Kam na mauri tariu ao maneu n te Kaabong Tabu aio n ana tangira te Uea,

A bati baai aika ti kauringaki iai n te bong ae e rangi n tabu aio. N te moan wareboki ao ti kauringaki aron aia tai ni kamaeuaki natin Iteraera man ana tautaeka Barao i Aikubita. Ti kauringaki kamaeuakia n raraan te tiibu te teei ngke a kabiri bouan aia auti iai ao e tarariaoia nako Ana Anera te Atua man aki tiringi natia mane ake karimoa.

Ma n te kauoua ni wareboki ao ti kauringaki moan katean te Eukari are bon Rabatan ma Raraan Iesu are e riki ni koaua ba kanara n ua matera. Ko raba Iesu n am tangira ae moan te kororaoi. Ko aki kan kitanira ma ko kan tiku irarikira n ua tokin aonnaba. Anganira am karatia ae e tau ibukira ba ti na nora kakawakin kawaran te Eukari ni maeura. Anganira te onimaki ae matoa man nene ba ti na onimakina raoi ae ko bon mena n te Eukari.

Ioane n te evangkerio ao e manga kamatoa riki aron ana tangira Iesu nakoira ngke e tuangira ba e tangirira ni kabane Iesu. E kaboa mwin ana bure te tia kamanea n te tangira man kariaia ba e na mate n te kaibangaki. E karinanoa arona Iesu nakoia ana reirei ngke e teboka waeia man taku ba e ngae ngke bon te Uea ngaia ao te Tia Reirei e bon riai naba ba e na teboki waeia ba e kan anganira te katoto ae tamaroa. E tangirira ba ti na kakaraoa aei nakoia raora ba ti aonga ni kaota aron butimaeaia raora ma karineaia n taai nako. Ba e kangai Iesu 'ngkana ko butimaea teuare I kanakoa ao ko bon butimaeai naba.

Iesu ti kan bubutimaiko nakon maeura ba ko aonga n tangira riroura. Ti kan tangiria raora ni kabane man aki tiatiana aron ara tangira n arom ae ko aki. Ma Iesu, ae ti kan tangiria riki iaon baai ni kabane bon ngkoe.

Katauira Iesu ba ti na rin raoi inanon am Batio are e moanaki n te bong aio. Ti kan iriko ni marakim Iesu n ingabong, te Kanimabong Tabu ike ko nang uota iai am Kaibangaki nakon te Kawario.

Iesu kabarai ara bure ao nanoangaira ba ti aonga ni kamaeuaki n am tangira ae moan te kororaoi. Ti a butiko Iesu.