Man te moan tai ao e karika te aomata te Atua man te tano ba katotongana. Ma e bua te aro ni kakananto anne ngke a bure ara moan karo ao a kanakoaki man te baretaiti ae Eten. N onea muin te kimareirei n te baretaiti ao e tiku te aomata ma te aro ni buakaka ao ni mka ao te maiu are tokina bon ti te mate n aki totoki. Te kabuakakaki aio e bon rota te botanaoamata nako iaon te aba. E tiku te aomata inanon te kabuakakaki ao akea riki nnena ae na kantaningaia ba ti aonteaba ao tiaki Karawa. Bon akea, ae bon akea te kantaninga ibukin te kamauiaki ao aiaron ae ngaira te botanaomata ae tangitang n tai nako ibukin kamaiuakina. Akea te tua ae na kaira maiun te aomata nakon te kamauiaki. Ma man ana raoiroina ae akea n aiarona ao E baireia te Atua ba e na manga karokoa te kabouaki nakon aonnaba; te aonnaba ae na noraki iai te kororaoi, ae a tiba rikirake ao e boou ao are kamaunaki mai iai ana tautaeka te bure ao raona are te mate. Inanon te maiu ni kabouaki are e aki kaboaki are ti anganaki n te babetito, ao ti na riki ba karikibai aika bou aika tia ni manga bungiaki kaua.
Ma e na kanga ni koro bukin ana iango te Atua aio? Tiaki ba te kabanea n tamaroa ba e na reke te aine ae te kabanea n itiaki ae te baretenia ba te tia buoka karabataan ao kakoroan Nanon te Atua aio? Ba e na bikoukou te baretenia aio ri-tinanikun tuan te karikibai ao te rabata? N aiaron are e kabonga tanon aontano ni karika te moan Atam te Atua ao E a manga kabongana te tano ae bou ae e itiaki ae bon Nei Maria ni karika te kauoua n Atam are na kaoka te aro n natinaki. Inanon Nei Maria ao e riki n iriko Natin te Atua are na manga kabuoua te aomata ao ni kaoka te maiu n Atua nakoina ae aki totoki n arona are man te moan tai. Nei Maria boni Ngaia ana moan karikibai te Atua ae a tia ni karikaki inanon te itiaki ao n akea naba barekana teutana ba e aonga n reke Aken te Tamnei ae Bou are na kaoka te kamauiaki nako aonteba. E a riki ngkanne Nei Maria ba Ngaia te moani ua inanon te karikibai ae bou. Ti butiko tinara Nei Maria ba ko na riki ba tinara n taai nako ao tei irarikira n ara tai ni mate. Buokia natim ni kabane riki ake a tia ni kitanira ba a na roko irarikim i Karawa. Amen