Ma te bai ae riki ba I karaoa moa au nebonebo ao I a bon namakina te ang teuana ae taonai are I bon rangi ni maiu inanona. I a bon tabeka au tataro ni butia te Uea are E bon nori bai ni kabane ma aki taun ara kekeiaki Ibukina ao ngkai I kakoaua ba ti a tia ni keiaki ni karaoa ae Nanona ao I bubuti ba ni Makana Ngaia ae Iesu ae bon te Atua ao E na ringa au flash ni karaoia ba I aonga ni kabongana man anai au bai inanona ake I kainanoi ba kanoan te website.
Ngke I kanima au flash ao akea ba I noria iaon au computer ba e a oti are e a kinaki ao I a kona ni kaukia. Ma ngke I a kaukia ao bon akea naba te bai teuana ae oti iai. Imuina ao I a manga kamaeua teuana te lab top ae I uotia ao I manga kataia naba iai ao bon ti tebo ba e aki uki.
E bon taonai te tang ni bon nanoangai i bon irou ba I ataia ae I kona ni manga koraoi baai ni kabane ake I a tia ni katauraoi ma imoana ma e na bon rawawata ba are I a bon tiba matu n te aoa aua (4am).
E ngae n anne ao I a bon moana moa are I kona ni karaoia. I kanakoi tataro aika uarereke nakon Wayne ao iana I a manga rinanon karakin te charismatic are roko mairouia Neiti ao Kautoa ma mai Tarawa. Ngke a tia ao I manga kanakoi n te emai nakon Wayne.
Imuin anne ao I a bon manga nebonebo ao e a reke au iango ba N nang manga kanimma au flash n au computer n te aobiti are I ataia ba e a bon aki reke arona ao I a manga tataro ni kangai, “Iesu kabarai au bure ni kabane ao anganai ngkai am kakai ba I aonga ni kakoaua ae E boni kukurei Nanom n ara website aio ao n te tai naba aio ao ani kabentaea au flash drive aio.
Ngke I tia n tataro ao I kanima au flash ao I kaukia ao Alleluia...... E raoiroi au flash ao a bane ni kaoti kanoana. E reke raoi aio n 10.31 am. I bon tang man tang man tang ba I ataia ba E a tia n anaganai te Uea ana kanikina ba E kukurei Nanona n ara website.
(inanon korean aika inano ao I a kuri aki kona ni koroboki ba are ai bon te tang ae a taonai ao I a namakina ae I a koroboki inanon te tang ma te nebonebo…)
I kawaekoa Wayne ba e na kawarai n te aobiti ba ti na tataro teutana ba iana ti a nakon ana auti ni kabanea ara katauraoi. Ngke e roko Wayne ao I a kongoa te bai ae riki ao n tuanga ba e bon riai n roko ba e na katonga ana kamimi te Uea ni makana are e a tia ni kaotia n au flash drive. Imain ae ti nebonebo ao I a tuanga Wayne ba N na kabanea moa te bai are I taibina ao iana ti a tataro.
Ngke I taibi ao I a kunea ba ai te tataro are I mena inanona ao aio are I a bon tabe n taibinna n aki iangoia ba tera ae N na tabinna. I a buti naba ngkami ba kam a reitai iai ngkai n tataroakinna:
“Ai rabara ngkoe Iesu ba Ko anganira te kona ni katonga Karawa ikai i aonteaba man ataia ma te aki nanououa ba E bon bane nanom ni mataiakina aron nanora ibukin karokoan Ueam ikai iaon teaba n ara website. Ko na neboaki ao Ko na kamoamoaki ba boni Ngkoe te Atua ae Ko onrake n te tangira ao te nanoanga ma te akoi. Ko noria natim ni charismatic n aia kekeiaki ao Ko kataua ba ti na kona ni katonga am tangira ao n noora ami kamimi n te bong aio.
Ti karabako tinara Nei Maria ngkai ko a tia n raonira ao ti ataia ni koaua ba ngkai ko Uea irarikin Natim i Karawa ao boni ngkoe te tia tei bukira mai karawa. Ko a reita Karawa ma aoteaba n te bong aio; kataua ba ara webiste aio e na reke ba am anga teuana ni kona n rotia natim ni kabane iaonaba. Kawakinira ian am rabuna ni katantan . Ti bon ataia ba ko a tia ni kabeabeania St Mikaere te Akanera, St Padre Pio ao St Isidore of Seville ba a na ibuobuoki ni kakoroi bukin ara kantaninga ibukin neboan Natim ae Iesu. Amen.
E na neboaki te Tama, E na neboaki te Nati, E na neboaki te Tamnei ae Raoiroi ngkai ao n taai nako n airon are mangkoa Amen.
E raba te Uea, ao kam raba tariu ma maneu n ami tataro! Alleluia, Alleluia, Alleluia!”
Uriam Timiti, St. Padre Pio, Suva