E taku ana taeka temanna te tia rabakau ba aongkoa bon akea manen bai ni kabane. Ngkana ti makuri korakora iaon te aba ke tao ti aki ao n tokina ti na bane ni kitani ara bai ni kabane. Tera te kabaia ae na karekea te aomata man ana makuri korakora ao man taian tabeaianga ni bai aika bati ao te korakai ian kabuebuen te riringa ni katoa bong? E karekea ba tabena te tabeianga ma te rawawata ao e bon aki kona ni motirawa ana iango ibukini baikai ni kabane aika bon akea manenaia.
E kauringa Bauro n ana reta nakoia I-Korote ba ngkai ti a tia ni kamaiuaki iroun Iesu Kristo ae mangauti ao ti riai ni mataaikini bain karawa ike E teketeka iai Iesu i angatain te Atua. Ti na katurua taran bain eta ao tiaki bain aonteaba ba ngkai ti a tia ni mate mani kawakinaki tamneira inanon Kristo ao ti na bane n uotakirake ma Kristo ngkana E manga kaoti. Ngkai ti a tia n rki ba aomata aika bou ngaira ao ti riai ni kitan arora ngkoa ni bure n te kammaira ma te buakaka, te kaibabaru ao ai te matai. Ti riai ni katokai aomatara aika bou inanon ataakin te Atua ae te tia karikibai ao kakaraoan Nanona. Ba inanon Kristo ao ai bon akea te kaokoroaki ba ti a tia riki n ti teuana ma Ngaia.
N te ewangkerio ao e kamamatataki raoi nakoira ba te maiu ni koaua bon tiaki inanon karekean ao kaikoan kaubain te maiu aio ma bon inanon karaoakin Nanon Teaure E anganganira bai ni kabane inanon maiura. Te bai ae kakawaki iroun te Atua bon ataakin ao kakaraoakin Nanona inanon bai aika E anganira. Ti na bon riki ba taian baba ngaira ngkana ti katotonga te kaubai are kabanea korakorana ni kaikoi kaubain te maiu aio ni kawakinna inanon auti aika bubura ao e taku ba e nang riai n aki manga tabeianga ma e na riai ni kuikurei ba e a tia n karekea te maiu inanon kaubai ake kawakin ao e tikonna n rawa n tibaia nakoia aomata. Eng te bai ae kakawaki tariu ao maneu ba tiaki te maiu ni koaua kaikoan kaubain te aonnaba aio ma te maiu ni koaua bon kaikoan kaubain Karawa n ara makuri n tibatibai bai ake ti karekei nakoia tarira ao manera ao ara karaoakin makuri n tangira nakoia raora. Ti na butia te Atua ba E na anganira te wanawana ni mataiakini bain karawa ao ni katokai aomatara aika bou inanon te raoiroi. E bia anganira naba te karatia ni kona ni karaoi makuri aika raraoi ao ni kabonganai bai aika E anganira ibukin karokoan ana tangira ma ana nanoanga nakoia aomata nako.