Wiki 17 Kaabong.
Warekan ana Boki te Burabeti ae Ieremia. 18: 1-6
Aei te taeka are E atongnga te Uea nakoni Ieremia: “Teirake, ruo ni kawara te tia karao mangko ao N na kaongoko au taeka iai.” Ao I ruo ni kawara te tia karao mangko; ao ngaia e tabe ni makuri are e tabe ni karaoia- ba bon aroaron te riburibu ae a babainna tani karao mangko. Ngkanne e roko irou ana taeka te Uea ae kangai: “Ngkami te utu ae Iteraera, ane e karaoia te tia karao mangko anne, tiaki I kona nab ani karaoia nakoimi? Bon ana taeka te Uea. Bon aron te riburibu i nanoni bain te tia karao mangko, ao ai aromi naba i nanoni baiu, ngkami te utu ae Iteraera.”
Te Taramo 146: 2-6
Kaekana: A kabaia ana aomata Atuani Iakoba.
Tamneiu, neboa te Uea; N na neboa te Uea n tai nako,
N na anenea te Atua n ua mateu. K
Tai onimakinia nati n uea, E aki kona ni kamaiu te aomata ae te tano.
E moti ikena, ao e okira tanona, Ao a mauna nako ana iango. K
E kabaia ane E buokia Atuani Iakoba, Ane onimakina te Uea ae Atuana,
Boni Ngaia ae karika karawa ma aonaba, Ao marawa, ma kanoaia nako. K
Alleluia, alleluia.
A ongo banau au tibu, A kinaai, ao a irirai. Alleluia.
Euangkerio
Warekan ana Euangkerio Mataio..13:47-53
E taetae ni kaikonaki Iesu nakoia ana reirei ni kangai: “Te Abanuea ae karawa, ai aron te karaun ae kabakaki i tari, ao e manei aekaki ika nako, ao ngkana e a on, ao a katikia rake tan akawa; ao a tekateka ni boti akana raoiroi i nanon aia baene, ao a tewenakoi akana buakaka. Ai arona naba n tokin aonaba: a na roko anera ni kaokoroia akana buakaka ma akana raoiroi, ao a na tewenakoia i nanon te ai ae uramaki, i buakon te tang ma te kangenge wi.”
E taku Ieus nakoia: “Kam ota ni baikanne ni kabana?” Ao a kangai: “Ti a ota.” Ao E kangai Iesu nakoia: “Ai ngaia anne: te tia koroboki nako ae reireiaki taekan te Abanuea ae karawa, ao ai aroni mataniwin te auti ae buti man ana kaubai baika bou ma bai ni ikawai.” Ngke a bane ana taetae ni kaikonaki akanne, ao E mananga Iesu ni kitana te tabo arei.
______________________________________________________
Tibatiba: A kamaenakoi konan te karaun ao a kawakini ake a raraoi
Inanon bong aika a nako ao ti a tia n ongora n taian kaikonaki ibukin te Abanuea ae Karawa. E kabotauaki ma te kaubai ae kuneaki n te tawana ke te momoi ae moan te kakawaki ae kuneaki ao e kaboi nako ana bai tia kunea te momi ba e aonga n reke irouna te momi ae moan te kakawaki. N te bong aio ao ti ongora te kaikonaki teuana are kabotaua te Abanuea ae Karawa ma te karaun ae kabaakaki ao imuina e kaerakeaki nako eta ba a na kanakoa konan te karaun ao kaokoroi ika aika raraoi ma aika bubuaka.
N te kaikonaki aio ao e katereaki te bai ae na riki nakoira ni kabane ngkana e a roko tain te motikitaeka are a nang kaokoroaki iai aomata ake a tia ni maiuakina te nanoanga ma te tangira ao te eti ma te riai ao te koraki ake a tia ni maiuakina te bure ma te buakaka ao a tia n aki karaoi makuri aika raoiroi.
Tariu ao maneu tera ami iango n tain te motikitaeka? E nga am tabo ake ko kan mena iai? Ibuakoia aika raoiroi ke ibuakoia aika buakaka? Eng I taku ba e na bon ti tebo nanora ni kabane ba ti kan mena ibuakoia akana raoiroi ba ti aonga n rin te Abanuea ae Karawa. Ba ti tuangaki ikai ba tera ae na riki nakoia akana buakaka ba a na teweakinako nakon te te ai ae urarake are e boo iai te tang ao te kangenge wi.
Inanon maiura aio ao e bon teimatoa ana nanoanga te Atua nakoira ba E kan onikira ba karikibai ngaira aika bou aika kororaoi n te tamaroa ma te raoiroi. Ti riai n riki ba kanga ai aron bai ake a karaoaki man te bokaboka ake a kona ni manga buabuaki nakon ana kantaning te tia karaobai ake a bane tamaroaia. Ba ngkana ti aki roko n ana kantaninga te tia karaobai ao e na bon kona naba ni manga buabuaira ba t i aonga n roko n ana kantainga. Eng, te bai ae kakawaki nakoira ngkanne ba ti riai ni babaina n tai nako te nano ae maraurau ao ni kona n rairi nanora nakon ana kantaninga te Atua are tangira ba ti na riki n kororaoi n te tamaroa ma te raoiroi n ai arona. N te aro anne ao ti na bon bane ni karekea te kaniwanga ae moan te kakawaki are bon te rin n te Abanuea ae Karawa.