Kanan Tamneira...
- Details
- Written by Uriam Timiti
Inanon tain te karemo ao e bon riai ba ti na kaboui maiura ao ti na tauraoi ni kaburei maiura nakon te Uea. Ba e na riki te karemo ba te tai ae ti na karikirakea iai aron ara reitaki ma te Atua ni karokoa nakon are E tangiria ba ti na kaburei maiura Nakoina. Ba ti na karaoa ara anganano n te bong aio ba e na riki te Atua ba ara Uea n ti Ngaia ao ngaira ti na riki ba ana botanaomata te Atua. Ba e na reke ara reitaki ma te Atua ba kakoauan ara Berita n tangira ma te Atua n aron te berita are E karaoia ngkoa ma te nati n Iteraera rinanon Moote.
Ma inanon kawakinan ao kateimatoan maiura n reitaki ma te Atua ao ti manga kauringaki n te bong aio arora ae ti na karaoia. E kangai Iesu, “Kam a tia n tuangaki ngkoa ba kam na tangiria raomi ao n ribaia ami kairiribai. Ma ngai I kangai nakomi – tangiria ami kairiribai ao tataro ibukia akana bainikirini ngkami.” Ngkana ti karaoa aio ao ti na riki ba natin te Atua are i Karawa are E anga otan taai nakoia akana raoiroi ma akana buakaka ao ai arona naba ma te karau are e angania aomata ni kabane. Ma inanon te karemo aio ao ti a manga tuangaki ba ti na aki toki n tataro ibukia ara kairiribai ba na rairi nanoia ao ti na kaota te katoto nakoia ni maiura ba a na kairaki nakon te raoiroi. Ti na kaitara uniia ma te nimamannei, ao aia iowawa ma te nanorinano. Ti na kaitara aia taetae n aki akaka ma te tataro ao aia kairua ma te matoatoa inanon te onimaki. Ba inanon arora aika raraoi nakoia ao ti kaotia iai ba bon ngaiia raora ni koaua. Ba karaoan aio ao ti riki iai ba katotongan Iesu are E rinanon te maraki ma te kamaemaeaki ao te bainikirinaki n akea te kabomui irouna ma n tokina ao E butia Tamana ba E na kabarai aia bure tani bainikirinna ba aki ata te bai ae a karaoia. Ngkana ti karaoa te raoiroi nakoia ara kairiribai n tataro ibukia ao ni kaota te nimamannei ao te taotaonannano ao ti na bon teimatoa ngkanne ni maiu inanon Iesu Kristo. Ao ti na uaia n rinnako ma Iesu inanon te maiu ae onraken te maiu. Ba bon akea te maiu ae na reke ngkana ti maiu ni maenako ma Iesu. Ba e bon aki tau ae ti na ti taetaekina ao ni kaotiota ara onimaki ma e riai ba ti kakoaua n ara makuri ao n arora n tangiriia ara kairiribai.
- Details
- Written by Uriam Timiti
Tariu ao maneu ti kauringaki ni moan te karemo aio ba ti riai n urui nanora ao tiaki ana kunikai are nanona ba te karemo bon te tai are ti na kaitiakii iai nanora. Ti kauringaki naba ba ngkana ti aki mamatam ao ti naki kaotia nakoia aomata ae ti aki mamatam. Ba e kakawaki riki are inanora.
Akea ba ti roko ngkai n ara ka-10 ni bong ni karemo ao ti karaba te Atua n ana kakorakora ma ana kakawakin nakoira mai i moan ara karemo ni karokoa te bong aio. Ni bong aika nako ao ti taekini arora ni karemo aika a botau ma Nanon te Atua, are bon karaoan taini makuri n nanoanga man tangira nakoia tarira ma manera, riki nakoia ake a kainnano ao a kananoanga. Ba e kakawaki riki karaoan te makuri ae raoiroi ni katotonga iai Iesu nakon kawakinan te Tua. Ma n te bong aio ao e reita reireira Iesu n arora ni karemo n tuangira ba ti riai ni kabarai aia bure tarira ma manera ao riki ara kairiribai. Ao ngkana ti kabarai aia bure aomata ao ti riai ni kabarai ni kabane ao n aki katuka teutana. N ana kaikonaki Iesu ao e taku ba ti riai ni kabaka boon baera nakoia raora ni kababanea ba muina ti kabureaki. Are nanona irou ba ngkana ti tangiria ba e na kabarai ara bure Iesu ni kabane ao e na ti kona n reke aio ngkana ti tauraoi ni kabarai aia bure aomata ni kababanea. Ti kauringaki naba ba ngkana ti kan angkarea nakon Tamara ao ngkana ti ataia ba ti bobuka ma raora ao ngkanne e bon riai ba ti na katiku moa ara karea ao ti na oki ni kaiokira ma tarira ke manera ao imuina ti a tiba okira te Tama ma ara karea.
