Ti teuana te kawai nakon te Atua ae Tamara ke ti teuana kawaira ae ti kona n toua are ti na kona ni kakoaua ba ti kamaiuaki ni koaua iai ba ti irirakin Iesu ma Tinana Nei Maria ni kawaia are a toua ae e onrake n te tangira, te raoi ao te kabaia ae aki babane.
Anne kawaira ae ti bon ataia ni koaua ba e na karokoroia ni kimareirein te Atua i karawa, ma touakin kawai ake tabeua ni kakaea kaubain ao kakukurein te aonnaba aio, ke iririrakin are bon nanora, ti na bon aki kona n roko iai i karawa n tokiia ba ti a kunea ba e a toki naba, are aranna Imatang ba te 'dead end' te toki ae te mate.
Ara rairannano ni koaua bon arora n tanrikaki iaon kawaira are ti toua n te tai teuana ma teuana n oki iaona ni manga okira Iesu ma Tinana ake ti na kuneia ba A tei moa n tataningaira n te tuta ni kawai are ti b'akee nako mai iai. E bong ao e ngaina ao are A bon tataninga naba n te tuta ni kawai arei. Ngkana ko aki tanrikaki ni koaua ba ko rarikiriki ao bon tiaki te rairannano ao e na aki reke Iesu ma Tinana ba ko na bakee nako ao ko bon m'am'anaiko ao ko na bua. E na anaanau kawaim ao Iesu ma Tinana, a nang bon rangi ni kainnano riki n tataningaiko ma te nanokawaki ao te rawawata ngkai ko nang bua n aki manga reke Irouia. Te Atua ae Tamara, e nori bai ni kabane, E nora aron kananoangara n tai ake ti bua iai ao E rangi n korakai nanona n tangiria ba ti na oki ao ngkana ti oki ao ti ataia ba E ti butimaira ana Tangira ma ana Raoi ao tiaki te tiribureaki ao ti taonaki n te rawawata n ara bure ma ti a namakina te kimareirei.
Ti a baina te raira n nano ni koaua ni katoa bong, ni kaoki kawaira n okira rarikin Iesu ao Tinara Nei Maria, man arora nako aika ti bake nako iai, n ara taetae, ara makuri, ara iango ao arora n aki muti imatan Atuara. Ti a butia te Atua ana karatia ba ti na kona n raira nanora ma te nanomaraki man kawaira aika a kairua Imatana,aika a kimototo ke a anaanau, ni katoa bong. Ngkana ti okiria ao ti na manga noria raora aika a toua nako, ao ti na ongo b'anaan Iesu ae kangai, "Nako rimuia," ao ti na nako n buritia ni kaokia ma te korakora n ana kanaanako Iesu.