E riki ba te moanibwai n taai nako iangoana ni katoan utiu nte moaningabong ao man iangoa kawarana imarenan tabeu nau makuri nte tautaeka ni katoabong. Ma e oti ba e aki kona ni koro bukin au iango aei iaan katabeau aika moan te maiti ni moa man mwengau ngke I moan uti are bon katauraoaia moa natiu imain reireia nua ae I a mananga ni kaea au makuri. Ai tii au tai naba ni kaitibo ma Te Eukari bon ti n te tabati koraki ao Kanimabong koraki are e aki toki iai ni kakaotinakoaki iai ibukin te tantani mangaia. Ao aio are tiaki toki ni kakaraoia ba tabera ni katoa Kanimabong ngai ma kain abau.

N reitaki ngkanne ma au ururing rikaaki ni kanoan ara rereua ibukin Bentekota  ae nako are e booaki i Teaoraereke ao bon moan te kakaongora ara moan program iroun Fr Koru n tairikin te Kanimabong (1st day retreat) anne ba te tamnei (movie) n rongorongon kakannaton Te Eukari rinanon te kakai are e riki iroun Julia Kim man te aba ae Korea. E bon nang ringaki nanou nte tamnei aei n ua motina ao man tii ranin matau ni makorona aika bati are e a ringaki iai mani kammarakaki iai Nei Julia riki ni makorona are kabakakia ataei. Ngke e bon moti te tamnei aei ao e a moa naba au titiraki ikanne nakon te tama ba iraman aika kakoaua te tamnei aei ke te documentary aei iaon te aonnaba. E kaeka te tama ao e taku ba aitiba tabeman iaon te aonnaba n ikotaki ma ngaira nte tai aei aika ti a tiba tia n tamnei iai. E bon tuai naba buta te aonnaba n atakin te documentary aei.  E aki rauaki nanou n ana kaeka te tama n ua tokin te bong anne ao I a bon tiku ma mamaran nanou are I a bon aki kan kakoaua te tamnei ke te rongorongo aei kioina ngkai bon iai au onimaki ae I mena inanona ngkai ae babane nanou iai ibukin Kakannaton te Eukari ao e oti ikai ba titebo ma e a nang mangori au onimaki irarikin ana onimaki Nei Julia ao ni koauana raoi titebo ma I a nang riki ba te akea arou imatan Te Uea e nang raroanako au kekeiaki Nakoina ni kabotauaki ma ana kekeiaki Nei Julia i matana. I kabara nanou man te iango aei ao man aki kan manga katabea nanou n te tamnei aei. Ao I a bon tiku n tataroakina au kanganga aei ma au koaua are ti bane ni kakatiteboaki i matan Te Uea man nooran ara kekeiaki  nako ae e bon noori mai nanora.

A maiti documentaries aika I a tia n noorii n aron rongorongon bai aika riki ma a bon koaua. Ma uringnga ba a bon nang maiti rabakau n taai aikai aika kona ni mwamwana te aba man kona ni kairiri iango nakon ae angkoa e a bon nang koaua. Tekatoto teuana man te aekan rongorongo (documentaries) teuana rongorongon te teinaine temanna ae e aki toki n niniaki iroun te anti ma ngke e uarereke n ua ae e a nang ataeinaine ao e a kataaki n anaki koauana irouia taan rabakau rawean ma katikuan taian kaemera aika maeu 24 te aoa maeuna n ana ruu ni matu te teinaine aei ao e a bon oti ana kakai te anti aei e a bon roko ni kakakiriwea te aine aei ma akea rabatana ae eoti ma e a bon tii oti naba mamaingingin baai aika e kakiriwe ao man oti uakinan neiei man ana kainiwene nako downstairs. E nang tara ni koaua raoi te rongorongo aei man aia rongorongo naba taan rabakau aika karekea te rongorongo aei ma ni bon koauana ba e a bon nang ewaa te rabakau ae e riaon naba aia atatai aomata n taai aikai ike a kona naba ni kairira ara iango ba ti na rangi ni kakoauai aia iango ni kabane. Ao I a katikia ngkanne nakon te documentary are rongorongon Julia Kim. Ngke I moan noora te tamnei aei ao ea bon bane naba au iango iaona ba bon moan te kamimi ma ni koaua n aron ana set-up ae karaoaki iai n tamneina.

Bon man mwin te Bentoka anne ao e riki ba marakin birotou kakabeanakiu rawean (copy) te tamnei aei irouia tariu ma maneu n ara charismatic mai Betio ba are I abon aki kan copy te tamnei iaan au kantaninga are I a bon tau n au iango are Nang bon katuka taekan iangoan Julia ma ana kakai nako. Tera au kaeka nakoia tariu ma maneu? I kabarabae nakoia ba angkoa I nang tabetabe ao akea moa te tama ba e nako buuki ao I aki ataia ba ena aoki ningai, Tao ai bon inanon taina ma a naki raraoma ba I a karekea au copy ao I a duplicate ni katoaia. I bon nang kabarabae nakoia ba are kanga bon akea au iango iai.

