tangiria te Uea ba ti na nora aron kananoangara ngkana ti maiu inanon te bure ao ti raroanako ma Ngaia- ba ti na mate kanga aiaron te aroka ae bewerake inanon te rereua are kai rotaki n te kabuebue ao e na bon aki kona ni karekea te maiu ibukina ba e raroanako wakana ma te ran. E tangiria Iesu n te bong aio ba ti na nora aron kabaira ao tekeraoira ngkana ti rairi nanora ao ti iriria- ti na riki ba aiaron te aroka are bewerake irarikin te karanga are na maiu reirei ao ni kariki ua ibukina ba e kaan wakana ma te ran. E na bon aki kona n rotaki n te kabuebue ibukina e mena irarikin te Maiu are bon Iesu.
Inanon kororaoin ana nanoanga Iesu ibukira ao E a manga anganira riki te tamnei teuana ae ti kona n nora iai tekeraoira ma kabaiara ao kananoangara inanon karakin Rataro ao te kaubai. Bon nanon Iesu inanon te karaki aio ba ti na aki manga nanououa n taekan te kamaiuaki ma ti na kakoaua. Ti riai ni kauki nanora n ongo te rongorongo aio ba ti aonga ni karekea te kamaiuaki ngkai e kona n reke ao ngkai e angaraoi. Ba ti aki ata te tai ae ti na weteaki iai ao a na motikaki iai taekara. Ngkana ti aki kakoaua ngkai ao ti na riki n aiaron te kaubai are bubuti buokana ngke e a mate ao e tuataua ba a na kaongoaki kain ana auti taekan te mate ao mone. Man karakinan Rataro ao te kaubai ao ti kauringaki naba arora ae ti kona ni karekea iai te kamaiuiki – ba bon te kona n noriia raora aika kainanno ao aika a bara nanoia n te maiu aio ao te tauraoi n angania te amarake ke te tangira ao te ibuobuoki . A na motikaki taekara n te aro ae rawawata ngkana ti aki tauraoi ni karaoa te makuri n nanoanga man tangira nakoia ake ti noriia ba a kainnanoa ara ibuobuoki ma ara tangira. Are nanona ba inanon te karemo aio ao ti riai ni keiakina mutiakinan te raoiroi are ti riai ni karaoia. Ba ngkana ti karaoa te raoiroi ae ti riai ni karaoia ao ti na riki ngkanne ba taan anga te Maiu nakoia tarira ma manera.
- Details
- Written by Uriam Timiti
Inanon maiura aio ao bon iai ana kantaninga Tamara ae te Atua ibukira ni kabane; ba ti na maeka ma ngaia i Karawa inanon te kabaia ae akea tokina. Ti na irira kawain Iesu i aonteaba n ongongora n ana reirei ao nori taian kakai aika e karaoi ao ti na kaitibo naba ma tarira ma manera ake raora n irira Iesu. Ma inanon ara tai ao ti na bon roko n te tabo teuana are na kangai iai Iesu nakoira; "Ti a bane n nako Ierutarem".
Tariu ao maneu tera otam n ana wewete Iesu aio nakoira? Iai kunara ngaira kain te charismatic ae ti rangi tatangiria are kangai, "Ti na bane n nora i eta Ierutarem ae ngkai naba" ao ngai e bon rangi n teteke nanou ni manewena ao nte tamnei ae anganai ni katoa te tai ae I a aneneia iai. Ba e kaota nakoiu tamnein te kaniwanga ae katauraoia te Uea ibukiu are bon te kabaia n aki toki ma Ngaia i Karawa. Te tabo are e na manga akea iai te tanga ao te maraki ao te mate ma ai bon ti te kukukurei naba iai n tai nako ba ti nora iai matan te Atua ao n neneboia n aki toki.
Ma inanon maiura aio ao e koaua ba ti na bon ira Iesu nako Iesrutarem. Iroun Iesu ao nanon te nako Ierutarem bon kakoroan bukin rokona iaon te aba are na maraki mani mate ibukira ao ni kaboira n rarana ae moan te tabu ba ti aonga ni maiu n aki toki. Te nako Ierutarem bon te tauraoi n rinanon te maraki ma Iesu n kawario ba ti aonga ni kamaiuaki. E kaotia ikai Iesu ba te kamaiuaki ibukira ni kabane e na ti reke iroura ngkana ti tauraoi n rinanon te maraki ma Iesu ke ti tauraoi n toua kawain te kaibangaki. Akea riki kawain te kamaiuaki ba bon ti te kaibangaki. Mai iai te kantaninga ae ti anganaki inanon tain te karemo ba ti na maraki ma Iesu inanon te wiki ae tabu inanon te maan ae teuana te wiki ao ngkanne tin a manga raona naba Iesu ni mangauti ma Ngaia nakon te mimitong ao ti na bane n riki ngaira ba taian karikibai aika bou inanon te tamnei. Ngaia are ti a bane ni katauraoira ni kabane ao ti a mananga ma Iesu nako Ierutarem.
