Iai te karaki teuana are bon taekan temanna te aomata are mate ao e a manga uti. Inanon ana tai ni mate ao e nora rabatara inanon te ru ni mate n te onaoraki ao inanon ana tai n tiku ikekei ao akea ba e a taonaki n te ota teuana are e ataia ba bon mimitongin Iesu ae kawaria. Iai te titiraki ae ongo ae kangai, "Iai te bai ae ko a tia ni karaoia ibukiu inanon maium?" Imuin te ota anne ao akea ba e a nora tamneina n aiaron are mataku n birim ae oti n te video. E nora aron maiuna ma ngke e ataei ni karokoa ae e a ikawai. Inanon ana tai ni mataku ao e kataia ni kakaea tamneina ae karaoa iai te makuri ae raoiroi ibukin te Uea ma bon akea. Ngke e tia ni mataku ao e a bon taonna te nanokawaki, rarawata ao te maaku ba titebo ma e a ata te bai ae nang riki nakoina. Akea riki nnena ba ti te nako moone. E aki tabara ma e a takarua naba ni bubuti nakon te Atua ba e na anganaki riki ana tai n okira aonteaba ba e na kataia ni bita aron karakinan maiuna ni kabatia te tai ibukin karaoan nanon te Atua.
Tariu ao maneu tera tibangam are reke n te karaki aio? Antai ae na motiki taekara ngkana e a toki ara borau iaon te aba? Antai ae ti na bukinna ibukin te motikitaeka ae na reke iroura?
Iai te koaua teuana ae titiku n au iango are maiura aio kanga bon ara tai ni koroi ara karaki bon ibukira are e na tiku inanon roro ma roro. Ao tera te aeka ni karaki ae ti tangiria ba e na tiku i muira ngkana ti a kitana te maiu aio. Tao e na bane n titebo ara kantaninga ba tera aron taekara ma rongorongora are ti tangiria ba e na tiku inanon taian boki ni korokaraki. Ba ti tangiria ba e na iai inanona karakinan taekara ae ti kabanea iai ara tai ibukin karaoan nanon te Atua. Te koaua are ti riai n noria ba e mena te kainikoroboki inanon baira ao boni ngaira aika ti n a korokaraki. Are nanona ba bon ngaira aika ti n a kona ni baireia ba terana ae na rin inanon ara karaki. Te karaki aio a na bane ni kauarerekeaki n riki ba kanga aiaron te CV are na oti iai ara makuri aika raraoi ake a na karinira i Karawa. Tamaroan kanoan ara CV kanga ai bon ara batibooti (passport) n rin i Karawa. Are nanona ngkanne ba boni ngaira aika ti na motiki taekara man aron tein karakinara are ti na koreia i aonteba. Ti na butia te Atua ana karatia ba ti na kona ni koroi ara karaki aika tamaroa man raoiroi ni maiura aio ake a reke ba kawain karekean iroura kororaoin te kukurei inanon te mimitong i Karawa.