I a tiku n au kantaninga anne nua e manga bon roko te kamimi teuana ngke ti nebonebo n te auti teuana n tain raoi ana toa Atinibanin Iesu nte kanimabong ao anne are bon kakanoan au program ma kain abau ba ti na bon riai ni kakaitiboo ma te Eukari ngkana ti tia n nebonebo. Bon tian ara nebonebo ao imain okiran mwengara ao ti a manga bon kananau riki nakon umantabun te Kaotitaeka are e kaotinakoaki iai te Eukari, te tai aei e a bon uotaki nakon 12 am nukanibong.  Ngke ti a rin ao ngai e aki naba toki mimiakinan te taetae ni burabeti are I a anganaki n tain te nebonebo ae kangai “Am Kau akanne ni borau”, I bon ngare inanou ba kanga e nang kamanga ana taeka Te Uea nakou ao I aki naba kan kaotinakoa n taina ma ea roko tain te wareboki ao neiere e na bon wareboki e manga batinna nakoiu ba Nna warekia ibukina ngaia are I aki tabara I a wareka atuun te wareboki ao ai taekan “Te mamananga”. E a bon moa naba mai ikanne mimiu n ana tangira Te Uea n ua ae tia roko n te Kaotitaeka. Bon inanon marorora ma Te Eukari ao e a kauringai naba kainabau mwin ana maroro ma Uriam n te email ibukin au rongorongo iaon Te Eukari ngkana iai ba e aonga n rin naba nte issue Emanuera aei. E taku kainabau ba e bon kataetaeai ao ngai I aki bae ni kakauongo ana kakaraki ba I a bon bae ni miiakina te kaoti are e a roko irou nte miniti anne. Te kaoti anne bon neiere I nang aki kan kakoaua tamneina (movie) are Nei Julia Kim, e kaoti ma ni katorobubua n te moan katamarake nakon te baonikarea are e toka iaona Te Eukari. I nooria ni kainano n tang ni maraki ibukin aia bure kain aonnaba ni bane ike e manga onrake naba wiina nte rara ngke e toka i newena te Bane are Rabatan Iesu.

I tabe ni mataku n te kaoti arei ao kainabau e a kumeai ma taekan ana rongorongo Uriam are I a bon aki naba ongo teutana ma I a tii tanrikaki naba nakoina ni kangai, “tara Nei Julia are e katorobubua i matan Te Eukari ma raran wiina “ ane e a manga kainnano naba ni mino ni maraki ngkanne i abana i Korea ibukin ara bure ao aia bure kain aonnaba ni bane. I a kaoka matau nakon ana tabo Julia are e katorobubua iai ao e a bua. I manga tiba uringa are iai ana kakaraki kainabau inanon tain te kaoti arei are e taku ba I aki bae n ongo ao ngaia naba e nang mimi ngke I abon kakaekaeka n taekan Nei Julia. Te bai ae e rangi ni kamimi ma ni kakukurei ba Te Uea E a bon karokoa Nei Julia nakou ba Nna kakoaua ni kabane baike a riki nakoina ao Nna aki karikia ba mamaran nanou ba Nna karekea kaotina aio nakou ba Nna bubuokia ni marakina are ngaia e buobuoka naba iai kabebetean marakin Atinibanin Iesu. Mai ikai ao e a kamatoaki riki iai nanou ma au onimaki n aron kakannaton Te Eukari are e aki toki ni kakaitiboaki iai Nei Julia ni katoa bong e ngae ngke tiaki tain te komunio ao e a bon roroko nikirakina iaon newena irouia Aneran Karawa ni katoa tai are e tataro iai buokaia taan bure iaon te aonnaba ni kabuta.

Bon nte tai anne naba ngke ea tuangai kainabau ana rongorongo Uriam ao e a bon bane naba ni kaekaki te rongorongo anne man kaotin Julia Kim nakou. I aki tabara ngke ti a anga ara katuaraoi ibukin te bai ae riki aei ao I a namakina ae e a bon tare au taeka ae I kona riki n reita iai au katituaraoi nakon au Uea ao I a mimi ngke e a bon otinako naba n otomatiki n nako au Bau n Nanoanga ao are e a manga irai naba kainabau n reita au “Bau n Nanoanga”.

Bon te rongorongo ae raoiroi ae I kunea nte tai naba aei ba Te Uea Ea tia ni kaota nanou man mamarau n tamnein Nei Julia ao ni kangaraoia raoi ma ana toa Atiniban Iesu ba I aonga n reita ana makuri are E a tia ni kareanaki iai ba buokan kabebetean marakin ATINIBANIN IESU man ara bure ao aia bure kain aonnaba ni bane rinanon kakaonimakira nakon Te Eukari. Ao e aoria ngke e aki reke irou te karea n aiaron Nei Julia ma ngaia tabeu ni buokia iai ni kabebetea iai marakin ATINIBANIN IESU bon man ananakin te Bau n Nanoanga ni katoabong tiaki ntii te aoa 3pm ma ntaainako inanon aoa nako. Tariu ma maneu ti na aki mamaninga te Bau n Nanoanga n n anaia ba ngaia bon kawaira naba teuana ni karinea ma mamananoan ao kakawakin Rabatan IESU ae maiu ni koaua n Te Eukari.

Jeny Kautoa, St Faustina, Betio, 2010