- Details
- Written by Uriam Timiti
Bon nanon te Tama ba ti na kororaoi n taai nako ao ni baai ni kabane ba ti aonga ni katotonga ao ni karekea te maiu ae aki totoki. Ngkana ti karaua ni iangoia ba tera raoi anuan te Atua ae ti kona ni kabarabara iai ao bon aikai ara taeka ae ti kona ni kabonganai;"Ba e onrake n te nanoanga te Atua, ma te atataiaomata ao te akoi." Bon nanon te Uea ba ti na maiu ma Ngaia inanon te kabaia ae akea tokina ao e aki tangiria ba ti na mate n aki totoki.
Bon aio ngkanne te bai ae ti riai n noria n te tai aio ao riki inanon tain te karemo ba bon te tai ae ti anganaki ba ti na kona kamaiuaki iai. Ao te kamaiuaki aio e na bon reke ngkana ti kauki nanora n ongo a wewete te Uea ba ti na okirikaki Nakoina ma nanora ni kabane. Ti kona n noria ngkanne ba ana Nanoanga te Atua bon te bai ae tauraoi ibukira ni kabane ao e na ti reke iroura ngkana ti onimaki ao ni kakoaua ba e kororaoi ana Nanoanga ma ana Tangira te Atua ibukira. Ba ana Nanoanga te Atua kanga aiaron marawa are ti beibeiti inanona ngkana ti betinako. Ngkana ti tara buburan marawa ae ti aki kona n nora tokina ao ti na kona n ota iai n ana Nanoanga te Atua ae tauraoi ibukira n taai nako.
Ba e kanga raoi aron ana Nanoanga te Atua ibukira? Eng, tariu ao maneu e anganira te Atua te kanikina teuana ae ti na kona iai n ota n ana Nanonaga ibukira, ao aei bon te kaibangaki. Bon te Kaibangaki ae ngaia kaota makan ana nanoanga ao ana kamaiu te Atua ibukira. Ba inanon te kaibangaki ao ti kakoaua iai aron Iesu n anai ao ni katokai rawawatan au bure ni kabane iaona ao n tauraoi n riki ba te tia bure ibukiu ao anaai ni kabane kain au bure. Inanon te kaibangaki ao ti nora iai ana anganano ae kororaoi Iesu ba E na maraki ao ni mate ibukin ara bure. Aio bon te angakarea are kauka nakoira te maiu ngkai ti a manga kaiokaki ma te Tama.
Tariu ao maneu ai rabara kororaoin ana Nanoanga Iesu ibukira. Ti kauringaki n te bong aio ba ti na karimoa n taai nako ana Nanoanga te Atua n arora nakoia tarira ma manera. Ti na kabarai aia bure ao ti na tangiria ara kairiribai; ti na buokiia akana a kainnano ao ti na kaota ana Nanoanga te Atua nakoia aomata nako. Weteara nakon maiuakinan te nanoanga iroun te Atua bon tiaki te bai ti inaomata iai ni kaeka ba "eng" ke "tiaki" ma aio bon te kairoro nakoira ba te bai ti riai ni karaoia ba ti aonga ni kamaiuaki inanon tain te karemo aio. Bon aio te kawai nakon te inaomata ni koaua ao te maiu ni kimareirei ma Iesu.
