Aikai ana taeka Iesu nakoia abotoro imain ae kanakoia ba ana babetitoia aomata n aran te Tama, te Nati ao te Tamnei ae Raoiroi. Aikai naba taeka ake a kabarabara raoi oin taben te Ekaretia are na riai ni kinaaki iai, ba karokoan te kamaiuaki ao karikaia aomata nako ba naati iroun te Tama ao tan baibai ma Iesu.
Eng tariu ao maneu, e anganiira ate kamaiuaki te Atua iroun Natina ae Iesu ba te karea ae aki kaboaki. Are nanona ba e bon moan tangirira te Atua ao E kan manga kaoka te aro n natinaki are bua irouia ara moan karo iroun Natina te Rikitemanna ae Iesu n akea boona. E anganiira makan te nakoa ni mitinare Iesu imuin anganakina te maka ao te Tauateka i Karawa ao i aonteaba mairoun te Tama. N aiaron are kanakoaki Iesu iroun te Tama ao E a manga kanakoira naba ba ti na babetioia aomata nako n aran te Tama, te Nati ao te Tamnei ae Raoiroi. Ti riai ni karaoa nakoara ni mitinare ngkanne ma te ongotaeka iroun Iesu ao te nano n tangira ao n tituaroai. N aiaron are ti a tia ni karekea te kamaiuaki n akea boona mairoun te Atua ao ti na riai ni kabuta te kamaiuaki nakoia aomata nako n akea naba boona.
Te bai ae kakawaki inanon karaoan nakoara ni mitinare ba ti na riai n onimakina ana kairiri te Tamnei are Raoiroi are boni Ngaia are rineira ao Ngaia naba are katiteuanaira n te koaua ae ti teuana ae ti na taekinna ao ni karikirakea Rabara Iesu ae te Ekaretia. E riki ngkanne te Ekaretia ba te Takaramnetu are kateimatoa maiun Iesu i buakora ao e karokoa te kamaiuaki nakoia aomata nako.