E kanakoia ana reirei Iesu ba a na tabeakina kabutan te rongorongo ae e raoiroi are bon rongorognona. Te rongorongo ae e tangiria Iesu ba a na taetaekinna ana reirei bon taekana ae bon Natin te Atua ngaia. Te Atua te Tama are e tangiria aomata ni kabane ba a na ataia man kakoaua. Bon te Atua te Tama naba are ngaia ae e na reireinia aomata aroia n onimaki ao ni kakoaua ba a aonga ni kamaeuaki. E kan tuangia aomata te Atua ba a riai n onimakina natina ae Iesu Kristo ba ngaia angan kamaeuakia. Rinanon Iesu ao e tangiria te Atua te Tama ba ti na kona n roko irouna ngaia ae te Atua te Tama.

Ana taeka naba Iesu nakoia ana reirei ba ngkana iai ake a kakoaua man ongo irouia ma te onimaki ao e na karekea kanuangaia man angania te mwaaka  ni kona ni karaoi kakai. E katereterea ni koaua Iesu ba boni ngaia ae e na anga te mwaaka aio ngaia are e riai n ota raoi iroura ba ti aonga n aki burebureaki n ara tai ni kabongana ana bai n tangira Iesu aikai.

Taan tataro ake a kabonganai karea ni kakai n aron ae e taekinaki: ba kakai n kanakoia taimonio; kakai n katoki aoraki; kakai n kona n taetae n taetae aika a boou ao a bati riki a bon riai ni matata raoi ba te mwaaka aio bon tiaki mai irouia ma bon mai iroun te Atua. E bon raoiroi iroura ngaira aomata ba tin a angan te Atua neboakina n ana tangira ma ana akoi. Aomata nako ake a anganaki te mwaaka aio a bon riai n kateimatoa te onimaki nakon Iesu ba e aonga n reitanako ana makuri rinanoia ibukin kamaeuaia ana botanaomata. Man kamaeuakia ao a na bon kona iai n riki ba taan neboia man kabuta rongorongona ae bon ngaia te Uea ao te Tia Kamaeu.