Teuana te bai ae kainnaoia te aonaba n te tai aio bon te Raoi. E bon teimatoa te buaka i marenaia aba ao tautaeka are a tia iai ni bua maiua aomata aika bati n ikotaki ma te koraki ake bon akea aia bure. A maiti naba utu ma tanga aika a tia naba n uruaki ao ni maekanako ibukin taian itabarara ma kauntaba aika bati.
E teke nanou n aron ana taeka Iesu imuin mangautina nakoia ana reirei are e kangai,"Te raoi iroumi". Ti kakoaua ae E taekina aio Iesu tiaki ti teuana te tai ma e bon maiti. Ao tao tera bukina ngkai E katuua taekan te raoi nakoira Iesu imuin mangautina? Tao a na bon kakaokoro ara reke ma ngai irou e bon kaotia Iesu nakoira ba te kamaiuaki ni koaua are E anganira tiaki nakon te rabata ma bon nakon te tamnei. E na reke te raoi bon mai nanora ao tiaki mai kiraroa. Ngke a karikaki ara moan karo iroun te Atua ao ti ongora ba E buabua te tano ao iana, ngke E noria ba e a nakoraoi tein te rabata are E buabuaia ao E ukia ni karina te maiu inanona. Are nanona ba te maiu ni koaua bon te aro ni kaiokaki ma maiun te Atua are inanora are ti a tia ni bane n anganaki. Te raoi ngkanne bon te riki ni katiteuanaki ma te maiu n Atua are inanora.
N te taina ao I uringa ae I a tabe ni kan kabarabara ba tera raoi nanon te taeka ae te Raoi. Imuin te tai ae maan ni karaua ni iangoa raoi nanon te taeka aio ao e a reke kabarabaran te raoi irou ba te aro ni maiu are akea iai te tabeianga ke te maku. Baai aika uoua aikai a reke iroura ngkana ti ataia ba ti a tia karaoa te bure ae kaitara ma banaan te Atua i nanora. Ti na bon tiku ma te tabeianga ao te rawawata ngkana ba ti a tia ni karaoa te makuri ae aki eti. E ngae ngke akea ae norira ma e na tiku iroura ataakin karaoan te bure ba kanga te rekenikai are na kabua mairoura te mweraoi ao te rau. Ao teuana riki ba ti na tiotio nako n aiaron Kain ngke e kewe nakon te Atua ibukin tarina are Abera are e tiringa.
Karekean te raoi bon te kona ni kataua maiun te Atua inanora ba e na kairira inanon maiura, ke te riki n teuana n ara makuri ao maiun te Atuan inanora. E anganira te Raoi aio Iesu mai iaon ana kaibangaki inanon rarana ae ranganako ba e na kaitikira ao ni katabuira. Ti karaba te Atua n ana tituaraoi nakoira ngkai e karekea inanon Natina ae Iesu te kona ni katiaki man ara bure ao te kona ni kainamoataki man taian tabeianaga, maaku ao rawawata ake ti taonaki iai ngkana ti karaoa te bure. Ma ti kakoaua ae bon akea rawawatan ara kairua ao ara bure ae kona n riaon ana nanaoanga te Atua. E na reke ngkanne te raoi iroura ngkana ti kairaki ni banan ao maiun te Atua are i nanora. E na reke te raoi ngkana ti kakaraoa nanon te Atua ao ti kararoa mairoura unin te Atua n airon ae ti ongora n te wiki aio n ana kamaraia Iesu nakoia baritaio. Ngkana ti kairua ao ti na waekoa ni manga kaiaoaki ma te Uea inanon te takaramentu ni Benetenia. Ti na butia Nei Maria ae Uean te Raoi ba e na tataro ibukira ba e na teimatoa te raoi n ara utu ao inanora n te aro ba ti aonga ni kona ni katonga Karawa ikai i aonteaba.