Ti a bane ni kamauria ao ni kateraoia ara mitinare n Atiniban Iesu n aia toa ae kakawaki are bon ana toa Atiniban Iesu ae moan te Tabu. Ti karaba te Atua n ana baintangira ae moan te kakawaki nakoira ngaira kain Kiribati ae bon Utu ni Mitinare ae Atiniban Iesu. Ti na neboa ara tangira ao ana akoi te Atua nakoira ae e kaotaki iroun Iesu are maraki mani mate iaon te kaibangaki. Inanon te ewangkerio ao ti ongora aron Iesu ngke tine iaon te kaibangaki ba e mate ao iai te tautia are ewara rarikina ao tinako iai te rara ma te ran. E bon tinako te rara ma te ran man buroon Iesu are ewaraki ao e a ranga mai iai te kamaiuaki are ti aki toki ni kakarekea inanon taian takaramentu. Man ikoakin Iesu aio ao e kauka Rabatana ba e na ranga mai iai are boni Ngaia ba ti aonga ni karekea n te aro ae banin te maiu n Atua. Are nanona ba n ukin Rabatan Iesu ao ai akea te bai are na kona n totokoa te ranga ni kamaiu mairoun Iesu nakoira. Ti na bane n neboa te Atua n ana tangira ae kororaoi ibukira are ti a noria ngkai ni buroon Iesu ae niiniraki n te kai ae kateketeke. N te bong naba aio iaon Biti ao e a reitaki kanoan te toa iroun te Tari Robati Tebaiuea are karaoa ana kabanea ni berita inanon te utu ni mitinare ae Atiniban Iesu. N aron otau iroun te Tari Robati ao aio bon te kabanea ni kakawaki ao ni kakannato ni maneka n aia Utu are bon te kaburei maiuia ba a na riki ba mitinare ngaia ibukin Atiniban Iesu ni karokoa tokin maiuia. E boni koaua ba te kabanea n rietata ni kawai are ti kaota iai ara tangira nakon te Atua bon te kaburei maiura ni kababaneira ba ti na tangiria iaoni baai ni kabane. Bon ara katekeraoi nakon te Tari Robati ao ara tataro ba e na kawakinaki ao n anganaki te korakora ba e na kakanimaki inanon nakoana ao muiokoana iroun te Uea ibukin uouotan ana tangira ao ana nanoanaga Atiniban Iesu nakoia aomata nako riki ake a bua man raroanako ma Atinibanna ae mona te Tabu.