- Details
- Written by Uriam Timiti
Ti kauringaki ni moan te karemo aio ba ngkana ti aki mamatam ke ti tataro ke ti angabai nakoia aika kainnano ao ti riai ni karaoi makuri aikai n te aro ae raba ba ti aonga ni karekea kaniwangara iai mairoun te Atua. Aio bon te wewete ae kakawaki nakoira inanon tain te karemo aio ba ti na kaitiakii raoi nanora ao ni karaoi ara makuri aika a raraoi n te aro ae raba ba a na akea riki ae na noria ma bon ti te Atua. Are nanona ngkanne ba ti na riai ni karaoi ara makuri n tangira ibukina ti na kakukureia iai nanon te Uea ao tiaki ibukina ba ti na atongaki iai irouia aomata. Tariu ao maneu bon aio teuana te kawai ae kona ni kamaneira iai te riaboro ba ti na karaoi baai aika a na kakukureia raora ao ti aki ibukina ba ti ataia ba e boraoi ma nanon te Atua. N tabetai ao ti tangiria ba ti na ataaki ngkana iai te makuri are raoiroi ae ti karaoia ao n tabetai ti kairaki n ara makuri man taraan nanoia aomata. Karekean te itiaki n te nano bon te karimoa te Uea ni baai ni kabane aika ti karaoi ao te kakoaua n taai nako ba te bai ae ti karaoia e botau ma nanon te Uea. Are nanona ba e na riai n riki Nanon te Atua ba kairara inanon baai aika ti na karaoi. Ngkana ti kataua te Uea ba e na tautaeka iaon maiura ao ngkanne ti na namakina te aro ni inaomata ae kororaoi ni kataua te Tamnei ae Raoiroi ba E na kairira inanon maiura n taai nako. Ti riai n riki ba taan tei ibukin te koaua ao te eti ao n aki kataua te kairua ba e na tokanikai. N te aro aio ao ti na kona n nora materaoin ara karemo ngkai ti kaikoi raoiroi n nanora ake a na karekea nakoira te kabaia ae akea tokina.
- Details
- Written by Uriam Timiti
E bia reke te karemo aio ba ara tai n airi ma Iesu ba ti aonga n rin ma Ngaia nakon nanon te Maiu ae Onraken te Maiu i Karawa. Ti reitira ma ana tataro te tia taramo n te bong aio ni miakina te kaniwanga ae katauraoia te Uea ba te kabaia ae tokina. Inanon kawaira n tain te karemo ao ti riai ni baina te onimaki ao te kakoaua are aiaron ae ti noria iroun Aberaam. Ba tera te onimaki? I bon irou ao I taku ba te onimaki bon te tauraoi ni muiokoi taekara ma arora ni kabane iroun te Atua ba Ngaia ae E na tararuaira ao ni kawakinira riki inanon tain te kabuanibai. Ti nora aron kororaoin ana onimaki Aberaam ngke e tuangaki ba e na nako Moria ni kareana iai natina ae ana rikitemanna nakon te Atua. Bon akea te nanouoa iroun Aberaam ao e akakoaua ba inanon ana kaetieti te Atua nakoina aio ao e bon teimatoa kororaoin ana tangira te Atua e ngae ngke e ataia Aberaam ba e nang kamatea natina ae Itaaka.
Ma iai te bai ae ti noria ae reke iroun Aberaam ba kaniwangan ana onimaki. E bon anganaki Aberaam te karaoiroaki ae moan te bati ba e na reke ana kariki ae aekan maitin itoin karawa ke maitin tanon te bike. Are nanona ba ti kamatoaki nakon ana karaoiroi te Atua man ara onimaki. Inanon te berita n akoi ae bou ao ti a kaongoaki iai ba ti kaboaki nakon te aro ni kamaiuaki inanon Iesu ae ana Riki Temanna te Atua are tiringaki man tauraki iaon te kaibangaki ibukin ara bure ba ti aonga ni kona n nakonako i matan te Atua I abaia akana a maiu.
A riai ni kamatoaki ara onimaki iaon ana berita n akoi te Atua nakon te Maiu ae aki totoki ba E a tia ni kaotia iroun Natina ae Iesu are onikaki tarana n te maunga are Tabora ao e a noraki iai mimitongina n Atua. Betero, Joane ao Iakobo ake ngaia Abotoro ao taan irira Iesu a bon onrake n te kimareirei ae moan te bati ao a kan tiku i taubukin te maunga ao n rawa n ruo. Ti noria naba ba ike e mena iai te Atua ao ai bon katongan naba Karawa ikai i aonteaba. Ma ike akea iai te Uea ao e na bon reke iai te kiriue ma ikakaiwi ao te aki rau.
Bon iai te tamnei ae kamimi ae anganira te Uea inanon taian wareboki n te Tabati aei ba ti moan karekea ana karaoiroi te Atua inanon ana onimaki Aberaam are tauraoi n tiringa natina ae Itaaka ba te karea nakon te Atua. Ma ngkai ti a anganaki te maiu ae totoki iroun Iesu are ana Rikitemammana te Atua are kareanaki ibukira iaon te Kaibangaki. Ti a kabaia ngaira taan mangana ma Iesu n tain te karemo aio ba ti na karekea te kaniwnaga man marakin ao maten Iesu iaon te Kaibangaki ibukin kabaran ara bure ba ti aonga n nakonako n te taina imatan te Uea i abaia akana maiu.