Kam na mauri n ana tangira te Uea ngkami tariu ao maneu.

Te bong aio ti kauringa iai ana toa Santa Mareta are manen Rataro ao tarin Maria. Neiei bon ngaia naba are e butimaea Iesu man tangi nakoina ao n tuanga Iesu ba ngke arona ba e waekoa riki ao e na bon ooa manena. E kakoaua naba ae e na bon kona ni kamaeua manena Iesu ba ngke e tuangnga Iesu ae e na bon manga uti manena ao e tuanga Iesu ae e ata taekan te maeu ae e na roko ao e ataia ae e na iai manga te bane n uti iai. Ma e bon kaokoro ma nanon ana karabakau Iesu n te tai are e tuangnga ba e na bon manga uti manena. 

E a bon tia n baireia Iesu ba e na manga angan Rataro te maeu e ngae ngke e taekinna Mareta ba e a tia n mate. Ai ngaia are ngke e roko n te tabo are e mena iai rabatan Rataro ao e nakoina man kateirakea man ruana.

E anganira naba ana taeka Iesu ikai rinanon Mareta ba ngkana ti onimakinna ae Ngaia te ota ao te maeu ao ti na bon anganaki te maeu ae e aki mamate. Ti bia bane n ota n ana taetae Iesu aio ba tiaki nanona ba ti nang aki mamate ma nanona ba e na reke iroura te maeu are maeuia kain Karawa te aba are e a tia n katauraoia ibukia nake a ongo ana taeka ao a kawakinna man taua ao ni maeuakinna naba ba e na riki ba te koraa ae e rikirake man maeureirei.

Ti karabako Iesu ba ko anganira te kaunganano are rinanom n onimakinam ao ti na bon bane n kamaeuaki. Boni ngkoe te manga uti ao te maeu. Unika te onimaki aio inanora ba e na aki kabuaki mai iroura ma e na riki ba raora n taai nako ao naki totoki. Amen