Tariu ao maneu iai riki te rongorongo ae kakawaki nakoira n te bong aio ba ngkana ti nakon te Atua ma te nanomaraki ni butia kabaran ara bure ao te bai ae na riki ba ti anganaki te maiu ae boou ao a bane ni mauna arora ni buakaka ake rimoa. Ma ngkana ti a tia ni maiu ni kekeiaki mai maina ao ngkai ti a manga bure, ao ngkanne a na bon bane ni mauna ara kekeaki . Are nanona ngkanne ba te bai ae ti karaoia ngkai ke n te tai aio boni ngaia ae na karekea nakoira te maiu ke te mate ae akea tokina.
- Details
- Written by Uriam Timiti
Ai kakukureira te rongorongo ae ti anganaki n te bong aio ba taekan te rikia ni baibai ae katauraoia te Uea ibukira- ba kaubain te kamaiuaki ae akea tokina i Karawa. Aio bon te baibai ae aki kona n mka ke ni bua ma bon ara bai n taai nako ke n aki totoki.
Ma e na ti reke iroura aio ngkana ti ongo ana wewete te Atua nakon te rairannano ao ti kaeka ma te nanorinano n nanomaraki n ara bure ao ti oki rikaki nakon te Tama.
Ba iai te bai ae kakawaki riki nakon rongorongon Toromon te Wanawana ao nakon naba taekan Iona n rairi nanoia kain Niniwe. Eng iroun Toromon ao ti noria ba te bai ae kakawaki riki bon te Atua are Ngaia boton te wanawana ma te kamaiu. Ba imuin noran Toromon iroun te uea-n-aine mai maiaki ao e kakoaua raoi makan Atuan Toromon. Irouia kaini Niniwe ake a kamaiauaki ibukina ba a ongo ana wewete Iona nakon te rairannano, ao bon iai te bai ae kakawaki riki nakon Iona ba taekan te kamaiuaki are katauraoia te Atua nakoia kain Ninikiwe ngkana a rairi nanoia.
Ti na riki n raoiroi ngkanne n aiaron te Tama ae raoiroi. Ti na bane n nako ni moi n te koburakenran ae aki kaboaki ao ni karekea naba iai te tebokaki ni kaitiakaki nakon te kamaiuaki ao te mimitong. Aio bon banaan te Atua ni weteira ba ti aonga ni kamaiuaki. E na bon reke iroura te mate ngkana ti aki kaeka te wewete aio ao ti rineia ba ti na tannako mairoun te Uea. Bon ara bai ni kabane te Abanuea ae Karawa, ao e na reke iroura ngkana ti baireia ba e na reke iroura. E na bon reke iroura ngkana ti katotongiia kain Niniwe are a tauraoi n ongo te rongorongo ao n rairi nanoia.
- Details
- Written by Uriam Timiti
Aio ngkai te bai ae tangiria te Atua ba ti na ataia ao ni kakoaua inanon ara tai karemo. Ba ngkana ti kaeka ana wewete te Atua nakoira n tei aio n okirikaki Nakoina ma te rairannano ao te benetenia, ao ngkana ti kaburei maiura ibukin karaoan Nanon te Atua ao ngkanne bon aikai taeka aika E kan anganira ao E tangiria te Atua ba ti na kakoauai n akea te nanououa.
