Ana Tangira Te Uea

Inanon babanen te ririki ae nako ae 2009 ao ti a bane ngaira leader ni kabane ao tabeman riki ara koraki man St Padre Pio kurubu ni botaki n tarikin te Kabong ba ti na kaai n nebonebo ba tibutimaean Nei Beia Tiim n okina mai Nutiran.Ti bane ni kamroron ao e moanaki ara tataro iroun Uriam ao ngai I tabe ni kakatauraoa nanou ba tera tibangau ae E na manga anganai Te Uea n te tairiki anne. E a nako te anene ao e moanna n roko te ang teuana irou ao au namakin aio I kona naba n namakina aia namakin tariu ma maneu ake tabeman ba e a moanna n roko te ang ae bon angin te Tamnei ae Raoiroi ae E roko ni kairiri inanon te tai n anene imain are ti na bon nebonebo raoi ni koaua.Ti a bane n reiti baira ao tia takaruaea kainaomatan te Tamnei ae Raoiroi ni karokoa ae a bara nako baira ao ti a bane n takaruea katituaraoakin Iesu ma karabakina. I rangi ni mimi ngke ti a kanakoa te taetae ni ianena ao e bon roko te kamimi nakoiu ba te moan bai ae e riki nakoiu inanon au tai ni baebaeti ao n tang I a bon aki namakini baiu ake a bane ni mwemwe n eti nako karawa. Inanon takaruau n nebonebo ma tariu ma maneu n te tai aio ao I aki namakini baiu ba a mena iaa ngkai; kanga I a riki ba te aomata ae korowawa ni manging ngai ke tera ma I a bon aki kona ni kabarabara au namakin ma I ataia ba I rangi ni maeu n angina. E oota matau n te raneanea ae mainana ao I a nora Uriam ae e mena inanon baokina ba e a mate. I takarua n tang ao I a bon taekina naba te bai ae I noria nakoia tariu ma maneu n tain te nebonebo. Iraua te tekan imuina ao I a nora Uriam n tei ma uoman aomata aika m’ane ma kunikaia te mainaina ao a tabe ni karina te kunikai ae uraroo iaona. Ngke e rin te kunikai anne iaona ao a kairia rake nakon kanga te stage mai moa.

I a bon mamataku ngai inanon kairana anne ao I a noria aomata ae tao nakon ira mirion ake a tatakarua n nebonebo. E waerake Uriam ma aomata ake uoman akekei ao I kina te aomata ae e tei n takini baina imaina ae takamainana ao e bainna n te kamarai ae mainana ma buaina ao moana ae e moa irariki ae e rangi ni botonimane ae bon Iesu are E butimaea Uriam. Ngke e roko raoi Uriam iaon te stage anne ao e bon baka naba n aroka rangan Iesu ao inanon te tai naba anne ao aomata ake ko aki nora tokin am taratara ni maitia  a bane n takarua ao a neboa Iesu. I tatakarua n tang ngai ao titebo ma e bon roko te bai teuana irou ao I aki ataia ba tera ae I a taetaekinna ba maitin au ianena ao ai rikiraken riki itiakin au taratara n te bai are I tamnei iai arei. E kateirakeaki Uriam irouia nakeke uoman akekei ao temanna irouia e nako bukin te baonikarea ao e anaa te kunikai ae e kiirin (green) mai iaon te taibora ae uarereke ma ngke I kanakoa au taratara n rimiin te aomata are e anaa te kunikai arei ao I a manga noria aomata aika a bane ni bai kiirin aika a tekateka ibukin te baonikarea ae I a manga aki naba nora tokin tian au taratara ni maitiia. E butaki te kunikai are e euraroo mai iaon Uriam ao e a manga katokaki are e kiirin ao inanon te tai anne ao I a tabe ni mamataku ao I a rangi ni mimi n au namakin ba I a kona n ataa aia namakin aomata ake aki toka iaon te stage ba kanga e aki rokoraoi kukureia n aron ae e riki nakon Uriam ma aomata ake e toka iaoia te kunikai ae e kiirin ake a tekateka i akuun te baonikarea. I kataia ni kikinaia kain te tekateka akekei ma bon akea au kikina irouia ma I ataia ae kanga I-matang ake I noriia mai moa ao reeti riki tabeua. N au n tai n tara Iesu ao I a titirakinna ba E mena iaa natiu are Barry ma e aki taetae nakoiu ma e katika nanou ni matana nakoia aomata ake a tekateka i akuun te baonikarea arei ma oneaia te kiirin.

Ngke e tia n oneaki Uriam nakon oneana are e boou arei ao a bane n tei baia aomata ni kabane ao a manga nebonebo naba ao man anene ni kimarerei ao e a kairaki naba Uriam irouia naba uake uoman akekei nako ni katekatekaki ibukin te baonikarea irarikia aomata ake kanga tarakia aomata aika a rangin kakannato. E rangin kamimi au taratara ao I taku ba I a bon mena raoi i Karawa n te tai aio ma ngaia are I a kataia n namakina baiu ake I aki kona namakinii akekei ao I a bon kibara naba Uriam ni katoka bau iaona ao e a bon nako au tataro ni ianena ae moan te  bati iaona aika a rangi ni kamimi aron taekinaia ma I namakinna inanou ba titebo ma I bane n atai nanon au ianena ake I atongi n te tai anne. E a tatanako au taratara ao ni karokoa e a toki ma i a tiku ma te tang ae e aki reke arona ba kanga titebo ma I a bon urubekebeke imiun norakin Karawa ao noran te tokanikai iaon te aba ngkana ko a roko raoi iroun Iesu ma Tamana i Karawa.

E toki iteran te nebonebo n ribano ao e a butiai Uriam ba Nna kauka ana Taeka te Uea ma bon te kamimi ngke I kaukia ba e a kaitarai te wareboki ae te Otinako 39, 22-26, are e atunaki n ae kangai: TE KAMARAI AE E UARA-ROO are bon te bai are I a tiba tabe ni miakinna....E a bon manga taonai riki te tang ae korakora ao e aki mwemwe warekana ai ngaia are I a butia Uriam ba e a warekia ibukiu

Tariu ma maneu n ana Tangira te Uea, e rangi ni bubura tibangau ae e reke n te miniburabeti ae E anganai te Uea aio ba bon te tabe teuana irou ae Nna manga reita aron kabutaan te rongorongo ae raoiroi n te bai are I noria aio. Teuana mai buakon tibangau bon ana kakorakora te Uea nakoiu ba Nna boni kakoaua raoi ni koaua ae e bon eti ana taeka Iesu are e kangai nakoira ni kabane " Nna rimoa ni katauraoa ami tabo ni maeka irarikin Tamau."

Au bubuti nakon te Uea ba Nna kabongana raoi maiu ae E a tia anganai aio ba I aonga ni kona ao n reitaki ma au utu ao tariu ma maneu nako ni katonga koraoin te kukurei inanon te mimitong i Rarikina i Karawa. E raba ana tangira te Uea!!

Ian Namakin, St Padre Pio, Suva, 2010