Ba ngkana ti maeka ao ti maiu inanon ana tangira te Uea ao ngkana ti irira Nanona ao ngkanne ti na bon namakina ke n noora te Atua ae na roko ni maeka inanora ao E na tabe n tataraira n arora ni kabane aika ti karaoi. Ao ngkana e norira ba ti bubuti, ao ti ukeria ni koaua ao ti karebwerebwe i mataroan Nanona ao ngkanne E na kawarira Iesu ni kaotia nakoira ao E na anganira baai aika a kai nanorora iai ao e na nurakina iaora te toknaikai ao mani kamaiuira mairouia aiara. Ba ngkana e norira ba ti aki toki ni kakea mani katikui ara onimaki Irouna ao ngkanne E na bon kakairira mani kakaetiira ao E na reireinira arora n tataro ni koaua ao ti na riki ba bannana ao katotongana ni koaua. Ao e na riki Iesu ba te moani bai ae moan te kakawaki iroura.
N aiaron te ataei ae uarereke ae aki kona ni kammarakea ao n tararuaia i bon irouna ae e onimakina n taai nako ana karo ao ngaira naba ti bon riai n anga ara onimaki ma ara kantaninga nakon Iesu ba ti Ngaia ae bane nanona iroura ao E kan anganira baai ni kabane aika ti kainnanoi. N aiaron te tabera ae na mate ngkana e maenako ma te boto ao ai aron naba ane taku ba e kororaoi riki n te raoiroi nakon Iesu ba e na mate.
Tariu ao maneu bon aio ana kantaninga te Atua ibukira inanon tain te karemo aio ba E tangiria ba ti na bainaki Irouna n arora ni kabane n te aro are ti na kataua Iesu ba E na tararuaira ni kainnanora ni kabane ao n onimakina ana berita nakoira are ngkana ti bubuti ao ti ukeria ao ti karebwerebwe n ana mataroa ao E na bon buokira mani kaekaira ao ni kauka te maroa nakoira.
- Details
- Written by Uriam Timiti
Ai kakatekera aron tamaroan ao koro raoin ana akoi ma ana tangira te Atua nakoira ni kabane. Ba e tauraoi n ongo tangitangira ao ni kaekai ara bubuti ni kabane. E kaotia nakoira te Uea ba inanon te karemo aio ao ti riai n teimatoa ni kaota bannana ni koaua inanon ara makuri n tangira ao n nanoanga nakoia tarira ma manera ake a kainnanoa buokaia. Ti uringa aron Iesu ngke e uota ana kaibngaki n te kawario ao te bai ae karaoia nakon Veroinica ngke e kaoa matana are onrake n te bareka ma te maono ao te rara. Ni kaboa muin ana makuri n akoi Veronica ao Iesu e kataua tamnein ubuna ba e na tiku n te kunnikai are kaoaki ubuna iai. Ti bon kauringaki naba ikai ba karaoan taian makuri n nanoanga bon te makuri ae na ringa nanon te Atua ao boni ngaia naba ae na uota nakoira ma ara utu te karaoiroaki ae moan te bati.
N te ewangkerio ao e reireinira Iesu arora n tataro ae na rota nanon Tamana ae te Atua. Bon te tataro ae Tamara are i Karawa. Ti kauringaki n te tataro aio ba ngkana ti butia te Atua kabaran ara bure ao ti riai moa n tauraoi ni kabarai aia bure akana bure nakoira. Are nanona ba kabaran ara bure iroun te Atua e na reke man te makuri ae ti na tauraoi moa ni karaoia are bon kabaran aia bure akana bure nakoira.
Ti riai ni katotonga aron Tamara ae te Atua n tituaraoi ao n atataiaomata are kaotaki n taian taramo are tauraoin te Atua n ongo ao ni kaekai kainnanoia akana tang Nakoina. Bon nanon te Atua ba e na kanakoa nakoira ana taeka ao e na bon aki kona n oki n akea te kamaiu ae tia ni karaoia. Bon Nanon te Atua ba e na roko Iesu ibuakora ba e na anganira te kamaiuaki. Bon Nanon te Atua ba ti na riki ngaira tan onimaki ba taan karokoa ana tangira ao ana nanoanga te Atua nakoia aomata. Bon Nanon te Atua ba ti na riki ngaira ba rabatan ana Tangira ibuakora ae Iesu. E bia riki onimakinan Nanon te Atua aio ba kairara inanon maiura n tataro n kakoaua ae bon tauraoi te Atua n tai nako n ongo tangini banara inanon kainnanora ao ni kaekaira n ara bubuti.